Wa’ faso kimvuka lenda bakila muntu yina me sala disumu ya ngolo?

1. Yinki Yehova zola samu na bantu?

YEHOVA yidikaka beto na bweso ya kusoola yina beto ke sala. Beto ke sadilaka dikabu yayi ntangu beto ke bakaka mikanu. Mukanu ya kulutila mfunu yina muntu lenda baka, ni kupesa luzingu ya yandi na Yehova mpe kukuma kisadi ya yandi. Yehova zola ti bantu nyonso sala yawu. Samu na yinki? Yandi ke zolaka bantu mpe yandi zola ti ba vanda na kilengi. Yandi zola ti ba vanda na kindiku ya mbote na yandi mpe ba zinga ntangu nyonso.—Kul. 30:19, 20; Gal. 6:7, 8.

2. Yinki Yehova zola samu na ba yina nabunu ntete ba balula ntima? (1 Yoa. 2:1)

² Kasi, Yehova ke nataka ve bantu na kusadila yandi na ngolo. Yandi ke bikaka muntu nyonso, soola yina yandi mosi zola kusala. Yinki bakuluntu me fwana kusala kana mpangi mosi me sala disumu ya ngolo? Kana yandi me balula ve ntima, bakuluntu me fwana kukatula yandi na kati ya kimvuka. (1 Ko. 5:13) Kasi ata faso yina, Yehova ke na nsatu ya ngolo ya kutala muntu yango balula ntima mpe kuvutuka na yandi. Ya ke mambu ya mfunu yina nataka yandi na kupesa mwana ya yandi na munkayulu samu na kulemvokila masumu ya beto. 1 Yoane 2:1 ke zonzaka: “Bana ya munu, munu ke na kusonikina beno mambu yayi, samu ti beno sala ve masumu. Kasi kana muntu sala masumu, beto kele na nzonzi na ntwala ya Tata, ni Yesu-Klisto yina kele ya kudedama.” Yehova ke Nzambi ya luzolo yina ke zonzaka na ba yina me sala disumu ya ngolo na kubalula ntima.​—Zak. 1:3; Rom. 2:4; Zaki 4:8.

3. Yinki beto ke tala na disolo yayi?

³ Yehova zola ti beto vanda na dikanisi mosi na yandi na yina me tadila faso ya kubakila bantu yina me sala disumu ya ngolo. Na disolo yayi, beto ke tala faso ya kusala yawu. Nyonso nge ke na tangaka disolo yayi, tala 1) mutindu ba yidikaka mambu ya disumu ya ngolo yina salamaka na siècle ya ntete na kimvuka ya Korinto, 2) malongi yina ntumwa Polo pesaka ntangu yandi balulaka ntima, mpe 3) yinki disolo ya Biblia yayi ke na lakisaka na mutindu Yehova ke bakilaka bantu yina me sala disumu ya ngolo.

MUTINDU BA YIDIKAKA MAMBU YA DISUMU YA NGOLO YINA SALAMAKA NA SIÈCLE YA NTETE

4. Yinki salamaka na siècle ya ntete na Korinto? (1 Bakorinto 5:1, 2)

⁴ Tanga 1 Bakorinto 5:1, 2, NWT. Na nzyetolo ya yandi ya tatu ya missionnaire, Polo kuwaka nsangu ya kulutila yimbi na kimvuka ya malu-malu ya Korinto. Mpangi mosi salaka kinsuza na kento ya tata ya yandi. Ya vandaka mambu ya “kulutila yimbi yina ata makanda lenda sala ve yawu.” Kasi kimvuka vandaka na kilengi na yina yandi vanda sala, mpe bikaka yandi na bunsuza ya yandi na kati ya kimvuka. Ya lenda vanda ti, ba ya nkaka vanda tala ti na kubika yandi na kati ya kimvuka, ba vanda landa kifwani ya ntima ya kyadi ya Yehova. Kasi Yehova ke sepelaka ata fioti ve na kutala masumu ya mutindu yayi na kimvuka ya yandi. Mambu ya busafu yayi vanda nata bantu yina ke sambilaka ve Yehova na kuzonza yimbi ya bisadi ya Yehova. Mpe kana yandi vanda kaka na kimvuka, bakristo ya nkaka zola landa kifwani ya yandi. Na yawu, yinki Polo zonzaka na kimvuka na kusala?

