Wa’ faso bakuluntu ke lakisaka luzolo mpe ntima ya kyadi na ba yina me sala disumu ya ngolo?

1. Yinki lenda salama ntangu muntu me sala disumu ya ngolo?

NA DISOLO yina me luta, beto talaka mutindu ntumwa Polo yidikaka mambu ya disumu ya ngolo yina salamaka na Korinto. Muntu yina salaka disumu ya ngolo mangaka kubalula ntima, mpe ba katulaka yandi na kimvuka. Kasi, verse ya yintu dyambu ke na lakisaka ti Nzambi lenda nata muntu na kubalula ntima. (Rom. 2:4) Wa’ faso bakuluntu lenda sadisa muntu yina me sala disumu ya ngolo na kubalula ntima?

2-3. Yinki beto lenda sala kana beto me zaba ti mpangi mosi me sala disumu ya ngolo, mpe samu na yinki?

² Kana bakuluntu me zaba ve mbote-mbote yina me nata muntu na kusala disumu, ba ke lenda ve kusadisa yandi. Kana beto me zaba ti mpangi mosi me sala disumu ya ngolo, beto ke kanisa kwandi ti ba ke katula yandi na kimvuka? Yinki beto me lunga kusala? Kima ya ntete ya kusala ni kuzonza na yandi na kukwenda tala bakuluntu samu ba sadisa yandi.​—Iza. 1:18; Bis. 20:28; 1 Pi. 5:2.

³ Kasi, kana yandi me manga kukwenda tala bakuluntu, yinki beto lenda sala? Beto me fwana kukwenda tala beto mosi bakuluntu samu na kuzonza na bawu, mpe samu yandi kuzwa lubakusu yina yandi ke na yawu nsatu. Ya ke faso ya kulakisa luzolo na mpangi ya beto ya kento to ya bakala samu ti bakuluntu ke sadisa yandi. Kana muntu yina me sala disumu ya ngolo ke na tatamanaka kusala mambu ya yimbi, yandi ke bebisa kindiku ya yandi na Yehova. Yandi lenda bebisa mpe nkumbu ya kimvuka. Na yawu, kusala kima ke kulakisa luzolo na Yehova mpe na mpangi yina me sala disumu ya ngolo.​—Nku. 27:14.

MUTINDU BAKULUNTU KE SADISAKA MUNTU YINA ME SALA DISUMU YA NGOLO

4. Wapi yina ke vandaka dikanisi ya bakuluntu ntangu ba ke sololaka na muntu yina me sala disumu ya ngolo?

⁴ Ntangu muntu me sala disumu ya ngolo na kati ya kimvuka, bakuluntu ke soolaka bampangi tatu na kati ya bawu yina ke solola na yandi.a Bakuluntu yango me lunga kuvanda ya kukuluka mpe kuzaba bandilu ya bawu. Ata ti ba ke na sosaka kusadisa muntu na kubalula ntima, ba zaba ti ba me fwana kusala ve yawu na ngolo. (Kul. 30:19) Ba me zaba ti, bantu nyonso ve ke faso mfumu Davidi yina balulaka ntima na mbangu. (2 Sa. 12:13) Ba zaba ti ba ya nkaka yina me sala disumu ya ngolo lenda manga malongi ya Yehova. (Kub. 4:6-8) Ata faso yina, dikanisi ya bakuluntu ke vandaka kaka mosi, kusala nyonso yina ba lenda sala samu na kunata yandi na kubalula ntima. Wapi malongi ya Biblia ke sadisaka bawu samu na kusadisa mpangi yina me sala disumu ya ngolo?

5. Wa’ faso bakuluntu ke bakilaka muntu yina me sala disumu ya ngolo ntangu ba ke sololaka na yandi? (2 Timote 2:24-26) (Tala mpe kizizi.)

⁵ Bakuluntu me zaba ti ata muntu me sala disumu ya ngolo, yandi ke kaka mfunu na meso ya Yehova. (Luke 15:4, 6) Ntangu ba ke kutanaka na muntu yina me sala disumu ya ngolo, ba ke zonzilaka to ke bakilaka ve yandi na faso ya ngolo. Ba ke kanisaka ve ti kisalu ya bawu kaka ni kuyufula byuvu samu na kuzaba faso bamambu me luta. Na yawu, ba ke sadilaka bifu yina ke zonzilaka 2 Timote 2:24-26. (Tanga.) Bakuluntu ke vandaka ya kulembama, mpe ke lakisaka ntima ya mbote na muntu yina me sala disumu ya ngolo samu na kusadisa yandi na kubalula ntima.

