Mukanda yina me katuka na Kimvuka ya Bantwadisi

Bampangi ya kento na ya bakala:

Luzolo ya beto samu na Nzambi mpe samu na bantu ke na tindaka beto na ‘kukwenda na sika ya bantu ya bayinsi nyonso, kukitula bawu na kukuma bilandi, mpe kubotika bawu.’ (Mat. 28:19, 20; Mrk. 12:28-31) Luzolo ke kima mosi ya ngolo. Ya lenda simba ntima ya “bayina ke sosaka” Nzambi.​—Ebr. 11:6.

Na ntama, beto vanda kangaka na yintu masolo ya kusala na bantu, mpe beto vanda kabulaka mingi mikanda. Bubu yayi, beto zola kubongisa mayela ya beto ya kusolola na bantu. Beto ke na sosaka kulakisa luzolo na kusalaka masolo yina ke simba bantima ya bawu. Ya zola kuzonza, kundima kusoba mwa bamambu mpe kuteka dikebi na muntu nyonso. Wa’ faso mukanda yayi ke sadisa beto na kusala yawu?

Mukanda yayi ke na bileso 12 yina ke zonzilaka bifu ya mbote yina ke sadisa beto na kulakisa luzolo mpe kukumisa bantu bilandi. Konso kileso ke ya kukangama na disolo mosi ya Biblia yina ke na zonzilaka mutindu Yesu to basamuni ya nkaka ya siècle ya ntete sadilaka bifu yango samu na kusamuna. Ya ke ve ti beto ke bumba bifwani ya masolo na yintu, kasi beto ke sosa faso ya kulakisa luzolo ya beto na bantu. Bifu nyonso ya bukristo kele mfunu samu na bafaso nyonso ya kusamuna. Kasi na mukanda yayi, beto ke tala wapi bifu kele mfunu mingi samu na kubanda masolo, na kuvutukila kutala bantu to kulongoka Biblia na bawu.

Na konso kileso, tala wapi mutindu nge lenda lakisa kifu ya mbote yina ya ke na zonzilaka ntangu nge ke sololaka na bantu kisika nge kele. Sala bangolo samu na kukulisa luzolo ya nge samu na Yehova mpe samu na bantu. Luzolo yayi me lutila nyonso yina beto lenda sala, mpe ya ke sadisa beto na kulungisa kisalu ya beto ya kukumisa bantu bilandi.

Ya ke bweso ya nene ya kusala dipeka na dipeka na beno. (Sof. 3:9) Bika Yehova sakumuna beno mingi ntangu beno ke na tatamanaka na kuzola bantu mpe na kukumisa bawu bilandi!