Kukengidila bakento​—Yina Biblia ke zonzaka

Madhua yina ke vandaka na bwala ya Inde me zonza: “Ntangu mu vandaka mwana ya fioti, yaya ya munu ya bakala vanda bulaka munu mpe vanda zonzilaka munu bamambu ya ngolo. Na manima ya makwela ya munu, ya kumaka ni bokilo ya munu ya kento. Yandi na bakala ya yandi vanda nyokolaka munu. Na bawu, mu vandaka mutindu mwa mwana ya bawu ya kisalu. Mu kumaka na nsatu ya kufwa nzutu.”

Kimvuka yina ke tadilaka mambu ya mavimpi na yinza nyonso (Organisation mondiale de la santé) me zonza: “Na yinza nyonso, ba ke nyokolaka bakento.” Ya me zonza ti kana ya ke na bakento tatu na bwala, ya lenda vanda ti mosi na kati ya bawu, ba me bulaka yandi to ba me nataka yandi na ngolo na kuvukisa nzutu na luzingu ya yandi.

Kana ya me kuminaka nge, nge lenda vanda na boma ti kisika ni kisika nge ke kwenda ya kumina dyaka nge, ba finga nge, ba bula nge to ba nata nge na ngolo na kuvukisa nzutu. Kutala ti bakento ke bwabanaka bamambu ya faso yayi, kaka samu ba ke bakento lenda nata nge na kukanisa ti samu na bantu mingi ‘bakento ke bantu ya mpamba.’ Kasi bakento ke kwandi mfunu samu na Nzambi?

Wapi mutindu Nzambi ke tadilaka bakento?

Dilongi ya Biblia: ‘Nzambi yidikaka bawu bakala na kento.’ —Kubanda 1:27.

Yina ya zola zonza: Nzambi yidikaka bakala na kento. Yandi zolaka ti bawu nyonso zole kuzwa buzitu. Yandi ke na vingilaka dyaka ti bakala “[zola] kento ya yandi mutindu yandi ke zolaka nzutu ya yandi mosi,” yandi bakila ve yandi na ngolo to kusosa kutula meso na mambu nyonso yina yandi ke salaka, kuzonzila ve yandi na faso ya ngolo to kutalisa yandi mpasi. (Baefeze 5:33; Bakolose 3:19) Ntembe ve, Nzambi zola ti ba kengidila bakento.

Maria yina ke vanda na Argentine me zonza: “Ntangu mu vandaka mwana ya fioti, bantu ya dikanda ya beto vanda nataka munu na ngolo na kuvukisa nzutu. Ntangu mu kumaka na bamvula 17, mfumu ya munu ya kisalu zonzaka na munu ti yandi ke katula munu na kisalu kana mu vukisa ve nzutu na yandi. Ntangu mu kulaka, bakala ya munu, bibuti ya munu mpe bampangi ya quartier vanda zitisaka ve munu. Kasi ntangu mu kwizaka longoka kuzaba Yehova,b muntu yina yidikaka beto, mu kwizaka zaba ti yandi ke zitisaka bakento. Mu kwizaka ndima ti yandi ke zolaka munu mpe ti mu ke mfunu na meso ya yandi.”

Yinki lenda sadisa nge na kubeluka?

Dilongi ya Biblia: ‘Ya kele na ndiku yina ke kangamaka ngolo kuluta mpangi.’—Bingana 18:24.

Yina ya zola zonza: Ndiku ya mbote lenda sadisa nge. Na yawu, kana nge ke na nsatu ya kuzonza mpe kana nge me tala ti ya ke sadisa nge, zonzila mambu yina ke na nge na muntu yina nge ke tulaka ntima.

Elif yina ke vandaka na Turquie me zonza: “Na kati ya bamvula 20, mu zonzilaka ata muntu ti ba nataka munu na ngolo na kuvukisa nzutu. Ya salaka ti ntangu mu vanda kula, mu vanda vandaka ntangu nyonso na mawa, boma mpe na manyongi. Kasi ntangu mu zonzilaka yawu na muntu yina tekaka munu dikutu, mu kuzwaka kizunu na ntima.”

Dilongi ya Biblia: ‘Beno pesa manyongo nyonso ya beno na Nzambi, samu ti yandi ke sadisaka beno.’—1 Piere 5:7.

Yina ya zola zonza: Ntangu nge ke sambilaka, Nzambi ke kuwaka nge. (Nkunga 55:22; 65:2) Samu yandi ke kipeke nge, yandi lenda sadisa nge na kutala ti nge ke mfunu mingi.

Ana yina ke vandaka na Belize me zonza: “Kulongoka kuzaba Yehova sadisaka munu na kubanda kubeluka na mputa ya nene yina vandaka na munu na ntima. Awa mu lenda sambila Yehova mpe kuzonzila yandi mambu nyonso yina ke na ntima ya munu. Yandi ke mutindu ndiku yina me zaba mbote-mbote mambu yina ya ke na salaka munu.”

Nzambi ke sala kwandi ti ba nyokola dyaka ve bakento?

Dilongi ya Biblia: ‘Yehova ke zenga mambu na lunungu samu na mwana yina me kondwa tata mpe bantu yina ba me petemisa, samu muntu ya ntoto kupesa bawu dyaka boma ve.’—Nkunga 10:17, 18.

Yina ya zola zonza: Na mwa ntangu fioti, Nzambi ke manisa mambu nyonso ya yimbi, ya vanda kusala bampangi bamambu ya yimbi mpe kunyokola bakento.

Roberta yina ke vandaka na Mexique me zonza: “Kuzaba ti Yehova ke manisa na mwa ntangu fioti bamambu nyonso ya yimbi yina ba ke salaka na bakento mpe na bana ya bakento vanda samu na munu mutindu manganga yina ke belusaka. Ya pesaka munu kizunu ya ntima.”

Na kuzaba kivuvu yina Biblia ke pesaka, samu na yinki nge lenda tula ntima na bansilulu ya Biblia mpe faso Bambangi ya Yehova ke sadisaka bantu na manima ya Biblia bubu yayi, nge lenda lomba na muntu yina me pesa nge mukanda yayi na kuvutuka samu na kusolola na nge.

Baka disolo yayi na mukanda yina nge lenda basisa.