Gabriele me kwiza tala Maria

Elizabeti vandaka na mpangi mosi ya kento na nkumbu ya Maria yina vanda zingaka na mbanza ya Nazareti ya Galile. Maria na Yozefi, yina vandaka kisadi-mabaya, wisanaka na kukwelana. Ntangu kivumu ya Elizabeti kumaka na bangonda 6, mbazi Gabriele basikilaka Maria. Yandi zonzaka na yandi: ‘Mbote Maria! Yehova me sakumuna nge mingi.’ Maria bakulaka ve mambu yina Gabriele zonzaka. Gabriele zonzaka na yandi: ‘Nge ke kuzwa kivumu mpe nge ke buta mwana ya bakala, nge ke pesa yandi nkumbu Yesu. Yandi ke vanda Mfumu. Kimfumu ya yandi ke vanda samu na ntangu nyonso.’

Maria vutulaka: ‘Kasi nabunu mu vukisa nzutu na bakala. Wa’ faso mu ke buta?’ Gabriele zonzaka: ‘Ya ke ve na mambu yina Yehova lenda sala ve. Mpeve ya santu ke kulumuka na zulu ya nge, mpe nge ke buta mwana ya bakala. Mpangi ya nge Elizabeti kele mpe na kivumu.’ Na manima Maria zonzaka: ‘Mu ke kisadi ya Yehova. Bika bamambu salama kaka mutindu nge me zonza.’

Maria kwendaka tala Elizabeti. Yandi vanda zingaka na bwala mosi na zulu ya bamongo ya fioti. Ntangu Maria pesaka Elizabeti mbote, mwana yina vandaka na kivumu ya yandi ninganaka ngolo. Elizabeti fulukaka na mpeve ya santu, mpe yandi zonzaka: ‘Maria, Yehova me sakumuna nge. Mu me kuzwa bweso ya kuyamba na yinzo ya munu mama ya Mfumu ya munu.’ Maria zonzaka: ‘Mu ke na kembilaka Yehova na ntima ya munu nyonso.’ Maria vandaka na yinzo ya Elizabeti na kati ya bangonda tatu mpe na manima, yandi vutukaka na yinzo ya yandi na Nazareti.

Ntangu Yozefi kuwaka ti Maria kumaka na kivumu, yandi sosaka kumanga yandi. Kasi mbazi basikilaka yandi na ndosi mpe zonzaka na yandi: ‘Kuvanda ve na boma ya kukwela Maria. Yandi me sala ve mambu ya yimbi.’ Na yawu, Yozefi kwelaka Maria mpe nataka yandi na yinzo ya yandi.