6. Wapi mutindu bakuluntu ke bongisaka bantima ya bawu tekila ba kutana na muntu yina me sala disumu ya ngolo? (Baroma 2:4)

⁶ Bakuluntu ke bongisaka bantima ya bawu samu Yehova twadisa bawu. Ba ke sosaka kulanda faso ya Yehova ya kubakila muntu yina me sala disumu ya ngolo. Mutindu zonzaka yawu ntumwa Polo: “Nzambi ke na sosaka kunata nge na kubalula ntima.” (Tanga Baroma 2:4, NWT.) Bakuluntu me fwana kuzimbana ve ti ba ke mivungi mpe ba me fwana kulanda kifwani ya Yesu na faso ya bawu ya kubakila bampangi na kimvuka. (Iza. 11:3, 4; Mat. 18:18-20) Tekila ba kutana na muntu yina me sala disumu ya ngolo, ba ke sambilaka Yehova samu yandi sadisa bawu na kuzaba yinki ya kusala samu na kusadisa muntu na kubalula ntima. Samu na yawu, ba ke sosa na Biblia mpe na mikanda ya beto mpe ba ke sambila Yehova samu yandi sadisa bawu na kubakula mbote-mbote muntu yango mpe mambu ya yandi. Ba lenda yindula na kyuvu yayi: ‘Yinki beto zaba na luzingu ya yandi yina ntangu ya nkaka me nata yandi na kukanisa mutindu yina, to na kusala mambu ya yimbi yina yandi me sala?​—Bin. 20:5.

7-8. Wa’ faso bakuluntu lenda landa kifwani ya ntima ya yinda ya Yehova ntangu ba ke sololaka na muntu yina me sala disumu ya ngolo?

⁷ Bakuluntu ke landaka ntima ya yinda ya Yehova. Ba ke tulaka dikebi na mutindu Yehova sosaka kunata bantu yina na ntama salaka disumu ya ngolo na kubalula ntima. Na kifwani, na ntima ya yinda nyonso, Yehova sololaka na Kayini. Yandi zonzaka na yandi bamambu yina zola salama kana yandi soba ve, mpe bambote yina yandi zola kuzwa kana yandi tumama na yandi. (Kub. 4:6, 7) Yehova sadilaka mbikudi Natani samu na kusadisa Davidi. Kifwani yina Natani sadilaka, simbaka ntima ya Davidi mpe nataka yandi na kubalula ntima. (2 Sa. 12:1-7) Ata dikanda ya Izraele vanda tumama ve na yandi, Yehova vanda ‘bika ve kufidisa bawu’ bambikudi ya yandi “mbala na mbala”. (Yer. 7:24, 25) Yandi vanda vingilaka ve ba balula ntima samu na kusadisa bawu. Kasi, ata ba vandaka ntete na kati ya masumu ya bawu, yandi vanda bakaka mantwala samu na kusadisa bawu na kubalula ntima.

⁸ Bakuluntu ke landaka kifwani ya Yehova ntangu ba ke sosaka kusadisa muntu yina me sala disumu ya ngolo. Mutindu 2 Timote 4:2 (NWT) ke zonzaka yawu, ba ke sololaka na yandi “na ntima ya yinda nyonso.” Samu na kulenda kusadisa muntu yina me sala disumu ya ngolo, bakuluntu me lunga kuvanda na ntima ya yinda. Kana kuluntu ke na tiya mingi to ke dasukaka, ya lenda sala ti muntu yina me sala disumu ya ngolo kuwa ve to balula ve ntima.

9-10. Wa’ faso bakuluntu lenda sadisa muntu yina me sala disumu ya ngolo na kutala bamambu yina me nata yandi na kusala disumu ya ngolo mpe yimbi ya mambu yina yandi me sala?

⁹ Bakuluntu ke sosaka kuzaba bamambu yina, ntangu ya nkaka me nata muntu na kusala disumu ya ngolo. Na kifwani, yandi kotaka kwandi madidi samu yandi vanda sambila dyaka ve, vanda longoka dyaka ve to vanda samuna dyaka ve ntangu nyonso? Yandi bikaka kwandi bansatu ya yimbi twadisa yandi? Yandi kumaka kwandi na bandiku ya yimbi mpe vanda lutisa kwandi ntangu na bansaka ya yimbi? Mikanu yina yandi bakaka vanda bebisa ve kwandi makanisi ya yandi? Yandi ke na ndimaka kwandi ti mikanu yina yandi me baka to bamambu yandi me sala me lwalisa ntima ya Yehova?

¹⁰ Bakuluntu lenda yufula byuvu yayi na muntu yina me sala disumu ya ngolo samu na kuzaba bamambu yina me nata yandi na kusala disumu yango, mpe na kuzaba faso ya kubakila yandi samu na kusadisa yandi. (Bin. 20:5) Mutindu Natani salaka yawu na Davidi, bakuluntu lenda sadila mpe bifwani samu na kusadisa muntu yina me sala disumu ya ngolo na kutala yimbi ya mambu yina yandi me sala mpe yinki me nata yandi na kusala yawu. Ya lenda vanda ti mbala ya ntete yina bakuluntu ke solola na yandi, yandi lenda nyonga na mikanu yina yandi bakaka mpe na faso ya yandi ya kukanisa. Ntangu ya nkaka mpe, yandi lenda balula ntima.

