Nge ke lenda kukanga ntima ntangu ba ke talisa nge mpasi

Bubu yayi to na bilumbu yina ke kwiza, bakristo nyonso ke kutana na bankwamusu mpe ba ke nyokola bawu. Kasi, ya me fwana kwandi kupesa beto boma?

1. Wapi mutindu beto me zaba ti ba ke talisa beto mpasi?

Biblia ke zonzá pwelele ti: “Bantu nyonso yina ke zola kuzinga kintwadi na Yesu-Klisto na kuvanda ya kukwikama na Nzambi, ke tala mpasi mingi.” (2 Timote 3:12) Ba nyokolá Yesu ntangu yandi vandá awa na ntoto samu yandi vanda kotá ve na mambu ya yinza ya Satana. Beto mpe ke kotá ve na mambu ya yinza, na yawu ya ke pamusá ve beto ntangu bamfumu ya yinza to mabuundu ke nyokolá beto.—Yoane 15:18, 19.

2. Wapi mutindu beto lenda yidama tekila bankwamusu kuma?

Samu na kuyidama na bankwamusu, beto me lunga kukumisa ngolo kiminu ya beto na Yehova kubanda bubu yayi. Ni na yawu, beto zolá baka ntangu ya kusambilá mpe ya kutangá Biblia bilumbu nyonso. Beto me lunga mpe kuvanda na balukutakanu nyonso. Bamambu nyonso yayi ke pesa nge ngolo ya kununga bankwamusu na bukindi nyonso, ata ti ya ke na katuká na bantu ya dikanda ya nge. Ni na yawu ntumwa Polo, yina vanda kutaná na bankwamusu ntangu nyonso, soniká: “[Yehova] kele kisadisi ya munu, mu ke vanda ve na boma ya kima.”—Baebre 13:6.

Kima ya nkaka yina ke sala ti beto vanda na bukindi na mantwala ya bankwamusu ni kisalu ya kusamuná ntangu nyonso. Kisalu ya kusamuna ke sadisa beto na kukumisa ngolo kiminu ya beto na Yehova mpe na kununga boma ya bantu. (Bingana 29:25) Kana nge kulisa bukindi ya nge na kisalu ya kusamuna kubanda bubu yayi, ya ke sala ti nge bika ve ata fioti kusamuna ata ntangu bamfumu ya bwala ke nimina kisalu ya beto ya kusamuna.—1 Batesalonika 2:2.

3. Wapi bambote beto ke kuzwa kana beto kanga ntima na mantwala ya bankwamusu?

Ntangu beto ke kangá ntima na mantwala ya bankwamusu to ntangu ba ke nyokolá beto, ata ti ya ke pesá ve beto kilengi, kiminu ya beto ke kumá dyaka ngolo. Beto ke kumá pene-pene na Yehova samu ti, beto ke talá mutindu yandi ke sadisá beto na luzingu ya beto ntangu beto ke vandá ya kulemba. (Tanga Zaki 1:2-4.) Ntangu beto ke kutaná na bankwamusu to ba ke nyokolá beto, ya ke salá Yehova mpasi, kasi ntangu beto ke kangá ntima, ya ke pesaka yandi kilengi. Biblia ke zonzá: “Kana nge ke na kuvibidila [. . .] samu na mambu ya mbote yina nge me sala, ya kele mbote na ntwala ya Nzambi.” (1 Piere 2:20) Yehova ke pesa na ba yina nyonso ke vanda kaka ya kukangama na yandi luzingu ya ntangu nyonso na yinza ya malu-malu. Ata muntu na yinza yango ke kwamisa to ke nyokola dyaka bawu.—Matayi 24:13.

SOSA KUZABA MBOTE-MBOTE

4. Nge lenda kanga ntima na mantwala ya bankwamusu ya dikanda

Yesu zabá mbote-mbote ti, bantu ya nkaka ya dikanda ya beto lenda vanda ve na kilengi kana beto me baka mukanu ya kusadila Yehova. Tanga Matayi 10:34-36, mpe na manima beto zonzila kyuvu yayi:

• Yinki lenda salama ntangu muntu mosi ya dikanda me baka mukanu ya kusadila Yehova?

