KILESO 49
Mfumu mosi ya kento ya ntima ya yimbi me kuzwa masembo
Na fenetre ya yinzo ya yandi na Izraele, mfumu Ahabi vandaka na makoki ya kutala bilanga ya vinu ya bakala mosi na nkumbu ya Nabote. Ahabi vandaka na nsatu ya kuzwa bilanga ya vinu yina, mpe yandi mekaka kusumba yawu na Nabote. Kasi Nabote mangaka kutekisa yandi yawu, samu Musiku ya Yehova vanda pesaka ve nzila ya kutekisa ntoto yina muntu kuzwaka na dikabu. Ahabi budilaka kwandi Nabote maboko samu yandi salaka mambu ya mbote? Ve. Samu yandi vandaka ya kudasuka mingi, yandi vanda manga kubasika na kisika yina yandi vanda lalaka, mpe yandi vanda manga kudya.
Kento ya Ahabi, mfumu ya kento Yezabele zonzaka na yandi: ‘Nge ke mfumu ya Izraele. Nge lenda kuzwa kima nyonso yina nge ke na yawu nsatu. Mu ke kuzwa ntoto yayi samu na nge.’ Yandi sonikaka mukanda na bakuluntu ya mbanza. Yandi zonzaka na bawu na kuvunina Nabote mambu ti yandi me loka Nzambi mpe ba kufwa yandi na matadi. Bakuluntu salaka mambu yina Yezabele zonzaka mpe na manima Yezabele zonzaka na Ahabi: ‘Nabote me kufwa. Bilanga ya vinu ke ya nge.’
Katula Nabote, Yezabele kufwaka mpe bantu ya nkaka yina salaka ve ata kima. Yandi kufwaka bantu mingi yina vanda zolaka Yehova. Yandi vanda sambilaka biteki mpe salaka bamambu ya nkaka ya yimbi. Yehova vanda tala bamambu nyonso ya yimbi yina Yezabele vanda sala. Yinki Yehova zolaka sala yandi?
Na manima ya lufwa ya Ahabi, mwana ya yandi ya bakala Yehorami kumaka mfumu. Yehova filisaka bakala mosi na nkumbu ya Yewu samu na kusemba Yezabele na dikanda ya yandi.
Yewu vandaka na zulu ya pusu-pusu ya yandi mpe vanda kwenda na Izraele kisika yina Yezabele vandaka. Yehorami kwizaka na pusu-pusu ya yandi samu na kukutana na Yewu mpe yufulaka yandi: ‘Kizunu ke kwandi na kati ya beto?’ Yewu vutulaka: ‘Kizunu lenda vanda ve ntangu nyonso yina mama ya nge Yezabele, ke tatamana na kusala bamambu ya yimbi.’ Yehorami mekaka kubalula pusu-pusu ya yandi samu na kukima. Kasi Yewu kubulaka yandi dyonga mpe yandi kufwaka.
Na manima Yewu kwendaka na yinzo ya Yezabele. Ntangu Yezabele kuwaka ti Yewu vanda kwiza, yandi bongisaka kizizi ya yandi, yandi yidikaka bansuki mpe yandi vanda vingila na fenetre. Ntangu Yewu kumaka, Yezabele pesaka yandi mbote na faso yina vandaka ve na buzitu. Yewu zonzaka na ndinga ya ngolo na bisadi ya Yezabele yina vandaka ya kutelama pene-pene na kento yayi: “Beno losa yandi!” Ba losaka Yezabele, yandi kubwaka na ntoto mpe yandi kufwaka.
Na manima ya mambu yayi, Yewu kufwaka bana ya babakala 70 ya Ahabi mpe yandi katulaka lusambu ya Baale na bwala nyonso. Nge me tala ti Yehova zaba mambu nyonso mpe na ntangu yina me lunga, yandi ke sembaka bantu yina ke salaka mambu ya yimbi?
“Dikabu yina muntu bakaka ntete na lukoso ke vanda ve lusakumunu na nsuka.”—Bingana 20:21