Mutindu Yehova ke sadisaka beto na kukanga ntima

1. Samu na yinki beto ke na nsatu ya kukanga ntima mpe nani lenda sadisa beto? (1 Piere 5:10)

BETO nyonso ke na kutanaka na bamambu ya mpasi. Ya lenda vanda mpasi na kutatamana na kukanga ntima tii na nsuka samu beto ke kutanaka: Na maladi yina ke manisaka ve, lufwa ya muntu yina beto ke zolaka, bankwamusu ya bantu ya dikanda to ya luyalu. (Mat. 10:18, 36, 37) Kasi, beto lenda vanda na kundima ti ata bampasi yina beto ke na kutanaka na yawu, Yehova ke sadisa beto na kukanga ntima.—Tanga 1 Pi. 5:10.

2. Na nani ngolo ya beto ya kukanga ntima ke katukaka?

² Kukanga ntima zola zonza kubikana ya kukangama na Yehova mpe kusadila yandi na kilengi ata ntangu beto ke na kutanaka na bampasi, bankwamusu to ntangu ba ke sosaka kunata beto na kusala disumu. Samu na kukanga ntima beto ke mpe na nsatu ya kuvanda na kundima ti bamambu ke bonga. Makoki ya kukanga ntima ke katukaka ve na beto mosi, kasi na Yehova yina ke pesa beto “ngolo yina me lutila ngolo yina beto lenda bakula ve.” (2 Kor. 4:7) Na disolo yayi beto ke tala ti Yehova me pesa beto lusambu, Biblia, bampangi mpe kivuvu samu na kusadisa beto na kukanga ntima. Beto ke tala mpe mutindu mosi na mosi ya yawu lenda sadisa beto.

LUSAMBU

3. Samu na yinki beto lenda zonza ti lusambu ke mambu mosi ya ngitukulu?

³ Lusambu ke mambu mosi ya ngitukulu yina Yehova me pesa beto samu na kusadisa beto na kukanga ntima. Ata ti beto ke bantu ya masumu, Yehova me fungula nzila yina ke sadisa beto na kusolola na yandi. (Ebr. 4:16) Yinki ya zola zonza? Beto lenda sambila Yehova na ntangu yina beto me zola mpe na mambu nyonso. Na ndinga ni ndinga mpe na kisika ni kisika yina beto kele yandi ke kuwa beto. Ata ti beto ke nkaka beto mosi to beto ke na boloko. (Yona 2:1, 2; Bis. 16:25, 26) Yehova ke na makoki ya kubakula yina beto ke na sosaka kuzonza ata ntangu beto ke na manyongi ya kulutila mpe beto zaba ve mutindu ya kuzonzila yandi mambu yina beto ke na yawu. (Rom. 8:26, 27) Ya tsyeleka, lusambu kele mambu ya ngitukulu.

4. Samu na yinki beto lenda zonza ti balusambu ya beto samu na kukanga ntima ke kwelanaka na luzolo ya Yehova?

⁴ Na Biblia Yehova me zonza na beto ti “kima ni kima yina beto ke lombaka ya kukwelana na luzolo ya yandi, yandi ke kuwaka beto.” (1 Yoa. 5:14) Beto lenda lomba kwandi na Yehova na kusadisa beto na kukanga ntima? Ee! Kusala yawu ke na kwelanaka na luzolo yandi. Samu na yinki? Ntangu beto ke kangaka ntima na kati ya bampasi, beto ke pesaka bweso na Yehova na kupesa mvutu na muntu yina ke sombolaka yandi, Satana Dyabulu. (Bin. 27:11) Biblia ke zonzaka ti Yehova ke na sosaka “kusadisa bantu nyonso yina ke zolaka yandi na ntima mosi.” (2 Ns. 16:9) Na yawu, beto lenda vanda na kundima ti Yehova ke na ngolo mpe nsatu ya kusadisa beto na kukanga ntima.—Iza. 30:18; 41:10; Luke 11:13.

