Ba me kanga Yesu

Yesu na bantumwa ya yandi lutaka na dibenga ya Kidroni samu na kukwenda na Mongo ya bayinti ya Olive. Ya vandaka na kati-kati ya mpimpa, mpe ngonda vanda ngenga. Ntangu ba kumaka na bilanga ya Getesemane, Yesu zonzaka na bantumwa: “Beno bikana awa mpe beno vanda ekenge.” Na yawu yandi kwendaka mwa ntama mpe fukamaka. Yandi vandaka na boma mingi, mpe sambilaka Yehova: “Bika ti luzolo ya nge salama.” Na manima, Yehova filisaka mbazi samu na kukindisa Yesu. Ntangu Yesu vutukaka kisika yina bantumwa vandaka, yandi kutanaka bawu ya kulala. Yandi zonzaka na bawu: ‘Beno vumbuka! Yayi ke ve ntangu ya kulala. Ntangu ya kuteka munu na bambeni ya munu me lunga!’

Yuda kwizaka na bantu mingi yina vandaka na bambele mpe bayinti. Yuda zabaka kisika yina Yesu vandaka, samu Yesu vanda kwendaka na bawu kuna. Yandi zonzaka na basoda ti yandi ke lakisa bawu Yesu. Na yawu, yandi kwendaka pene-pene ya Yesu mpe zonzaka: ‘Mbote, Mulongisi,’ mpe yandi pesaka Yesu bizu. Yesu zonzaka na yandi: ‘Yuda, nge me pesa munu bizu samu na kuteka munu?’

Yesu pusanaka kisika yina bantu vandaka mpe yandi yufulaka bawu: “Beno ke na sosaka nani?” Ba zonzaka: “Yesu, muntu ya Nazareti.” Yandi vutulaka: “Ni munu.” Ba vutukaka manima mpe ba kubwaka na ntoto. Yesu yufulaka dyaka bawu: “Beno ke na sosaka nani?” Ba vutulaka dyaka yandi: “Yesu, muntu ya Nazareti.” Yesu zonzaka dyaka na bawu: “Mu me zonza na beno ti ni munu. Na yawu, kana ni munu beno ke na sosaka, beno bika bantu yayi ba kwenda.”

Ntangu Piere talaka mambu yina vanda salama, yandi basisaka mbele mpe zengaka dikutu ya Malakuse, kisadi ya nganga-nzambi ya nene. Kasi Yesu simbaka dikutu yango mpe belusaka yandi. Yesu zonzaka na Piere: ‘Vutula mbele ya nge na kisika ya yawu. Kana nge nwana na mbele, nge ke kufwa mpe na mbele.’ Basoda simbaka Yesu, ba kangaka yandi maboko mpe bantumwa kimaka. Ba nataka Yesu na sika ya Ane, mfumu ya banganga-nzambi. Ane yufulaka Yesu byuvu mpe na manima yandi filisaka yandi na sika ya nganga-nzambi ya nene Kayife. Kasi yinki kuminaka bantumwa?