Ba me mwangisa Yeruzalemi

Bambala na bambala, bantu ya Yuda bikaka Yehova mpe vanda sambila banzambi ya luvunu. Na kati ya bamvula mingi, Yehova sosaka kusadisa bawu. Yandi filisaka bambikudi samu na kukebisa bawu, kasi ba vanda kuwaka ve. Dyaka, ba vanda sekaka bambikudi. Yinki Yehova salaka samu na kusukisa lusambu ya bawu ya biteki?

Nebukadenezare mfumu ya Babiloni, vanda nunga bwala mosi-mosi. Mbala ya ntete yina yandi nungaka Yeruzalemi, yandi kangaka mfumu Yehoyakini, bamfumu ya fioti, basoda mpe bantu ya bisalu ya maboko. Yandi nataka bawu nyonso na Babiloni. Yandi bakaka mpe bimvwama nyonso yina vandaka na tempelo ya Yehova. Na manima, Nebukadenezare tulaka Zedekiya mfumu na Yuda.

Na kubanda, Zedekiya vanda tumamaka na Nebukadenezare. Kasi babwala yina vandaka pene-pene mpe bambikudi ya luvunu nataka yandi na kubalukila Babiloni. Yeremi kebisaka yandi: ‘Kana nge balukila Babiloni, ba ke kufwa bantu mingi na Yuda, bansatu ya ngolo mpe bimbevo ke vanda.’

Na manima ya kuyala bamvula 8, Zedekiya balukilaka mfumu ya Babiloni. Yandi lombaka na basoda ya Ezipte na kusadisa yandi. Na manima, Nebukadenezare filisaka basoda ya yandi na kunwanisa Yeruzalemi mpe ba tulaka camp ya bawu pene-pene na mbanza. Yeremi zonzaka na Zedekiya: ‘Yehova me zonza ti kana nge pesa nzutu na bantu ya Babiloni, nge na mbanza ke vuuka. Kasi kana nge sala ve yawu, bantu ya Babiloni ke yoka Yeruzalemi mpe ke kanga nge.’ Zedekiya mangaka kupesa bawu nzutu!

Mvula mosi na ndambu na manima, basoda ya Babiloni mwangisaka bibaka ya Yeruzalemi mpe ba tulaka tiya na mbanza. Ba yokaka tempelo, ba kufwaka mpe ba kangaka bantu mingi.

Zedekiya kimaka, kasi bantu ya Babiloni landaka yandi. Ba simbaka yandi pene-pene na Yeriko mpe ba nataka yandi na Nebukadenezare. Mfumu ya Babiloni salaka ti Zedekiya tala mutindu ba ke na kufwaka bana ya yandi ya babakala. Na manima, Nebukadenezare kufwaka yandi meso mpe tulaka yandi na boloko, kisika yina yandi kufwaka. Kasi Yehova pesaka nsilulu na bantu ya Yuda: ‘Na manima ya bamvula 70, mu ke vutula beno na Yeruzalemi.’

Yinki ke kumina bantwenya yina ba kangaka mpe ba nataka na Babiloni? Ba ke vanda ya kukangama na Yehova?