DISOLO YA KULONGOKA 10
NZIMBU 31 Tambula na Nzambi
Landa faso ya kukanisa ya Yehova na Yesu
“[Kristo] talaka mpasi na nzutu ya yandi. Beno mpe, beno vwanda na kibakala na dibanza yayi.”—1 PI. 4:1.
NA BUNKUFI
Beto ke tala mutindu ntumwa Piere longokaka faso ya kukanisa ya Yesu mpe mutindu beto mpe lenda sala yawu.
1-2. Yinki zola zonza kuzola Yehova, mpe wa’ faso Yesu lakisaka yawu?
YESU lakisaka wapi yina ke mambu ya kulutila mfunu na musiku ya Nzambi ntangu yandi zonzaka: “Nge fwana kuzola Yehova Nzambi ya nge na ntima ya nge nyonso, na mwela ya nge nyonso, na ngolo ya nge nyonso mpe na makanisi ya nge nyonso.” (Luke 10:27) Na yawu, beto ke zolaka Yehova na kimuntu ya beto nyonso mpe na nyonso yina beto ke na yawu, ya vanda bansatu ya beto to ngolo ya beto. Na kati ya luzolo yayi, ya ke mpe na faso ya beto ya kukanisa. Ya tsyeleka, beto lenda bakula ve na faso ya kulunga faso ya kukanisa ya Yehova. Kasi, kana beto longoka “dikanisi ya Kristo,” beto ke bakula mbote dikanisi ya Nzambi. Samu ti Yesu landaka na mutindu ya kulunga faso ya kukanisa ya Yehova.—1 Kor. 2:16.
2 Yesu zolaka Yehova na makanisi ya yandi nyonso. Yandi zabaka wapi yina vandaka luzolo ya Yehova samu na yandi mpe salaka nyonso samu na kusadila yawu. Ata ti yandi zabaka ti ya zola natina yandi bampasi. Yandi tulaka makanisi ya yandi nyonso na kusala luzolo ya Tata ya yandi. Yandi bikaka ata kima kanga yandi nzila na kulungisa yawu.
3. Yinki ntumwa Piere longoka na Yesu mpe na yinki yandi kindisaka bakristo na kusala? (1 Piere 4:1)
3 Piere na bantumwa ya nkaka vandaka na bweso na kulutisa ntangu na Yesu mpe kulongoka faso ya yandi na kukanisa. Ntangu Piere sonika mukanda ya yandi ya ntete, yandi kindisaka bakristo na kuvanda na dikanisi ya Kristo.a 1 Piere 4:1 ke zonzaka: “[Kristo] talaka mpasi na nzutu ya yandi. Beno mpe, beno vwanda na kibakala na dibanza yayi: Muntu yina ke na kutala mpasi na nzutu, ke na kusala dyaka ve masumu.” Na ndinga ya Greke nzonzolo “kuvwanda na kibakala” ke lakisaka basoda yina me bongama mbote-mbote na binwanunu samu na mvita. Na yawu, kana bakristo longoka kukanisa mutindu Yesu, ba ke vanda na nyonso yina ba ke na yawu nsatu samu na kunwana na bansatu ya yimbi mpe yinza yayi yina ke na lutumu ya Satana.—2 Kor. 10:3-5; Efe. 6:12.
4. Yinki beto ke longoka na disolo yayi?
4 Beto ke zonzila faso ya kukanisa ya Yesu mpe ke tala mutindu beto lenda landa yawu. Na yawu, beto zonzila yina beto me bonga kusala samu na 1) kulanda faso ya kukanisa ya Yehova, yina ke sadisa beto nyonso na kuvanda na dikanisi mosi, 2) kuvanda ya kukuluka, mpe 3) kuzinga na mutindu me fwanana na kutulaka ntima na Yehova na nzila ya lusambu.
