Mukanda samu na kuzaba mingi mambu yina ba me zonzila na Mukanda ya lukutakanu luzingu mpe kisalu
© 2024 Watch Tower Bible and Tract Society of Pennsylvania
6-12 MAI
BIMVWAMA YA BIBLIA
BANKUNGA 36-37
‘Kuwa ve nkele samu na bantu ya yimbi’
w17.04-F 10 §4
Yinki ke salama ntangu Kimfumu ya Nzambi ke kwiza yala na ntoto?
4 Wa’ faso bantu ya yimbi ke na talisaka beto mpasi? Ntangu mpeve ya santu twadisaka ntumwa Polo na kupesa mbikudulu ti na ntangu ya beto “bampasi ke lutila,” yandi sonikaka na manima: “Bantu ya yimbi mpe ya luvunu ke lutila na kusala yimbi.” (2 Tim. 3:1-5, 13) Nge ke na talaka kwandi mutindu mbikudulu yayi ke na lunganaka? Mingi na kati ya beto ke na talaka mpasi samu na bamambu yina bantu ya yimbi ke na salaka, mutindu kupesa bantu boma, kuyiina bampangi samu ba ke dibuundu ya nkaka, to kufwa bantu. Mingi na kati ya bawu ke lakisaka pwelele ti ba ke bantu ya yimbi. Ba ya nkaka ke vunaka ti ba zola kusadisa bantu, kasi ya tsyeleka ba ke bantu ya yimbi. Ata ti beto mosi nabunu beto kubwa na maboko ya bawu, mavanga ya bantu ya yimbi ke salaka beto mpasi. Ntangu beto ke kuwaka mutindu ba ke talisaka mpasi na bana ya fioti, biboba, to bantu ya nkaka yina ke ve na ngolo, ya ke lwalisaka bantima ya beto. Bantu ya yimbi yayi ke salaka bamambu mutindu bibulu, to bampeve ya yimbi. (Zaki 3:15) Kilengi samu Biblia ke pesaka beto nsangu ya mbote yina ke zunisaka bantima ya beto.
Yehova ke sakumuná ba yina ke lemvokilaka
10 Ntangu beto ke bumbá nkele, beto ke talisá nzutu ya beto mosi mpasi. Nkele ke mutindu kilo ya nene. Mpe Yehova zola beto zaba kizunu yina ke kwizá ntangu beto ke katulá kilo yina na bantima ya beto. (Tanga Baefeze 4:31, 32.) Yandi ke zonzá na beto na ‘kubika nkele mpe kubika kutomboka.’ (Nku. 37:8) Kulanda malongi yayi ke sadisa beto samu ti kubumba nkele lenda natina beto bampasi na nzutu mpe kubebisa makanisi ya beto. (Bin. 14:30) Ntangu beto ke bumbá nkele na mpangi, ni yandi ve ke talá mpasi. Ya ke mutindu beto me kunwa poison. Ni beto mosi ke tala mpasi. Na yawu, kulemvokila bampangi ke dikabu yina beto ke pesá na beto mosi. (Bin. 11:17) Ya ke salá ti beto vanda na kizunu na makanisi mpe na ntima. Mpe beto ke vanda na ngolo ya kukwenda na mantwala na kisalu ya Yehova.
w03-F 1/12 13 §20
‘Kuzwa kyese ya nge ya kulutila na Yehova’
20 ‘Bantu ya kukuluka ke baka ntoto.’ (Nkunga 37:11a) Kasi banani kele ‘bantu ya kukuluka?’ “Kukuluka” me katuka na nzonzolo yina me sosa kuzonza “kutala mpasi.” Bantu ya kukuluka ke ba yina ke tulaka ntima na Yehova samu yandi yidika bamambu nyonso ya yimbi yina ke kuminaka bawu. ‘Ba ke vanda na kyese mpe na kizunu ya mingi.’ (Nkunga 37:11b) Bubu yayi, beto ke na kuzwaka kizunu ya mingi na kati ya paradiso ya kimpeve yina ke na kati ya kimvuka ya bakristo ya tsyeleka.
Matadi ya ntalu ya kimpeve
it-2-F 341
Mongo
Kima ya yinda, yina ke ninganaka ve, mpe ke vandaka kaka kisika mosi. Ntangu beto ke talaka kima yina ke vandaka kaka kisika mosi mpe ke ninganaka ve, beto ke kanisaka na bamongo. (Iza 54:10; Aba 3:6; fwanisa na Nku 46:2.) Na yawu, ntangu muntu mosi yina sonikaka Bankunga zonzilaka lunungu ya Yehova mutindu ‘bamongo ya Nzambi,’ (Nku 36:6) ya lenda vanda ti, yandi vanda sosa kuzonza ti lunungu ya Yehova ke vandaka kaka. Ya lenda vanda mpe ti ntangu yandi vanda kanisa na yinda ya bamongo, yandi vanda sosa kulakisa mutindu lunungu ya Yehova me lutila lunungu ya bantu. (Fwanisa na Iza 55:8, 9.) Luzabusu 16:20 ke zonzaka ti, na ntangu mbazi mwangisaka kopo ya sambwadi ya nkele ya Nzambi, “myongo vandaka ve.” Ya lenda sosa kuzonza ti bima nyonso, ata bima yina ke yinda mutindu bamongo ke vuuka ve na nkele ya Nzambi.—Fwanisa na Yer 4:23-26.
13-19 MAI
BIMVWAMA YA BIBLIA BANKUNGA 38-39
Kunyonga ve ntangu nyonso samu na masumu yina nge salaka na ntama
“Tala kaka” na bilumbu ya mantwala
12 Tanga 1 Yoane 3:19, 20. Ya me kuminá beto nyonso, na kutala mpasi na ntima, ntangu beto ke kanisá na masumu yina beto salá na ntama to yina beto salá avant na kuzaba Yehova. Ba ya nkaka mpe ke talá mpasi na ntima, ntangu ba ke kanisá dyaka na masumu to ba-ereur yina ba salá na manima ya bateme ya bawu. Makanisi yayi lenda kumina mpe beto. (Rom. 3:23) Ya vrai, beto nyonso ke na nsatu ya kusala kaka mambu ya bien. Kasi “beto nyonso ke bulá mabaku bambala mingi.” (Zaki 3:2; Rom. 7:21-23) Kukanisa ntangu nyonso na mambu yina beto salá ke ve bien, kasi ya lenda sala mpe beto bien. Samu na yinki? Samu ti, kukanisa na ba-ereur yina beto salá na ntama, lenda nata beto na kubongisa ndyatulu ya beto bubu yayi, mpe na kuvutukila dyaka ve yawu.—Ebr. 12:12, 13.
