Mutindu Piere, kubika ve na kusadila Yehova

1. Yinki ya salá Piere na kutala kimangu yina Yesu salá samu ba kuzwa bambisi?

MPIMPA nyonso Piere lobá bambisi, kasi yandi kuzwá ata kima. Na mbala mosi Yesu me zonza na yandi: “Nata bwatu ya nge sika maza kele ndilu mingi, mpe nge na bampangi ya nge, beno losa bampwasa ya beno samu na kuzwa bambisi.” (Luke 5:4) Ata ti yandi vandá na bantembe na kuzwa bambisi, kasi yandi salá mambu yina Yesu zonzá na yandi na kusala. Samu bambisi vandá mingi, bampwasa (filets) bandá kupasuka. Ntangu Piere na ba yina vandá na yandi kwizá tala ti ya vandá kimangu yina Yesu salá, ba “kumaka na boma mingi.” Piere zonzá na ngolo: “Mfumu! Katuka pene-pene ya munu samu ti mu kele musumuki.” (Luke 5:6-9) Piere talá ti yandi vandá kaka muntu ya mpamba yina lungá ve kuvanda na Yesu.

2. Samu na yinki ya ke mfunu na beto na kulongoka kifwani ya Piere?

² Piere vuná ve, yandi vandá “musumuki.” Biblia ke lakisá ti bantangu ya nkaka bamambu yina yandi zonzá, to yina yandi salá, vandá nyongisa yandi. Ya ke kuminá kwandi nge na kuvanda na makanisi faso ya Piere? Ya ke kwandi na kifu mosi ya yimbi yina nge ke na lendá ve kubika? Kana ni faso yina, kulongoka kifwani ya Piere ke pesa nge bukindi. Samu na yinki? Kanisa ntete: Yehova vandá ve na nsatu ya kutula bafoti ya Piere na Biblia. Kasi, yandi tulak’ yawu samu beto benda bileso na yina Piere salaka. (2 Tim. 3:16, 17) Kulongoka na bangolo yina Piere salá samu na kunwana na bifu ya yimbi, ke sadisa beto na kuzaba ti Yehova ke vingilá ve ti beto kuma bantu ya kulunga. Yandi zaba ti beto ke bantu ya masumu. Yandi zola ti beto bika ve kusadila yandi, ata ti beto ke na mwa bifu ya yimbi.

3. Samu na yinki beto zolá bika ve kusala bangolo?

³ Samu na yinki ya ke mbote na beto na kubika ve kusala bangolo? Samu ti, ntangu beto ke biká ve na kusala kima, ya ke bongisá faso ya beto ya kusala yawu. Na kifwani, ntangu muntu ke longoká faso ya kubula guitare, ya lenda baka bamvula mingi. Na kati ya bantangu yango, yandi lenda sala bafoti mingi. Kasi, samu yandi zaba ti yandi ke bongisa faso ya yandi ya kubula guitare, yandi ke bika ve kulongoka kusala yawu. Ata ntangu yandi ke zaba kubula yawu mbote-mbote, yandi lenda sala dyaka mwa bafoti, kasi yandi ke bika ve. Yandi ke sala kaka bangolo samu na kubongisa faso ya yandi ya kubula yawu. Faso mosi mpe, na manima ya kusala bangolo samu na kubika kifu ya yimbi, beto lenda kubwa dyaka na yawu. Na yawu, beto bika ve kusala bangolo samu na kubongisa kimuntu ya beto. Beto nyonso ke zonzá to ke salá bamambu yina ke nyongisá beto. Na yawu, kana beto bika ve, Yehova ke sadisa beto na kukwenda kaka na mantwala. (1 Pi. 5:10) Beto tala kifwani ya Piere, yina biká ve kusala bangolo. Ntima ya kyadi yina Yesu lakisak’ yandi ata ti yandi vandá sala mwa bafoti, lenda kindisa beto na kubika ve kusadila Yehova.

PIERE SALÁ BANGOLO MPE KUZWÁ BAMBOTE

4. Faso beto me tanga yawu na Luke 5:5-10, wapi mutindu ya muntu Piere vandá tala ti yandi vandá, kasi yinki Yesu zonzá na yandi samu na kukindisa yandi?

