BIBLIOTEK Watchtower NA INTERNET
Watchtower
BIBLIOTEKE NA INTERNET
Kituba
  • BIBLIA
  • MIKANDA MPE BABUKU
  • BALUKUTAKANU
  • w25 mars p. 2-7
  • Kuvingila ve na kuzwa mbotokolo

Nge lenda kuzwa ve video awa.

Kima mosi me simba ve ntangu nge vanda baka video.

  • Kuvingila ve na kuzwa mbotokolo
  • Yinzo ya Kengidi Ke Samunaka Kimfumu ya Yehova (Ya Kulongoka)—2025
  • Ba sous-titres
  • Yina ke faso mosi
  • BANTU YA SAMARIYA KUZWAKA MBOTOKOLO
  • SOLO YA TARSE KUZWAKA MBOTOKOLO
  • KORNEYE KUZWAKA MBOTOKOLO
  • BANTU YA KORINTO KUZWAKA MBOTOKOLO
  • KIMINU YA NGE LENDA KATULA BAMONGO
  • “Tatamana na kulanda” Yesu na manima ya mbotokolo ya nge
    Yinzo ya Kengidi Ke Samunaka Kimfumu ya Yehova (Ya Kulongoka)—2024
  • Nge ke kwandi ya kubongama samu na kukipesa na Yehova?
    Yinzo ya Kengidi Ke Samunaka Kimfumu ya Yehova (Ya Kulongoka)—2024
  • Mikanu yina ke lakisá ti beto ke tudilá Yehova ntima
    Luzingu mpe kisalu ya beto ya bukristo—Mukanda ya lukutakanu—2023
  • Beto vanda ya kukuluka na bamambu yina beto zaba ve
    Yinzo ya Kengidi Ke Samunaka Kimfumu ya Yehova (Ya Kulongoka)—2025
Tala mingi
Yinzo ya Kengidi Ke Samunaka Kimfumu ya Yehova (Ya Kulongoka)—2025
w25 mars p. 2-7

DISOLO YA KULONGOKA 9

NZIMBU 51 Beto me kukipesa na Nzambi

Kuvingila ve na kuzwa mbotokolo

“Yinki nge ke na vingilaka? Telama, mpe kuzwa mbotokolo.”—BIS. 22:16.

NA BUNKUFI

Beto ke tala mutindu beto lenda kuzwa ngolo samu na kuzwa mbotokolo na kifwani ya bantu ya Samariya, ya Solo ya Tarse, ya Korneye mpe ya bantu ya Korinto.

1. Yinki lenda nata nge na kuzwa mbotokolo?

NGE KE zolaka kwandi Yehova, muntu yina me pesa nge bima nyonso ya kitoko, ya vanda luzingu? Nge ke kwandi na sosaka kulakisa luzolo ya nge samu na yandi? Faso ya kulutila mbote ya kusala yawu ni kukipesa na yandi mpe kuzwa mbotokolo. Kusala bamambu yayi, ke sala ti nge kota na dikanda ya Yehova. Ya ke sala ti Yehova twadisa nge mpe kipe nge samu ti yandi me kuma Tata ya nge mpe ndiku ya nge. (Nku. 73:24; Iza. 43:1, 2) Kukipesa mpe mbotokolo ke pesa nge kivuvu ya kuzinga ntangu nyonso.—1 Pi. 3:21.

2. Yinki beto ke longoka na disolo yayi?

2 Ya ke kwandi na mambu yina ke na kangaka nge nzila na kuzwa mbotokolo? Kana ni yawu, nge ke ve nge mosi. Ba millions ya bantu tekila nge, sobaka ndyatulu ya bawu mpe faso ya bawu ya kukanisa samu na kuzwa mbotokolo. Bubu yayi, ba ke na sadilaka Yehova na kilengi mpe na tiya nyonso. Na siècle ya ntete ya ke na ba yina kuzwaka mbotokolo. Yinki nge lenda longoka na kifwani ya bawu? Beto tala bamambu yina zola kanga bawu nzila mpe yinki beto lenda longoka.