13 Kasi beto lenda kuma na kifu ya kukanisá ntangu nyonso na mambu ya yimbi yina beto salá; ya zola zonza kukontinye na kutala mpasi na ntima ata ntangu beto nyongá masumu ya beto mpe Yehova lemvokilá beto. Ni kulutisa ntangu mingi na kukanisa na masumu yina ke ve bien. (Nku. 31:10; 38:3, 4) Samu na yinki? Beto zonzila mpangi mosi ya kento yina vandá talisa ntima ya yandi mpasi na kukanisá kaka na masumu yina yandi salá na ntama. Yandi zonzá: “Ya ke dyaka ve nesesere na munu na kusala bangolo na kisalu ya Yehova, samu ti mu ke kuzwa ve luzingu ya ntangu nyonso.” Bampangi mingi ke kanisá faso yandi. Samu na yawu, beto zolá katula kifu ya kukanisá ntangu nyonso masumu ya beto ya ntama. Na nyonso, beto kanisa ntete na kilengi ya Satan, si beto mosi me bika Yehova, ata ntangu Yehova lemvokilá beto mpe me manga ve beto!—Tala 2 Bakorinto 2:5-7, 11.
w02-F 15/11 20 §1-2
Yinki beto lenda sala samu ti bilumbu ya luzingu ya beto vanda mfunu na meso ya Yehova?
BILUMBU ya luzingu ya beto lenda talana nkufi. Na mosi ya Bankunga yina yandi sonikaka, Davidi kanisaka na nkufi ya luzingu. Ya nataka yandi na kusambila mutindu yayi: ‘O Yehova, sadisa munu na kuzaba mutindu nsuka ya munu ke vanda mpe yinda ya bilumbu ya munu, samu mu zaba mutindu luzingu ya munu kele nkufi. Ya tsyeleka, nge me kumisaka bilumbu ya munu fioti, mpe ntangu ya luzingu ya munu kele kima ya mpamba na mantwala ya nge.’ Davidi vandaka na nsatu ti mutindu ya yandi ya kuzonza mpe ya kusala bamambu sepelisa ntima ya Yehova ntangu nyonso. Samu na kulakisa ti luzingu ya yandi vandaka na maboko ya Nzambi, yandi sonikaka: ‘Kaka nge kele kivuvu ya munu.’ (Nkunga 39:4, 5, 7) Yehova kuwaka lusambu ya Davidi. Yandi talaka bamambu yina Davidi salaka mpe sakumunaka yandi samu na yawu.
Ya ke pete na kuvanda ntangu nyonso na bamambu ya kusala. Beto lenda bika ti bamambu ya luzingu nata beto na kusala bamambu na mbangu mpe na kusalaka bisalu kilumbu na kilumbu. Nyonso yayi lenda sala ti ntima ya beto vanda ve na kizunu samu ti mambu ke mingi ya kusala, kasi ntangu kele fioti. Na yawu, beto zola vanda na dikanisi mosi na Davidi ya kunata luzingu ya beto mutindu Yehova zola samu ya sepelisa ntima ya yandi. Ntembe ve, Yehova ke talaka mosi na mosi ya beto. Bamvula 3 600 me luta, Yobi, muntu mosi yina vanda kima Nzambi, vandaka na kiminu ti Yehova vanda talaka banzila ya yandi mpe vanda tangaka bisika nyonso yina yandi vanda tulaka makulu ya yandi. Ni na yawu, Yobi yufulaka kyuvu yayi: ‘Wapi mvutu mu lenda pesa kana yandi lomba na munu na kuvutula dyambu?’ (Yobi 31:4-6, 14) Kana beto tula bamambu ya kimpeve na kisika ya ntete na luzingu ya beto, kana beto landa misiku ya Yehova mpe beto sadila ntangu ya beto na mutindu ya mbote, beto ke sala ti bilumbu ya luzingu ya beto vanda mfunu na meso ya Yehova. Beto zonzila mbote-mbote bamambu tatu yayi.
Tunga dyaka kindiku ya nge na Yehova
Sambila Yehova ntangu nyonso. Yehova, Tata ya nge ya zulu zaba ti, samu na makanisi ya yimbi yina nge ke na nwaná na yawu, ya lenda vanda mpasi na nge na kusambila yandi. (Rom. 8:26) Ata faso yina, “[vanda] ya kukwikama na lusambulu.” Zonza na Yehova nsatu ya nge ya kuvutula kindiku na yandi. (Rom. 12:12) Andrej me zonza: “Mu vandá na nsoni, mpe ntima ya munu vandá ve na kizunu. Kasi, na manima ya kusambila, makanisi ya yimbi yayi vandá dyaka ve ngolo. Kizunu vandá vutuka dyaka na ntima ya munu.” Si nge zaba ve yinki ya kuzonza na Yehova, nge lenda tala balusambu yina salá mfumu David na manima ya kubalula ntima, na kati ya Bankunga 51 mpe 65.
Matadi ya ntalu ya kimpeve
Lakisa ti nge ke muntu yina ba lenda tula ntima
16 Kuzaba kukutika nzutu ke mfunu mingi kana beto zola kuvanda bantu yina bampangi lenda tula ntima. Kifu yayi ke sadisá beto na kukanga yinwa ntangu ntima ke sosá kunata beto na kubasisa bamambu yina ba me zonza na beto na kubumba. (Tanga Bingana 10:19.) Ya lenda vanda mpasi na kukutika nzutu ntangu beto ke sololá na bampangi na internet. Kana beto sala ve keba, beto lenda zonza na bantu mingi bamambu yina beto zolá bumba. Mpe ntangu beto ke mwangisá mambu na internet, beto lenda sala ata kima samu bampangi sadila ve yawu na mutindu ya yimbi, to ya talisa ba ya nkaka mpasi. Kuzaba kukutika nzutu ke sadisa mpe beto na kuvanda swi ntangu bambeni ya beto ke sadila mayela ya yimbi, samu na kunata beto na kuzonzila bawu bamambu yina lenda tula luzingu ya bampangi na mpasi. Ya lenda salama ntangu luyalu ke yufulá beto byuvu, kana beto ke vandá na bwala yina ba ke niminá kisalu ya beto, to ba ke kangá beto nzila na kusala yawu. Na mambu yayi to na bamambu ya nkaka, beto lenda sadila dilongi ya Biblia ya ‘kukeba yinwa ya beto na kima ya kukangila yinwa.’ (Nku. 39:1) Ya vanda na kati ya dikanda ya beto, na bandiku ya beto, na kati ya kimvuka to na muntu ni muntu, beto me bonga kuvanda bantu yina ba lenda tula ntima. Mpe samu na kuvanda yawu, beto me bonga kuzaba kukutika nzutu.
