Yesu me belusa muntu na kilumbu ya saba

Bafarize vanda yiinaka Yesu mpe vanda sosa mambu yina ke nata bawu na kukanga yandi. Ba zonzaka ti yandi lenda belusa ve bantu na kilumbu ya saba. Kilumbu mosi ya saba, Yesu talaka bakala mosi ya kufwa meso yina vanda lomba mbongo na bala-bala. Yandi zonzaka na bilandi ya yandi: ‘Beno tala wa’ faso ngolo ya Nzambi ke sadisa bakala yayi.’ Yesu vukisaka mante ya yandi na ntoto samu na kusala poto-poto, mpe tulaka yawu na meso ya bakala yina. Yesu zonzaka na yandi: ‘Kwenda sukula meso ya nge na pisine ya Silowe.’ Bakala yango salaka yawu, mpe na manima yandi talaka mbala ya ntete na luzingu ya yandi.

Bantu kamwaka. Ba zonzaka: ‘Yayi ni bakala yina vanda vandaka awa mpe vanda lombaka mbongo, to ya ke kaka muntu yina ke faso mosi na yandi?’ Bakala yango zonzaka: ‘Ya ke ni munu, yina butamaka na meso ya kufwa!’ Bantu yufulaka yandi: ‘Wa’ faso nge me banda kutala?’ Ntangu yandi zonzaka na bawu mambu yina salamaka, ba nataka yandi na sika ya Bafarize.

Yandi zonzaka na Bafarize: ‘Yesu me tula poto-poto na meso ya munu mpe me zonza na munu na kwenda sukula yawu. Mu salaka yawu, mpe meso ya munu fungukaka.’ Bafarize zonzaka: ‘Kana Yesu belusa muntu kilumbu ya saba, ngolo ya yandi me katuka ve na Nzambi.’ Kasi ba ya nkaka zonzaka: ‘Kana ngolo ya yandi me katuka ve na Nzambi, yandi zolaka vanda ve na makoki ya kubelusa.’

Bafarize bokilaka bibuti ya bakala yina mpe yufulaka bawu: ‘Wa’ faso ya me salama ti mwana ya beno banda kutala?’ Bibuti ya yandi vandaka na boma samu Bafarize zonzaka ti muntu nyonso yina ke vanda na kiminu na Yesu ba ke bingisa yandi na sinagoge. Na yawu ba zonzaka: ‘Beto zaba ve. Beno lenda yufula yandi mosi.’ Bafarize yufulaka bakala yango byuvu mingi tii yandi zonzaka: ‘Mu me zonza na beno mambu nyonso yina mu zaba. Samu na yinki beno ke na bikaka ve kuyufula munu byuvu?’ Bafarize dasukaka mpe ba losaka yandi na ngaanda.

Yesu kwendaka na bakala yango mpe yufulaka yandi: ‘Nge ke na kiminu na Masiya?’ Bakala yango vutulaka: ‘Mu zolaka vanda na kiminu na yandi kana mu zaba nani yandi kele.’ Yesu zonzaka: ‘Mu ke Masiya.’ Ya tsyeleka Yesu vandaka na ntima ya mbote. Yandi sukaka ve kaka na kubelusa bakala yayi, kasi yandi sadisaka mpe yandi na kuvanda na kiminu.