Yehova ke na pesá bima ya mbote na ba yina nyonso ke na vutuká na babwala ya bawu

BAMPANGI MINGI ya kento na ya bakala yina kwenda na babwala yina ke na mbongo mingi, ke na vutuká na babwala ya bawu. Luzolo samu na Yehova mpe samu na bantu ya nkaka, me nata bampangi yayi na kuvutuka na babwala ya bawu kote yina baproklamtere ke ndambu. (Mat. 22:37-39) Wapi basakrifise ba salá, mpe wapi bima ya mbote Yehova pesá bawu? Na kuzaba yawu, beto zonzila masolo yayi me katuka na Cameroun.

“PLASE YA MBOTE SAMU NA KUSALA ‘LAPECHE YA BAMBISI’”

Na 1998 mpangi Onésime biká bwala ya yandi Cameroun samu na kwenda vanda na bwala ya nkaka. Na bwala yina yandi kwendá, yandi salá 14 ans. kilumbu mosi na lukutakanu, yandi kuwá ekzample mosi yina simbá ntima ya yandi. Mpangi yina vandá sala diskur zonzá: “Si bakamarade zole ke na pecheke bambisi na baplase ya kukabuka mpe mosi me kuzwa bambisi kulutila mpangi, kamarade yina me kuzwa bambisi ndambu ke sosa ve kukwenda peche kote yina mpangi me kuzwa bambisi mingi?”

Ekzample yayi pesá Onésime nsatu ya kuvutuka na Cameroun kote yina ke na bantu mingi yina ke na nsatu ya kulongoka Biblia. Kasi yandi vandá na boma. Yandi zolá lenda kwandi kubadila luzingu na Cameroun na manima ya kulutisa bamvula mingi na bwala ya nkaka? Samu na kutala si yandi ke lenda, Onésime kwenda sala ntete bangonda 6 na Cameroun. Na 2012, yandi kwendá vanda mbala mosi kuna.

Onésime me zonza: “Ya vandá mpasi na munu na kumesana na Bantangu ya ngolo mpe luzingu yina ke na Cameroun. Na Salle du Royaume, ba-banc vandá salá mu mpasi na mungongo.” Yandi me bwela na kuseka nyonso: “Kasi bambala nyonso yina mu vandá landa mbote-mbote mambu yina vandá luta na lukutakanu, ba-banc vandá sala dyaka ve mu mpasi.”

Na 2013, Onésime kwelá Géraldine. Géraldine vutuká mpe na Cameroun na manima ya kulutisa bamvula 10 na France. Yinki Yehova pesá na kuple yayi samu ba tulá volonte ya yandi na plase ya ntete na luzingu ya bawu? Onésime me zonza: “Beto salá École pour évangélisateur du Royaume mpe bubu yayi beto ke na Bethel. Mvula yina me luta, na kimvuka ya beto, bantu 20 yina ke longoká Biblia kuzwá bateme. Mu ke na talá ti bubu yayi, mu ke na plase ya bien samu na ‘kupeche bambisi.’” (Mrk. 1:17, 18) Géraldine me bwela: “Mu me kuzwa bima mingi ya mbote yina mu vanda kanisa ve kuzwa.”

KILENGI YA KUSALA BADISIPLE

Judith kwendá vanda na États-Unis, kasi na ntima ya yandi, yandi vandá na nsatu ya kusala mingi na kisalu ya predikasion. Yandi me zonza: “Bambala nyonso yina mu vandá kwendá talá famiye ya munu na Cameroun, na ntangu ya kuvutuka, mu vandá dilá samu mu vandá biká na manima ya munu, bantu mingi yina banda kulongoka Biblia na munu.” Kasi, Judith vandá ezite na kuvutuka na Cameroun. Yandi vandá na salere ya bien yina vandá sadisa yandi na kukipe papa yandi yina vanda na maladi na Cameroun. Kasi, yandi tulá konfianse ya yandi na Yehova mpe vutuká na Cameroun. Yandi me ndima ti luzingu yina yandi vandá natá na États-Unis, ke ve faso mosi na yina yandi ke na natá na bwala ya yandi. Yandi sambilá Yehova sadisa yandi na kusala bachanjema na luzingu ya yandi. Mpe mambu yina ntwadisi mosi ya sirkonskripsion na kento ya yandi zonzilá yandi pesá yandi ngolo.