20-26 MAI
BIMVWAMA YA BIBLIA BANKUNGA 40-41
Samu na yinki beto me bonga kusadisa bampangi?
w18.08-F 22 §16-18
Ba yina ke kabulaka ke vandaka na kilengi
16 Ba yina ke kabulaka na ntima mosi ke vingilaka ve ba vutula bawu kima. Ni yawu Yesu lakisaka ntangu yandi longaka: “Kana nge zola kusala mukembo, bokila bamputu, bantu ya binama ya kufwa, bikata, mpe bampofo. Nge ke vanda na kyese samu ti bawu lenda kuvutula nge yawu ve.” (Luke 14:13, 14) Muntu mosi yina sonikaka Biblia zonzaka ti ‘muntu yina ke kabulaka ke bakaka lusakumunu.’ Ya nkaka zonzaka ti ‘kyese na muntu yina ke tudilaka muntu ya kukondwa mfunu dikedi.’ (Bin. 22:9; Nku. 41:1) Ya tsyeleka, beto fwana kukabula samu ti kusadisa bampangi ke pesaka kilengi.
17 Ntangu Polo zonzilaka mambu yayi, yina Yesu zonzaka, “kilengi ke vandaka mingi na muntu yina ke kabulaka, kulutila muntu yina ke kuzwaka,” Polo vanda kanisa ve kaka na bima ya kinsuni. Beto lenda pesa mpe bukindi, malongi mpe lusalusu yina bampangi kele na yawu nsatu. (Bis. 20:31-35) Na bamambu yina yandi zonzaka mpe salaka, ntumwa Polo lakisaka beto ti ya ke mfunu na kupesa ntangu, ngolo, mpe luzolo ya beto.
18 Bantu ya mayela yina ke longokaka ndyatulu ya bantu me kwiza tala ti kukabula ke pesaka kilengi. Mukanda mosi me zonza ti, “bantu ke talaka ti kilengi ya bawu ke kumaka mingi ntangu ba ke salaka mambu ya mbote na bampangi.” Bantu ya mayela zonzaka dyaka ti ntangu beto ke sadisaka bampangi, “luzingu ya beto ke lutilaka kuvanda kitoko” samu ti “ba salaka beto na nsatu ya kukabula.” Na yawu, samu na kuvanda na kilengi mpe mavimpi ya mbote, bantu ya mayela ke lombaka na bantu na kusadisaka bampangi. Mambu yayi ke pamusaka ve bantu yina ke ndimaka ti Biblia ke mambu ya Muntu yina yidikaka beto, Nzambi ya beto ya luzolo, Yehova.—2 Tim. 3:16, 17.
w15 15/12 24 §7
Yehova ke sadisa nge
7 Kana beto ke na kimbevo, Yehova ke pesa beto ndwenga mpe ke sadisa beto, mutindu yandi sadisaka bisadi ya yandi ya ntama. Mfumu Davidi sonikaka: ‘Kyese na muntu yina ke tudilaka muntu ya kukondwa mfunu dikebi; Yehova ke vuukisa yandi na kilumbu ya mpasi. Yehova ke keba yandi mpe ke bumba yandi na luzingu.’ (Nku. 41:1, 2) Awa, Davidi vanda sosa ve kuzonza ti bantu ya ntangu ya yandi yina vanda tudila bantu ya kukondwa mfunu dikebi, kufwaka ve. Kasi mambu yina yandi zonzaka vanda lakisa ti Yehova zola sadisa bawu. Na wapi faso? Davidi zonzaka: ‘Yehova ke sadisa yandi na mfulu ya yandi ya maladi; na ntangu ya maladi ya yandi, nge ke soba ya tsyeleka mfulu ya yandi.’ (Nku. 41:3) Ntembe ve, Yehova zabaka bampasi mpe kukwikama ya bisadi ya yandi yina vanda tudila bantu ya kukondwa mfunu dikebi, mpe yandi lenda zimbana ve bawu. Dyaka, Yehova salaka nzutu ya muntu na makoki ya kubeluka yawu mosi na bimbevo.
w17.09 12 §17
Landa ntima ya kyadi ya Yehova
17 Ata ti kulakisa bantu ntima ya kyadi ke mbote samu na beto, beto ke salaka yawu ntete samu na kulanda kifwani ya Yehova mpe kupesa yandi nkembo. Ni na Yehova luzolo mpe ntina ya kyadi ke katukaka. (Bin. 14:31) Yandi me pesa beto kifwani ya kulutila mbote na yina me tadila kulakisa kifu yayi. Beto sala nyonso samu na kulakisa ntima ya kyadi. Kana beto sala yawu, luzolo ke vanda na kati ya beto, mpe beto ke vanda na kizunu na bantu yina ke vandaka kisika mosi na beto.—Gal. 6:10; 1 Yoa. 4:16.
Matadi ya ntalu ya kimpeve
it-1-F 1261
Yehova
Biblia nyonso ke zonzilaka mutindu ba mangilaka luyalu ya Nzambi. Ni yawu salaka ti Yehova vanda na dikanisi ya kusukula nkumbu ya Yandi. Ya zola zonza ve kaka kusukula nkumbu ya Nzambi na bamambu nyonso yina ba vuninaka yandi, kasi mpe ti bantu nyonso na ntoto mpe na mazulu pesa nkumbu yango lukumu. Ya zola zonza mpe ti ba ndima na ntima mosi luyalu ya Yehova, ba zitisa yandi, mpe ba ndima kusadila Nzambi na kilengi nyonso samu ti ba ke zolaka yandi. Na lusambu yina yandi salaka yina ke na kati ya Nkunga 40:5-10, Davidi lakisaka mutindu muntu lenda sala bamambu yayi, mpe mutindu ya kusukula nkumbu ya Yehova. (Tala mutindu ntumwa mosi sadilaka dilongi ya nkunga yango na Kristo Yesu na kati ya Ebr 10:5-10.)
27 MAI–2 JUIN
BIMVWAMA YA BIBLIA BANKUNGA 42-44
Kuzwa bambote ya lukolo ya Yehova
w06-F 1/6 9 §4
Bamambu ya mfunu yina ke na buku ya zole ya Bankunga
42:4, 5, 11; 43:3-5. Ntangu ya nkaka bamambu lenda sala ti beto vanda ntama na bampangi. Kukanisa na bantangu ya kitoko yina beto lutisaka na kimvuka lenda sadisa beto. Ata ti ya ke katula ve beto makanisi ti beto ke kaka beto mosi, ya lenda bambula beto moyo ti Yehova ke na beto mpe ti beto me bonga kutula yandi ntima samu yandi ke vuukisa beto.
w12-F 15/1 15 §2
Sala ti kulongoka ya nge ya Biblia pesa nge kilengi mpe sadisa nge na kusala mambu ya mbote
1 SAMBILA: Kima ya ntete ya kusala ni kusambila. (Nku. 42:8) Samu na yinki? Samu ti kulongoka Biblia ke mosi ya bafaso yina beto ke sambilaka Yehova. Beto me bonga na kulomba na Yehova mpeve ya yandi ya santu samu yandi sadisa beto na kutula makanisi ya beto na kulongoka Biblia. (Luke 11:13) Barbara, yina ke missionnaire na kati ya bamvula mingi me zonza: “Tekila mu tanga to mu longoka Biblia, mu ke sambilaka. Na manima ya kusala lusambu, mu ke talaka ti Yehova ke na munu mpe yandi ke sepelaka na mambu yina mu ke na salaka.” Kusala lusambu tekila beto longoka Biblia ke fungulaka makanisi mpe ntima ya beto samu na kuyamba madya ya kimpeve yina ke na mantwala ya beto.
w16.09-F 5 §11-12
“Kubwisa ve maboko”
11 Balukutakanu ya kimvuka, balukutakanu ya nene mpe balukolo yina ke na kati ya dibuundu ya Yehova ke bwelaka beto ngolo. Malongi nyonso yina beto ke kuzwaka ke nataka beto na kusosa kulungisa bamambu na kimpeve, mpe kusala bamambu mingi na kati ya kimvuka. (Nku. 119:32) Nge ke kwandi na nsatu ya kubika malongi yayi pesa nge ngolo?
