Mwana ya mufwidi me vutuka na luzingu

Na kati ya ntangu yina mvula vanda noka dyaka ve na bwala, Yehova zonzaka na Eli: ‘Kwenda na Sarefati. Kuna mufwidi mosi ke pesa nge madya.’ Na bamwelo ya mbanza, Eli talaka mufwidi mosi ya kento ya povre, yandi vanda lokota bankuni. Eli lombaka yandi maza ya kunwa. Ntangu yandi vanda kwenda baka maza, Eli zonzaka na yandi: ‘Mulemvo, natina munu mwa kitini ya dimpa.’ Kasi mufwidi vutulaka yandi: ‘Mu ke ve na dimpa ya kupesa nge. Mu ke kaka na mwa farine na mafuta samu na kusala madya samu na mwana ya munu mpe munu mosi.’ Eli zonzaka na yandi: ‘Yehova pesaka nsilulu ti kana nge sala dimpa samu na munu, farine ya nge mpe mafuta ya nge ke manisa ve tii ntangu mvula ke noka dyaka.’

Na yawu, kento yayi kwendaka na yinzo mpe yidikaka dimpa samu na mbikudi ya Yehova. Kaka mutindu Yehova zonzaka yawu, na kati ya ntangu nyonso yina mvula vanda noka ve, yandi na mwana ya yandi ya bakala vandaka kaka na kima ya kudya. Kitutu ya yandi ya farine mpe ya mafuta vandaka kaka ya kufuluka.

Mambu mosi ya kyadi salamaka. Mwana ya mufwidi yayi bandaka kubeela mpe kufwaka. Kento yango bondilaka Eli samu yandi sadisa yandi. Eli bakaka mwana na maboko ya kento yayi, mpe kwendaka na yandi na yinzo mosi ya fioti na etaje. Yandi tulaka yandi na zulu ya mfulu mpe sambilaka: ‘Yehova, mulemvo vutula mwana yayi na luzingu.’ Nge zaba samu na yinki mambu yina Yehova salaka vandaka mambu ya ngitukulu? Faso beto zaba yawu, ata muntu me vumbukaka na lufwa. Dyaka, mufwidi yayi na mwana ya yandi vandaka ve bantu ya Izraele.

Kasi mwana vutukaka na luzingu mpe yandi bandaka dyaka kupema! Eli zonzaka na kento yayi: ‘Tala! Mwana ya nge ke moyo.’ Kento yango vandaka na kilengi mingi mpe yandi zonzaka na Eli: ‘Nge kele ya tsyeleka muntu ya Nzambi. Mu me zaba yawu samu nge ke na zonzaka kaka mambu yina Yehova ke na lombaka na nge na kuzonza.’