Bisoni na kibaka

Na kati ya bantangu, Belshasare kumaka mfumu ya Babiloni. Kilumbu mosi na mpimpa, yandi salaka feti mpe yandi bokilaka bantu mingi ya mfunu ya bwala. Yandi zonzaka na bisadi ya yandi na kubaka bakopo ya wolo yina mfumu Nebukadenezare bakaka na tempelo ya Yehova. Belshasare na bantu yina yandi bokilaka, kunwaka na bakopo yango mpe ba kembilaka banzambi ya bawu. Na mbala mosi, diboko ya muntu basikaka mpe bandaka kusonika bisoni mosi ya ngitukulu na kibaka ya yinzo yina ba vandaka.

Belshasare kumaka na boma. Yandi bokilaka bantu ya yandi ya maji mpe pesaka bawu nsilulu: ‘Kana muntu lenda kuzonza na munu yinki zola zonza bisoni yayi, mu ke kumisa yandi muntu ya tatu ya kulutila mfunu na bwala ya Babiloni.’ Ba mekaka, kasi ata muntu na kati ya bawu lendaka kuzonza yinki zola zonza bisoni yina. Na manima, mfumu ya kento kotaka mpe zonzaka: ‘Ya ke na bakala mosi na nkumbu ya Daniele yina vanda pesaka na mfumu Nebukadenezare nsasa ya bamambu. Yandi lenda zabisa nge yinki zola zonza bisoni yayi.’

Daniele kotaka na sika ya mfumu. Mfumu zonzaka na yandi: ‘Kana nge lenda kutanga mpe kuzabisa munu yinki zola zonza bisoni yayi, mu ke pesa nge musanga (chaînette) ya wolo, mu ke kumisa nge muntu ya tatu ya kulutila mfunu na Babiloni.’ Daniele zonzaka na yandi: ‘Mu ke ve na nsatu ya makabu ya nge. Kasi, mu ke zabisa nge yinki zola zonza bisoni yayi. Tata ya nge Nebukadenezare vandaka na lunangu mpe Yehova fwisaka yandi nsoni. Nge zaba mambu nyonso yina kuminaka yandi, kasi nge me vweza Yehova na kunwaka vinu na bakopo ya wolo ya tempelo ya Yehova. Ni na yawu Nzambi me sonika bisoni yayi: Mene, Mene, Tekel, mpe Parsin. Bisoni yayi zola zonza ti bantu ya Mede mpe ya Persia ke nunga Babiloni mpe nge ke vanda dyaka ve mfumu.’

Ya vanda talana mutindu ata muntu lenda nunga Babiloni. Mbanza yayi vandaka na bibaka ya yinda mpe na nzadi ya sunda. Kaka na mpimpa yina, bantu ya Mede na ya Persia kwizaka nwanisa Babiloni. Sirusi mfumu ya Persia sobaka nzila ya maza samu basoda ya yandi lenda kuluta mpe kukuma na mantwala ya mwelo ya Babiloni. Ntangu ba kumaka na mantwala ya bamwelo ya vandaka ya kufunguka! Basoda kotaka na kati ya mbanza, nungaka yawu mpe kufwaka mfumu. Na manima Sirusi bandaka kuyala Babiloni.

Na manima ya mvula mosi, Sirusi pesaka nsangu yayi: ‘Yehova me zonza na munu na kutunga dyaka tempelo ya yandi na Yeruzalemi. Muntu nyonso ya dikanda ya yandi yina zola kutula diboko na kisalu yayi lenda kwenda.’ Na yawu, kaka mutindu Yehova pesaka nsilulu, Bazwife mingi vutukaka na Yeruzalemi bamvula 70 na manima ya kumwangana ya Yeruzalemi. Sirusi vutulaka bakopo ya wolo, ya arza mpe bima ya nkaka yina mfumu Nebukadenezare bakaka na tempelo ya Yehova. Nge me tala kwandi mutindu Yehova me sadila Sirusi samu na kusadisa dikanda ya yandi?