12 Yehova sadisaka bana ya Izraele na kununga bantu ya Amaleki na bantu ya Ityopi. Yandi pesaka mpe Nehemi na ba yina vandaka na yandi ngolo ya kumanisa kisalu ya kutunga. Mutindu Nzambi salaka yawu na bawu, yandi ke pesa beto ngolo na kukanga ntima na mantwala ya bankwamusu ya bambeni ya beto, kisayi yina bantu ke salaka ntangu beto ke samunaka mpe bamambu ya nkaka yina ke salaka ti beto vanda na manyongo. (1 Pi. 5:10) Beto ke na vingilaka ve ti Yehova sala bimangu samu na beto. Yina beto me bonga kusala ni kutanga Biblia bilumbu nyonso, kuvanda na balukutakanu mpe kubongisa yawu, kulongoka beto mosi mpe na kati ya dikanda samu na kufulusa yintu mpe ntima ya beto na bamambu ya mbote, mpe kusambila mingi Yehova samu yandi sadisa beto. Beto me bonga kubika ve bima ya nkaka sala ti beto kuzwa ve ngolo yina Yehova ke pesaka na nzila ya bamambu ya kimpeve yayi. Kana nge ke na talaka ti nge ke na bwisaka maboko ya nge na yina me tadila mosi ya bamambu yango, lomba Yehova lubakusu. Nge ke tala ti mpeve ya yandi ‘ke pesa nge bukindi, mpe ya ke pesa nge nsatu mpe ngolo ya kusala bamambu.’ (Flp. 2:13) Kasi, yinki nge lenda sala samu na kukindisa maboko ya bampangi?
Matadi ya ntalu ya kimpeve
it-1-F 417
Yimbwa ya brusu
Biblia ke zonzilaka bambala mingi kifwani ya yimbwa ya brusu. Ntangu Yobi vanda lutisa bantangu ya mpasi, yandi zonzaka ti yandi kumaka ‘mpangi ya bayimbwa ya brusu.’ (Yb 30:29) Samu na kuzonzila mutindu ba nungaka dikanda ya Nzambi na mvita, muntu mosi yina sonikaka Bankunga zonzilaka bantangu ya nkaka na kisika mosi yina mvita salamaka, kisika yina bayimbwa ya brusu vanda vukana samu na kudya ba yina kufwaka na mvita (fwanisa na Nku 68:23), ntangu yandi zonzaka, na kudila nyonso: ‘Nge me bedisa beto kisika yina bayimbwa ya brusu ke zingaka.’ (Nku 44:19) Na 607 T.N.B. Ntangu bantu ya Babiloni bakaka Yeruzalemi, ya salaka ti nsatu ya nene vanda na Yeruzalemi. Ya nataka bamama na kubakila bana ya bawu mosi na ntima ngolo. Yeremia lakisaka luswaswanu yina ke na ntima ngolo ‘ya bantu ya yandi’ na mutindu yina bayimbwa ya kento ya brusuke kipeke bana ya bawu.—Bid 4:3, 10.
3-9 JUIN
BIMVWAMA YA BIBLIA BANKUNGA 45-47
Nzimbu yina ke zonzilaka makwela ya mfumu mosi
w14-F 15/2 9-10 §8-9
Beto yangalala samu na makwela ya Mwana ya Dimeme!
8 Tanga Nkunga 45:13, 14a. Biblia ke zonzaka ti kento yina ke na kwelanaka “kele kitoko mingi” samu na makwela ya Mfumu. Luzabusu 21:2 ke fwanisaka kento yayi na mbanza mosi, Yeruzalemi ya malu-malu, mpe ya ke zonzaka ti yandi “me bongisa nzutu samu na bakala ya yandi.” Mbanza ya mazulu yayi ke na “nkembo ya Nzambi” mpe yandi ke na ngengaka ‘mutindu ditadi ya ntalu, ditadi ya zape yina ke na lezimaka mutindu kitala-tala.’ (Luz. 21:10, 11) Buku ya Luzabusu ke zonzilaka mbote-mbote kitoko ya Yeruzalemi ya malu-malu. (Luz. 21:18-21) Ni na yawu muntu mosi yina sonikaka Bankunga zonzaka ti kento yayi “kele kitoko mingi”! Ya ke na kamwisaka beto ve samu ti makwela yango ke na salamaka na mazulu.
9 Bakala yina ba me natina kento yina yandi ke kwela ke Mfumu Masiya. Yandi me bongisa kento ya yandi, na kukumisaka yandi ‘ya kuvedila mpe na kusukulaka yandi na maza mpe na bampova ya yandi.’ Kento yango ke ‘santu, mpe ba lenda kuzwa ve dyambu ya kusemba yandi.’ (Ef. 5:26, 27) Ya me bonga mpe ti kento yina mfumu yayi ke kwela vanda na bilele ya kitoko samu na mukembo ya makwela. Ya tsyeleka, yandi me lwata mutindu yina. ‘Ba me kumisa bilele ya yandi kitoko na wolo’ mpe ‘ba me nata yandi na mfumu, na bilele yina ba me tunga kitoko.’ Samu na makwela ya Mwana ya Dimeme, “ba me pesa yandi kinkuti ya kitoko ya lino yina ke na kulezima mpe kele ya kuvedila. Kinkuti ya lino kele bisalu ya kudedama ya bantu ya santu.”—Luz. 19:8.
Buku ya Luzabusu ke zonzilá bambote yina ke na vingilá beto
10 Yinki Yehova ke sala ntangu ba ke nwanisa bisadi ya yandi? Yandi zonzaka: ‘Nkele ya munu ya ngolo ke pela.’ (Ezk. 38:18, 21-23) Luzabusu kikapu 19 ke lakisá yinki ke salama na manima. Yehova ke filisa Mwana ya yandi kunwanina bisadi ya yandi, mpe kufwa bambeni ya bawu. Yesu ke kwiza nwana ve kaka yandi mosi. Yandi ke vanda na ‘bimvuka ya basoda ya zulu,’ bambazi ya kukangama na Nzambi, mpe bakristo 144 000. (Luz. 17:14; 19:11-15) Wa’ faso mvita yayi ke manisa? Bantu nyonso mpe bimvuka nyonso yina ke salá yintu ngolo na Yehova ke kufwa ya mbala mosi.—Tanga Luzabusu 19:19-21.