BANTU YA SAMARIYA KUZWAKA MBOTOKOLO

3. Wapi bamambu zola kanga bantu ya nkaka ya Samariya nzila samu na kuzwa mbotokolo?

3 Na ntangu ya Yesu bantu ya Samariya vandaka na dibuundu ya bawu. Mingi na kati ya bawu vandaka na kizunga ya Samariya na nore ya Zude mpe na bisika ya nkaka na bwala ya Shekeme. Na yawu, ba vandaka na nsatu ya kundima mpe kulongoka malongi nyonso ya Biblia tekila ba kuzwa mbotokolo. Samu na bawu kaka babuku 5 ya Biblia katukaka na Nzambi. Buku ya Kubanda tii na Deteronome. Ya lenda vanda ti ba vanda ndimaka mpe buku ya Yozue. Kasi, ba vanda kwikilaka na nsilulu yina ke na Deteronome 18:18, 19, yina ke lakisaka ti Masiya ke kwiza. (Yoa. 4:25) Samu na kuzwa mbotokolo ba vandaka na nsatu ya kundima ti Yesu ke ni Masiya yina ke kwiza. Ni yawu “bantu mingi ya Samariya” salaka. (Yoa. 4:39) Samu ti bazwife vanda wisanaka ve na bantu ya Samariya, bantu ya Samariya ya nkaka zola soba faso ya kutadila bawu.—Luke 9:52-54.

4. Mutindu Bisalu 8:5, 6, 14 ke lakisaka yawu, yinki bantu ya nkaka ya Samariya salaka ntangu Filipe samunaka bawu?

4 Yinki sadisaka bantu ya Samariya na kuzwa mbotokolo? Ntangu Filipe samunaka bantu ya Samariya mambu yina me tadila “Kristo,” ba ya nkaka na kati ya bawu “ndimaka dyambu ya Nzambi.” (Tanga Bisalu 8:5, 6, 14.) Ata ti Filipe vandaka ve muzwife, ba mangaka ve kuwa yandi. Ntangu ya nkaka, ba bambukaka na musiku ya Moyize yina ke zonzaka ti Nzambi ke soolaka ve bizizi. (Det. 10:17-19) Ba vanda teka “dikebi na mambu yina Filipe vanda zonza” na yina me tadila Kristo mpe ba vandaka na ata ntembe ti ni Nzambi filisaka Filipe. Yandi salaka mpe bimangu mingi, belusaka ba yina vanda beela mpe bingisaka bampeve ya yimbi.—Bis. 8:7.

5. Yinki kifwani ya bantu ya Samariya ke na longoka nge?

5 Na kutala, ba zola manga kuwa Filipe samu ti yandi vandaka muzwife to ya vandaka mbala ya bawu ya ntete na kuwa malongi yina. Kasi, ni yawu ve ba salaka. Na manima ya kundima ti mambu yina Filipe longaka vanda matsyeleka, ba kuzwaka mbotokolo na mbangu. Biblia ke zonzaka: “Ntangu ba kwikilaka Filipe yina vanda zabisa nsangu ya mbote na yina me tadila Kimfumu ya Nzambi mpe nkumbu ya Yesu Kristo, ba bandaka kuzwa mbotokolo, bakento mpe babakala.” (Bis. 8:12) Nge ke ndimaka kwandi ti Biblia ke zonzaka matsyeleka? Nge ke ndimaka kwandi ti Bambangi ya Yehova ke lakisaka luzolo kaka mutindu Yesu zonzaka yawu? (Yoa. 13:35) Na yawu, kuvanda ve na boma ya kuzwa mbotokolo. Nge lenda vanda na kundima ti Yehova ke sakumuna nge.

