Bamambu yina Biblia ke zonzá na yina me tadila luzingu ya Yesu ke kwandi ya tsyeleka?

Mvutu ya Biblia

Luke, mosi ya ba yina soniká Biblia, soniká mpe bamambu ya disolo ya luzingu ya Yesu, yandi zonzá: “mu sosaka na kuzaba mbote-mbote mambu nyonso yina salamaka katuka mbandukulu.”—Luke 1:3.

Bantu ya nkaka ke zonzá ti na siècle ya yiya (4) N.B. bantu sobá masolo ya luzingu ya Yesu yina vandá na kati ya buku ya Matayi, Marke, Luke mpe Yoane.

Kasi na kubanda ya siècle ya 20, bantu talá kitini mosi ya buku ya Yoane na Egypte. Bubu yayi ba ke bokilak’ yawu Papyrus Rylands 457 (P⁵²) mpe ba bumbak’ yawu na biblothèque ya John Rylands, na Manchester, na Angleterre. Papyrus yango vandá kitini yina ke na Yoane 18:31-33, 37, 38 na Biblia ya bubu yayi.

Ni yawu ke masonoko ya kulutila ntama na kati ya masonoko ya Ngeleke (Grec) ya bakristo yina ke bubu yayi. Bantu mingi ya mayela ke kanisá ya lenda vanda ti ba sonikak’ yawu na mvula 125 N.B, ya zola zonza bamvula kukuma 25 na manima ya mukanda yina Yoane soniká yandi mosi. Bamambu yina ke na mukanda yango yina ba kuzwá me kwelana mingi na bamambu yina ke na masonoko yina ba talá na manima.