5. Wa’ faso lusambu lenda pesa beto kizunu? (Izayi 26:3)

⁵ Biblia ke zonzaka ti ntangu beto ke sambilaka na bamambu yina ke na kwamisaka beto, “kizunu ya Nzambi yina me lutila nyonso yina beto lenda bakula, ke bumba bantima ya beno mpe makanisi.” (Filp. 4:7) Beto ke vutulaka Yehova matondo samu na yawu. Bantu yina ke sadilaka ve Yehova ke kutanaka mpe na bamambu ya mpasi. Samu na kusosa kuzwa kizunu, ba ke kubwaka na bansalulu ya mutindu na mutindu. Ata ti bansalulu yayi lenda pesa bawu kizunu, kasi kizunu yango ke ve ya tsyeleka samu ya ke katukaka ve na Yehova. Ya tsyeleka, kizunu yina Yehova ke pesaka beto ntangu beto ke sambilaka yandi, me lutila kizunu yina bansalulu ya mutindu yayi ke pesaka. (Fwanisa yawu na Matayi 12:43-45.) Ntangu beto ke sambilaka Yehova, beto ke lakisaka ti beto ke tudilaka yandi ntima mpe yandi ke pesa beto “kizunu.” Izayi 26:3 ke zonzaka: “Na muntu yina mabanza ya ntima ke sobaka ve, nge ke pesaka yandi kizunu, kizunu samu ti yandi ke tulaka kivuvu ya yandi na nge.” Yehova ke kubambula mpe beto malongi ya Biblia yina sadisaka beto na kuzwa kizunu. Malongi yayi ke lakisaka ti Yehova ke zolaka beto mingi, ke na nsatu ya kusadisa beto mpe ya ke pesaka beto kizunu.—Nku. 62:1, 2.

6. Wapi bamambu nge lenda lomba na lusambu ya nge? (Tala mpe kizizi.)

⁶ Yinki nge lenda sala? Yekula bampasi ya nge na Yehova mpe lomba yandi pesa nge kizunu. (Nku. 55:22) Sambila mpe samu yandi pesa nge ndwenga yina nge ke na yawu nsatu na kunwana na bamambu mpasi yina nge ke na kutanaka na yawu. (Bin. 2:10, 11) Na ntangu nge ke na bondilaka yandi samu na kukanga ntima, kuzimbana ve na kuvutula yandi matondo. (Filp. 4:6) Kanisa na bamambu yina ke na lakisa ti Yehova ke na sadisaka nge bilumbu nyonso na kukanga ntima mpe vutula yandi matondo samu na lubakusu ya yandi mpe na bamambu ya mbote yina yandi ke na salaka samu na nge. Ata ti nge ke na kutanaka na bamambu yina ke na talisaka nge mpasi, kuzimbana ve bamambu nyonso yina Yehova me sala samu na kusadisa nge.—Nku. 16:5, 6.

BIBLIA

7. Wa’ faso kulongoka Biblia lenda sadisa beto na kukanga ntima?

⁷ Yehova me pesa beto Biblia samu na kusadisa beto na kukanga ntima. Na kati ya Biblia ke na baverse mingi yina ke longaka beto ti Yehova ke sadisa beto. Na kifwani, Matayi 6:8 ke zonzaka: “Tata ya beno zaba mambu yina beno ke na yawu nsatu, ata tekila beno lomba yandi yawu.” Yesu zonzaka bamambu yayi, mpe yandi zabaka ti ya ke ve na muntu yina lutila Yehova. Beto lenda vanda na kundima ti ntangu beto ke na kutanaka na bampasi, Yehova zaba yina beto ke na yawu nsatu mpe yandi ke sadisa beto. Na kati ya Biblia, ya ke na makanisi mingi ya mutindu yayi yina ke pesaka beto ngolo samu na kukanga ntima.—Nku. 94:19.

8. a) Pesa kifwani ya dilongi mosi ya Biblia yina lenda sadisa beto na kukanga ntima. b) Yinki lenda sadisa beto na kubambuka malongi ya Biblia na ntangu beto ke na nsatu ya yawu?