6. Wapi mutindu kifwani ya Ruben lenda sadisa nge?

6 Ruben, yina ke vandaka na Allemagne kulaka na dikanda ya Bambangi ya Yehova. Kasi, ntangu yandi vandaka ntwenya, yandi vandaka na bantembe ti Nzambi kele. Wapi mutindu yandi katulaka yawu? Yandi kwiza tala ti yandi zabaka ve mingi na mambu yango mpe yandi bakaka mukanu ya kulongoka yawu. Yandi zonzaka: “Na kulongoka ya munu ya Biblia mu vandaka na nsatu ya kukatula bantembe ya munu. Mu bakaka ntangu mingi samu na kulongoka mikanda ya beto yina ke lakisaka ti ni Nzambi yidikaka bima nyonso.” Yandi tangaka buku Y a-t-il un Créateur qui se soucie de vous ? Buku yayi sadisaka mingi Ruben. Yandi zonzaka: “Mu me ndima ti Nzambi kele.” Ntangu Ruben kwendaka tala biro yina ke twadisaka kisalu ya beto na yinza nyonso, luzolo ya yandi kulaka na kutala bumosi yina ke na Bambangi ya Yehova ya yinza nyonso. Ntangu Ruben vutukaka na Allemagne, yandi kuzwaka mbotokolo na bamvula 17. Kana nge ke na bantembe samu na bamambu yina nge ke na longokaka, sosa na mikanda ya beto bamambu yina ke sadisa nge samu na kukatula yawu. “Kuzaba mbote-mbote” bamambu yina Biblia ke zonzaka ke sadisa nge na kukatula bantembe. (Efe. 4:13, 14) Kuwa, kutala luzolo mpe bumosi yina ke na kati ya dikanda ya Yehova na bisika ya nkaka mpe na kimvuka ya nge, ke kumisa dyaka ngolo luzolo ya nge samu na bampangi ya yinza nyonso.

SOLO YA TARSE KUZWAKA MBOTOKOLO

7. Wapi dikanisi Solo vandaka na nsatu ya kusoba?

7 Beto tala kifwani ya Solo ya Tarse. Yandi vanda kula mingi na mambu yina me tadila dibuundu ya Bazwife. Yandi vandaka muntu ya Izraele. (Gal. 1:13, 14; Filp. 3:5) Na ntama, Bazwife mingi vanda talaka ti bakristo vandaka bantu yina balulaka Yehova mukongo. Ni na yawu, Solo vanda kwamisa bawu na faso ya kulutila. Samu na yandi, ya vandaka luzolo ya Nzambi. (Bis 8:3; 9:1, 2; 26:9-11) Solo zabaka ti kana yandi kwikila na Yesu mpe kuzwa mbotokolo ba zola kwamisa yandi.

8. a) Yinki sadisaka Solo na kuzwa mbotokolo? b) Mutindu ke na zonzilaka Bisalu 22:12-16, wapi mutindu Ananiase sadisaka Solo? (Tala mpe kizizi.)

8 Yinki sadisaka Solo na kuzwa mbotokolo? Ntangu Yesu talanaka na Solo meso kufwaka yandi. (Bis. 9:3-9) Yandi lutisaka bilumbu tatu ata kudya mpe kuwa ve maza. Ya lenda vanda ti yandi vanda yindula na bamambu yina kuminaka yandi. Ya tsyeleka Solo kwizaka ndima ti Yesu vandaka Masiya mpe bilandi ya yandi vandaka na dibuundu ya matsyeleka. Samu Solo tulaka diboko samu na lufwa ya Etiene ya vanda kwamisa yandi. (Bis. 22:20) Na nsuka ya bilumbu tatu, Ananiase yina vandaka na ntima ya mbote pusanaka pene-pene ya Solo, belusaka yandi mpe kindisaka yandi na kuzwa mbotokolo ata kuvingila. (Tanga Bisalu 22:12-16.) Na kukuluka nyonso Solo kuwaka Ananiase mpe kuzwaka mbotokolo.—Bis. 9:17, 18.

Solo ke na kotaka na kati ya maza samu na kuzwa mbotokolo. Mwa ndambu ya bantu ke na kutalaka na kiliengi nyonso.

Mutindu Solo, nge lenda ndima kwandi lubakusu na kuzwa mbotokolo? (Tala paragrafe 8)


9. Yinki disolo ya Solo lenda longoka nge?

9 Bileso yina beto lenda benda na disolo ya Solo. Yandi bikaka ve ti boma ya bantu to luzingu ya yandi ya ntama kanga yandi nzila na kuzwa mbotokolo. Yandi vandaka ya kukuluka mpe ndimaka kusoba luzingu ya yandi samu na kukuma kilandi ya Yesu. (Bis. 26:14, 19) Yandi ndimaka kukuma mukristo ata ti yandi zabaka ti ba zola kwamisa yandi. (Bis. 9:15, 16; 20:22, 23) Na manima ya mbotokolo, yandi bikaka ve kutula ntima na Yehova samu yandi sadisa yandi na bamambu ya mpasi yina yandi vanda kutana. (2 Kor. 4:7-10) Ya tsyeleka, kukuma mosi ya Bambangi ya Yehova lenda meka kiminu ya nge to kunatina nge bampasi. Kasi Yehova ke sadisa nge. Nge lenda tula ntima na lubakusu yina Yehova na Yesu ke pesa nge.—Filp. 4:13.