5. Yinki ntumwa Polo zonzaka na kimvuka na kusala, mpe yinki ya vanda sosa kuzonza? (1 Bakorinto 5:13) (Tala mpe kizizi.)

⁵ Tanga 1 Bakorinto 5:13. Na mukanda yina Yehova nataka ntumwa Polo na kusonika, yandi zonzaka na kukatula muntu yango samu yandi salaka disumu mpe balulaka ve ntima. Wa’ faso kimvuka zola bakila yandi? Polo zonzaka na bawu na “kuvanda ve kintwadi” na yandi. Yinki ya zola zonza? Polo zonzaka ti, ya zola mpe kuzonza “kudya ata fioti ve na muntu ya mutindu yayi.” (1 Ko. 5:11, NWT) Ntangu beto ke kudyaka na muntu, beto ke sololaka na yandi mpe ya lenda nata beto na kulutisa dyaka ntangu na yandi. Na bunkufi, Polo vanda sosa kuzonza na kimvuka na kulutisa ve ntangu na muntu yango. Ya zola sala ti ndyatulu ya yandi mwangana ve na kati ya kimvuka. (1 Ko. 5:5-7) Kumanga kulutisa ntangu na yandi lenda nata yandi na kutala ti, yandi me nyongisa Yehova mpe nsoni ya kuzaba ti yandi me bebisa nkumbu ya Yehova lenda nata yandi na kubalula ntima mpe kuvutuka na Yehova.

6. Yinki mukanda ya Polo salaka na kimvuka mpe na muntu yina salaka disumu ya ngolo?

⁶ Polo sosaka kuzaba yinki kimvuka salaka na manima ya kuyamba mukanda ya yandi. Tite zonzaka na yandi bansangu yina pesaka yandi kilengi. (2 Ko. 7:6, 7) Kimvuka sadilaka bamambu yina Polo zonzaka mpe katulaka muntu yango na kimvuka. Na manima, muntu yango balulaka ntima, yandi sobaka ndyatulu, faso ya yandi ya kutala bamambu mpe bandaka kulanda misiku ya Yehova. (2 Ko. 7:8-11) Na yawu, yinki Polo zonzaka na kimvuka na kusala?

FASO KIMVUKA ZOLA BAKILA MUNTU YINA BALULAKA NTIMA

7. Yinki muntu yina ba katulaka na kimvuka salaka? (2 Bakorinto 2:5-8)

⁷ Tanga 2 Bakorinto 2:5-8, NWT. Polo zonzaka ti “Masembo yina bantu mingi na kati ya [bawu] pesaka muntu yina, [lungaka].” Masembo yina ba pesaka yandi vandaka samu na kusadisa yandi na kubalula ntima. Awa yandi me balula ntima, ba vandaka dyaka ve na nsatu ya kusemba yandi.​—Ebr. 12:11.

8. Yinki Polo zonzaka dyaka na kimvuka na kusala?

⁸ Polo zonzaka na kimvuka na “kulemvokila yandi na ntima mosi mpe kukindisa yandi.” Yandi zonzaka mpe na bawu na “kulakisa yandi ti [ba] ke zolaka yandi mingi.” Kimvuka me bonga ve kuzonza kaka ti yandi me vutuka, kasi ba me bonga kulakisa na faso ya bawu ya kuzonza mpe ya kusala ti, ba me lemvokila yandi mpe ke zolaka yandi. Ya zola talana pwelele ti ba me sepela na yina yandi me vutuka na kimvuka.