⁴ Biblia ke lakisá ve samu na yinki Piere zonzá ti yandi ke “musumuki” to na wapi masumu yandi vandá kanisa ntangu yandi zonzak’ yawu. (Tanga Luke 5:5-10.) Kasi ya lenda vanda ti yandi salá bafoti ya nene. Yesu zabá ti Piere vandá na boma. Ya lenda vanda samu ti Piere vandá tala ti yandi vandá ve muntu ya mbote. Kasi Yesu zabá ti Piere lenda bikana ya kukwikama. Na yawu, na ntima ya mbote nyonso, Yesu zonzá na yandi na “kutala boma ve.” Samu Yesu tulá ntima na Piere, ya sadisak’ yandi na kusoba luzingu ya yandi. Piere na Andre biká kisalu ya bawu ya kuloba bambisi. Ba kumá bilandi ya Yesu mpe ba bandá kusamuna na yandi. Ya vandá mukanu mosi ya mbote yina ba baká, mpe ba kuzwá bambote mingi.—Mrk. 1:16-18.

5. Samu yandi biká ve makanisi ya yimbi kanga yandi nzila ya kulanda Yesu, wapi bambote Piere kuzwaka?

⁵ Kuvanda kilandi ya Yesu vandá bweso mosi ya nene samu na Piere. Ya salá ti yandi kuzwa bambote mingi: yandi talá ntangu Yesu belusá bantu yina vandá beela, basisá bampeve ya yimbi mpe vumbulá bantu ya kufwa.b (Mat. 8:14-17; Mrk. 5:37, 41, 42) Yandi talá mpe kimona-meso mosi ya ngitukulu, na kisalu ya Yesu ntangu yandi zolá vanda Mfumu ya Kimfumu ya Nzambi. (Mrk 9:1-8; 2 Pi. 1:16-18) Piere zimbaná ata fioti ve bamambu yina yandi talaka. Yandi zolá tala ve yawu, kana yandi landá ve Yesu. Beto lenda zonza ti Piere vandá na kilengi na kubika ve makanisi ya yimbi kanga yandi nzila ya kuzwa bambote yayi.

6. Piere biká kwandi bifu ya yandi ya yimbi na mbangu? Zonzila yawu.

⁶ Ata Piere talá to kuwá bamambu yina Yesu salá, yandi vandá nwana kaka na bifu ya yandi ya yimbi. Beto tala mwa bifwani. Ntangu Yesu zonzá wa’ faso yandi zolá tala mpasi mpe kufwa, mpe ti ya vandá kulungana ya mbikudulu mosi ya Biblia, Piere bandá kusemba Yesu. (Mrk. 8:31-33) Bambala mingi, Piere na bantumwa ya nkaka vandá swana samu na kuzaba nani me lutila mfunu na kati ya bawu. (Mrk. 9:33, 34) Na nkokila tekila lufwa ya Yesu, na mbangu nyonso, Piere baká mbele ya yandi mpe zengá dikutu ya bakala mosi. (Yoa. 18:10) Kaka na nkokila yina, samu yandi vandá na boma, bambala tatu, Piere mangá ti yandi zabá ve Yesu, ndiku ya yandi. (Mrk. 14:66-72) Ya natak’ yandi na kudila mingi.—Mat. 26:75.

7. Na manima ya kuvumbuka ya Yesu na lufwa wapi bweso Piere kuzwaka?

⁷ Ata ti Piere vandá ya kulemba, Yesu biká ve yandi. Na manima ya kuvumbuka na lufwa, Yesu pesá dyaka Piere bweso ya kulakisa ti yandi ke zolá Yesu. Na yawu, yandi bokilak’ yandi na kusala mutindu muvungi samu na mameme ya yandi. (Yoa. 21:15-17) Piere ndimá kisalu yango. Yandi vandá na Yeruzalemi kilumbu ya Pantekote mpe yandi vandá na kati ya bantu ya ntete yina ba tulá mpeve ya santu.