11 Kanisa na kilengi yina ke vanda na bisadi ya Nzambi yina ke vuuka ntangu bambeni ya Nzambi nyonso ke kufwa. Kilengi ya mingi ke vanda mpe na zulu ntangu Babilone ya Nene ke kufwa. Kasi, ya ke na kima ya nkaka yina ke pesa ba yina ke na zulu kilengi ya kulutila. (Luz. 19:1-3) Ya ke mambu ya mfunu mingi yina buku ya Luzabusu ke zonzilaka: ‘makwela ya Mwana ya Dimeme.’—Luz. 19:6-9.
12 Makwela yango ke salama na wapi ntangu? Bakristo 144 000 nyonso ke vukana na zulu tekila Armagedoni banda. Kasi, ni na ntangu yina ve makwela ya Mwana ya Dimeme ke salama. (Tanga Luzabusu 21:1, 2.) Makwela ya Mwana ya Dimeme ke salama na manima ya Armagedoni, ntangu bambeni nyonso ya Nzambi ke kufwa.—Nku 45:3, 4, 13-17.
it-1-F 1041
Mvita
Na manima ya mvita yango, kizunu ke vanda na ntoto samu na bamvula 1 000. Nkunga ke zonzaka ti ‘[Yehova] ke sukisa bamvita na ntoto ya muvimba. Yandi ke buka munduki ya tolo-tolo mpe dikonga. Yandi ke yoka bapusu-pusu ya basoda na tiya.’ Mbikudulu yayi lunganaka ntete ntangu Yehova mwangisaka binwanunu ya bambeni ya Izraele mpe nataka kizunu na bwala ya Izraele. Na Armagedoni, Yesu ke nunga bantu yina ke nwanaka bamvita. Na manima kizunu ya kulunga ke vanda na ntoto nyonso. (Nku 46:8-10) Ba yina ke kuzwa bweso ya kuzinga ntangu nyonso ni ‘ba yina me kumisa bambele ya bawu ya bamvita bima ya kubundudila ntoto, ba yina me kumisa makonga ya bawu bakupu-kupu,’ mpe ba yina ke na ‘longokaka dyaka ve bamvita,’ ‘samu yinwa ya Yehova ya bimvuka ya basoda me tuba.’—Iza 2:4; Mik 4:3, 4.
Matadi ya ntalu ya kimpeve
w17.04-F 11 §9
Yinki ke salama ntangu Kimfumu ya Nzambi ke kwiza yala na ntoto?
9 Yinki Nzambi ke tula na kisika ya bimvuka ya yimbi? Na manima ya Armagedoni, ya ke vanda kwandi na kimvuka yina ke bikana awa na ntoto? Biblia ke zonzaka: “Mutindu Nzambi pesaka nsilulu, beto ke na vingilaka zulu ya malu-malu mpe ntoto ya malu-malu sika ke vwanda mambu ya kudedama mutindu Nzambi ke zolaka.” (2 Pi. 3:13) Zulu ya ntama ke baluyalu ya yimbi, mpe ntoto ya ntama ke bantu yina ba ke na yalaka. Yinki Nzambi ke tula na kisika ya bawu ntangu ba ke vanda dyaka ve? Zulu ya malu-malu kele luyalu ya malu-malu, yina Yesu ke yala na bantu 144 000. Ntoto ya malu-malu kele bantu yina Kimfumu ya Nzambi ke yala. Yesu mpe bantu yina ke yala na yandi ke landa mbote-mbote kifwani ya Yehova, Nzambi yina ke ve na muvusu. (1 Ko. 14:33) Na yawu na “ntoto ya malu-malu” muvusu ke vanda ve. Na yinsi ya lutumu ya Yesu mpe ya ba 144 000, ya ke vanda na bantu ya mbote yina ke twadisa bisalu awa na ntoto. (Nku. 45:16) Kanisa na ntangu yina bimvuka nyonso ya yimbi ke vanda dyaka ve, mpe na ntoto ya muvimba, ya ke vanda kaka na kimvuka mosi ya mbote yina ke beba ata fioti ve!
10-16 JUIN
BIMVWAMA YA BIBLIA BANKUNGA 48-50
Bibuti, beno sadisa bana ya beno na kuvanda na kiminu ya ngolo na dibuundu ya Yehova
Kusadila Yehova na mutindu yina yandi ke zolá ke pesa nge kilengi
11 Beto ke sadilá Yehova ntangu beto ke longoká Biblia mpe ntangu beto ke sadisá bana ya beto na kuzaba yandi. Na Izraele, bantu vandá salá ve kilumbu ya saba. Ya vandá kilumbu ya kukumisa ngolo kindiku ya bawu na Yehova. (Bas. 31:16, 17) Ba yina vandá ya kukangama na Yehova vandá longá bana ya bawu na kuzaba Yehova mpe ntima ya mbote ya yandi. Bubu yayi, beto mpe me bonga kuyidika programme ya beto samu na kuzwa ntangu ya kutanga mpe kulongoka Biblia. Ya ke na kati ya bima yina beto ke salá samu na kusadila Yehova. Ya ke sadisá beto na kuvanda pene-pene na yandi. (Nku. 73:28) Mpe ntangu beto ke longoká kintwadi na bana ya beto, beto ke sadisá bawu na kuvanda na kindiku ya ngolo na Tata ya beto ya mazulu.—Tanga Nkunga 48:13.
w11-F 15/3 19 §5-7
Nge ke na mambu yina lenda pesa nge kilengi
‘Beno tambula zinga-zinga ya Sioni; beno tambula pene-pene ya yawu, Beno tanga bayinzo ya yawu yazulu. Beno tula bantima ya beno na bibaka ya yawu yina ke bumbaka. Beno tala mbote-mbote bayinzo ya yawu ya zulu yina kele na bibaka ya ngolo, Samu beno zonzila yawu na mulonga ya bantu yina ke kwiza na manima.’ (Nku. 48:12, 13) Muntu mosi yina sonikaka Bankunga bakisaka bantu ya Izraele na kutala mbote-mbote Yeruzalemi. Kanisa na yina ya vanda sala bawu ntangu makanda vanda kwenda na mbanza ya santu samu na bafeti yina vanda salama bamvula nyonso, mpe na yina ya vanda sala bawu na kutalaka kitoko ya tempelo. Ya zolaka pesa bawu nsatu ya ‘zonzila yawu na mulonga ya bantu yina ke kwiza na manima.’
Kanisa na mfumu ya kento ya Sheba, yina vanda na maketi-keti na bansangu yina yandi kuwaka na yina me tadila kimfumu ya Salomoni mpe mayela yina vandaka na yandi. Yinki nataka yandi na kusoba makanisi ya yandi? Yandi zonzaka: ‘Munu ndimaka yawu ve tii ntangu mu me kwiza mpe me tala na meso ya munu mosi.’ (2 Ns. 9:6) Ya tsyeleka, yina beto ke talaka na meso ya ‘beto mosi’ lenda simba bantima ya beto.
