Yinti ya nene yina vanda fwanisa kimfumu mosi

Kilumbu mosi na mpimpa, Nebukadenezare salaka ndosi mosi yina pesaka yandi boma. Yandi bokilaka bantu ya yandi ya mayela mpe yufulaka bawu yinki ya zola zonza. Kasi ba lendaka ve kuzonzila yandi yawu. Nsuka-nsuka, mfumu sololaka na Daniele.

Nebukadenezare zonzaka na Daniele: ‘Na ndosi ya munu, mu me tala yinti. Ya kulaka mingi mpe ya kumaka tii na zulu. Bantu nyonso na ntoto vanda tala yawu. Makasa ya yawu vandaka kitoko mpe yinti ya yawu vandaka na bambuma mingi. Bibulu vanda pemaka na yisi ya mpewo ya yawu, mpe bandeke vanda tungaka bayinzo ya bawu na zulu ya yawu. Na manima mbazi mosi katukaka na mazulu. Yandi zonzaka na ndinga ya ngolo: “Beno zenga yinti mpe beno kufwa yawu! Kasi beno bika mwa kitini na myanzi ya yawu na kati-kati ya matiti. Beno kanga yawu na mpanga ya kisengo mpe ya kisengo ya mbwaki. Bika ti kinoko ya mazulu banda na kubolisaka yawu. Bika ti yawu banda na kudyaka matiti yina bibulu ya mfinda ke kudyaka. Yawu ke vwanda kaka mutindu yina bamvula sambwadi, tii na ntangu yina nge ke zaba ti Nzambi ya Kulutila Kuzangama kele Mfumu ya bimfumu ya bantu. Nge ke zaba mpe ti yandi ke pesaka kimfumu na muntu ni muntu yina yandi zola.”’

Yehova lakisaka na Daniele yinki zola zonza ndosi yina. Daniele kuzwaka boma mingi. Yandi zonzaka na mfumu: ‘O mfumu, mu vanda kanisa ti ndosi yayi zolaka lungana na bambeni ya nge, kasi ni nge ya ke na tadilaka. Yinti ya nene yina ba me zenga, ni nge. Nge ke vanda dyaka ve mfumu, mpe nge ke kudya matiti mutindu kibulu ya brusu. Kasi samu mbazi zonzaka ti ba bika kitini ya yawu mpe bamyanzi, nge ke vutuka dyaka na kimfumu ya nge.’

Mvula mosi na manima, ntangu Nebukadenezare vanda tambula na zulu ya yinzo ya yandi, mpe vanda sepela kutala Babiloni, yandi zonzaka: ‘Mbanza yayi ke kitoko mingi mpe ni munu tungaka yawu. Mu ke muntu ya nene!’ Ntangu yandi vanda zonza ntete, ndinga mosi katukaka na mazulu mpe zonzaka: ‘Nebukadenezare! Ntangu yayi nge ke vanda dyaka ve mfumu.’

Kaka na ntangu yina, Nebukadenezare kumaka kilawu mpe yandi kumaka mutindu kibulu. Ba bingisaka yandi mpe yandi kumaka kuzinga na brusu na bibulu. Bansuki ya yandi kumaka yinda mutindu mantsala ya ndeke yina ba ke bokilaka mbemba (aigle), mpe manzaka ya yandi kumaka mutindu ya ndeke.

Na manima ya bamvula 7, bulawu ya yandi manisaka, mpe Yehova tulaka dyaka yandi mutindu mfumu ya Babiloni. Na manima Nebukadenezare zonzaka: ‘Mu me kembila Yehova mfumu ya mazulu. Ntangu yayi mu me zaba ti ni Yehova muntu ke Mfumu. Yandi ke fwisaka nsoni na bantu ya lunangu, mpe yandi lenda pesa kimfumu na muntu ni muntu yandi zola kupesa yawu.’