Yesu me dikisa bantu mingi

Kaka ntangu fioti tekila mukembo ya Pake ya mvula ya 32 ya N.B., bantumwa katukaka na kisalu ya kusamuna. Ba vandaka ya kulemba. Na yawu, Yesu nataka bawu na Besayida, na bwatu kisika yina ba lenda pema. Kasi ntangu bwatu kumaka pene-pene na ntoto, Yesu talaka bantu mingi yina landaka bawu kuna. Ata ti Yesu vandaka na nsatu ya kuvanda yandi mosi na bantumwa ya yandi, yandi yambaka bantu yayi mbote. Yandi belusaka ba yina vandaka na bimbevo mpe bandaka kulonga bawu. Kilumbu ya muvimba, Yesu longaka bawu Kimfumu ya Nzambi. Ntangu nkokila kumaka, bantumwa kwizaka kisika yina yandi vandaka mpe zonzaka: ‘Bantu yayi lenda vanda na nsatu. Vutula bawu na bayinzo ya bawu samu ba kwenda sosa kima ya kudya.’

Yesu vutulaka: ‘Ba ke ve na nsatu ya kukwenda. Beno pesa bawu kima ya kudya awa.’ Bantumwa yufulaka: ‘Nge zola beto kwenda sumba mampa samu na bawu?’ Filipe, yina vandaka mosi ya bantumwa zonzaka: ‘Ata ti beto ke na mbongo, beto ke lenda ve kusumba mampa yina ke lunga bantu nyonso yayi.’

Yesu yufulaka: ‘Wapi kima ya kudya beto ke na yawu awa?’ Andre zonzaka: ‘Beto ke na mampa 5 na bambisi zole ya fioti. Ya ke lunga ve.’ Yesu zonzaka: ‘Beno natina munu yawu.’ Yesu zonzaka na bantu ba vanda na matiti, ba sala bikunku ya bantu 50 mpe ya bantu 100. Yesu bakaka mampa mpe bambisi, yandi talaka na zulu mpe sambilaka. Na manima yandi pesaka madya na bantumwa, mpe bantumwa kabulaka yawu na bantu. Babakala 5 000, bakento mpe bana kudyaka tii ba yukutaka. Na manima, bantumwa lokotaka madya yina bikanaka samu ata kima beba. Ba fulusaka bitunga 12 na madya! Nge me tala ve ti ya vandaka kimangu mosi ya ngitukulu?

Na yawu, bantu vanda sosa kukumisa Yesu mfumu ya bawu. Kasi Yesu zabaka ti ya vandaka ve ntangu yina Yehova soolaka samu na kutula yandi mfumu. Na yawu, yandi vutulaka bantu yina mpe zonzaka na bantumwa ya yandi na kukwenda na simu ya nkaka ya Mubu ya Galile. Ba kotaka na kati ya bwatu ya bawu, mpe Yesu kwendaka yandi mosi na mongo. Samu na yinki? Samu yandi vandaka na nsatu ya kusambila Tata ya yandi. Ata ti Yesu vandaka na mambu mingi ya kusala, yandi vanda kuzwaka ntangu ya kusambila.