⁸ Malongi ya Biblia lenda sadisa beto na kukanga ntima. Bileso yina beto ke benda na yawu lenda pesa beto ndwenga samu na kubaka mikanu ya mbote. (Bin. 2:6, 7) Na kifwani, Biblia ke zonzaka na beto na kunyonga ve samu na mbasi, na kutula ntima ya beto nyonso na Yehova bilumbu nyonso. (Mat. 6:34) Kana beto ke na kifu ya kutanga Biblia mpe kuyindula na yawu, ya ke vanda ve mpasi na beto na kubambuka malongi yina beto ke na yawu nsatu na ntangu beto ke na nsatu yawu.

9. Wa’ faso masolo ya Biblia ke sadisaka beto na kuvanda na kundima ti Yehova ke sadisa beto?

⁹ Na kati ya Biblia ke na masolo ya bantu yina tudilaka Yehova ntima mpe kuzwaka lubakusu ya yandi. (Ebr. 11:32-34; Zaki 5:17) Ntangu beto ke kanisaka na masolo ya mutindu yayi, ya ke sadisaka beto na kuvanda na kundima ti Yehova kele “kiswamunu mpe kiyekamanu ya beto, yandi ke kondwaka ve na kusadisa beto na kati ya bampasi.” (Nku. 46:1) Na ntangu beto ke kanisaka mutindu bisadi ya Yehova lakisaka kiminu na yandi mpe tatamana na kusadila yandi ata na bantangu ya mpasi, ya lenda kindisa beto na kulanda kifwani ya bawu.—Zaki 5:10, 11.

10. Yinki nge lenda sala samu Biblia sadisa nge?

¹⁰ Yinki nge lenda sala? Tanga Biblia bilumbu nyonso, mpe sonika baverse yina lenda sadisa nge. Bantu mingi ke sepelaka na kusadila mukanda Longoka dikanisi ya Biblia bilumbu nyonso samu na kubanda kilumbu na dikanisi ya Biblia yina ke sadisa bawu. Beto tala kifwani ya mpangi ya kento na nkumbu ya Marie.a Ba kwiza tala bibuti ya yandi na maladi ya cancer. Yinki sadisaka yandi na kukanga ntima ntangu yandi vanda kukipe bibuti ya yandi tekila bawu kufwa? Yandi me zonza: “Bilumbu nyonso na suka munu vanda tangaka verse ya Biblia yina ke na mukanda Longoka dikanisi ya Biblia bilumbu nyonso mpe munu vanda yindulaka na yawu. Ya sadisaka munu na kutula makanisi ya munu bilumbu nyonso na Yehova mpe na bamambu ya kitoko yina yandi ke longaka munu na Biblia kasi ve na mambu yina mu vanda kutana na yawu.”—Nku. 61:2.

BAMPANGI

11. Samu na yinki ya ke mbote na kuzaba ti ya ke mpe na bampangi nkaka yina ke na kangaka ntima na mantwala ya bampasi?

¹¹ Yehova me pesa beto bampangi samu na kusadisa beto na kukanga ntima. Ya ke pesaka beto ngolo na kuzaba ti beto ke ve kaka beto mosi samu ti “kimvuka nyonso ya bampangi ya [beto] na yinza ke na kutanaka mpe na bampasi ya mutindu mosi.” (1 Pi. 5:9) Ya zola zonza ti ya ke na bampangi ya kento na ya bakala yina ke kutanaka na bamambu yina beto ke na kutanaka na yawu mpe ba ke na bikanaka ya kukangama ya Yehova. Beto mpe lenda kanga ntima.—Bis. 14:22.

