KILESO 20

Mutindu bamambu ke tambulá na kati ya dibuundu ya Yehova

Mutindu ya ke na talanaka na mukanda

Yehova ke ve Nzambi ya muvusu. (1 Bakorinto 14:33) Ni na yawu beto mpe bisadi ya yandi zolá vanda ve na muvusu. Wa’ faso bamambu ke salamá na kati ya dibuundu ya Yehova? Yinki mosi na mosi na kati ya beto lenda sala samu bamambu tambula na faso ya mbote?

1. Nani ke mfumu ya dibuundu ya Yehova?

“Kristo kele yintu ya dibuundu.” (Baefeze 5:23) Katuka na zulu yandi ke na twadisá kisalu ya bisadi ya Yehova ya yinza nyonso. Samu na kusala yawu, yandi ke sadilá “kisadi ya kukwikama mpe ya mayela”—kimvuka ya fioti ya bakuluntu yina ke ya kuyela na kimpeve. Beto ke bokilá mpe kimvuka yango Kimvuka ya Bantwadisi. (Tanga Matayi 24:45-47.) Kaka faso bantumwa mpe bakuluntu na Yeruzalemi na siècle ya ntete, Kimvuka ya Bantwadisi ke lakisá nzila ya kulanda na dikanda ya Yehova ya ntoto nyonso. (Bisalu 15:2) Kasi ya zola zonza ve ti ba kele bamfumu ya dibuundu ya beto. Samu na yinki? Samu ti bawu mpe ke sambilá mpe ke longoká mbote-mbote Biblia, samu na kuzaba yinki Yehova me zola ba sala, mpe ba ke tumamá na Yesu na ntima mosi.

2. Banani kele bakuluntu mpe yinki ba ke salaka?

Bakuluntu kele bakristo ya babakala yina ke ya kuyela na kimpeve. Ba ke sadilá Biblia samu na kulonga, kukipe mpe kukindisa bisadi ya Yehova. Ba ke futá ve bawu samu na kisalu yina ba ke salaka. Kasi, ba ke salaka yawu “na ntima mosi mutindu Nzambi ke zolaka; samu na kuzwa mbongo ve, kasi na luzolo ya kulutila.” (1 Piere 5:1, 2) Ya ke na bampangi ya bakala na kati ya kimvuka yina ke sadisá bakuluntu, ba ke bokilá bawu basadisi, mpe na manima, ba lenda kuma bakuluntu kana ba me lungisa bamambu yina Biblia ke lombá na bakuluntu.

Kimvuka ya Bantwadisi ke soolá bakuluntu ya nkaka na kuvanda bantwadisi ya circonscription (kikunku ya bimvuka). Bantwadisi ya circonscription ke kwendá talá bimvuka mingi, samu na kukindisa mpe kupesa bawu malongi. Ni bawu mpe ke tulá bakuluntu mpe basadisi na kati ya bimvuka. Samu na yawu, ba ke sadilá mambu yina Biblia ke lombá na bakuluntu mpe na basadisi.—1 Timote 3:1-10, 12; Tite 1:5-9.

3. Yinki konso muntu na kati ya dibuundu ya Yehova me bonga kusala?

Konso muntu na kati ya dibuundu ya Yehova ke “kembila nkumbu ya Yehova.” Na yawu, konso Mbangi ya Yehova ke yimbá, ke pesá bamvutu na balukutakanu ya kimvuka, mpe ke salá nyonso yina yandi lenda sala samu na kusamuna mambu ya Yehova.—Tanga Nkunga 148:12, 13.

SOSA KUZABA MBOTE-MBOTE

Tala wapi mutindu ya mfumu Yesu kele, wa’ faso bakuluntu ke salá bangolo samu na kulanda kifwani ya yandi, mpe wa’ faso beto nyonso lenda sala kintwadi na Yesu mpe na bakuluntu.

4. Yesu kele mfumu yina ke na ntima ya mbote

Yesu me lomba na beto na kusala mambu mosi ya mfunu. Tanga Matayi 11:28-30, mpe na manima beto zonzila byuvu yayi:

Wa’ faso Yesu me zola beto tadila bumfumu ya yandi?

Wa’ faso bakuluntu lenda landa kifwani ya Yesu? Tala VIDEO.

VIDEO: Bakuluntu me sadisa bampangi na manima ya kuningana ya ntoto na Népal (4:56)

Biblia ke lakisá pwelele wa’ faso bakuluntu lenda sala kisalu ya bawu.

Tanga Izaya 32:2 na 1 Piere 5:1-3, mpe na manima beto zonzila byuvu yayi:

Yinki ya ke salá nge na kuzaba ti mutindu Yesu, bakuluntu ke salá bangolo samu na kukindisa beto?
Wapi yina ke bafaso ya nkaka yina bakuluntu ke landá kifwani ya Yesu?

5. Bakuluntu ke longá beto na kifwani ya bawu

Wa’ faso Yesu me zola ti bakuluntu bakila kisalu ya bawu na kati ya kimvuka? Tala VIDEO.

VIDEO: Bakuluntu beno pesa kifwani! (7:39)

Yesu pesá misiku na ba yina ke twadisá kimvuka, samu bawu sala yawu na faso ya mbote. Tanga Matayi 23:8-12, mpe na manima beto zonzila kyuvu yayi:

Yinki ya ke na salá nge na kutala ti mambu yina Biblia ke zonzá samu na bakuluntu, ke ve ni yina bamfumu ya mabuundu ke salaka?

A. Kuluntu mosi ke na kipeke bansatu ya yandi ya kimpeve, mpe ya dikanda ya yandi. 1. Yandi ke na sambilá tekila yandi banda. 2. Yandi na kento ya yandi ke na longá mwana ya bawu mambu ya Biblia.

B. Kuluntu yina kaka, na kento ya yandi, me kwenda tala mpangi mosi ya kento yina ke na maladi na lupitalu.

Bakuluntu ke bumbá ngolo kiminu ya bawu mpe ya makanda ya bawu
Bakuluntu ke kipeke bantu nyonso na kati ya kimvuka
Bakuluntu ke samuná mingi
Bakuluntu ke longaka. Ba ke tulá diboko samu na kubongisa kisika ya balukutakanu, mpe na bisalu ya nkaka

6. Ya ke mbote na kusala kintwandi na bakuluntu

Biblia ke lakisá beto mfunu ya kusala kintwandi na bakuluntu. Tanga Baebre 13:17, mpe na manima beto zonzila kyuvu yayi:

Samu na yinki Biblia ke lombá na beto na kutumama na ntima nyonso na ba yina ke twadisá kimvuka?

Tanga Luke 16:10, mpe na manima beto zonzila kyuvu yayi:

Samu na yinki ya ke mfunu na kutumama na bakuluntu ata na bamambu ya fioti-fioti?

BANTU YA NKAKA KE ZONZAKA: “Kuvanda na dibuundu yina nge ke sambilá ke ve mfunu. Nge lenda sambila Nzambi na faso ya nge.”

Kuvukana na bampangi samu na kusambila Yehova ke natina nge wapi bambote?

NA BUNKUFI

Yesu ke mfumu ya dibuundu ya Yehova. Beto ke sepelá na kusala kintwadi na bakuluntu, samu ti ba ke kindisá beto mpe ke longá beto na bifwani ya bawu ya mbote. Beto nyonso ke tumamá kintwandi na mfumu ya beto, Yesu.