Yesu me basikila bilobi-mbisi

Ntangu Yesu talanaka na bantumwa ya yandi, na manima Piere bakaka mukanu ya kwenda loba bambisi na Mubu ya Galile. Toma, Zaki, Yoane, mpe bilandi ya nkaka kwendaka na yandi. Mpimpa nyonso ba lobaka, kasi ba kuzwaka ata mbisi.

Na suka-suka, ba talaka bakala mosi ya kutelama pene-pene na maza. Bakala yango zonzaka na bawu na ndinga ya ngolo: ‘Beno me kuzwa bambisi?’ Ba vutulaka: “Ve!” Bakala yango zonzaka na bawu: “Beno losa mpwasa na lweka ya diboko ya bakala ya bwatu.” Ntangu ba salaka yawu, mpwasa vandaka ya kufuluka na bambisi, ba vanda lenda ve kukotisa yawu na bwatu. Na mbala mosi Yoane kwizaka zaba ti ya vandaka Yesu mpe yandi zonzaka: “Ya ke Mfumu!” Na mbala mosi, Piere kubwaka mbangu na maza samu na kusabuka na simu. Bilandi ya nkaka landaka yandi na bwatu.

Ntangu bawu nyonso kumaka na simu, ba talaka dimpa na mbisi na tiya. Yesu zonzaka na bawu na kunata mwa bambisi na yina ba kuzwaka samu ba kudya. Mpe yandi zonzaka dyaka: ‘Beno kwiza mpe beto kudya.’

Ntangu ba manisaka kudya, Yesu yufulaka Piere: ‘Nge zola kwandi munu kuluta kisalu ya kuloba bambisi?’ Piere zonzaka: ‘Ee, Mfumu, nge zaba ti mu zola nge.’ Yesu zonzaka: “Dikisa bana ya munu ya mameme.” Yesu yufulaka dyaka yandi: ‘Piere, nge zola munu?’ Piere zonzaka: ‘Mfumu, nge zaba ti mu zola nge.’ Yesu zonzaka: “Kengidila mameme ya munu ya fioti.” Yesu zonzaka dyaka na yandi na mbala ya tatu. Piere kumaka na mawa. Yandi zonzaka: ‘Mfumu, nge zaba bamambu nyonso. Nge zaba ti mu ke zolaka nge.’ Yesu zonzaka: “Dikisa mameme ya munu ya fioti.” Mpe Yesu bwelaka: “Tatamana na kulanda munu.”