10. Yinki kifwani ya Anna me longa nge?

10 Anna kulaka na dikanda mosi ya Kurde na Esti ya Europe. Na manima ya mbotokolo ya mama yandi, papa ya yandi ndimaka yandi longoka Biblia ntangu yandi vandaka na bamvula 9. Na ndinga ya bawu, dikanda nyonso ke vandaka yinzo mosi. Na yawu, ya natinaka Anna bankwamusu. Ba vanda tala ti ya vandaka mambu ya nsoni na kubika dibuundu ya bankooko. Ntangu Anna kumaka na bamvula 12, yandi yufulaka na papa ya yandi kana yandi lenda kuzwa mbotokolo. Papa ya yandi vanda sosa kuzaba kana mukanu yina yandi me baka, me katuka na yandi mosi to ti ba ke na salaka yandi tiya na kubaka yawu. Yandi vutulaka: “Mu ke zolaka Yehova.” Papa ya yandi ndimaka yandi kuzwa mbotokolo. Na manima, bantu ya dikanda ya yandi nyokolaka yandi mpe sombolaka yandi. Nkooko ya yandi zonzaka na yandi: “Ya zola vanda mbote na nge na kuvanda na luzingu ya kinsuza mpe kunwa matiti ya yimbi kasi ve kukuma mbangi ya Yehova.” Yinki sadisaka Anna? Yandi me zonza: “Yehova pesaka munu ngolo, mama ya munu na papa ya munu sadisaka munu mingi.” Anna sonikaka na mwa mukanda bamambu yina Yehova salaka samu na kusadisa yandi na luzingu ya yandi. Yandi ke vutukilaka kutala yawu bambala nyonso samu na kuzimbana ve mutindu Yehova sadisaka yandi. Kana nge ke na boma ti ba kwamisa nge, kuzimbana ve ti Yehova ke sadisa nge.—Ebr. 13:6.

KORNEYE KUZWAKA MBOTOKOLO

11. Samu na yinki Korneye zola vanda na maketi-keti ya kuzwa mbotokolo?

11 Kifwani ya Korneye lenda longa beto mpe bileso ya mfunu. Yandi vandaka “mfumu ya kikunku mosi ya basoda,” mpe vanda twadisa basoda pene-pene na 100 ya bwala ya Roma. (Bis. 10:1) Yandi vandaka muntu ya nene na kisika yina yandi vanda vandaka mpe na kisalu ya yandi. Yandi “vanda pesaka bantu makabu mingi ya kyadi.” (Bis. 10:2) Yehova filisaka ntumwa Piere samu na kuzonzila yandi nsangu ya mbote. Korneye vanda kwandi na maketi-keti ya kuzwa mbotokolo samu yandi vandaka muntu ya mfunu?

12. Yinki sadisaka Korneye na kuzwa mbotokolo?

12 Yinki sadisaka Korneye na kuzwa mbotokolo? Biblia ke zonzaka ti “yandi na bantu nyonso yina vanda na yinzo ya yandi vandaka na boma ya Nzambi.” Mpe yandi vanda bondilaka Nzambi ntangu nyonso. (Bis. 10:2) Ntangu Piere zonzilaka yandi nsangu ya mbote, yandi na dikanda ya yandi tulaka kiminu na Kristo mpe vingilaka ve na kuzwa mbotokolo. (Bis. 10:47, 48) Ya lenda vanda ti Korneye vandaka ya kubongama na kusala bansobolo nyonso yina vandaka mfunu na kusadila Yehova na dikanda ya yandi.—Yoz. 24:15; Bis. 10:24, 33.

13. Yinki nge lenda longoka na disolo ya Korneye?

13 Mutindu Solo, Korneye bikaka ve kisalu ya yandi ya kisoda kanga yandi nzila na kukuma mukristo. Nge ke kwandi na nsatu ya kusala bansobolo ya nene na luzingu ya nge samu na kuzwa mbotokolo? Kana ni yawu, Yehova ke sadisa nge. Yandi ke sakumuna bangolo yina nge ke na salaka samu na kusadila malongi ya Biblia na luzingu ya nge samu na kusadila yandi.