8. Wapi foti ya nene Piere salá na Antioshe?

⁸ Ata ti na manima, Piere kumá mosi ya bantu yina ke yala na Yesu, yandi vandá nwana kaka na bifu ya yimbi. Na mvula 36 N.B., yandi vandá ntangu Korneye yina vandá ve zwife kuzwá mpeve ya santu. Ya vandá lakisa pwelele ti “Nzambi ke talaka bantu nyonso mutindu mosi” mpe ba yina vandá ve bazwife vandá na bweso ya kuvanda na kimvuka ya bakristo. (Bis. 10:34, 44, 45) Na manima, Piere bandá kudya na ba yina vandá ve bazwife. Na ntama yandi zolá sala ve yawu. (Gal. 2:12) Kasi, bakristo ya nkaka yina vandá bazwife vandá kanisa ti bazwife na ba yina vandá ve bazwife me lunga ve kudya kintwadi. Mpe ntangu ba yina vandá kanisa mutindu yina kwizá na Antioshe, Piere talá bawu, mpe samu yandi vandá na boma ya bawu, yandi biká kudya na bampangi yina vandá ve bazwife. Ntumwa Polo talá yina Piere salá, mpe sembak’ yandi na mantwala ya bantu nyonso. (Gal. 2:13, 14) Ata ti yandi salá foti yayi, Piere biká ve kusala bangolo. Kasi, yinki sadisak’ yandi?

YINKI SADISÁ PIERE NA KUBIKA VE KUSADILA YEHOVA?

9. Wa’ faso Yoane 6:68, 69 ke na lakisá ti Piere vandá ya kukwikama?

⁹ Piere vandá ya kukwikama. Yandi biká ata kima kanga yandi nzila ya kulanda Yesu. Kilumbu mosi, ntangu Yesu zonzá mambu mosi yina bilandi ya yandi vandá lenda ve kubakula, Piere lakisá kukwikama ya yandi. (Tanga Yoane 6:68, 69.) Bantu mingi biká kulanda Yesu. Kasi Piere ve. Ata ti yandi zabá ve mbote-mbote yina Yesu vandá sosa kuzonza, yandi vingilá ve samu na kuzonza ti Yesu vandá na “mambu yina ke pesaka luzingu ya seko.” Ya ke na lakisá ti yandi vandá ya kukwikama.

10. Wa’ faso Yesu lakisá ti yandi vandá tula ntima na Piere? (Tala mpe kizizi.)

¹⁰ Yesu biká ve Piere. Na nkokila ya nsuka yina yandi lutisá awa na ntoto, Yesu zabá ti Piere na bantumwa ya nkaka zolá bika yandi. Ata faso yina, Yesu vandá lakisa ti yandi vandá tula ntima na Piere, ntangu yandi zonzá na Piere ti yandi ke vutuka mpe ke bikana kaka ya kukangama na yandi. (Luke 22:31, 32) Yesu zabá ti “ntima ya muntu kele ya kufuluka na nsatu ya kusala mambu ya mbote, kasi nzutu kele ya kulemba.” (Mrk. 14:38) Na yawu, ntangu Piere mangá ti yandi zabá ve Yesu, Yesu biká ve yandi. Na manima ya kuvumbuka na lufwa, Yesu talaná na Piere. Ya lenda vanda ti Yesu salak’ yawu ntangu Piere vandá yandi mosi. (Mrk. 16:7; Luke 24:34; 1 Ko. 15:5) Kanisa na ngolo yina ya pesá Piere, yina vandá ya kulemba.

