Nzambi yidikaka bakala na kento ya ntete

Yehova salaka bilanga na kisika yina ba vanda bokilaka Edeni. Bilanga yango vandaka ya kufuluka na bafololo, bayinti mpe bibulu. Na manima, Nzambi sadilaka ntoto samu na kuyidika bakala ya ntete, Adami. Yandi fulaka mupepe na bambombo ya yandi. Nge zaba yinki salamaka? Adami kumaka muntu ya moyo! Yehova zonzaka na Adami na kukipe bilanga ya Edeni mpe na kupesa bankumbu na bibulu nyonso.

Yehova pesaka Adami musiku mosi ya mfunu. Yandi zonzaka na Adami: ‘Nge lenda kudya bambuma ya bayinti nyonso, kaka mbuma ya yinti mosi nge zolaka kudya ve. Kana nge kudya mbuma ya yinti yina, nge ke kufwa.’

Na manima, Yehova zonzaka: ‘Mu ke yidika sadisi samu na Adami.’ Yandi lalisaka Adami pongi ya ngolo, mpe na manima yandi bakaka mukwa mosi ya mbanzi ya yandi samu na kuyidika kento samu na Adami. Nkumbu ya yandi vandaka Eva. Adami na Eva kumaka dikanda ya ntete. Yinki ya salaka Adami na ntima ntangu yandi talaka kento ya yandi? Adami vandaka na kilengi mingi mpe yandi zonzaka: ‘Tala yina Yehova me sala na nzila ya mukwa ya munu! Ee! Yandi ke muntu faso munu.’

Yehova zonzaka na bawu na kubuta bana mpe na kufulusa ntoto. Yehova zolaka ba sala kintwadi na kilengi nyonso samu na kukumisa ntoto nyonso paradiso to kisika ya kitoko, kaka faso bilanga ya Edeni. Kasi bamambu salamaka ve faso yina. Samu na yinki? Beto ke zonzila yawu mbote-mbote na disolo yina ke landa.