Korneye me kuzwa mpeve ya santu

Na bwala ya Sezarea, vandaka na mfumu mosi ya basoda ya Roma na nkumbu ya Korneye. Yandi vandaka ve Zwife, kasi Bazwife vanda zitisaka yandi. Yandi vanda sadisaka bapovre mpe bantu yina vandaka na nsatu ya kima. Korneye vandaka na kiminu na Yehova mpe yandi vanda sambilaka yandi ntangu nyonso. Kilumbu mosi, mbazi mosi basikilaka Korneye mpe zonzaka na yandi: ‘Nzambi me kuwa balusambu ya nge. Filisa bantu na mbanza ya Zope, kisika yina Piere kele, mpe ba zonza na yandi na kwiza tala nge.’ Na mbala mosi, Korneye filisaka babakala tatu na Zope mpe ba salaka bakilometre pene-pene na 50.

Kaka na ntangu yina, na Zope, Piere kuzwaka kimona-meso. Yandi talaka bibulu yina Bazwife vandaka ve na muswa ya kudya, mpe yandi kuwaka ndinga mosi yina vanda zonza na yandi na kudya yawu. Piere mangaka mpe zonzaka: ‘Nabunu mu kudya kibulu yina ke ve ya kuvedila na luzingu ya munu.’ Na yawu ndinga zonzaka na yandi: ‘Bika kuzonza ti bibulu yayi ke ve ya kuvedila. Nzambi me kumisa yawu ya kuvedila.’ Piere kuwaka dyaka: ‘Bantu tatu ke na mantwala ya mwelo ya nge. Kwenda na bawu.’ Piere kwendaka na mantwala ya mwelo mpe yufulaka babakala yina samu na yinki ba me kwiza kuna. Ba vutulaka: ‘Ni Korneye mfumu ya basoda ya Roma muntu me filisa beto. Yandi ke na bokilaka nge na yinzo ya yandi na Sezarea.’ Piere lombaka na babakala yayi na kulutisa mpimpa na yinzo ya yandi. Na suka, Piere kwendaka na bawu na Sezarea na bampangi ya nkaka ya Zope.

Ntangu Korneye talaka Piere, yandi fukamaka na makulu ya yandi. Kasi Piere zonzaka: ‘Telama! Mu ke kaka muntu mutindu nge. Nzambi me zonza na munu na kukwiza na yinzo ya nge, ata ti Bazwife ke kotaka ve na yinzo ya bantu ya makanda. Ntangu yayi, mulemvo zonzila munu samu na yinki nge me bokila munu.’

Korneye zonzaka na Piere: ‘Bilumbu 4 me luta mu vanda sambila Nzambi, mpe mbazi zonzaka na munu na kufilisa bantu samu ba bokila nge. Mulemvo longa beto mambu ya Yehova.’ Piere zonzaka: ‘Mu me kwiza zaba ti Nzambi ke soolaka ve bizizi. Yandi ke ndimaka muntu nyonso yina me zola kusambila yandi.’ Piere longaka bawu mambu mingi na yina me tadila Yesu. Na manima mpeve ya santu kwizaka na zulu ya Korneye mpe na ba yina vandaka na yandi mpe bawu nyonso kuzwaka mbotokolo.