Mukanda ya Kimvuka ya Bantwadisi

Bampangi ya luzolo,

Beto bisadi ya Yehova, beto ke zolaka Dyambu ya yandi Biblia. Beto ke na kundima ti ya ke zonzaka masolo ya tsyeleka, ya ke pesaka malongi ya mbote, mpe ya ke lakisaka pwelele ti Yehova zola bantu. (Nkunga 119:105; Luke 1:3; 1 Yoane 4:19) Beto ke na nsatu mingi ya kusadisa bantu ya nkaka na kulongoka matsyeleka yina ke na kati ya Biblia. Na yawu, beto ke na kilengi ya kubasisa buku yayi, Benda bileso na masolo ya Biblia. Bika beto zonzila nge mwa fioti mutindu buku yayi me salama.

Ntete-ntete beto me basisa buku yayi samu na bana. Kasi, ya lenda sadisa mpe bantu ya kukula yina ke na nsatu ya kulongoka mingi na yina me tadila Biblia. Na yawu, samu Biblia ke buku ya bantu nyonso, ntembe kele ve, beto nyonso ke kuzwa bamambu ya mbote na kutala bileso ya yawu yina lenda sadisa beto na kuvanda na kilengi ya tsyeleka.

Buku yayi ke zonzilaka masolo ya Biblia kubanda ntangu ba yidikaka muntu. Beto me sala bangolo samu masolo yango vanda pwelele, ya vanda nkufi mpe ya landasana na mulonga mutindu Biblia ke zonzilaka yawu.

Kasi buku yayi ke zonzilaka ve kaka masolo ya Biblia. Ba me bongisa bisoni mpe bizizi na mutindu yina ke kumisa masolo ya Biblia kitoko mpe ya ke sadisa beto na kuvanda na kisika ya bantu yina ya ke na zonzilaka.

Buku yayi ke sadisa beto na kutala ti Biblia ke buku yina ke zonzilaka bantu yina tumamaka na Yehova mpe bantu yina tumamaka ve na yandi. Mpe ya ke sadisa beto na kubenda bileso na bamambu yina kuminaka bawu. (Baroma 15:4; 1 Bakorinto 10:6) Buku yayi ke ya kukabuka na bitini 14. Na kubanda ya konso kitini, ba me lakisa na bunkufi bileso yina beto lenda benda.

Kana nge ke na mwana, beno lenda tanga kileso mosi beno zole mpe kusolola na bizizi ya kileso yango. Na manima beno zole lenda tanga baverse ya Biblia yina ke na kati ya kileso yango. Sadisa mwana ya nge na kukwelisa mambu yina yandi ke na tangaka na Biblia na mambu yina beno ke na longokaka na buku yayi. Beto lenda sala mpe mutindu yina samu na kusadisa muntu ya kukula na kuzaba na bunkufi nsangu ya Biblia.

Beto ke na kivuvu ti buku yayi ke sadisa bantu nyonso ya ntima ya mbote, ya vanda bana to bantu ya kukula, na kulongoka mambu yina Biblia ke zonzaka mpe kusadila bileso ya yawu na luzingu ya bawu. Na yawu, bawu mpe ke lenda kusadila Yehova mutindu bantu ya dikanda ya yandi yina yandi ke zolaka mingi.