Kimfumu ya ntangu nyonso

Kilumbu mosi na mpimpa, mfumu Nebukadenezare salaka ndosi mosi ya ngitukulu. Ya kwamisaka yandi mingi mpe pongi kimaka yandi. Yandi bokilaka bantu ya yandi ya maji mpe zonzaka na bawu: ‘Beno zonzila munu yinki zola zonza ndosi ya munu.’ Ba vutulaka: ‘Zonza na beto ndosi yina nge me sala, O mfumu.’ Kasi Nebukadenezare zonzaka na bawu: ‘Ve! Beno zonza na munu ndosi yango, to ve mu ke kufwa beno.’ Ba zonzaka dyaka: ‘Zonza na beto ndosi yina nge me sala, mpe beto ke zonzila nge yinki ya zola zonza.’ Yandi vutulaka: ‘Beno ke na sosaka kuvuna munu. Beno zonza na munu ndosi yina mu me sala!’ Ba vutulaka: ‘Ya kele ve na muntu na zulu ya ntoto yina lenda sala yawu. Mambu yina nge ke na lombaka lenda salama ve.’

Nebukadenezare dasukaka mingi. Na yawu yandi pesaka musiku ya kufwa babakala nyonso ya mayela na bwala. Ya zola zonza ti ba zolaka kufwa mpe Daniele na bandiku ya yandi. Daniele lombaka na mfumu na kupesa yandi mwa ntangu. Na manima, yandi na bandiku ya yandi lombaka lusalusu ya Yehova. Yinki Yehova salaka?

Na kimona-meso, Yehova lakisaka Daniele ndosi ya Nebukadenezare mpe zonzilaka yandi yinki ya zola zonza. Na kilumbu yina landaka, Daniele kwendaka tala kisadi ya mfumu mpe zonzaka: ‘Kufwa ve bantu ya mayela. Mu lenda zonza na mfumu yinki ndosi ya yandi zola zonza.’ Kisadi nataka Daniele na sika ya mfumu. Daniele zonzaka na mfumu: ‘Nzambi me lakisa nge bamambu yina ke salama na bilumbu yina ke kwiza. Na ndosi ya nge, nge me tala kiteki mosi ya nene yina yintu ya yawu vandaka na wolo, ntulu mpe maboko ya yawu vandaka na arza, kivumu mpe ba cuisses ya yawu vandaka na kwivre, makulu ya yawu vandaka ya bisengo, mpe mitambi ya yawu vandaka ya kuvukana na kisengo na ntoto. Na manima, ditadi mosi katukaka na zulu ya mongo mpe kwizaka bula makulu ya kiteki yango. Kiteki mwanganaka, ya kumaka fundu-fundu mpe mupepe nataka yawu. Ditadi yina kumaka mongo ya nene mingi mpe ya fulukaka na ntoto.’

Na manima Daniele zonzaka na mfumu: ‘Ndosi ya nge zola zonza: Kimfumu ya nge ni yintu ya wolo. Arza ke kimfumu yina ke kwiza na manima ya kimfumu ya nge. Na manima, ya ke vanda na kimfumu yina ke mutindu kwivre, yina ke yala na zulu ya ntoto nyonso. Kimfumu yina ke landa, ke vanda ngolo mutindu kisengo. Na nsuka, ya ke vanda na kimfumu ya kukabuka yina kitini mosi ke vanda ngolo mutindu kisengo mpe kitini ya nkaka ke vanda pete-pete mutindu ntoto. Ditadi yina me kuma mongo ni Kimfumu ya Nzambi. Yandi ke mwangisa bimfumu nyonso yayi mpe ke vanda samu na ntangu nyonso.’

Nebukadenezare kubwaka kizizi na ntoto na mantwala ya Daniele. Yandi zonzaka: ‘Nzambi ya nge me lakisa nge ndosi yayi. Ya ke ve na Nzambi mutindu yandi.’ Na kisika ya kufwa Daniele, Nebukadenezare tulaka yandi na zulu ya babakala nyonso ya mayela, mpe mfumu na kizunga ya Babiloni. Nge me tala kwandi faso Yehova pesaka mvutu na lusambu ya Daniele?