Ntangu yandi ke na kanisá na bambote nyonso yina yandi kuzwá, Judith me zonza: “Na kati ya bamvula tatu kaka, me kuzwa kilengi ya kunata bantu yiya na bateme.” Judith me kumá pionier spesial. Bubu yayi, yandi na bakala ya yandi Sam-Castel ke na kisalu ya sirkonskripsion. Kasi yinki kuminá papa ya yandi? Yandi na famiye ya yandi kuzwá Hopital mosi na bwala ya nkaka, yina ndimá kubaka charje ya operasion ya papa ya yandi. Operasion yango simbá.

TALA DIBOKO YA YEHOVA

Mpangi na nkumbu ya Victor kwenda vanda na Canada. Na manima ya kuwá mambu yina artikle mosi ya Yinzo ya Kengidi vandá zonza samu na kifu ya kulandá lekole ya yinda, yandi biká kukwenda na universite, mpe yandi longoká kisalu ya maboko. Yandi me zonza: “Ya sadisá mu na kuzwa kisalu na mbangu mpe na kusala kima yina mu vandá zola kusala depuis ntama, kuvanda pionier.” Na manima, Victor kwelá Caroline, mpe bawu zole kwenda lutisa mwa ntangu na Cameroun. Mpe ntangu ba kwendá tala Bethel, bampangi pesá bawu kilengi ya kusala na Cameroun. Victor me zonza: “Beto vandá ve na rezon ya kumanga invitasion ya kitoko yina, mpe depuis ntangu yina, beto yidiká luzingu ya beto samu na kuvutuka kusala na Cameroun.” Ata Caroline vandá ve na sante ya mbote, ba baká desizion ya kuvutuka na bwala.

Victor na Caroline kumá bapionier ya ntangu nyonso, mpe ba vandá longoka Biblia na bantu mingi. Mbongo yina ba bumbá sadisa bawu na kusosa ve ntete kisalu ntangu ba kumá. Kisalu yina ba vandá sala na Canada, vandá sadisa bawu na kukontinye kisalu ya bawu ya pionier na Cameroun. Wapi bima ya mbote ba kuzwá? Ba kuzwá kilengi ya kusala École pour évangélisateur du Royaume, mpe ba kumá bapionier spesial. Bubu yayi ba ke na salá kisalu ya kutunga. Victor me zonza: “Samu beto biká luzingu ya mbote yina beto vandá na yawu, beto talá diboko ya Yehova.”

KILENGI YA KUSADISA BANTU YA NKAKA NA KUZWA BATEME

Na 2002, Alain tangá mukanda, Jeunes gens, qu’allez-vous faire de votre vie ?, ntangu yandi vandá kota na mosi ya ba-universite ya Allemagne. Mambu yina yandi tangá simbá ntima ya yandi. Mpe na 2006, yandi salá École de formation ministérielle. Na manima ba filisá yandi na bwala ya yandi na Cameroun.

Na Cameroun, Alain kuzwá kisalu mosi yina vandá baká ve yandi ntangu mingi. Na manima ya mwa ntangu, yandi kuzwá kisalu yina vandá na salere ya bien, kasi yandi vandá na boma ti, ya nata yandi na kupreche dyaka ve mingi. Na yawu, ntangu ba zonzá na yandi na kukuma pionier spesial, yandi eziteke ve na kundima. Mfumu ya yandi ya kisalu sosa kupesa yandi salere ya mingi, kasi Alain mangaka. Na manima, yandi kwelá Stéphanie. Stéphanie vandá vanda ntete na France. Wapi bamambu ya mpasi yandi bwabaná ntangu yandi vutuká na Cameroun?

