Yesu me vumbula Lazare na lufwa

Yesu vandaka na bandiku tatu yina vanda zingaka na Betani. Ya vandaka Lazare na bampangi ya yandi zole ya bakento, Maria na Marte. Kilumbu mosi, ntangu Yesu vandaka na simu ya nkaka ya Yordani, Maria na Marte filisaka yandi nsangu mosi ya mpasi: ‘Lazare ke na kimbevo ya ngolo. Mulemvo kwiza mbangu!’ Kasi Yesu kwizaka ve na mbala mosi. Yandi salaka dyaka bilumbu zole kuna. Na manima, yandi zonzaka na bilandi ya yandi: ‘Beto kwenda na Betani. Lazare ke na lalaka, mpe mu ke kwenda kuna samu na kuvumbula yandi.’ Bantumwa zonzaka na yandi: ‘Kana Lazare ke na lalaka, ya ke sadisa yandi na kubeluka.’ Na yawu, Yesu zonzilaka bawu pwelele: ‘Lazare me kufwa.’

Ntangu Yesu kumaka na Betani, bilumbu 4 lutaka banda kilumbu yina ba zikaka Lazare. Bantu mingi kwizaka samu na kukindisa Marte na Maria. Ntangu Marte kuwaka ti Yesu ke na kwizaka, yandi kwendaka bwabana yandi na mbangu nyonso. Yandi zonzaka: “Mfumu, kana nge vandaka awa, mpangi ya munu zolaka kufwa ve.” Yesu vutulaka yandi: ‘Mpangi ya nge ke zinga dyaka. Nge me ndima kwandi yawu, Marte?’ Yandi zonzaka: ‘Mu ke na kundima ti yandi ke vutuka na luzingu na mvumbukulu ya bantu ya kufwa.’ Yesu vutulaka yandi: “Mu ke mvumbukulu mpe luzingu.”

Na manima Marte kwendaka zonza na Maria : ‘Yesu kele awa.’ Maria kimaka mbangu samu na kukwenda na sika ya Yesu, mpe bantu mingi landaka yandi. Maria fukamaka na makulu ya Yesu, mpe vanda bika ve kudila. Yandi zonzaka: ‘Mfumu, kana nge vandaka awa, mpangi ya beto zolaka kufwa ve!’ Yesu talaka mutindu ya vanda sala Maria mpasi, yandi mpe bandaka kudila. Ntangu bantu mingi talaka ti Yesu vanda dila, ba zonzaka: ‘Ya tsyeleka yandi vanda zolaka Lazare mingi.’ Kasi ba ya nkaka vanda yufula: ‘Samu na yinki yandi me vuukisa ve ndiku ya yandi?’ Yinki Yesu ke sala?

Yesu kwendaka na ndyamu. Ya vandaka na ditadi ya nene yina vanda kanga kisika ya kukotila. Yandi zonzaka: ‘Beno katula ditadi.’ Marte zonzaka na yandi: ‘Kasi ya me sala bilumbu yiya! Nzutu ya yandi me banda kubasika nsunga.’ Ata faso yina, ba katulaka ditadi, mpe Yesu sambilaka: ‘Tata, matondo na kuwa munu. Mu zaba ti nge ke kuwaka munu ntangu nyonso. Kasi mu ke na zonzaka na ndinga ya ngolo, samu bantu nyonso yayi zaba ti ni nge me filisa munu.’ Na manima yandi zonzaka na ndinga ya ngolo: “Lazare, basika!” Mambu ya ngitukulu salamaka: Lazare basikaka na ndyamu, mpe ba vandaka ya kukanga nzutu ya yandi nyonso na bitende. Yesu zonzaka: “Beno fungula yandi mpe beno bika yandi, yandi kwenda.”

Mingi ya bantu yina talaka mambu yayi kumaka na kiminu na Yesu. Kasi bantu ya nkaka kwendaka zonzila yawu na Bafarize. Banda kilumbu yina, Bafarize vanda sosa kufwa Lazare mpe Yesu. Yuda Iskayote, mosi ya bantumwa 12 kwendaka tala Bafarize na mansweki mpe yufulaka bawu: ‘Beno ke futa munu yikwa kana mu sadisa beno na kusimba Yesu?’ Ba wisanaka na kupesa yandi bambongo 30 ya bisengo, mpe Yuda bandaka kusosa nzila samu ba kanga Yesu na Bafarize.