Yesu ke na tambulaka na zulu ya maza

Yesu sukaka ve kaka na kubelusa bantu ya bimbevo mpe kuvumbula bantu na lufwa, kasi yandi vandaka mpe na lutumu na zulu ya mupepe na mvula. Na manima ya kusambila na zulu ya mongo, Yesu talaka mupepe ya ngolo na zulu ya Mubu ya Galile. Bantumwa ya yandi vandaka na kati ya bwatu mpe ba vanda nwana na mupepe. Yesu katukaka na mongo mpe bandaka kutambula na zulu ya maza, samu na kukwenda kisika bwatu vandaka. Bantumwa kumaka na boma mingi ntangu ba talaka muntu na kutambula na zulu ya maza. Kasi Yesu zonzaka na bawu: ‘Ya ke munu. Beno kuvanda ve na boma.’

Piere zonzaka: ‘Mfumu, kana ya tsyeleka ya ke nge, zonza na munu na kukwiza kisika yina nge kele.’ Yesu zonzaka na Piere: ‘Kwiza!’ Na yawu, na kati ya mupepe ya ngolo, Piere basikaka na bwatu mpe tambulaka na zulu ya maza samu na kukwenda kisika yina Yesu vandaka. Kasi ntangu yandi kumaka pene-pene na Yesu, yandi talaka mupepe ya ngolo mpe kumaka na boma. Yandi bandaka kudyama. Piere bokilaka na ndinga ya ngolo: ‘Mfumu, vuukisa munu!’ Yesu simbaka yandi na diboko, mpe zonzaka na yandi: ‘Samu na yinki nge me banda kutula ntembe? Wapi kisika ke kiminu ya nge?’

Yesu na Piere vutukaka na bwatu, mpe na mbala mosi, mupepe ya ngolo manisaka. Nge lenda meka kukanisa na yina ya salaka bantumwa? Ba zonzaka: “Ya tsyeleka nge ke Mwana ya Nzambi.”

Yayi vandaka ve mbala ya ntete yina Yesu zunisaka mupepe. Kilumbu ya nkaka, ntangu Yesu na bantumwa vanda kwenda na simu ya nkaka ya mubu. Yesu kwendaka lala na manima ya bwatu. Ntangu yandi vanda lala, mupepe ya ngolo bandaka. Bitembo vanda bula bwatu mpe ya bandaka kufuluka na maza. Bantumwa vumbulaka Yesu, ba vanda bokila yandi na ndinga ya ngolo: ‘Mulongisi, beto ke kufwa! Sadisa beto!’ Yesu vumbukaka mpe zonzaka na mubu: “Bika makelele, vanda swi!” Na mbala mosi mupepe na mubu kumaka swi. Yesu yufulaka na bantumwa ya yandi: ‘Wapi kisika ke kiminu ya beno?’ Ba vanda zonza bawu na bawu: “Muntu yayi ke nani? Ata mupepe mpe mubu ke tumamaka na yandi.” Bantumwa longokaka ti, kana ba tula ntima ya bawu nyonso na Yesu, ba ke vanda ve na boma ya kima ni kima.