LANDA FASO YA KUKANISA YA YEHOVA
5. Na wapi mambu Piere vandaka ve na dikanisi mosi na Yehova?
5 Beto zonzila mambu mosi yina lakisaka ti Piere vandaka ve na dikanisi mosi na Yehova. Yesu zonzaka na bantumwa ya yandi ti yandi me fwana kukwenda na Yeruzalemi. Kuna ba ke pesa yandi na maboko ya bamfumu ya mabuundu samu na kutalisa yandi mpasi mpe kufwa yandi. (Mat. 16:21) Ya lenda vanda ti ya vandaka mpasi na Piere na kundima ti Yehova ke bika Yesu yina kele kivuvu ya Izraele mpe Masiya yina ba vandaka vingila kufwa. (Mat. 16:16) Na yawu, yandi nataka Yesu na lweka mpe zonzaka: “Mfumu, kuzonza ve mambu ya mutindu yayi. Ya ke kumina ve nge ata fioti.” (Mat. 16:22) Yesu ndimaka ve dikanisi ya Piere, samu Piere vanda kanisa ve mutindu ya Yehova.
6. Wa’ faso Yesu lakisaka ti yandi vanda kanisa kaka mutindu Yehova?
6 Yesu kanisaka kaka mutindu Tata ya yandi ya mazulu. Yandi zonzaka na Piere: “Luta na manima ya munu, Satana! Nge ke kima yina ke na budisaka munu dibaku, samu ti makanisi ya nge ke ve makanisi ya Nzambi, kasi ya bantu.” (Mat. 16:23) Ya lenda vanda ti Piere vandaka na makanisi ya mbote. Kasi, Yesu ndimaka ve malongi ya yandi. Beto lenda benda kileso samu na yawu. Yesu zabaka ti yandi zola sala bangolo ya yandi nyonso samu na kulungisa luzolo ya Yehova. Mambu yayi sadisaka Piere na kulongoka kileso mosi ya mfunu na yina me tadila kukwelisa faso ya yandi ya kukanisa na ya Nzambi.
7. Wa’ faso Piere kwelisaka faso ya yandi ya kukanisa na ya Yehova? (Tala kizizi.)
7 Na mantwala, Piere sosaka kukwelisa faso ya yandi ya kukanisa na ya Yehova. Ya vandaka ntangu Yehova pesaka bweso na bantu ya makanda na kukota na dikanda ya yandi. Luzolo ya Yehova vandaka ti Piere samuna Korneye yina vandaka mosi na kati ya bantu ya ntete ya makanda na kukuma mukristo. Bazwife vanda wisanaka ve na bantu ya makanda. Na yawu, Piere zola sala bansobolo na faso ya yandi ya kukanisa samu na kubongama na kusamuna bantu ya makanda. Ntangu yandi bakula luzolo ya Nzambi na mambu yango, yandi sobaka faso ya yandi ya kukanisa. Na yawu, ntangu Korneye bokilaka Piere na yinzo ya yandi, yandi “mangaka ata fioti ve.” (Bis. 10:28, 29) Yandi samunaka Korneye na dikanda ya yandi mpe bawu nyonso kuzwaka mbotokolo.—Bis. 10:21-23, 34, 35, 44-48.
Piere ke na kotaka na yinzo ya Korneye (Tala paragrafe 7)
8. Wa’ faso beto lenda lakisa ti makanisi ya beto ke na kwelanaka na ya Yehova? (1 Piere 3:8)
8 Bamvula mingi na mantwala, ntumwa Piere kindisaka bakristo na ‘kuwisana.’ 1 Piere 3:8 ke zonzaka: “Na yina, beno wisana mpe beno kabula na bampangi yina ke na mpasi. Beno zolasana mutindu bampangi. Beno tala bampangi kyadi, mpe beno vwanda bantu ya kukuluka na ntwala ya bampangi.” Kana beto longoka na Biblia mutindu ya kukanisa ya Yehova, ya ke sadisa beto na kuwisana na bampangi. Na kifwani, Yesu zonzaka na bilandi ya yandi na kutula Kimfumu ya Nzambi na kisika ya ntete na luzingu ya bawu. (Mat. 6:33) Na yawu, muntu na kimvuka ya nge lenda baka mukanu ya kuvanda mupasuli-nzila to kusosa kusadila Yehova na kisalu ya ntangu nyonso. Na kisika ya kuzonzila yandi, ‘kuzonza ve mambu ya mutindu yayi,’ beto me bonga kukindisa yandi mpe kusadisa yandi na kulungisa yawu.