Stéphanie me zonza: “Mu kuzwá mwa bamaladi ya fioti mpe nzutu ya munu vandá manga bamadya ya nkaka, kasi mu lenda kuzwa mwa manganga yina vandá sadisa munu.” Yehova pesá kuple yayi bima ya mbote samu na kiminu ya bawu. Alain me zonza: “Ntangu beto kwendá preche na mwa bwala mosi na nkumbu ya Katé, beto kuzwá bantu mingi yina vandá sosa kulongoka Biblia. Na manima, beto bandá kulongoka na bawu na telephone. Zole ya bawu kuzwá bateme. Mpe grupe mosi funguká kuna.” Stéphanie me bwala: “Ya vandá vrai kilengi samu na beto, na kusadisa bantu na kukwenda tii na bateme. Kusala awa, me sadisa beto na kuzwa kilengi yayi bambala mingi.” Bubu yayi, Alain na Stéphanie ke na kisalu ya sirkronskripsion.

“BETO ME SALA YINA BETO ZOLÁ SALA”

Gisèle kuzwá bateme, ntangu yandi vandá sala lekole ya kubasika doktere na Italie. Luzingu yina vandá nata kuple ya pionier yina longoká Biblia na yandi, pesak’ yandi nsatu ya kusala mingi na kisalu ya predikasion. Na yawu, ntangu yandi manisá lekole ya yandi, Gisèle kumá pionier ya ntangu nyonso.

Gisèle vandá na nsatu ya kusala mingi na kisalu ya pionier na Cameroun, kasi yandi vandá na boma. Yandi me zonza: “Mu vandá na boma ti guvernema ya Italie ndima dyaka ve mu vutuka kuna. Mpe boma ya kukabuka na bakamarade ya munu mpe bantu ya famiye ya munu yina vandá vanda kuna.” Ata faso yina, na Mai 2016, Gisèle kwendá na Cameroon.

Na manima, yandi kwelaná na Léonce, mpe filiale ya Cameroun filisá bawu zole na Ayos, tewritware mosi yina ke kaka na proklamtere fioti.

Wa’ faso luzingu ya bawu vandá na Ayos? Gisèle me zonza: “Bambala mingi courant vandá kwendá mpe beto vandá lenda ve kucharje batelefone ya beto. Bantangu mingi, beto vandá ve na kisalu. Mu longoká kulamba na bakuni, mpe beto vandá kwendá teká maza ntama na mpimpa na ba-torche.” Yinki sadisá kuple yayi na kukontinye kupreche kuna? Gisèle me bwela: “Mpeve ya Yehova, kuwisana na kati ya kuple, mpe ngolo na mwa mbongo yina bakamarade na bantu ya famiye vandá pesá beto.”

Gisèle ke kwandi na kilengi yina yandi vutuká na bwala ya yandi? Yandi me zonza: “Mu ke na kilengi ya mingi. Na kubanda, bamambu nyonso yayi vandá lembisa munu, kasi ntangu beto banda kutala bamambu na faso ya nkaka, munu na bakala ya munu, beto kwiza zaba ti ni kisalu yayi beto zola sala. Kiminu mpe kikamarade ya beto na Yehova me kula.” Na manima Léonce na Gisèle salá École pour évangélisateur du Royaume, mpe bubu yayi ba ke bapionier spesial ya ntangu fioti (temporaire).

Faso pechere ya bambisi, na kuraje nyonso, ke talá ve boma ya kukwenda kote yina bambisi ke mingi, ba yina ke vutuká na babwala ya bawu samu na kupreche ke salá basakrifise samu na kusadisa bantu na kuzaba Yehova. Yehova lenda zimbana ata fioti ve ba yina nyonso ke lakisá luzolo samu na nkumbu ya yandi. (Neh. 5:19; Ebr. 6:10) Si nge ke vandá na bwala ya nkaka mpe nge zaba ti na bwala ya nge ba ke na nsatu ya proklamatere, nge lenda vutuka kwandi? Si nge sala yawu, Yehova ke pesa nge bima mingi ya mbote.—Bin. 10:22.