14. Yinki kifwani ya Tsuyoshi lenda longa nge?

14 Samu na kuzwa mbotokolo, Tsuyoshi yina ke vandaka na Japon, salaka bansobolo yina me tadila kisalu ya yandi. Yandi vandaka sadisi ya mfumu ya lekole mosi ya nene. Kuna ba ke longaka mutindu ya kubongisa bafololo. Ntangu mfumu vandaka ve na ntangu ya kusala bansalulu ya misiku yina dibuundu ya bouddhiste vanda lombaka, ntangu muntu ke kufwaka ni yandi vanda salaka yawu. Kasi, ntangu Tsuyoshi longokaka matsyeleka na yina me tadila lufwa, nsalulu yayi vanda kanga yandi nzila samu na kuzwa mbotokolo. Yandi bakaka mukanu ya kusala dyaka ve misiku nyonso yina dibuundu yayi vanda lombaka. (2 Kor. 6:15, 16) Tsuyoshi sololaka na mfumu ya yandi na mukanu yango. Yinki ya nataka? Yandi lendaka kubumba kisalu ya yandi. Mpe vanda landa dyaka ve misiku mpe bansalulu ya dibuundu yango. Kaka mvula mosi na manima yina yandi bandaka kulongoka Biblia, yandi kuzwaka mbotokolo.a Kana nge na nsatu ya kusala mwa bansobolo na kisalu ya nge samu na kusepelisa Yehova, vanda na kundima ti yandi ke pesa nge na dikanda ya nge yina beno ke na yawu nsatu.—Nku. 127:2; Mat. 6:33.

BANTU YA KORINTO KUZWAKA MBOTOKOLO

15. Yinki vanda kanga bantu ya Korinto nzila na kuzwa mbotokolo?

15 Bantu ya Korinto ya ntama zabanaka mutindu bantu yina ke zolaka bimvwama mpe yina vanda salaka kinsuza na faso ya kusakana ve. Mingi ya ba yina vanda vandaka kuna vanda salaka bamambu yina Nzambi ke yiinaka. Na yawu, ya vandaka mpasi mingi na bawu na kubanda kusadila Yehova. Ntangu ntumwa Polo kwendaka na mbanza yina mpe bandaka kusamuna nsangu ya mbote na yina me tadila Yesu, “bakorinto mingi yina kuwaka, bandaka kukwikila mpe kuzwaka mbotokolo.” (Bis. 18:7-11) Mfumu Yesu talanaka na Polo na kimona-meso mpe zonzaka: “Mu ke na bantu mingi na mbanza yayi.” Na yawu, Polo lutisaka mvula mosi na ndambu kuna samu na kusamuna.

16. Yinki sadisaka bantu ya nkaka ya Korinto na kuzwa mbotokolo? (2 Bakorinto 10:4, 5)

16 Yinki sadisaka bantu ya Korinto na kuzwa mbotokolo? (Tanga 2 Bakorinto 10:4, 5.) Ni mambu ya Nzambi mpe ngolo ya mpeve ya santu, sadisaka bawu na kusala bansobolo ya nene na luzingu ya bawu. (Ebr. 4:12) Ba yina ndimaka nsangu ya mbote na yina me tadila Yesu bikaka ndyatulu mutindu babakala yina ke vukisaka nzutu na babakala ya nkaka, kukola malafu mpe muyibi.—1 Kor. 6:9-11.b

17. Yinki nge lenda longoka na bantu ya Korinto?

17 Ata ti bantu ya nkaka ya Korinto vandaka ya kukangama na bansalulu ya busafu, ba zonzaka ve ti ya ke mpasi mingi na bawu na kubika yawu samu na kukuma bakristo. Ba salaka bangolo mingi na kukangama na nzila yina ke nataka na luzingu ya ntangu nyonso. (Mat. 7:13, 14) Kana ya ke mpasi na nge na kukatula nsalulu mosi ya yimbi yina ke na kangaka nge nzila na kuzwa mbotokolo, kubwisa ve maboko. Lomba na Yehova mpeve ya yandi ya santu samu ya sadisa nge na kubwa ve na mambu ya yimbi.