VANDA YA KUKULUKA
9-10. Wa’ faso Yesu lakisaka ti yandi vandaka ya kukuluka?
9 Yesu longaka na Piere mpe na bantumwa ya nkaka kileso ya mfunu na yina me tadila kukuluka. Yandi salaka yawu na mpimpa tekila lufwa ya yandi. Tekila nkokila kuma, Yesu zonzaka na Piere na Yoane na kukwenda bongisa kisika yina bantumwa nyonso zola kudya na yandi tekila yandi kufwa. Ya lenda vanda ti mosi ya bima yina ba zola bongisa vandaka, ndonga, balele yina zola sadisa na kusukula makulu ya ba yina zola vanda kuna tekila ba kudya. Kasi, nani na kati ya bawu vandaka ya kukuluka samu na kusala kisalu yayi?
10 Yesu vandaka ve na nsoni ya kusala kisalu yayi. Yandi lakisaka ti yandi vandaka ya kukuluka. Ya kamwisaka bantumwa na kutala Yesu kusala kisalu yina bisadi ke salaka. Yesu katulaka kinkuti ya yandi ya zulu mpe bakaka lele ya kukusuna mpe kangaka yawu na luketo ya yandi. Yandi tulaka maza na kati ya ndonga mpe bandaka kusukula makulu ya bawu. (Yoa. 13:4, 5) Yesu sukulaka makulu ya bantumwa ya yandi 12. Yuda mpe, muntu yina zola tekisa yandi, vandaka na kati ya bawu. Ya lenda vanda ti kusala yawu bakaka yandi ntangu mingi. Kasi, na kukuluka nyonso Yesu salaka yawu. Na ntima ya yinda nyonso Yesu zonzaka: “Beno me bakula mambu yina mu me sala beno? Beno ke bokilaka munu ‘Mulongi’ mpe ‘Mfumu.’ Ya ke ni faso yina, samu ni yawu mu kele. Na yawu, kana munu muntu yina ke Mfumu mpe Mulongi, mu me sukula beno makulu, beno mpe beno me fwana kusukula makulu ya bampangi.”—Yoa. 13:12-14.
Kukuluka ke tadilaka faso beto ke tadilaka bampangi mpe beto mosi
11. Wa’ faso Piere lakisaka ti yandi longokaka kukuluka? (1 Piere 5:5) (Tala mpe kizizi.)
11 Piere longokaka kukuluka na kifwani ya Yesu. Na manima, ntangu Yesu vutukaka na zulu, Piere salaka kimangu yina belusaka bakala mosi yina vandaka na makulu ya kufwa. (Bis. 1:8, 9; 3:2, 6-8) Mambu ya ngitukulu yayi salaka ti bantu nyonso kima na kisika ya Piere. (Bis. 3:11) Kasi Piere zolaka ve ti ba kumisa yandi ata ti yandi kulaka kisika yina bantu ke zolaka mingi ba pesa bawu lukumu. Yandi vandaka ya kukuluka mpe yandi vanda zola ba pesa nkembo na Yehova na Yesu ntangu yandi zonzaka: “Ni na nzila ya nkumbu ya [Yesu] mpe na nzila ya kiminu na nkumbu ya yandi, muntu yayi yina beno ke na talaka mpe yina beno zaba me kuma na ngolo.” (Bis. 3:12-16) Nzonzolo yina Piere sadilaka na mukanda yina yandi filisaka na bakristo na yina me tadila mfunu na kukulisa kifu ya kuvanda ya kukuluka, lenda bambula beto ntangu yina Yesu kangaka lele na luketo mpe sukulaka makulu ya bantumwa. 1 Piere 5:5 ke zonzaka: “Beno mpe bantwenya, beno tumama na bakuluntu ya dibuundu. Na kati ya bunkundi ya beno, beno fwana kukuluka na ntwala ya bampangi, samu ti Dibuku ya Nzambi ke tubaka: ‘Nzambi ke mangaka bantu ya lunangu, kasi yandi ke lakisaka bumbote ya yandi na bantu yina kele na ntima ya kukuluka.’”