12. Wa’ faso bampangi lenda sadisa beto mpe yinki beto lenda sala samu na bawu? (2 Bakorinto 1:3, 4)

¹² Bampangi ya beto lenda sadisa beto na kukanga ntima na yina ba ke zonzaka mpe ke salaka. Ni yawu salamaka samu na ntumwa Polo. Na mikanda yina yandi sonikaka, yandi zonzilaka bankumbu ya bampangi yina sadisaka yandi ntangu yandi vandaka na boloko mpe vutulaka bawu matondo. Ba kindisaka yandi mpe pesaka yandi lubakusu yina yandi vandaka ya yawu nsatu. (Filp. 2:25, 29, 30; Kol. 4:10, 11) Beto mpe bubu yayi, bampangi ke salaka yawu samu na beto. Ntangu beto ke vandaka na nsatu ya kukanga ntima, bampangi ya beto ke vandaka na beto. Mpe ntangu ba ke vanda na nsatu ya beto, beto mpe ke vandaka na bawu.—Tanga 2 Bakorinto 1:3, 4.

13. Yinki sadisaka mpangi Maya na kukanga ntima?

¹³ Bampangi sadisaka mingi Maya yina ke vanda na Russie. Na 2020 basoda ya Russie kotaka na yinzo ya mpangi Maya samu na kusosa bima. Mpe na manima, yandi kutanaka na bamambu ya mpasi samu yandi vanda zonzilaka kiminu ya yandi na bantu ya nkaka. Maya zonzaka: “Na ntangu munu vanda kutana na bamambu yayi, mu vanda ya kulemba, na nkele mpe na mawa. Bampangi ya kento na ya bakala vanda bokila munu mpe vanda sonikilaka munu samu na kulakisa munu ti ba ke zolaka munu. Kubanda ntama, munu zaba ti bampangi ya kento na ya bakala ke zolaka munu mpe ba kele dikanda ya munu. Kasi, ntangu munu ke kanisaka na yina ba salaka samu na munu ya ke nataka munu na kuvanda na kundima ti ba ke zolaka munu.”

14. Yinki beto lenda sala samu na kuzwa lubakusu ya bampangi ya kento na ya bakala? (Tala mpe kizizi.)

¹⁴ Yinki nge lenda sala? Ntangu nge ke na kangaka ntima na mantwala ya bampasi, ya ke mfunu na kusolola na bampangi ya kento na ya bakala mpe kulutisa ntangu na bawu. Kuvanda ve na boma ya kulomba lusalusu ya bakuluntu, ba lenda vanda “kiswamunu samu na mupepe, mutindu kibumbamanu samu na mvula.” (Iza. 32:2) Kuzimbana ve ti bampangi ya nge ya kento na ya bakala ke na kutanaka mpe na bampasi. Na yawu, kusala mambu ya mbote na muntu yina ke na nsatu ya yawu ke sala ti nge vanda na kilengi mpe ya ke sadisa nge na kukanga ntima na mantwala ya bampasi.—Bis. 20:35.

KIVUVU

15. Wa’ faso kivuvu sadisaka Yesu mpe wa’ faso ya lenda sadisa beto? (Baebre 12:2)

¹⁵ Yehova me pesa beto kivuvu samu na kusadisa beto na kukanga ntima. (Rom. 15:13) Kuzimbana ve ti, na kati ya bilumbu ya kulutila mpasi yina Yesu lutisaka awa na ntoto, yandi lendaka kukanga ntima samu ti yandi vandaka na kivuvu. (Tanga Baebre 12:2.) Yesu zabaka ti kana yandi bikana ya kukangama, yandi ke lakisa ti bamambu yina Satana zonzaka na yina me tadila Yehova ke luvunu mpe ti Yehova ke muntu yina beto me lunga kuzitisa. Yesu vanda vingila mpe ntangu yina yandi zola vutuka na Tata ya yandi na mazulu, mpe ntangu yandi ke kuma mfumu mpe ke banda kuyala kintwadi na bampangi yina ba tulaka mafuta. Mutindu mosi mpe kivuvu ya beto ya kuzinga na yinza ya malu-malu, ke sadisa beto na kukanga ntima ntangu beto ke kutanaka na bampasi na yinza ya Satana.

16. Wa’ faso kivuvu sadisaka mpangi mosi ya kento na kukanga ntima mpe yinki nge ke na longokaka na mambu yina yandi me zonza?