18. Yinki kifwani ya Monika lenda longa nge?

18 Beto zonzila Monika, yina ke vandaka na Géorgie. Yandi vandaka na nzonzolo ya mvindu, mpe yandi vandaka talaka bansaka ya yimbi. Kasi, yandi salaka bangolo na kubika yawu samu na kuzwa mbotokolo. Yandi zonzaka: “Na buntwenya, ngolo ya munu vandaka na lusambu. Yehova zabaka ti mu vandaka na nsatu ya kusala mambu ya mbote. Yandi vanda sadisaka kaka munu mpe vanda twadisaka munu.” Monika kuzwaka mbotokolo na bamvula 16. Nge ke kwandi na bansalulu yina nge ke na nsatu ya kubika samu na kusadila Yehova na faso yina yandi me zola? Kubika ve kulomba Yehova mpeve ya yandi ya santu samu na kusala yawu. Samu ti Yehova ke pesaka ve mpeve ya yandi ndambu-ndambu.—Yoa. 3:34.

KIMINU YA NGE LENDA KATULA BAMONGO

19. Yinki lenda sadisa nge na kunwana na bamambu ya nene? (Tala mpe kizizi.)

19 Ata ti nge ke na nwanaka na bamambu yina lenda kanga nge nzila samu na kuzwa mbotokolo, vanda na kundima ti Yehova ke zolaka nge mpe yandi zola ti nge vanda na kati ya dikanda ya yandi. Yesu zonzaka na kikunku ya bilandi ya yandi ya siècle ya ntete: “Kana kiminu ya beno ke nene mutindu mbuma ya mutarde, beno ke zonza na mongo yayi, ‘katuka awa, kwenda kuna,’ mpe ya ke kwenda. Na yawu, ya ke vanda ve na kima mosi yina beno ke lenda ve kusala.” (Mat. 17:20) Bantu yina vandaka kuwa Yesu vandaka na nsatu ya kukulisa kiminu ya bawu, samu ti ya salaka kaka bamvula fioti yina ba kumaka bilandi. Kasi, Yesu zonzaka na bawu kana ba kulisa kiminu ya bawu, Yehova ke sadisa bawu na kukatula bamongo yina ke bamambu ya nene. Yehova ke sadisa nge mpe na kusala yawu.

Na lukutakanu ya nene, kikunku ya bampangi ya kento na ya bakala na kilengi nyonso ke na bulaka maboko, ntangu ba yina me kuzwa mbotokolo ke na lutaka.

Vanda na kundima ti Yehova ke zolaka nge mpe zola ti nge vanda na kati ya dikanda ya yandi (Tala paragrafe 19)c


20. Wa’ faso kifwani ya bakristo ya siècle ya ntete mpe ya bubu yayi yina ba me zonzila na disolo yayi lenda sadisa nge?

20 Kana ya ke na bamambu yina ke na kangaka nge nzila na kuzwa mbotokolo, katula yawu na mbangu. Bifwani ya bakristo ya siècle ya ntete mpe ya bubu yayi lenda sadisa nge na kuzwa ngolo. Kifwani ya bawu lenda kindisa nge mpe kunata nge na kukipesa na Yehova mpe kuzwa mbotokolo. Ya ke mukanu ya kulutila mbote yina nge ke baka.

WAPI MVUTU NGE KE PESA?

  • Wa’ faso bantu ya Samariya nungaka bamambu yina vanda kanga bawu nzila na kuzwa mbotokolo?

  • Wa’ faso Solo na Korneye nungaka bamambu yina vanda kanga bawu nzila na kuzwa mbotokolo?

  • Wa’ faso bantu ya Korinto nungaka bamambu yina vanda kanga bawu nzila na kuzwa mbotokolo?

NZIMBU 38 Yandi ke pesa nge ngolo

a Tala disolo ya luzingu ya mpangi Tsuyoshi Fujii, na Réveillez-vous! ya 8 août 2005, bapaje 20-23.

b Tala na jw.org video ‘Yinki ke na kangaka nge nzila samu na kuzwa mbotokolo?’

c YINA KIZIZI KE NA LAKISAKA: Kikunku ya bampangi ya kento na bakala ke na yambaka na kilengi nyonso ba yina me kuzwa mbotokolo.

    Mikanda ya Kituba (2012-2025)
    Basika
    Kota
    • Kituba
    • Kabula
    • Soola yina nge zola
    • Copyright © 2025 Watch Tower Bible and Tract Society of Pennsylvania
    • Misiku samu na kusadila yawu
    • Misiku samu na kubumba yina nge ke na salaka
    • Paramètres de confidentialité
    • JW.ORG
    • Kota
    Kabula