11. Wa’ faso Yesu lakisá na Piere ti yandi vandá na nsatu ya kusadisa yandi?

¹¹ Yesu zonzá na Piere ti Yehova ke kipe yandi. Ntangu yandi vumbuká na lufwa, Yesu salá kimangu samu na kusadisa Piere na bantumwa ya nkaka na kuzwa bambisi. (Yoa. 21:4-6) Kimangu yayi kwizá lakisa na Piere ti ya ke ve mpasi na Yehova na kupesa yandi bima yina yandi vandá na yawu nsatu. Ya lenda vanda ti ya bambulak’ yandi moyo ntangu Yesu zonzá ti Yehova lenda pesa ba yina ke “sosa ntete Kimfumu” bima yina ba ke na yawu nsatu. (Mat. 6:33) Nyonso yayi sadisá Piere na kutula kisalu ya kusamuna na kisika ya ntete, kasi ve kisalu ya yandi ya kuloba bambisi. Na kilumbu ya Pantekote ya mvula 33 N.B., na bukindi nyonso, Piere samuná mpe sadisá bantu pene-pene na 3 000 na kundima nsangu ya mbote. (Bis. 2:14, 37-41) Na manima, yandi sadisá bantu ya Samaria mpe ba yina vandá ve bazwife na kulongoka kuzaba mpe kulanda Kristo. (Bis. 8:14-17; 10:44-48) Yehova sadilá mpe yandi na kunata bantu ya mutindu na mutindu na kimvuka.

YINKI YA KE NA LONGÁ BETO?

12. Kana beto me sala bangolo na kubika kifu mosi ya yimbi, kasi beto ke na lendá ve kubika yawu, wa’ faso kifwani ya Piere lenda sadisa beto?

¹² Yehova lenda sadisa beto na kubika ve kusadila yandi. Ya lenda talana mpasi, ntangu beto ke salá bangolo na kubika kifu ya yimbi banda ntama. Ntangu ya nkaka, bifu ya beto ya yimbi lenda vanda mpasi mingi kuluta yina vandá na Piere. Kasi Yehova lenda pesa beto ngolo ya kunwana na yawu. (Nku. 94:17-19) Na kifwani, mpangi mosi ya bakala vandá vukisa nzutu na babakala na kati ya bamvula mingi tekila yandi zaba matsyeleka. Na manima, yandi sobá luzingu ya yandi mpe bandá kusala yina Biblia ke longaka. Kasi bantangu ya nkaka, yandi vandá nwana na bansatu ya yimbi yango. Yinki sadisak’ yandi na kubika ve? Yandi me zonza: “Yehova me pesa munu ngolo. Na mpeve ya santu ya Yehova, mu me longoka ti mu lenda bika ve kulanda nzila yina yandi me lakisa munu. Ata ti mu ke salá mwa bafoti, Yehova ke pesá munu ngolo ntangu nyonso.”

13. Faso ke na lakisak’ yawu Bisalu 4:13, 29, 31, wa’ faso beto lenda landa kifwani ya Piere? (Tala mpe kizizi.)

¹³ Kaka faso beto me tala yawu, Piere salá bafoti ya nkaka ya nene samu ti yandi vandá na boma ya bantu. Kasi, ntangu yandi vandá sambilá samu na kuzwa ngolo, yandi vandá lenda kusala bamambu na bukindi nyonso. (Tanga Bisalu 4:13, 29, 31.) Beto mpe, beto lenda nwana na boma. Beto tala yinki kuminá mpangi Horst. Ntangu yandi vandá ntete ntwenya, yandi vandá zinga na Allemagne, na ntangu ya Hitler. Na ntangu yina, bantu mingi vandá pesa mbote na faso yina vandá na nsatu ya kuzonza: “Hitler ke vuukisa beto.” Ata ti Horst zabá ti kuzonza yawu ke yimbi, kasi boma ya milongisi mpe bampangi ya yandi ya kalasi, natak’ yandi na kuzonza yawu bantangu ya nkaka. Bibuti ya yandi ngalá ve yandi. Ba sambilá Yehova na kupesa yandi bukindi. Na lubakusu ya bibuti ya yandi, mpe samu yandi vandá tula ntima na Yehova, yandi kuzwá ngolo ya kubwa dyaka ve na mutambu yango. Yandi zonzá na manima: “Yehova biká munu ata fioti ve.”c

