BIBLIOTEK Watchtower NA INTERNET
Watchtower
BIBLIOTEKE NA INTERNET
Kituba
  • BIBLIA
  • MIKANDA MPE BABUKU
  • BALUKUTAKANU
  • lfb kileso 59 p. 142-p. 143 par. 5
  • Bantwenya 4 yina tumamaka na Yehova

Nge lenda kuzwa ve video awa.

Kima mosi me simba ve ntangu nge vanda baka video.

  • Bantwenya 4 yina tumamaka na Yehova
  • Benda bileso na masolo ya Biblia
Benda bileso na masolo ya Biblia
lfb kileso 59 p. 142-p. 143 par. 5
Daniele, Hanania, Mishaele, na Azaria me manga kudya madya ya mfumu

KILESO 59

Bantwenya 4 yina tumamaka na Yehova

Ntangu Nebukadenezare nataka bamfumu ya fioti ya Yuda na Babiloni, yandi tulaka kisadi mosi na nkumbu ya Ashpenaze na zulu ya bawu. Nebukadenezare zonzaka na Ashpenaze na kuzwa bantwenya ya babakala yina ke na mavimpi ya mbote mpe yina ke na mayela mingi na kati ya bawu. Ba ke longa bawu na kati ya bamvula tatu samu ba kuma bisadi ya mfumu na Babiloni. Bantwenya yango zolaka longoka kutanga, kusonika mpe kuzonza Akkadien, ndinga yina ba vanda zonzaka na Babiloni. Ba zolaka kudya mpe madya yina mfumu na bantu ya yinzo ya yandi vanda kudyaka. Na kati ya bantwenya yango, vandaka na Daniele, Hanania, Mishaele, mpe Azaria. Ashpenaze pesaka bawu bankumbu ya malu-malu ya bantu ya Babiloni: Belteshasare, Shadrake, Meshake, mpe Abedenego. Malongi yina ba vanda kuzwa zola nata kwandi bawu na kubika kusadila Yehova?

Bantwenya 4 yayi bakaka mukanu ya kutumama na Yehova. Ba zabaka ti ba zolaka kudya ve madya ya mfumu samu yandi vanda kudyaka madya ya nkaka yina Musiku ya Yehova zonzaka ti ya vandaka mvindu. Na yawu, ba zonzaka na Ashpenaze: ‘Mulemvo kupesa ve beto madya ya mfumu.’ Ashpenaze zonzaka na bawu: ‘Kana beno kudya ve yawu mpe kana mfumu tala beno na nzutu ya kubeela, yandi ke kufwa munu!’

Daniele kuzwaka dikanisi. Yandi zonzaka na bantu yina vanda kengidila bawu: ‘Mulemvo beno pesa beto kaka bandunda mpe maza na kati ya bilumbu 10. Na manima beno fwanisa beto na bantwenya yina ke na kudyaka madya ya mfumu.’ Bakengidi ndimaka.

Na manima ya bilumbu 10, Daniele na bandiku ya yandi tatu vanda talana na mavimpi ya mbote kuluta bantwenya ya nkaka. Yehova sepelaka mingi samu ba tumamaka na yandi. Yandi pesaka mpe Daniele ndwenga ya kubakula bimona-meso mpe bandosi.

Ntangu ba manisaka kulonga bawu, Ashpenaze nataka bawu na Nebukadenezare. Mfumu sololaka na bawu mpe yandi talaka ti Daniele, Hanania, Mishaele, mpe Azaria vandaka na mayela mingi kuluta bana ya nkaka ya babakala. Mfumu soolaka bantwenya 4 yayi na kusala na yinzo ya yandi. Bambala mingi yandi vanda lombaka bawu malongi na bamambu ya mfunu. Yehova salaka ti ba vanda na ndwenga kuluta bantu ya mayela mpe ya maji yina vanda salaka samu na mfumu.

Ata ti ba vandaka na bwala ya bunzenza, ba zimbanaka ve ti ba vandaka bantu ya Yehova. Nge mpe ke bambuka kwandi ntangu nyonso na Yehova, ata ntangu bibuti ya nge ke vanda ve na nge?

“Kubika ve ata fioti muntu kuvweza buntwenya ya nge. Kasi, kuma kifwani samu na bantu ya kukwikama na nzonzolo, na ndyatulu, na luzolo, na kiminu mpe na bunkete.”—1 Timote 4:12

Byuvu: Samu na yinki Daniele na bandiku ya yandi tatu tumamaka na Yehova? Wa’ faso Yehova sadisaka bawu?

Daniele 1:1-21

    Mikanda ya Kituba (2012-2025)
    Basika
    Kota
    • Kituba
    • Kabula
    • Soola yina nge zola
    • Copyright © 2025 Watch Tower Bible and Tract Society of Pennsylvania
    • Misiku samu na kusadila yawu
    • Misiku samu na kubumba yina nge ke na salaka
    • Paramètres de confidentialité
    • JW.ORG
    • Kota
    Kabula