Kimfumu ya kukabuka

Kizunu vandaka na Izraele ntangu nyonso yina Salomo vanda sambila Yehova. Kasi Salomo kwelaka bakento mingi ya bayinsi ya nkaka, bakento yango vanda sambilaka biteki. Malembe-malembe, Salomo mpe bandaka kusambila biteki. Yehova dasukaka. Yandi zonzaka na Salomo: ‘Kimfumu ke katuka na dikanda ya nge mpe ya ke kabuka na bitini zole. Mu ke pesa kitini ya kulutila nene na mosi ya bisadi ya nge, mpe dikanda ya nge ke yala kaka na zulu ya kitini ya fioti.’

Yehova salaka kima ya nkaka samu na kulakisa pwelele mukanu ya yandi. Mosi ya bisadi ya Salomo, Yeroboami, vanda sala nzyetolo. Na nzila yandi kutanaka na mbikudi Ahiya. Ahiya pasulaka kinkuti ya yandi na bitini 12 mpe yandi zonzaka na Yeroboami: ‘Yehova me katula kimfumu ya Izraele na maboko ya dikanda ya Salomo mpe yandi ke kabula yawu na bitini zole. Baka bitini 10 ya kinkuti yayi mu me pasula samu nge ke vanda mfumu na zulu ya makanda 10.’ Salomo kuwaka mambu yayi mpe yandi sosaka kufwa Yeroboami. Na yawu, Yeroboami kimaka na Ezipte. Na kati ya bantangu, Salomo kufwaka mpe mwana ya yandi Rehoboami kumaka mfumu. Na manima, Yeroboami talaka ti ya vandaka ntangu ya mbote na kuvutuka na Izraele.

Bakuluntu ya Izraele zonzaka na Rehoboami: ‘Kana nge bakila bantu na mutindu ya mbote, ba ke vanda ya kukangama na nge.’ Kasi bandiku ya Rehoboami yina vandaka bantwenya mutindu yandi, zonzaka na yandi: ‘Nge me lunga kuvanda na mambu ya ngolo! Kumisa kisalu ya bawu ngolo mingi!’ Rehoboami landaka malongi ya bandiku ya yandi. Yandi kumaka na ntima ya yimbi, mpe bantu balukilaka yandi. Ba tulaka Yeroboami mfumu ya makanda 10 yina kumaka ya kuzabana mutindu kimfumu ya Izraele. Makanda zole ya nkaka kumaka ya kuzabana mutindu kimfumu ya Yuda, mpe ba bikanaka ya kukangama na Rehoboami. Ntangu yayi makanda 12 ya Izraele kumaka ya kukabuka.

Yeroboami vanda zola ve ti bantu ya yandi kwenda sambila na Yeruzalemi yina vandaka na kati ya kimfumu ya Rehoboami. Nge zaba samu na yinki? Yeroboami vandaka na boma ti ba balukila yandi mpe ba kwenda pesa diboko na Rehoboami. Na yawu, yandi yidikaka biteki zole ya bana ya bangombe na wolo mpe zonzaka na bantu: ‘Yeruzalemi ke ntama. Beno lenda sambila awa.’ Bantu bandaka kusambila biteki yina mpe ba bandaka dyaka kuzimbana Yehova.