Piere me manga Yesu

Ntangu Yesu vandaka na bantumwa na kati ya yinzo ya fioti na etaje, yandi zonzaka na bawu: ‘Beno nyonso ke bika munu na mpimpa yayi.’ Piere zonzaka: ‘Munu ve! Ata ti bampangi nyonso bika nge, mu ke bika ata fioti ve nge.’ Kasi Yesu zonzaka na Piere: ‘Tekila nsusu kokola, nge ke zonza ti nge zaba ve munu bambala tatu.’

Ntangu basoda nataka Yesu na sika ya Kayife, bantumwa mingi kimaka. Kasi bantumwa zole landaka Yesu na kati-kati ya bantu yina vanda nata yandi. Mosi ya bawu vandaka Piere. Yandi kwendaka tii na ngaanda ya yinzo ya Kayife mpe yandi vandaka pene-pene ya tiya samu na kuyotila yawu. Tiya vanda ngengisa kizizi ya yandi. Ya salaka ti kisadi mosi ya kento tala yandi mpe zonza na yandi: ‘Mu zaba nge! Nge vandaka na Yesu!’

Piere vutulaka: ‘Luvunu ya nge, mu vandaka ve na yandi! Mu zaba ve yinki nge ke na zonzaka!’ Yandi kwendaka pene-pene ya mwelo ya nene. Kasi kisadi mosi ya nkaka ya kento talaka yandi mpe zonzaka na bantu nyonso: ‘Muntu yayi vandaka na Yesu!’ Piere zonzaka: ‘Mu zaba ata fioti ve Yesu!’ Mpe bakala mosi zonzaka na yandi: ‘Nge ke mosi ya bilandi ya yandi! Mu ke na zabaka faso ya nge ya kuzonza, nge ke muntu ya Galile faso Yesu.’ Kasi Piere zengaka ndefi: ‘Mu zaba ve yandi!’

Kaka na ntangu yina, nsusu kokolaka. Na ntama, Piere talaka Yesu balukaka samu na kutala yandi. Yandi bambukaka mambu yina Yesu zonzaka na yandi, yandi basikaka mpe yandi dilaka mingi.

Kaka na ntangu yina, Sanedreni vukanaka na yinzo ya Kayife samu na kusambisa Yesu. Ba bakaka mukanu ya kufwa Yesu, kasi ba vanda sosa mambu yina ke pesa bawu nzila. Na kutala mbote ba vandaka na ata mambu mosi ya kusemba yandi. Na kumanisa, Kayife yufulaka yandi: ‘Nge ke mwana ya Nzambi?’ Yesu zonzaka: ‘Ee.’ Kayife zonzaka: ‘Beto ke dyaka ve na nsatu ya kidimbu ya nkaka. Yandi me vweza Nzambi!’ Bantu nyonso ya Sanedreni zonzaka: ‘Bakala yayi me fwana kufwa.’ Ba bulaka Yesu bambata, ba losilaka yandi mante, ba kangaka yandi bameso, mpe ba vanda bula yandi na kuzonzaka: ‘Kana nge ke mbikudi, zonza nani me bula nge!’

Ntangu suka kumaka, ba kwendaka na Yesu na Sanedreni mpe ba bandaka dyaka kuyufula yandi: ‘Nge ke mwana ya Nzambi?’ Yesu zonzaka: ‘Beno mosi ke na zonzaka ti mu ke mwana ya Nzambi.’ Na manima, ba sambisaka Yesu ti yandi vwezaka Nzambi mpe ba nataka yandi na yinzo ya kimfumu ya Ponse Pilate mfumu mosi ya Roma. Yinki salamaka na manima? Ni yawu beto ke longoka na disolo yina ke landa.