9. Samu na yinki bampangi ya nkaka lenda vanda na maketi-keti ya kulemvokila mpangi yina me balula ntima?

⁹ Ya lenda vanda ti bampangi ya nkaka na kimvuka me sepela ve na yina mpangi yina ba basisaka na kimvuka me vutuka. Samu na yinki beto ke na zonzaka yawu? Ya lenda vanda ti, yandi salaka muvusu na kati ya kimvuka mpe ti bamambu yina yandi salaka bampangi, ke ntete na salaka bawu mpasi. Ba lenda tala ti bangolo yina bawu ke na salaka samu na kubikana ya kukangama na Yehova mpe na misiku ya yandi ke kaka ya mpamba samu ba me yamba na kilengi nyonso muntu yina me sala disumu ya ngolo. (Fwanisa na Luke 15:28-30.) Samu na yinki ya vandaka mfunu kimvuka yamba muntu yina me vutuka na kimvuka na luzolo nyonso?

10-11. Kana bakuluntu mangaka kulemvokila mpangi yina balulaka ntima, a) Yinki ya zola sala yandi? b) Yinki ya zola sala na kimvuka?

¹⁰ Kanisa na yina zola salama kana bakuluntu mangaka kuvutula na kimvuka mpangi yina balulaka ntima. Yinki ya zola sala na mpangi yango kana kimvuka yambaka ve yandi na luzolo nyonso? Yandi zola vanda na “kyadi ya kulutila.” Na yawu, yandi zola tala ti yandi lenda vutuka dyaka ve na kimvuka mpe ti kindiku ya yandi na Yehova lenda vutuka dyaka ve faso na ntama.

¹¹ Yinki zola salama kana bampangi ya kimvuka mangaka kulemvokila mpangi yina me balula ntima? Ya zola bebisa kindiku ya bawu na Yehova. Samu na yinki? Samu ti na kusala mutindu yina, ba zola landa ve kifwani ya Nzambi yina ke lemvokilaka ba yina ke balulaka ntima, kasi kifwani ya Satana yina ke talaka ve bantu mawa. Ba zola bika Satana sadila bawu na kukanga nzila na mpangi yina me balula ntima samu na kuvutukila kusadila Yehova.​—2 Ko. 2:10, 11; Ef. 4:27.

12. Wa’ faso kimvuka zola landa kifwani ya Yehova?

¹² Samu na kulanda kifwani ya Yehova kasi ve ya Satana, yinki kimvuka ya Korinto zola sala? Ba zola bakila mpangi yina balulaka ntima mutindu Yehova ke salaka yawu. Beto tala yina Biblia ke zonzaka na yina me tadila Yehova. Davidi zonzaka ti Yehova ke ‘mbote mpe ya kuyidama na kulemvokila.’ (Nku. 86:5) Mika sonikaka: ‘Nani kele Nzambi mutindu nge, yina ke lemvokilaka kifu mpe yimbi?’ (Mika 7:18) Mpe Izayi zonzaka: ‘Bika ti muntu ya nko kubika banzila ya yandi mpe muntu ya yimbi kubika makanisi ya yandi. Bika ti yandi vutuka na Yehova, yina ke kuwa yandi mawa, na Nzambi ya beto, samu yandi ke lemvokilaka na luzolo nyonso.’​—Iza. 55:7.

13. Samu na yinki ya vandaka mbote ba vutula mpangi yina balulaka ntima na kati ya kimvuka? (Tala encadré “Na manima ya bangonda yikwa ba vutulaka muntu ya Korinto na kimvuka?”)

¹³ Na kulanda kifwani ya Yehova, kimvuka ya Korinto zola yamba na kilengi nyonso mpangi yina balulaka ntima mpe kulakisa yandi luzolo. Polo zonzaka ti kana ba yamba muntu yina balulaka ntima, ba zola lakisa “kutumama ya [bawu] na mambu nyonso.” (2 Ko. 2:9, NWT) Ata ti ba katulaka mpangi yayi na kimvuka na kati ya mwa bangonda kaka, masembo yina ba pesaka yandi sadisaka yandi na kubalula ntima. Na yawu, bakuluntu vandaka ve na nsatu ya kuvingila dyaka samu na kuvutula yandi na kati ya kimvuka.