¹⁶ Beto tala mutindu kivuvu na yina me tadila Kimfumu sadisaka mpangi ya kento na nkumbu ya Alla yina ke vandaka na Russie. Ba simbaka bakala ya yandi mpe ba tulaka yandi na boloko. Ntangu mambu yayi salamaka, Alla me zonza: “Bambala mingi mu vanda sambila Yehova samu na kivuvu yina yandi pesaka munu mpe mu vanda yindulaka na yawu. Ya sadisaka munu na kulemba ve. Munu zaba ti na manima ya bamambu ya mpasi yayi, bamambu ya mbote ke kwiza. Yehova ke nunga, beto mpe ke nunga.”

17. Wa’ faso beto lenda lakisa ti beto ke na vutulaka matondo na kivuvu yina Yehova me pesa beto? (Tala mpe kizizi.)

¹⁷ Yinki nge lenda sala? Baka ntangu ya kukanisa na bansilulu ya kitoko yina Yehova ke lungisa na mantwala. Kanisa na luzingu yina nge ke vanda na yawu na yinza ya malu-malu, bambote yina nge, ba ndiku ya nge mpe bantu ya dikanda ya nge ke kuzwa. Bampasi yina beto ke na kutanaka na yawu bubu yayi ke kaka samu na “ntangu fioti, mpe ti ya ke ve kilo.” (2 Kor. 4:17) Kanisa na ba yina ke sadilaka ve Yehova. Bawu mpe ke na kutanaka na bamambu ya ngolo na yinza ya Satana yayi. Kasi, ba zaba ata fioti ve bansilulu ya kitoko yina Yehova ke na bumbilaka bawu samu na mantwala. Na yawu, sala nyonso yina nge lenda sala samu na kuzonzila bawu kiminu ya nge. Ata ti nge ke zonzila ve bawu bamambu mingi, ya lenda kindisa bawu mpe kunata bawu na kuzaba dyaka mingi na yina me tadila Kimfumu ya Yehova mpe bansilulu ya yandi.

18. Samu na yinki beto lenda tula ntima na bansilulu ya Yehova?

¹⁸ Na manima ya kununga bamambu mingi ya mpasi yina yandi kutanaka na yawu, Yobi zonzaka na Yehova: “Mu zaba ti nge ke na lenda na mambu nyonso, mpe ata muntu lenda kabikisa yina nge zola kusala.” (Yobi 42:2) Mutindu Yobi longokaka yawu, ata kima lenda kanga Yehova nzila samu na kulungisa dikanisi ya yandi. Mambu yayi lenda pesa beto ngolo na kukanga ntima. Kanisa na kifwani yayi, mpangi mosi ya kento yina ke na maladi yina me baka bantangu mingi. Na manima ya kutala minganga mingi, yandi me lemba samu ata mosi me lenda kubelusa yandi. Kasi yandi me kuzwa munganga mosi yina zaba kisalu mpe yina me zonza na yandi wapi maladi yandi ke na yawu mpe yinki yandi ke sala samu na kusadisa yandi na kubeluka. Ya me fulusa yandi na kilengi ata ti yandi zola vingila mwa bilumbu samu na kubeluka. Na manima ya kuzwa kivuvu yayi, yandi me kuma ya kubongama samu na kukanga ntima, samu ti yandi ke kuma na mavimpi ya mbote na mantwala. Kaka mutindu mosi, beto ke na kundima na kivuvu ya beto ya paradiso yina ke na sadisaka beto na kukanga ntima.

19. Yinki beto ke na nsatu samu na kukanga ntima?

¹⁹ Mutindu beto me tala yawu, ni lusambu, Biblia, bampangi ya beto mpe kivuvu ya beto na Yehova ke sadisaka beto na kukanga ntima. Beto sadila mbote-mbote nyonso yayi yina Yehova me pesa beto. Yehova ke sadisa beto na bamambu ya mpasi yina beto ke na kutanaka na yawu tii na kilumbu yina yandi ke katula yinza ya Satana mpe bamambu ya yawu ya yimbi.—Filp. 4:13.