Wa’ faso nge lenda sadisa bana ya nge na kutala ‘na meso ya bawu mosi’ kitoko yina ke na kati ya kimvuka ya Yehova? Kana Betele ke ve ntama na kisika nge ke vandaka, sala bangolo na kwenda tala yawu. Na kifwani, Mandy na Bethany, kulaka na kisika yina vandaka ntama na Betele na bakilometre 1 500. Kasi, bibuti ya bawu vanda nata bawu kuna bambala mingi. Ba me zonza: “Tekila beto kwenda na Betele, beto vanda kanisaka ti ba yina ke vandaka kuna ke kaka bampangi ya kento na ya bakala ya kukula. Kasi, beto talaka bantwenya yina ke salaka mingi samu na Yehova mpe yina ke sepelaka na kusala kisalu yango. Beto kwizaka bakula ti kimvuka ya Yehova ke sukaka ve kaka kisika yina beto ke vandaka. Ntangu nyonso yina beto vanda katuka kuna, kimpeve ya beto vanda kumaka ngolo.” Samu ti ba talaka na meso ya bawu mosi mutindu kimvuka ya Yehova kele, Mandy na Bethany me kuma mipasoli-nzila. Ba kuzwaka mpe bweso na kusala na Betele samu na mwa ntangu.
w12-F 15/8 12 §5
Beno dyatila na mutindu yina me fwanana na nsangu ya mbote ya Kristo!
5 Kulongoka masolo. Muntu yina ke na nsatu ya kukuma muntu ya bwala mosi, lenda vanda na nsatu ya kuzaba ntete mbote-mbote disolo ya bwala yina. Kaka faso mosi, ba yina ke na nsatu ya kukota na Kimfumu ya Nzambi zola sosa ntete kuzaba yinki ya kele. Beto zonzila kifwani ya bana ya Kora, bisadi ya Yehova na Izraele ya ntama. Ba vanda zolaka Yeruzalemi. Ba vanda zolaka kisika yina lusambu ya tsyeleka vanda salamaka mpe ba vanda sepela na kuzonzila masolo ya mbanza. Ba vanda zolaka kaka ve mutindu ba tungaka bwala, kasi bamambu yina vanda sala ti Yeruzalemi vanda bwala ya mfunu. Yeruzalemi vanda ‘mbanza ya Mfumu ya Nene,’ Yehova, samu ti ni kuna lusambu ya tsyeleka vanda salamaka. Ni kuna mpe ba vanda longaka Musiku ya Yehova. Ni na Yeruzalemi Yehova vanda twadisa dikanda ya yandi mpe vanda lakisa bawu ntima ya mbote. (Tanga Nkunga 48:1, 2, 9, 12, 13.) Kaka faso bawu, nge mpe ke na nsatu ya kulongoka mpe kuzonzila dibuundu ya Yehova awa na ntoto? Kana nge baka ntangu ya kulongoka disolo ya dibuundu ya Yehova mpe mutindu Yehova sadisaka dikanda ya yandi, Kimfumu ya Nzambi ke kuma tsyeleka na meso ya nge mosi. Ya ke pesa nge nsatu ya kusamuna Kimfumu yango na tiya.—Yer. 9:24; Luke 4:43.
Matadi ya ntalu ya kimpeve
it-2-F 799
Bimvwama
Samu dikanda ya Izraele vanda bamvwama, ba vandaka na madya mpe malafu, (1Mf 4:20; Lon 5:18, 19), mpe bimvwama ya bawu vanda sala ti ba tala ve bampasi yina kuvanda ve na bima ke nataka. (Bin 10:15; Lon 7:12) Kasi, ata ti Yehova vanda na nsatu bana ya Izraele vanda na bimvwama na manima ya kisalu ya bawu ya ngolo yina ba ke sala, (fwanisa na Bin 6:6-11; 20:13; 24:33, 34), kasi yandi kebisaka bawu na bampasi yina zola kumina bawu kana ba zimbana ti bimvwama ya bawu katukaka na yandi, mpe ba banda kutula ntima na bimvwama ya bawu. (Kul 8:7-17; Nku 49:6-9; Bin 11:4; 18:10, 11; Yer 9:23, 24) Yandi zonzaka na bawu ti bimvwama ke kaka samu na ntangu fioti (Bin 23:4, 5), ba lenda pesa ve yawu na Nzambi samu na kuvuukisa luzingu ya muntu (Nku 49:6, 7), mpe ya ke ata fioti ve mfunu samu na bantu ya kufwa (Nku 49:16, 17; Lon 5:15). Ba lakisaka bawu ti manyongi ya kulutila samu na kuvanda na bimvwama lenda nata muntu na kusala bamambu ya mayuya, mpe kunyongisa Yehova. (Bin 28:20; fwanisa na Yer 5:26-28; 17:9-11.) Yandi zonzaka mpe na bawu na ‘kukumisa Yehova na bima ya bawu ya ntalu.’—Bin 3:9.
17-23 JUIN
BIMVWAMA YA BIBLIA BANKUNGA 51-53
Bamambu yina ke sadisa nge samu nge sala ve bafoti ya nene
w19.01-F 15 §4-5
Wapi mutindu nge lenda bumba ntima ya nge?
4 Na Bingana 4:23, nzonzolo “ntima” yina ba me sadila zola zonza “kimuntu ya kati,” (Tanga Nkunga 51:6 mpe noti na yisi ya paje.) “Ntima” zola zonza dyaka makanisi, bansatu, mavanga, mpe bamambu ya kati ya ntima. Ya ke kimuntu ya beto ya kati, kasi ve muntu yina beto ke talanaka na ngaanda.
5 Mutindu ya beto ya kubakilaka mavimpi ya beto ke sadisa beto na kuzaba mfunu ya kubumba kimuntu ya beto ya kati. Ya ntete, samu na kuvanda na mavimpi ya mbote, beto me fwana kudya madya ya mbote mpe kusala sport bantangu nyonso. Mutindu mosi, samu na kuvanda na mavimpi ya mbote na kimpeve, beto me fwana kudya madya ya mbote ya kimpeve mpe kulakisa kiminu na Yehova ntangu nyonso. Beto ke lakisaka yawu ntangu beto ke sadilaka bamambu yina beto ke longokaka mpe ntangu beto ke zonzilaka yawu na bantu ya nkaka. (Rom. 10:8-10; Zaki 2:26) Ya zole, kana beto ke tula dikebi ya mingi na kimuntu ya beto ya ngaanda, beto lenda kanisa ti beto kele na mavimpi ya mbote, kasi kati ya beto ke maladi. Mutindu mosi, ntangu beto ke salaka bamambu ya kimpeve yina beto ke salaka bilumbu nyonso, beto lenda kanisa ti kiminu ya beto ke ngolo. Kasi, ya lenda vanda ti beto ke na kulisaka makanisi ya yimbi na kati ya beto. (1 Ko. 10:12; Zaki 1:14, 15) Beto zimbana ve ti Satana ke zolaka beto kanisa mutindu yandi. Wapi mutindu yandi ke salaka yawu? Wapi mutindu beto lenda bumbana?
