Yozyase vanda zolaka Musiku ya Nzambi

Yozyase kumaka mfumu ya Yuda ntangu yandi vandaka na bamvula 8. Na ntangu yina, bantu vanda salaka maji mpe vanda sambilaka biteki. Ntangu Yozyase kumaka na bamvula 16, yandi longokaka faso ya kusambila Nzambi na mutindu ya mbote. Ntangu yandi kumaka na bamvula 20, yandi bandaka kumwangisa biteki mpe bisika ya minkayulu na bwala nyonso. Mpe ntangu yandi kumaka na bamvula 26, yandi bongisaka bamambu samu ba yidika tempelo ya Yehova.

Na tempelo, nganga-nzambi ya nene Hilikiya kuzwaka rulo ya Musiku ya Yehova. Ntangu ya nkaka ya vandaka rulo yina Moyize yandi mosi sonikaka. Shafani yina vandaka secrétaire ya mfumu, nataka rulo na Yozyase mpe bandaka kutanga Musiku na ndinga ya ngolo. Ntangu Yozyase vanda kuwa, yandi kwizaka zaba ti bantu me tumama ve na Yehova na kati ya bamvula mingi. Mfumu Yozyase zonzaka na Hilikiya: ‘Yehova me dasukila beto mingi. Kwenda solola na yandi. Yehova ke zonza na beto yinki beto me lunga kusala.’ Yehova pesaka mvutu na nzila ya mbikudi ya yandi ya kento Hulda: ‘Bantu ya Yuda me bika munu. Ba ke semba bawu, kasi ya ke vanda ve na ntangu yina Yozyase ke mfumu, samu Yozyase kele ya kukuluka.’

Ntangu mfumu Yozyase kuwaka nsangu yina, yandi kwendaka na tempelo mpe bokilaka bantu nyonso. Na manima yandi tangilaka bawu Musiku ya Yehova na ndinga ya ngolo. Yozyase na bantu, salaka nsilulu ya kutumama na Yehova na ntima ya bawu nyonso.

Ba salaka ve mukembo ya Pake na kati ya bamvula mingi. Kasi ntangu Yozyase tangaka na kati ya Musiku ti mukembo ya Pake me lunga kusalama bamvula nyonso, yandi zonzaka na bawu: ‘Beto ke sala mukembo ya Pake samu na Yehova.’ Na manima Yozyase bongamaka samu na kupesa minkayulu mingi mpe yandi yidikaka bamambu samu na kutula bantu yina ke yimbaka na tempelo. Mpe dikanda nyonso salaka mukembo ya Pake mpe mukembo ya mampa yina vandaka ve na levire. Ya salaka bilumbu 7. Kubanda na bilumbu ya Samuele tii na ntangu ya Yozyase, mukembo ya Pake ya mutindu yayi vandaka ntete ve nabunu ya salama. Ya tsyeleka Yozyase vanda zolaka Musiku ya Nzambi. Nge mpe ke sepelaka na kulongoka mambu yina me tadila Yehova?