Yehova me filisa Yeremi na kusamuna

Yehova soolaka Yeremi na kuvanda mbikudi samu na bantu ya Yuda. Yandi zonzaka na yandi na kusamuna mpe kukebisa bantu na kubika bamambu ya yimbi yina ba vanda sala. Yeremi zonzaka na Yehova: ‘Kasi Yehova, mu ke kaka mwana ya fioti. Mu zaba ve kuzonza na bantu.’ Yehova vutulaka: ‘Kuvanda ve na boma. Mu ke zonza na nge mambu yina nge ke zonza. Mu ke sadisa nge.’

Yehova zonzaka na Yeremi na kuvukisa bakuluntu, na kumwangisa kitutu na mantwala ya bawu mpe kuzonza: ‘Yeruzalemi ke mwangana kaka mutindu yayi.’ Ntangu Yeremi salaka faso Yehova zonzaka na yandi, bakuluntu dasukaka. Nganga-nzambi na nkumbu ya Pashure, bulaka Yeremi mpe kangaka yandi makulu na kati ya mabaya. Mpimpa nyonso, Yeremi vanda lenda ve kuningana. Pashure basisaka yandi na suka. Yeremi zonzaka: ‘Mu ke lenda dyaka ve mambu yayi. Mu ke bika kusamuna.’ Kasi yandi bikaka kwandi ya tsyeleka kusamuna? Ve. Ntangu Yeremi kanisaka dyaka na yawu, yandi zonzaka: ‘Nsangu ya Yehova ke mutindu tiya na kati ya munu. Mu lenda bika ve kusamuna.’ Yeremi tatamanaka na kukebisa bantu yayi.

Ntangu mfumu ya malu-malu bandaka kuyala na Yuda. Banganga-nzambi mpe bambikudi ya luvunu vanda yiinaka nsangu ya Yeremi. Ba zonzaka na bamfumu ya fioti: ‘Bakala yayi me lunga kufwa.’ Yeremi zonzaka na bawu: ‘Kana beno kufwa munu, beno ke kufwa muntu yina me sala ve mambu. Mu ke na zonzaka mambu ya Yehova, kasi ya munu ve.’ Bamfumu yango zonzaka: ‘Bakala yayi me lunga ve kufwa.’

Yeremi bikaka ve kusamuna, mpe bamfumu yango dasukaka mingi. Ba lombaka na mfumu na kufwa Yeremi. Mfumu zonzaka na bawu ti, ba lenda sala yandi nyonso yina ba me zola. Ba losaka Yeremi na kati ya dibulu ya yinda ya poto-poto. Ba vandaka na kivuvu ti yandi ke kufwa kuna. Yeremi bandaka kudyama na kati ya poto-poto.

Kisadi mosi ya mfumu na nkumbu ya Ebede-meleke zonzaka na mfumu: ‘Bamfumu ya fioti me losa Yeremi na dibulu! Kana beto bika yandi kuna, yandi ke kufwa.’ Mfumu zonzaka na Ebede-meleke na kubaka babakala 30 samu ba basisa Yeremi na dibulu. Beto me fwana kuvanda kwandi ve mutindu Yeremi, yina bikaka ata kima kanga yandi nzila na kusamuna?