w15-F 15/6 14 §5-6
Beto lenda vanda na bunkete
5 Faso mosi ya mbote ya kulakisa kukangama ya beto na Yehova ke kuzonzila yandi na lusambu nsatu ya beto ya kukatula makanisi ya yimbi. Ntangu beto ke kwendaka pene-pene na Yehova na nzila ya lusambu, yandi mpe ke kwizaka pene-pene ya beto. Yandi ke pesaka beto mpeve ya santu ya yandi samu ya pesa beto ngolo ya kununga makanisi ya mvindu mpe kuvanda na bunkete. Na yawu, beto zabisa Yehova na lusambu nsatu ya beto ya ngolo ya kusepelisa yandi. (Nku. 19:14) Na kukuluka nyonso, beto ke lombaka kwandi na Nzambi na kutala bantima ya beto kana beto ke na ‘mambu ya yimbi,’ na kifwani makanisi to bansatu ya yimbi, yina lenda nata beto na kusala disumu? (Nku. 139:23, 24) Beto ke lombaka kwandi yandi ntangu nyonso na kusadisa beto na kubumba kukangama ya beto ntangu beto ke kutanaka na bantontolo?—Mat. 6:13.
6 Ntangu ya nkaka ndyatulu ya beto ya ntama to mutindu beto kulaka, salaka ti beto zola bamambu yina Yehova ke yiinaka. Kana ya ke mutindu yina, Yehova lenda sadisa beto na kusoba samu beto bika ve kusadila yandi na mutindu yina yandi ke zolaka. Mfumu Davidi ndimaka yawu. Na manima ya kusala kinsuza na Batsheba, yandi sambilaka Yehova: ‘Yidika munu ntima ya bunkete, mpe tula na kati ya munu mpeve ya malu-malu, mpeve ya ngolo.’ (Nku. 51:10, 12) Nsatu ya kusala disumu lenda vanda ngolo na kati ya beto, kasi Yehova lenda pesa beto ngolo ya kutumama na yandi mpe ya kusala mambu ya mbote. Ata ti makanisi me kula na kati ya ntima ya beto, Yehova lenda twadisa beto na kutumama na misiku ya yandi mpe kuzinga na yawu. Yandi lenda sala ti mambu ya yimbi kuyala ve beto.—Nku. 119:133.
Matadi ya ntalu ya kimpeve
it-1-F 663
Doegi
Muntu mosi ya bwala ya Edomi yina vandaka mvungi ya ntete ya Mfumu Saule, kiyeka ya mfunu ya kukengidilaka. (1Sa 21:7; 22:9) Ya lenda vanda ti Doegi ndimaka dibuundu ya Bazwife. Samu ti ba ‘kangaka yandi na mantwala ya Yehova’ na Nobi, ya lenda vanda samu na nsilulu, to yandi vandaka ve bunkete to ba talaka yandi na maladi ya bwazi, Doegi talaka nganga-nzambi ya nene Ahimeleki yina vanda pesa Davidi dimpa yina ba ke pesaka na Nzambi, mpe mbele ya Goliati. Na manima, ntangu Saule, zonzaka na bisadi ya yandi ti, yandi ke na talaka mutindu ba ke na sosaka kukatula yandi na kimfumu, Doegi zonzaka mambu yina yandi talaka na Nobi. Yandi bokila nganga-nzambi ya nene mpe banganga-nzambi ya nkaka na Nobi mpe na manima ya kuyufula Ahimeleki, Saule lombaka na binati-nsangu na kufwa banganga-nzambi. Samu ba vanda manga na kusala yawu, Doegi, na lutumu ya Saule, kwizaka kufwa banganga-nzambi 85. Na manima ya kusala mambu ya yimbi yina, Doegi mwangisaka Nobi, kufwaka bantu nyonso yina vanda zinga kuna, bantwenya mpe biboba, na bibulu mpe.—1Sa 22:6-20.
Kaka faso ke na lakisaka yawu na mambu yina ke ya kusonama na kubanda ya Nkunga 52, Davidi sonikaka samu na Doegi: ‘Ludimi ya nge, yina ke meno mutindu kima yina ba ke sadilaka samu na kuzenga bansuki, ke kanisaka na mambu ya yimbi mpe ke salaka mambu ya luvunu. Nge ke zolaka mambu ya yimbi kuluta mambu ya mbote, nge ke zolaka luvunu kuluta kuzonza mambu ya lunungu, nge ke zolaka konso nzonzolo yina ke salaka mpasi, O nge ludimi ya luvunu.’—Nku 52:2-4.
24-30 JUIN
BIMVWAMA YA BIBLIA BANKUNGA 54-56
Nzambi ke na nge
w06-F 1/8 22 §10-11
Lakisa ndwenga: Kuwa Nzambi boma
10 Ya vandaka na ntangu yina Davidi kimaka na Gati, mbanza ya Goliati, kisika ya mfumu Akishi. (1 Samuele 21:10-15) Bisadi ya Akishi zonzaka ti yandi ke mbeni ya bwala ya bawu. Yinki Davidi salaka na mpasi ya mutindu yayi? Yandi fungulaka ntima ya yandi na Yehova na lusambu. (Nkunga 56:1-4, 11-13) Na manima, yandi vunaka bulawu samu na kuuvuka. Kasi, yandi zabaka ti ni Yehova sakumunaka mambu yina yandi salaka, mpe vuukisaka yandi. Samu yandi tulaka ntima ya yandi nyonso na Yehova, Davidi lakisaka ti yandi vandaka na boma ya Nzambi.—Nkunga 34:4-6, 9-11.
11 Mutindu Davidi, beto ke lakisaka ti beto ke na boma ya Nzambi, ntangu beto ke tulaka ntima na nsilulu yina yandi salaka ya kusadisa beto na bantangu ya mpasi. Mutindu yandi zonzaka: ‘Pesa nzila ya nge na Yehova. Tudila yandi ntima, mpe yandi ke sadila nge mambu ya mbote.’ (Nkunga 37:5) Ya zola ve kuzonza ti beto sala ata kima, mpe beto vingila Yehova sala nyonso, na manima ya kusambila yandi. Ni yawu ve Davidi salaka. Na manima ya kusambila, yandi sadilaka mayela mpe ngolo yina Yehova pesaka yandi samu na kusosa kuyidika mambu ya yandi. Kasi yandi kanisaka mpe ve ti, yandi zola lenda kaka na yandi mosi. Beto me lunga kulanda kifwani ya yandi. Ntangu mambu ke kubwaka, beto sala nyonso yina beto lenda vanda na ngolo ya kusala, mpe yina beto ke lenda ve, beto bika yawu na maboko ya Yehova. Kasi na bamambu mingi, mambu ya mbote ya kusala ke vandaka kaka kubika nyonso na maboko ya Yehova. Ni na bantangu yina, boma ya Nzambi ke kumaka mambu ya muntu na muntu. Ya ke pesaka bukindi na kubambuka mambu yayi Davidi zonzaka: ‘Kindiku ya ngolo na Yehova kele samu na bantu yina ke kuwaka yandi boma.’—Nkunga 25:14.
