Wa’ faso beto lenda vanda ndiku ya tsyeleka?

YA ME kuminaka nge na kutala ti nge ke kaka nge mosi na kati ya bamambu ya mpasi yina nge ke na kutanaka na yawu? Samu beto zaba ti beto ke na zingaka na ntangu yina ‘bamambu ke mpasi mingi,’ ya lenda kumina beto na kuvanda ya kulemba mpe na kutala ti beto ke kaka beto mosi. (2 Tim. 3:1) Kasi na ntangu beto ke kutanaka na bamambu ya mpasi, ya ke na bantu yina lenda sadisa beto. Biblia ke zonzaka ti ya ke mfunu na kuvanda na bandiku ya tsyeleka ntangu beto ke lutisaka “bantangu ya mpasi.”—Bin. 17:17.

MUTINDU BANDIKU YA TSYELEKA LENDA SADISA BETO

Ntumwa Polo salaka nzyetolo ya kisalu ya yandi ya kimisionere na bampangi ya nkaka mpe ba sadisaka yandi na bafaso mingi. (Kol. 4:7-11) Ntangu ba kangaka Polo na boloko na Roma, yandi vandaka ve na muswa ya kusala bamambu ya nkaka. Kasi bampangi ya yandi sadisaka yandi na kusala yawu. Ntumwa Polo kuzwaka bima yina yandi vandaka na yawu nsatu, yina bampangi ya kento na ya bakala ya Filipi filisaka na nzila ya Epafrodite. (Filp. 4:18) Tyshike sadisaka Polo na kukwenda bika mikanda ya yandi na bimvuka mingi. (Kol. 4:7) Na lubakusu ya bampangi ya yandi, ntumwa Polo lendaka kukindisa bimvuka ata ti yandi vandaka na boloko to ntangu ba niminaka yandi na kubasika na yinzo ya yandi. Bubu yayi, wa’ faso beto lenda vanda ndiku ya tsyeleka?

Bubu yayi, ya ke na bampangi ya kento na ya bakala yina ke lakisaka mutindu bandiku ya tsyeleka lenda sadisa bampangi. Elisabet, mupasuli-nzila mosi na Espagne, ke na zonzaka mutindu mpangi mosi ya kento sadisaka yandi na kati ya bantangu ya mpasi. Na ntangu ba kwizaka tala mama ya Elisabet na maladi ya cancer yina kudyaka yandi nzutu mpe yandi kumaka pene-pene na lufwa. Mpangi yango sadilaka Biblia na ba messages yina yandi filisaka yandi. Ya kindisaka Elisabet mingi. Elisabet me zonza: “Ntangu mu vanda tala ba messages ya yandi, mu vandaka na kilengi ya kuzaba ti ya ke na muntu yina ke na kanisaka na munu, ya vanda pesa munu ngolo ya kusala yina mu vandaka na nsatu ya kusala mpe kubwisa ve maboko.”—Bin. 18:24.

Ntangu beto ke sadisaka bampangi ya beto ya kento na ya bakala na kukwendaka kitwandi na bawu na kisalu ya kusamuna to na balukutakanu, ya ke kumisaka dyaka kindiku ya beto na bawu ngolo. Na kifwani, nge lenda nata kwandi mpangi mosi ya kento to ya bakala ya kukula na lukutakanu to kusamuna na yandi? Kana nge sala yawu, nge ke kindisa bampangi, bawu mpe ke kindisa nge. (Rom. 1:12) Kasi, ya ke na bakristo ya nkaka yina me kotaka yinzo. Wa’ faso beto lenda sadisa bawu?

VANDA NDIKU YA TSYELEKA SAMU NA BA YINA KOTAKA YINZO

Na kifwani, ya ke na bampangi ya nkaka yina lenda vanda ve na beto kintwadi na balukutakanu na Yinzo ya Kimfumu samu ti ba ke na maladi ya ngolo. Beto tala kifwani ya David, yina ba talaka na maladi ya cancer. Yandi lutisaka bangonda kuluta 6 na kunwa manganga ya cancer. Ntangu nyonso yina yandi vanda kunwa manganga, yandi na kento ya yandi Lidia, vanda lutisa balukutakanu na nzila ya internet.

