Ata kima lenda kanga bawu nzila

Bakala mosi ya makulu ya kufwa vandaka na kifu ya kulombaka mbongo pene-pene ya mwelo ya tempelo. Kilumbu mosi na manima ya midi, yandi talaka Piere na Yoane vanda kwenda na tempelo. Yandi zonzaka na bawu: ‘Mulemvo beno pesa munu mwa kima.’ Piere zonzaka: ‘Mu ke na kima ya kulutila mbongo ya kupesa nge. Na nkumbu ya Yesu, telama mpe tambula!’ Piere sadisaka yandi na kutelama mpe bakala yango bandaka kutambula! Bantu mingi yina talaka kimangu yayi sepelaka mpe mingi ya bawu kumaka bilandi.

Kasi banganga-nzambi mpe Basaduse dasukaka. Ba kangaka bantumwa, ba nataka bawu na Sanedreni, mpe ba yufulaka bawu: ‘Nani me pesa beno makoki ya kubelusa muntu yayi?’ Piere zonzaka: ‘Ni Yesu Kristo yina beno kufwaka, muntu me pesa beto yawu.’ Bamfumu ya mabuundu yayi zonzaka na ndinga ya ngolo: ‘Beno bika kuzonzila Yesu!’ Kasi bantumwa zonzaka: ‘Beto me fwana kuzonzila na nkumbu ya yandi. Beto ke bika ve kusala yawu.’

Ntangu ba bikaka Piere na Yoane, ba kwendaka na sika ya bilandi ya nkaka samu na kuzonza na bawu mambu yina salamaka. Bawu nyonso kintwadi ba sambilaka Yehova: ‘Mulemvo pesa beto bukindi samu beto tatamana na kusala kisalu yina nge pesaka beto.’ Yehova pesaka bawu mpeve ya yandi ya santu, mpe ba tatamanaka na kusamuna mpe kubelusa bantu. Mingi vanda kuma bandimi. Basaduse vandaka na kimbanda mingi. Na yawu, ba kangaka bantumwa mpe tulaka bawu na boloko. Kasi na mpimpa, Yehova filisaka mbazi yina fungulaka bamwelo ya boloko mpe yandi zonzaka na bantumwa: ‘Beno vutuka na tempelo, mpe beno longa bantu.’

Na suka ya kilumbu yina landaka, ba zonzaka na Sanedreni, yina vandaka tribinale ya bamfumu ya mabuundu: ‘Boloko vandaka ya kukangama, kasi bantu yina beno kangaka ke dyaka ve na kati! Ba ke na longaka bantu na tempelo!’ Ba kwendaka kanga dyaka bantumwa mpe ba nataka bawu na mantwala ya Sanedreni. Nganga-nzambi ya nene zonzaka na bawu: ‘Beto niminaka beno na kuzonzila dyaka Yesu!’ Kasi Piere vutulaka: “Beto me fwana kutumama na Nzambi na kisika ya kutumama na bantu.”

Bamfumu ya mabuundu dasukaka mingi. Na yawu, ba vanda sosa kufwa bantumwa. Kasi Mufarize mosi na nkumbu ya Gamaliele telamaka mpe zonzaka: ‘Beto sala keba! Ya lenda vanda ti Nzambi ke na bantu yayi. Beno ke kwandi na nsatu ya kunwana na Nzambi?’ Ba kuwaka yandi. Na manima ya kubula bantumwa bashikoti, ba zonzaka dyaka na bawu na kubika kusamuna, mpe ba bikaka bawu ba kwenda. Kasi nyonso yayi kangaka ve bantumwa nzila. Ba tatamanaka na kusamuna nsangu ya mbote na bukindi nyonso, na tempelo mpe na yinzo na yinzo.