Na manima ya kusala kimangu, na kukuluka nyonso ntumwa Piere pesaka nkembo na Yehova mpe na Yesu. Beto mpe ntangu beto ke salaka mambu ya mbote, beto lenda lakisa kukuluka na kuvingilaka ve ti bantu pesa beto nkembo na yina beto me sala (Tala baparagrafe 11-12)
12. Mutindu Piere, wa’ faso beto lenda tatamana na kukulisa kifu ya kuvanda ya kukuluka?
12 Beto lenda landa kifwani ya Piere na kuvandaka ya kukuluka. Beto zimbana ve ti kuvanda ya kukuluka ke sukaka ve na kuzonza bamambu ya mbote. Nzonzolo kuvanda ya kukuluka yina Piere sadilaka ke tadilaka “makanisi yina beto ke na yawu na ntima.” Faso beto ke tadilaka beto mosi mpe bampangi. Beto ke sadisaka ve bampangi samu ba pesa beto lukumu, kasi samu beto ke zolaka Yehova mpe bantu. Kana beto sadila Yehova na bampangi ya beto na kilengi nyonso ata ti bantu ke ve na talaka bamambu yina beto ke na salaka, beto ke lakisa ya tsyeleka beto ke ya kukuluka.—Mat. 6:1-4.
“ZINGA NA MUTINDU ME FWANANA”
13. Yinki zola zonza ‘kuzinga na mutindu me fwanana?’
13 Yinki zola zonza ‘kuzinga na mutindu me fwanana’? (1 Pi. 4:7) Mukristo yina ke zingaka na mutindu yina me fwanana ke salaka nyonso yina yandi lenda sala samu na kubaka mikanu yina ke kwelana na faso ya Yehova ya kukanisa. Yandi zaba ti kindiku ya yandi na Yehova ke mambu ya kulutila mfumu na luzingu ya yandi. Yandi zaba ti yandi ke ve ya kulunga mpe ti yandi me zaba ve nyonso. Yandi ke sikidilaka na Nzambi ntangu yandi ke sambilaka yandi na kukuluka nyonso tekila yandi baka mukanu.
14. Na wapi ntangu Piere tulaka ve ntima na Yehova?
14 Nkokila tekila lufwa ya yandi, Yesu zonzaka na bilandi ya yandi: “Na mpimpa yayi, beno nyonso ke bula dibaku samu na mambu yina ke kumina munu.” Na bukindi nyonso Piere zonzaka: “Ata ti bawu nyonso bula dibaku samu na mambu yina ke kumina nge, munu, mu ke bula ata fioti ve dibaku.” Na mpimpa yina, Yesu pesaka malongi na bilandi ya yandi ya nkaka: “Beno vanda ekenge, mpe beno sambila ntangu nyonso.” (Mat. 26:31, 33, 41) Piere landaka ve malongi yayi. Kana yandi landaka yawu, ntangu ya nkaka yandi zola vanda na bukindi ya kundima ti yandi vandaka kilandi ya Yesu. Kasi Piere mangaka Yesu mpe na manima yandi nyongaka mingi.—Mat. 26:69-75.