11. Wapi mutindu Yesu bakilaka bantu yina salaka masumu ya ngolo?

¹¹ Bakuluntu ke salaka bangolo na kulanda kifwani ya Yesu. Samu na kusadisa yandi, Yesu yufulaka na Solo: “Solo, Solo, samu na yinki nge ke na nyokolaka munu?” Na kyuvu yayi, Yesu nataka Solo na kutala yimbi ya mambu yina yandi vanda sala. (Bis. 9:3-6) Na yina me tadila Yezabele, Yesu zonzaka: “Mu me pesa yandi ntangu mingi, samu ti yandi viluka [balula ntima].”​—Luz. 2:20, 21.

12-13. Wa’ faso bakuluntu lenda pesa ntangu na muntu yina me sala disumu ya ngolo samu yandi balula ntima? (Tala mpe kizizi.)

¹² Mutindu Yesu, bakuluntu ke kanisaka ve na mbangu ti muntu yina me sala disumu ya ngolo lenda balula ve ntima. Ba ya nkaka lenda balula ntima mbala ya ntete yina ba me solola na bakuluntu tatu. Kasi, bampangi ya nkaka lenda vanda na nsatu ya mwa ntangu. Na yawu, bakuluntu lenda bongisa bamambu samu na kusolola dyaka na yandi mbala ya nkaka. Na manima ya masolo ya bawu ya ntete, mpangi yina me baka nzila ya yimbi lenda baka ntangu ya kukanisa na bamambu yina ba zonzaka na yandi. Na kukuluka nyonso, yandi lenda sambila Yehova mpe kulomba yandi mulemvo. (Nku. 32:5; 38:18) Nyonso yayi lenda sala ti, na disolo ya nkaka, mpangi yango lenda tala bamambu na faso ya mbote.

¹³ Na kusadisa muntu yina me sala disumu ya ngolo na kubalula ntima, bakuluntu ke lakisaka yandi ntima ya kyadi mpe ya mbote. Ba ke vandaka na kivuvu, mpe ke sambilaka Yehova samu yandi sakumuna bangolo ya bawu samu na kusadisa muntu yina me sala disumu ya ngolo mpe kunata yandi na kubalula ntima.​—2 Tim. 2:25, 26.

14. Nani me bonga kuzwa nkembo ntangu muntu ke balulaka ntima, mpe samu na yinki?

¹⁴ Ntangu muntu ke balulaka ntima, ya ke pesaka beto kilengi mingi. (Luke 15:7, 10) Nani me bonga kuzwa nkembo na yawu? Ya ke kwandi bakuluntu? Beto zimbana ve mambu yina ntumwa Polo zonzaka na yina me tadila bantu yina me sala disumu ya ngolo. Yandi zonzaka: “Ntangu ya nkaka, Nzambi lenda pesa bawu nzila ya kubalula ntima.” (2 Tim. 2:25, NWT) Ya ke na talanaka ti ya ke ve ni muntu, kasi Yehova yandi mosi ke nataka muntu na kusoba makanisi mpe ndyatulu ya yandi. Polo ke na zonzilaka yina ke salamaka ntangu muntu ke balulaka ntima. Kubalula ntima ke sadisa yandi na kuzaba mbote-mbote matsyeleka, na kuvutukila mabanza ya yandi mpe kukima mitambu ya Dyabulu.

15. Na wapi mutindu bakuluntu lenda bika ve kusadisa muntu yina me balula ntima?

¹⁵ Ntangu muntu yina me sala disumu ya ngolo me balula ntima, bakuluntu ke bika ve na kupesa yandi lubakusu yina yandi ke na yawu nsatu. Ya ke sadisa yandi na kukima mitambu ya Dyabulu mpe na kusala mambu ya mbote. (Ebr. 12:12, 13) Bakuluntu ke zonzaka na ata muntu, bamambu yina ba me zaba na yina me tadila disumu yina mpangi me sala. Kasi, ya ke kwandi na bamambu yina kimvuka ke na nsatu ya kuzaba?

