Lusambu ya Ana samu na kuzwa mwana

Bakala mosi ya Izraele na nkumbu ya Elkana vandaka na bakento zole, Ana na Penina. Kasi yandi vanda zolaka mingi Ana. Penina vanda sekaka Ana ntangu nyonso samu yandi vandaka ve na bana mpe Penina vandaka na bana mingi. Bamvula nyonso, Elkana vanda nataka dikanda ya yandi na kwenda sambila na tabernakle na Shilo. Kilumbu mosi, ntangu ba vandaka kuna, yandi kwizaka tala ti Ana, kento yina yandi vanda zolaka mingi, vandaka na manyongi. Yandi zonzaka: ‘Mulemvo, kudila ve Ana. Nge ke na munu. Mu zola nge.’

Na manima, Ana basikaka mpe kwendaka sambila. Yandi vanda lenda ve kukanga kudila ntangu yandi vanda bondila Yehova na kusadisa yandi. Yandi salaka nsilulu yayi: ‘Yehova, kana nge pesa munu mwana ya bakala, mu ke pesa nge yandi mpe yandi ke sadila nge luzingu ya yandi nyonso.’

Nganga-nzambi Eli talaka Ana vanda dila na ndinga ya yisi mpe yandi kanisaka ti Ana kunwaka malafu mingi. Ana vutulaka: ‘Ve, mfumu ya munu, mu ke ve ya kunwa malafu. Mu ke na mambu yina ke na kwamisaka munu mingi mpe mu ke na sambilaka Yehova na mambu yango.’ Eli kwizaka tala ti mambu yina yandi zonzaka vandaka ve ni yawu mpe yandi zonzaka na Ana: ‘Bika Nzambi pesa nge yina nge ke na yawu nsatu.’ Ana kuzwaka ngolo mpe yandi kwendaka. Mvula mosi lungaka ve, Ana kuzwaka mwana ya bakala mpe yandi bokilaka yandi Samuele. Nge lenda meka kukanisa na kilengi yina vandaka na Ana?

Ana zimbanaka ve nsilulu yina yandi salaka na Yehova. Ntangu Samuele bikaka kunwa mabene, Ana nataka yandi na kwenda sala na tabernakle. Yandi zonzaka na Eli: ‘Lusambu yina mu salaka na Yehova, vandaka samu na kuzwa mwana yayi. Mu me defisa yandi na Yehova luzingu ya yandi nyonso.’ Bamvula nyonso Elkana na Ana vanda kwendaka talaka Samuele mpe vanda natinaka yandi kazaka ya malu-malu. Yehova pesaka dyaka Ana bana tatu ya babakala mpe zole ya bakento.