Madya ya Yesu ya nsuka

Konso mvula, Bazwife vanda salaka mukembo ya Pake na kilumbu ya 14 ya ngonda ya Nisani. Mukembo yango vanda bambulaka bawu ti Yehova basisaka bawu na bungaamba na Ezipte mpe yandi nataka bawu na Ntoto ya Nsilulu. Na mvula 33 ya N.B., Yesu na bantumwa ya yandi salaka mukembo ya Pake na Yeruzalemi. Ba salaka yawu na kati ya yinzo mosi ya fioti na etaje. Ntangu ba manisaka kudya, Yesu zonzaka: ‘Mosi ya beno ke teka munu.’ Ya salaka bantumwa mpasi na kuwa yawu, mpe ba yufulaka Yesu: ‘Nani ke teka nge?’ Yesu zonzaka: ‘Ya ke muntu yina mu ke pesa kitini ya dimpa yayi.’ Yandi pesaka kitini ya dimpa yango na Yuda Iskayote. Na mbala mosi, Yuda telamaka mpe basikaka.

Na manima Yesu sambilaka, yandi zengaka dimpa na bitini, mpe yandi pesaka yawu na bantumwa yina bikanaka. Yandi zonzaka: ‘Beno kudya dimpa yayi. Ya ke na fwanisaka nzutu ya munu, yina mu ke pesa samu na beno.’ Yandi sambilaka dyaka, yandi bakaka vinu mpe yandi pesaka yawu na bantumwa. Yandi zonzaka: ‘Beno kunwa vinu yayi. Ya ke na fwanisaka menga ya munu, yina mu ke pesa samu beno kuzwa mulemvo ya masumu ya beno. Mu me sala beno nsilulu ti beno ke vanda bamfumu na munu na mazulu. Beno sala yawu konso mvula samu na kubambukila munu moyo.’ Ni na yawu bilandi ya Yesu ke vukanaka konso mvula na nkokila ya 14 Nisani. Ba ke bokilaka lukutakanu yayi Madya ya Mfumu.

Na manima ya kudya, bantumwa swanaka samu ba vanda sosa kuzaba nani na kati ya bawu me lutila nene. Kasi Yesu zonzaka na bawu: ‘Muntu ya kulutila nene na kati ya beno ke ni yina ke kanisaka ti yandi ke leki mpe ke ve mfunu.

‘Beno ke bandiku ya munu. Mu ke zonzaka na beno, nyonso yina Tata ya munu zola ti beno zaba. Ntama mingi ve mu ke kwenda na sika ya Tata ya munu na mazulu. Beno ke bikana awa, mpe bantu ke zaba ti beno ke bilandi ya munu na luzolo yina beno ke lakisa beno na beno. Beno me fwana kuzolasana mutindu mu me zola beno.’

Na kumanisa, Yesu salaka lusambu, mpe lombaka na Yehova na kubumba bilandi ya yandi nyonso. Yandi lombaka mpe na Yehova na kusadisa bawu ba sala kintwadi na kizunu. Yandi sambilaka mpe samu nkumbu ya Yehova vanda ya santu. Na manima, Yesu na bantumwa ya yandi, kembilaka Yehova na banzimbu mpe ba basikaka. Ntangu yina ba zolaka kanga Yesu kumaka pene.