cl-F 243 §9
“Ata kima mosi ve ke lenda kukabula beto na luzolo ya Nzambi”
9 Kutala mutindu beto ke kangaka ntima, ke simbaka ntima ya Yehova. (Matayi 24:13) Satana ke na nsatu beto pesa Yehova mukongo. Na yawu, ntangu beto ke vandaka ya kukwikama na Yehova konso kilumbu, beto ke pesaka Yehova mvutu ya kupesa yandi. (Bingana 27:11) Kasi bantangu ya nkaka, ya ke vandaka mpasi na kukanga ntima. Bimbevo, bamambu ya mbongo, manyongi, mpe bamambu ya nkaka lenda sala ti konso kilumbu vanda kilo samu na beto. Kana beto ke mpe na vingilaka kima yina ke ve na lunganaka na mbangu, ya lenda lembisa beto. (Bingana 13:12) Kutala ti beto ke na kangaka ntima na kati ya bamambu ya mpasi ya mutindu yayi, ke lutilaka dyada kusimba ntima ya Yehova. Mfumu Davidi zabaka yawu. Ni na yawu yandi lombaka na Yehova na kubumba mansangasa ya yandi na ‘dibungu ya mpusu ya mbisi.’ Na kivuvu nyonso, yandi bwelaka: ‘Ya ke ve ya kusonama na mukanda ya nge?’ (Nkunga 56:8) Ya tsyeleka, Yehova lenda zimbana ata fioti ve mansangasa mpe bampasi nyonso yina beto ke kangaka ntima na yawu, samu na kuvanda ya kukwikama na yandi. Ya ke mfunu mingi na meso ya yandi.
Luzolo ya Yehova samu na beto ke sadisá beto na kukatula boma
16 Satan zaba ti beto zola ve kufwa. Na yandi, samu na kufwa ve, muntu lenda ndima kusala nyonso, ata kubebisa kindiku ya yandi na Nzambi. (Yobi 2:4, 5) Nyonso yayi ke luvunu! Kasi Satan ke “muntu yina kele [na] ngolo ya kufwa.” Na yawu, yandi ke sadilá boma ya lufwa samu na kunata beto na kubika Yehova. (Ebr. 2:14, 15, nwt-MK) Bantangu ya nkaka, Satan ke natá bantu ya yandi na kuzonza na bisadi ya Yehova ti, ba ke kufwa bawu, si ba vanda kaka ya kukangama na Nzambi. Bantangu ya nkaka mpe, beto lenda vanda na kibemvo ya ngolo yina ke na lombá ti ba kipe beto na mbangu. Satan lenda sadila mambu ya faso yayi samu na kunata beto na kusala bamambu yina misiku ya Nzambi ke niminaka. Na kifwani, ba docteurs to bantu ya dikanda ya beto yina ke sadilá ve Yehova lenda sala beto tiya samu beto ndima menga. To muntu ya nkaka lenda nata beto na kusala bamambu yina ke kwelaná ve na misiku ya Yehova samu beto beluka.
17 Beto zola ve kufwa. Kasi beto zaba ti ata beto kufwa, Yehova ke bika ve kuzola beto. (Tanga Baroma 8:37-39.) Ntangu bandiku ya yandi ke kufwá, Yehova ke zimbaná ve bawu. Samu na yandi, ya ke mutindu ba ke ntete moyo. (Luke 20:37, 38) Yandi ke na nsatu ya mingi ya kuvutula bawu na luzingu. (Yobi 14:15) Yehova futá kima mosi ya ntalu mingi samu beto kuzwa “luzingu ya mvula na mvula.” (Yoa. 3:16, nwt-MK) Beto zaba ti Yehova ke na luzolo ya mingi samu na beto mpe yandi ke kipeke beto. Na yawu, ntangu beto ke belá, to ntangu ba ke sosá kufwa beto, beto ke biká ve Yehova. Beto ke tulá ntima na yandi samu yandi pesa beto bukindi, mayela mpe ngolo. Ni yina salá Valérie na bakala ya yandi.—Nku. 41:3.
Matadi ya ntalu ya kimpeve
it-2-F 646
Makoki ya kuzaba bamambu yina ke kwiza na mantwala
Ntangu Yuda tekisaka Yesu, yandi lungisaka bambikudulu ya Biblia, mpe ya lakisaka ti ya tsyeleka, Yehova na Mwana ya yandi ke na makoki ya kuzaba bamambu yina ke kwiza na mantwala. (Nku 41:9; 55:12, 13; 109:8; Bis 1:16-20) Kasi, kuzonza ti Nzambi yidikaka Yuda samu yandi tekisa Yesu ke vanda ve ya tsyeleka. Bambikudulu zonzaka kaka ti, muntu yina zola tekisa Yesu zola vanda ndiku ya yandi. Kasi, ya zonzaka ve wapi ndiku ya zola vanda. Biblia ke longaka mpe ve ti Nzambi zonzaka na mantwala bamambu yina Yuda zola sala. Malongi ya Nzambi yina ntumwa Polo zonzilaka ni yayi: “Kutula ve muntu maboko na nswalu, mpe kukota ve na masumu ya bantu ya nkaka. Nge fwana kuvwanda ya kuvedila.” (1Ti 5:22; fwanisa na 3:6.) Dyaka, Yesu lutisaka mpimpa ya muvimba na kusambila Tata ya yandi, tekila yandi zonza banani zola vanda bantumwa ya yandi. Ya ke na lakisaka ti yandi vandaka na nsatu ya kusala yawu na ndwenga nyonso, mpe na faso ya mbote. (Lk 6:12-16) Na yawu, ya zola talana kidi-kidi, kana Nzambi yidikaka Yuda samu yandi tekisa Yesu, mpe na kutala malongi ya Biblia, ya zola vanda mutindu Nzambi kotaka na masumu ya yandi.
Nyonso yayi ke na lakisaka ti na ntangu ba soolaka Yuda na kuvanda ntumwa, yandi vandaka ntete na ntima ya mbote. Kasi na manima, yandi bikaka ‘myanzi ya ndudi kula,’ mpe bebisa yandi. Ni yawu sobaka yandi, mpe nataka yandi na kundima Satana twadisa yandi na kisika ya Nzambi. Na yawu, yandi kumaka muyibi, mpe tekaka Yesu. (Ebr 12:14, 15; Yoa 13:2; Bis 1:24, 25; Zk 1:14, 15; tala YUDA No. 4.) Samu yandi sobaka mingi, Yesu bikulaka ti ni Yuda zola tekisa yandi.—Yoa 13:10, 11.