VIDEO: Yehova baká beto (5:13)

• Yinki nge lenda sala ntangu muntu mosi ya dikanda ya nge, to ndiku ya nge ke na sosá kukanga nge nzila na kusadila Yehova?

Tanga Nkunga 27:10 mpe Marke 10:29, 30. Na manima ya kutanga mosi na mosi ya baverse, beto zonzila kyuvu yayi:

• Wapi mutindu nsilulu yina ba me zonzila na baverse yayi lenda sadisa nge, ntangu nge ke kutana na bankwamusu yina ke katuka na dikanda to na bandiku ya nge?

5. Kubika ve kusadila Yehova ata ba ke na talisá nge mpasi

VIDEO: Vanda na bukindi na kati ya bankwamusu (6:27)

• Wapi mutindu bifwani yina beto me tala na kati ya video me pesa nge ngolo?

Tanga Bisalu 5:27-29 mpe Baebre 10:24, 25. Na manima ya kutanga mosi na mosi ya baverse yayi, beto zonzila kyuvu yayi:

• Samu na yinki ya ke mfunu mingi na kubika ve kusadila Yehova, ata ntangu luyalu me nimina kisalu ya beto ya kusamuna mpe balukutakanu?

6. Yehova ke sadisa nge na kukanga ntima

VIDEO: Yehova ke pesa munu ngolo (3:40)

• Yinki sadisá bampangi yina beto me tala na kati ya video, na kukanga ntima na mantwala ya bankwamusu?

Tanga Baroma 8:35, 37-39 mpe Bafilipi 4:13. Na manima ya kutanga mosi na mosi ya baverse, beto zonzila kyuvu yayi:

• Wapi mutindu baverse yayi ke na ndimisá nge ti nge lenda kanga ntima na mantwala ya bampasi nyonso yina lenda kumina nge?

Tanga Matayi 5:10-12, mpe na manima beto zonzila kyuvu yayi:

• Samu na yinki nge lenda vanda na kilengi ata ti nge ke na kati ya bankwamusu?

NA BUNKUFI

Yehova ke talá kilengi na bangolo yina beto ke salá samu na kusadila yandi ata ti beto ke na kati ya bankwamusu. Na lubakusu ya yandi, beto ke lenda kukanga ntima na kilengi nyonso!

Mambu ya kusimba

• Wapi mutindu beto me zaba ti ba ke talisa beto mpasi?

• Yinki nge lenda sala bubu yayi samu na kuvanda ya kuyidama ntangu bankwamusu ke kwiza?

• Yinki ke sadisa nge na kundima ti ata bankwamusu nge ke lenda kuvanda kaka ya kukangama na Yehova?

SOSA KUZABA DYAKA

Tala mutindu ntwenya mosi ya bakala ke na zonzá yinki sadisaka yandi, na kukanga ntima ntangu ba tulaka yandi na boloko samu yandi mangá kukota na mambu ya politique.

Kanga ntima ata bantu ke na nyokolá nge (2:34)

Tala yinki sadisá bakala mosi na kento ya yandi na kuvanda kaka ya kukangama na Yehova ata bamvula mingi ya bankwamusu.

Ba biká ve kusadila Yehova ata ntangu mambu sobaka (7:11)

Tala yinki lenda sadisa nge na kuvanda na bukindi na mantwala ya bankwamusu.

“ Prépare-toi dès maintenant à la persécution ” (La Tour de Garde, Juillet 2019)

Wapi mutindu beto me bonga kutadila bankwamusu yina ke katuká na dikanda, mpe wapi mutindu kubumba kizunu ya beto mpe kuvanda kaka ya kukangama na Yehova?

“ La vérité apporte, ‘non pas la paix, mais l’épée’ ” (La Tour de Garde, Octobre 2017)