Wa’ faso bampangi ya kimvuka sadisaka bawu? Na manima ya konso lukutakanu, ba yina vandaka na Yinzo ya Kimfunu vanda sala bangolo ya kubokila David na Lidia na nzila ya internet. Dyaka, ntangu David na Lidia vanda pesa bamvutu na lukutakanu, bampangi ya kimvuka vanda filisa bawu ba messages na manima ya lukutakanu samu na kukindisa bawu. Yinki ya salaka bawu? Ya salaka ti ba tala ti bampangi ya kimvuka ke zolaka bawu.

Yinki beto lenda sala samu na kusamuna na ba yina kotaka yinzo? Beto lenda sala mwa bansobolo na programme ya beto samu na kusamuna na bawu. Kusala yawu ke lakisa ti beto me zimbana ve bawu. (Bin. 3:27) Na kifwani, nge lenda bongisa programme ya nge samu na kusamuna na bawu na nzila ya telefone to kusonika mikanda. Bakuluntu lenda yidika bamambu samu lukutakanu ya kisalu ya kusamuna vanda mpe na nzila ya internet. David na Lidia sepelaka mingi ntangu bakuluntu ya kimvuka ya bawu salaka yawu. David me zonza: “Lusambu mpe kuvanda kintwadi samu na mwa ntangu fioti na bampangi na lukutakanu ya kusamuna pesaka beto ngolo mingi.” Bantangu ya nkaka nge lenda lomba na bampangi yina kotaka yinzo, kana nge lenda nata mulongoki ya nge ya Biblia na yinzo ya bawu samu na kulongoka Biblia na bawu.

Kulutisa ntangu na bampangi yina kotaka yinzo, ke sadisa beto na kuzaba bawu mpe bifu ya mbote yina ke na bawu. Ya ke sala ti beto kuma pene-pene na bawu. Na kifwani, ntangu nge ke na kuwaka faso bawu ke na longaka muntu Biblia mpe kusadisa muntu yango na kukuma pene-pene na Yehova, ya ke sala ti nge pesa dyaka bawu buzitu. Nge lenda kuzwa bandiku ya malu-malu, ntangu nge ke sadisaka bampangi ya kento na ya bakala na kisalu ya kusamuna mpe na balukutakanu.—2 Kor. 6:13.

Ntangu ntumwa Polo vanda na mambu ya mpasi, ndiku ya yandi Tituse kwizaka tala yandi mpe sadisaka yandi na kuvanda na kilengi. (2 Kor. 7:5-7) Ya ke mbote ya kuzonza na mpangi bamambu yina ke pesa bawu ngolo, kasi kifwani ya Tituse ke na longaka beto ti beto lenda pesa bawu ngolo ntangu beto ke lutisaka ntangu na bawu mpe kusala bamambu yina ke sadisa bawu.—1 Yoa. 3:18.

VANDA NDIKU YA TSYELEKA NA NTANGU YA BANKWUMUSU

Bampangi ya kento na ya bakala ya bwala ya Russie, ke kifwani ya mbote na yina me tadila kusalasana. Beto tala mambu yina Sergey na kento ya yandi Tatyana kutanaka na yawu. Na manima ya kusala muvusu na yinzo ya bawu, basoda nataka Sergey na Tatyana na commissariat samu na kuyufula bawu byuvu. Tatyana vandaka muntu ya ntete yina basoda bikaka mpe yandi vutukaka na yinzo. Sergey me zonza: “Ntangu [Tatyana] vutukaka na yinzo, mpangi mosi ya kento yina vandaka na bukindi kwizaka tala yandi. Na manima, bampangi ya kento na ya bakala kwizaka samu na kusadisa beto na kuyidika bima yina basoda mwangisaka.”

Sergey me bwela: “Mu ke zolaka mingi Bingana 17:17, yina ke zonzaka: ‘Ndiku ya tsyeleka ke zolaka konso ntangu, Mpe yandi kele mpangi yina me butuka samu na bantangu ya mpasi.’ Na kati ya bankwamusu, mu vanda na nsatu ti bandiku ya munu sadisa munu mingi. Mu kwizaka tala ti bamambu yina ke na Bingana 17:17 ke ya tsyeleka. Na nzila ya bandiku, Yehova sadisaka munu na kuzwa lubakusu yina mu vandaka na yawu nsatu.”a

Ntangu beto ke lutisaka bantangu ya kulutila mpasi, beto ke vandaka na nsatu ti bandiku ya beto sadisa beto. Beto ke vanda dyaka na nsatu ya bawu ya kulutila, na ntangu ya mpasi ya nene. Na yawu, beto sala bangolo ya beto nyonso samu na kuvanda ndiku ya tsyeleka bubu yayi.—1 Pi. 4:7, 8.