14. Wa’ faso mivungi yina ke zolá beto ke pesá bukindi na ba yina ke ya kulemba?

¹⁴ Yehova na Yesu ke bika beto ve. Na manima ya kumanga Yesu, Piere zolá baka mukanu mosi ya mfunu. Yandi zolá vanda kaka kilandi ya Yesu to zolá bika kulanda yandi? Yesu sambilá Yehova samu kiminu ya Piere lemba ve. Yesu zonzá na Piere ti yandi sambilá samu na yandi mpe ti ni yandi ke pesa bampangi ya nkaka ngolo. (Luke 22:31, 32) Ntangu Piere vandá kanisa na yina Yesu zonzilak’ yandi, ya vandá pesa yandi ngolo. Ntangu beto ke vandá na mikanu ya mfunu ya kubaka, Yehova lenda sadila mivungi yina ke zolá beto samu na kupesa beto yina beto ke na yawu nsatu samu na kubikana ya kukangama na yandi. (Ef. 4:8, 11) Paul yina ke kuluntu banda bamvula, ke sosá kupesa bukindi na bampangi. Yandi ke lombá na ba yina nyonso ke na nsatu ya kubika Yehova, na kukanisa na faso yina Yehova bendá bawu na kimvuka. Yandi ke zonzá na bawu ti samu Yehova ke na luzolo ya kukwikama, yandi ke ve na nsatu ya kubika bawu. Paul me bwela: “Na lubakusu ya Yehova, bampangi mingi yina vandá ntete ya kulemba ke biká ve kusadila yandi.”

15. Wa’ faso kifwani ya Piere mpe ya mpangi Horst ke na lakisá ti mambu yina ke na Matayi 6:33 ke ya tsyeleka?

¹⁵ Mutindu yandi pesak’ yawu na Piere mpe bantumwa ya nkaka, Yehova ke pesa beto madya mpe bima ya nkaka yina beto ke na yawu nsatu, kana beto tula kisalu ya kusamuna na kisika ya ntete na luzingu ya beto. (Mat. 6:33) Na kati ya Mvita ya nene ya zole, mpangi Horst yina beto me zonzila ntete, bandá kisalu ya mupasuli-nzila. Yandi vandá ve na mbongo, ata samu na kusumba bima ya fioti. Mpe, yandi vandá na bantembe kana yandi lendá kuzwa mwa mbongo yina ke sadisa yandi na kubika ve kisalu ya yandi ya mupasuli-nzila. Yinki yandi salaka? Yandi baká mukanu ya kumeka Yehova mpe kutala kana Yehova ke pesa yandi yina yandi vandá na yawu nsatu. Na yawu, ntangu ntwadisi ya circonscription lutá na kimvuka ya bawu, yandi baká mukanu ya kusamuna lumingu nyonso yina. Na nsuka ya lumingu, ya kamwisak’ yandi, ntangu ntwadisi ya circonscription pesak’ yandi enveloppe yina vandá na mbongo na kati. Kasi yandi zonzá ve na mpangi Horst nani pesak’ yandi mbongo yango. Mbongo yango vandá ya kulunga samu yandi bika ve kisalu ya mupasuli-nzila na kati ya bamvula mingi. Mpangi Horst talá ti dikabu yango katuká na Yehova. Na luzingu ya yandi nyonso, yandi tulá Kimfumu ya Nzambi na kisika ya ntete.—Mal. 3:10.

16. Samu na yinki ya ke vanda mbote na beto na kulongoka kifwani ya Piere mpe mikanda yina yandi sonikaka?

¹⁶ Ntangu Piere zonzá na Yesu: “Mfumu ! katuka pene-pene ya munu,” Yesu salá ve yawu. Kanisa na kilengi yina Piere kuzwá samu Yesu biká ve yandi. Yesu biká ve kupesa Piere malongi samu yandi vanda ya kukangama na yandi mpe samu yandi lakisa kifwani ya mbote na bakristo ya nkaka. Beto lenda benda bileso mingi ya mbote na malongi yina Yesu pesak’ yandi. Piere kabulá bileso yango, mpe tulak’ yawu na mikanda zole yina yandi soniká mpe filisá na bimvuka ya bakristo ya ntete. Mpe bubu yayi, ya ke na kati ya Biblia. Na disolo yina ke landa, beto ke tala mwa bamambu yina ke na mikanda yango mpe yinki ya ke na longá beto.