15. Wa’ faso Yesu tatamanaka na kuzinga na mutindu me fwanana na nkokila tekila lufwa ya yandi?
15 Yesu tulaka ntima ya yandi nyonso na Yehova. Ata ti yandi vandaka ya kulunga, yandi vandaka sambilaka bambala mingi. Ya pesaka yandi ngolo ya kusala luzolo ya Yehova. (Mat. 26:39, 42, 44; Yoa. 18:4, 5) Piere zimbanaka ata fioti ve ti Yesu sambilaka bambala mingi na nkokila tekila lufwa ya yandi.
16. Yinki ke na lakisaka ti Piere vanda zinga na mutindu me fwanana? (1 Piere 4:7)
16 Na kati ya bamvula, Piere longokaka kutula ntima ya yandi nyonso na Yehova na nzila ya lusambu. Ntangu Yesu vumbukaka na lufwa, yandi zonzaka na Piere mpe bantumwa ya nkaka ti ba ke kuzwa mpeve ya santu yina ke pesa bawu ngolo ya kulungisa kisalu ya kusamuna. Kasi, yandi zonzaka na bawu na kuvanda kaka na Yeruzalemi tii ntangu ya ke salama. (Luke 24:49; Bis. 1:4, 5) Tekila ya salama, yinki Piere vanda sala? Piere na bakristo ya nkaka “vanda bika ve kusambila.” (Bis. 1:13, 14) Na mantwala, na mukanda ya yandi ya ntete Piere kindisaka bakristo na kuzinga na mutindu me fwanana mpe na kutula ntima ya bawu na Yehova na lusambu. 1 Piere 4:7 ke zonzaka: “Nsuka ya yinza me kuma pene-pene. Na yina, beno zinga na mutindu me fwanana, mpe beno lala pongi ve, samu ti beno lenda na kusambila.” Piere longokaka kutula Yehova ntima, mpe kumaka muntu yina bampangi vanda sikidila.—Gal. 2:9.
17. Ata mayela yina beto ke na yawu, yinki beto me bonga kubika ve kusala? (Tala mpe kizizi.)
17 Beto me fwana kupusana pene-pene ya Yehova na kusambilaka yandi bambala mingi. Ya ke sadisa beto na kuzinga na mutindu me fwanana. Beto me fwana kusambila ntangu nyonso ata na mambu yina ke ve mfunu mingi na beto. Beto me bonga kusambila Yehova samu yandi twadisa beto na kubaka mikanu ya mfunu, kutula ntima na yandi samu ti yandi zaba yina ke mbote samu na beto.
Piere longokaka kutula ntima na Yehova na lusambu. Beto mpe lenda zinga na mutindu me fwanana na kulombaka lusalusu ya Yehova na nzila ya lusambu, mingi-mingi ntangu beto ke na sosaka kubaka mikanu ya mfunu (Tala paragrafe 17)b
18. Yinki beto lenda sala samu na kulongoka dyaka mingi na faso ya kukanisa ya Yehova?
18 Beto ke vutulaka matondo na yina Yehova yidikaka beto na makoki ya kulanda bifu ya yandi. (Kub. 1:26) Kasi, beto lenda landa ve Yehova na faso ya kulunga. (Iza. 55:9) Kaka mutindu Piere, beto lenda longoka dyaka mingi na faso ya kukanisa ya Yehova. Na yawu, beto sala bangolo na kukwelisa faso ya beto ya kukanisa na ya Nzambi, beto vanda ya kukuluka mpe beto zinga na mutindu me fwanana.
NZIMBU 30 Tata ya munu, ndiku ya munu, Nzambi ya munu
a “Dibanza,” yina ke na 1 Piere 4:1, ba lenda bangula mpe yawu na “ndyatulu, faso ya kukanisa.”
b YINA KIZIZI YA PAJE YA NTETE KE NA LAKISAKA: Mpangi mosi yina ke na sosaka kisalu, ke na sambilaka na yisi ya ntima tekila yandi kwenda solola na mambu ya kisalu.