WA’ FASO BETO LENDA LANDA LUNUNGU YA YEHOVA MPE NTIMA YA YANDI YA KYADI?

14-15. Yinki beto lenda longoka na mambu yina salamaka na Korinto? (2 Piere 3:9) (Tala mpe kizizi.)

¹⁴ Ba sonikaka mpe ba bumbaka disolo ya faso ba bakilaka muntu ya Korinto yayi “samu na kulonga beto.” (Rom. 15:4, NWT) Ya ke na lakisaka beto ti Yehova ke sepelaka ata fioti ve na kutala masumu ya ngolo na kati ya dikanda ya yandi. Bantu ya nkaka lenda kanisa ti, samu Yehova ke na “ntima ya kyadi,” yandi lenda bika muntu yina me sala disumu ya ngolo yina me balula ve ntima na kati ya kimvuka, kasi ni mutindu yina ve Yehova ke lakisaka ntima ya kyadi. Yehova ke na ntima ya kyadi, kasi yandi ke ndimaka ve ndyatulu nyonso. Faso ya yandi ya kutala yimbi mpe mbote ke sobaka ve. (Yude 4) Kana Yehova bika muntu yina me balula ve ntima na kimvuka, ya ke ve kulakisa ntima ya kyadi samu ti yandi lenda bebisa kimvuka nyonso​—Bin. 13:20; 1 Ko. 15:33.

¹⁵ Kasi beto me longoka mpe ti Yehova zola ti ata muntu kufwa. Samu yandi zola bantu mingi vuuka, yandi ke lakisaka ntima ya kyadi na bantu yina ke balulaka ntima mpe ke salaka bangolo na kuvutula kindiku na yandi. (Ezek. 33:11.) 2 Piere 3:9, NWT ke zonzaka: “Yehova ke ve na lutisaka ntangu samu na kulungisa nsilulu ya yandi mutindu bantu ya nkaka ke kanisaka yawu. Yandi ke na ntima ya yinda samu na beto, samu ti yandi zola ve ti ata muntu mosi kufwa. Kasi, yandi zola ti bantu nyonso kubalula ntima.” Na yawu, ntangu muntu ya Korinto balulaka ntima mpe sobaka ndyatulu ya yandi ya yimbi, Yehova sadilaka ntumwa Polo samu na kuzonzila kimvuka na kulemvokila yandi mpe kuyamba yandi.

16. Faso ba bakilaka muntu ya Korinto ke na longoka beto yinki na yina me tadila Yehova?

¹⁶ Mambu yina salamaka na Korinto ke na lakisaka beto luzolo mpe lunungu ya Yehova. (Nku. 33:5) Ya ke ve na pesaka nge nsatu ya kukembila dyaka Yehova? Beto ke bantu ya masumu. Na yawu, beto ke na nsatu ya mulemvo ya Yehova. Mosi na mosi ya beto, me lunga kuvutula Yehova matondo samu na munkayulu ya Yesu yina ke salaka ti Yehova lenda kulemvokila beto. Ya ke kindisaka beto mpe ya ke pesaka beto ngolo na kuzaba ti Yehova zola beto mpe ti yandi ke sosaka kaka kilengi ya beto.

17. Yinki beto ke tala na masolo yina ke landa?

¹⁷ Wa’ faso ba lenda bakila muntu yina me sala disumu ya ngolo bubu yayi? Wa’ faso bakuluntu lenda landa kifwani ya Yehova na kusadisa muntu yina me sala disumu ya ngolo na kubalula ntima? Wa’ faso kimvuka lenda yamba muntu yina bakuluntu me vutula na kati ya kimvuka? Beto ke kuzwa bamvutu na masolo yina ke landa.