“SEMBA NA MESO YA BANTU NYONSO”

16. Yinki zola kuzonza “na meso ya bantu” yina Polo sadilaka na 1 Timote 5:20?

¹⁶ Tanga 1 Timote 5:20, NWT. Polo sonikaka bamambu yayi na Timote yina vandaka mpe kuluntu, samu na kulakisa yandi faso ya kubakila bantu yina “mesanaka kusala masumu.” Yandi vanda sosa kwandi kuzonza ti, ba zola semba bantu yango na mantwala ya bantu nyonso ya kimvuka? Ntangu Polo zonzaka “bantu nyonso,” yandi vanda zonzila bantu nyonso yina zabaka bamambu na yina me tadila disumu yina mpangi salaka. Na kati ya bawu, ya lenda vanda na bantu yina talaka yandi kusala disumu yango mpe bantu yina yandi mosi zonzaka na bawu mambu yina yandi salaka. Bakuluntu ke zonza kaka na bantu yango ti mambu ke na maboko ya bawu mpe ti ba me yidika yawu to ti ba me semba muntu yina me sala disumu ya ngolo.

17. Kana disumu ya ngolo ke ya kuzabana na kimvuka nyonso, wapi nsangu ba ke pesaka mpe samu na yinki?

¹⁷ Bantangu ya nkaka, mambu ya yimbi yina mpangi salaka lenda vanda ya kuzabana na kati ya kimvuka to na bantu mingi na kati ya kimvuka. Awa, “na meso ya bantu,” zola kuzonza kimvuka nyonso. Na yawu, kuluntu mosi ke pesa nsangu na kimvuka nyonso ti ba me pesa masembo na mpangi yina me sala disumu ya ngolo. Samu na yinki? Polo zonzaka: “Samu ya kebisa bantu ya nkaka,” samu ba sala ve disumu ya ngolo.

18. Wa’ faso bakuluntu ke yidikaka bamambu ntangu mpangi yina kuzwaka mbotokolo yina nabunu yandi lungisa bamvula 18 me sala disumu ya ngolo? (Tala mpe kizizi.)

¹⁸ Yinki bakuluntu ke sala kana mpangi yina kuzwaka mbotokolo yina nabunu yandi lungisa bamvula 18 me sala disumu ya ngolo? Kimvuka ya bakuluntu ke soola zole na kati ya bawu yina ke solola na mpangi yango kintwadi na bibutib ya yandi kana ba ke Bambangi ya Yehova. Ba ke yufula bibuti yinki ba me sala samu na kusadisa mwana na kubalula ntima. Kana mwana me kuwa malongi ya bibuti ya yandi mpe me soba makanisi na ndyatulu ya yandi, bakuluntu zole yina, lenda baka mukanu ya kubika bibuti ya yandi tatamana kusadisa yandi. Beto zaba ti ni na bibuti Yehova pesaka kisalu ya kulonga mpe ya kusemba bana ya bawu na luzolo nyonso. (Kul. 6:6, 7; Bin. 6:20; 22:6; Ef. 6:2-4) Bantangu ya nkaka na manima, bakuluntu ke solola na bibuti samu na kutala kana mwana ya bawu ke na kuzwaka lubakusu yina yandi ke na yawu nsatu. Kasi, yinki ya kusala kana yandi ke na sobaka ve ndyatulu ya yandi? Bakuluntu tatu ke solola na yandi kintwadi na bibuti ya yandi yina ke Bambangi ya Yehova.

YEHOVA “KELE YA KUFULUKA NA MBOTE MPE NA KYADI”

19. Wa’ faso bakuluntu ke landaka kifwani ya Yehova ntangu ba ke sololaka na muntu yina me sala disumu ya ngolo?

¹⁹ Yehova ke lombaka na bakuluntu na kubumba bunkete ya kimvuka. (1 Ko. 5:7) Kasi, ba zola mpe kusala nyonso yina ba lenda sala samu na kunata muntu yina me sala disumu ya ngolo na kubalula ntima. Na yawu, ntangu ba ke sadisaka muntu, ba ke vandaka na kivuvu ti yandi ke soba. Samu na yinki? Samu ba zola kulanda kifwani ya Yehova yina “kele ya kufuluka na mbote mpe na kyadi.” (Zaki 5:11) Beto tala mutindu ntumwa Yoane lakisaka luzolo na bampangi ya yandi ya kento na ya bakala. Yandi sonikaka: “Bana ya munu, mu ke na kusonikina beno mambu yayi, samu ti beno sala ve masumu. Kasi kana muntu sala masumu, beto kele na nzonzi na ntwala ya Tata, ni Yesu-Klisto yina kele ya kudedama.”​—1 Yoa. 2:1.

20. Yinki beto ke tala na disolo yina ke landa?

²⁰ Mambu ya kyadi ke ti, bantangu ya nkaka mpangi yina me sala disumu ya ngolo lenda manga kubalula ntima. Na yawu, ba lenda basisa yandi na kimvuka. Yinki bakuluntu ke salaka na ntangu yina? Disolo yina ke landa ke pesa mvutu na kyuvu yayi.