Bantwenya, beno kula na kimpeve na manima ya mbotokolo

1. Wapi bamambu ya mbote bantwenya mingi me sala?

BAMVULA nyonso, bantwenya mingi ke zwá mbotokolo. Kana nge ke mosi na kati ya bawu, zaba ti bampangi ya nge ya kento na ya bakala ke na kilengi mingi. Yehova mpe ke na kilengi. (Bin. 27:11) Kanisa ndambu na bamambu ya mbote yina nge me sala tii bubu yayi. Nge longoká Biblia, ntangu ya nkaka na kati ya bamvula mingi. Bamambu yina nge longoká me nata nge na kundima ti Biblia ke mambu ya Nzambi. Kasi ya kulutila mfunu, nge me kwiza zaba mpe kuzola muntu yina pesá beto Biblia. Luzolo ya nge samu na Yehova me kula, mpe ya me nata nge na kubaka mukanu ya kusadila yandi, mpe kuzwa mbotokolo. Nge me sala mambu ya mbote.

2. Yinki beto ke zonzila na disolo yayi?

² Ntangu ya nkaka tekila nge kuzwa mbotokolo, nge kutaná na bamambu mingi yina meká kiminu ya nge. Kasi malembe-malembe yina nge ke na kulaka, nge ke kutana na bamambu ya nkaka. Satan ke sala nyonso samu nge bika kuzola mpe kusadila Yehova. (Ef. 4:14) Kubika ve yandi bwisa nge. Yinki lenda sadisa nge na kuvanda kaka ya kukangama na Yehova, mpe na kulungisa nsilulu yina nge pesak’ yandi na kusadila yandi? Nge fwana ‘kusala ngolo’ samu na kubika ve kukula na kimpeve. (Ebr. 6:1) Wapi mutindu nge lenda sala yawu?

YINKI NGE LENDA SALA SAMU NA KUKULA NA KIMPEVE?

3. Yinki bakristo nyonso me lunga kusala na manima ya mbotokolo?

³ Na manima ya mbotokolo, beto nyonso me bonga kulanda malongi yina ntumwa Polo pesá na bakristo ya Efeze. Yandi zonzá na bawu na kukuma bakristo ‘ya kuyela.’ (Ef. 4:13) Yandi vandá sosa kuzonza ti, ba bika ve kukula. Ntumwa Polo sadilá kifwani ya mwana yina ke kulá samu na kulakisa faso mukristo ke kulá na kimpeve. Bibuti ya mwana yina me butama ntama mingi ve ke zolak’ yandi mpe ke sepelá na yandi. Kasi mwana ke bikana kaka ve mwana. Na manima ya mwa bamvula, yandi ke bika “mambu nyonso ya bana ya [fioti].” (1 Ko. 13:11) Ya ke faso mosi samu na bakristo. Na manima ya mbotokolo, beto me bonga kubika ve na kukula. Beto tala mwa bamambu yina lenda sadisa beto na kusala yawu.

4. Yinki lenda sadisa nge na kukula na kimpeve? Zonzila yawu. (Bafilipi 1:9)

⁴ Kulisa luzolo ya nge na Yehova. Ntembe ve, nge ke zolá Yehova. Kasi luzolo ya nge samu na yandi lendá kula. Na Bafilipi 1:9, ntumwa Polo zonzilá faso mosi yina beto lenda kulisa luzolo ya beto samu na Yehova. (Tanga.) Polo sambilá samu luzolo ya Bafilipi vanda “ya kulutila.” Bamambu yina Polo zonzá ke na lakisá ti luzolo ya beto samu na Yehova lenda kula. Wa’ faso beto lenda kulisa yawu? Beto lenda kuzwa ‘nzayilu ya sikisiki mpe luswasukusu mingi.’ Ntangu beto ke longoká kuzaba mingi Yehova, luzolo ya beto samu na yandi ke kulá, beto ke zolá mutindu ya muntu yina yandi kele, mpe faso ya yandi ya kusala bamambu. Nsatu ya beto ya kusepelisa yandi ke kulá, mpe beto zola kusala ata kima yina ke nyongisa yandi. Beto ke salá bangolo na kuzaba yinki yandi ke na vingilá beto sala, mpe wapi mutindu beto lenda sala yawu.

5-6. Wa’ faso beto lenda kulisa luzolo ya beto samu na Yehova?

⁵ Yesu landá na faso ya kulunga bifu ya Tata ya yandi. Na yawu, si beto longoka mingi kuzaba Yesu, luzolo ya beto samu na Yehova ke kula. (Ebr. 1:3) Faso ya kulutila mbote na kulongoka kuzaba Yesu ni na kulongoka babuku ya Matayi, Marke, Luke na Yoane. Kana nge ke ntete ve na kifu ya kutangá Biblia bilumbu nyonso, nge lenda banda na kutanga babuku yayi. Ntangu nge ke tangá masolo yina ke zonzilá luzingu ya Yesu, tala mbote-mbote bifu yina yandi lakisaka. Bantu vandá zolá kuvanda na yandi mpe kusolola na yandi. Na luzolo nyonso, yandi nanguná bana ya fioti. (Mrk. 10:13-16) Yesu vandá na ntima ya mbote, mpe bilandi ya yandi vandá ve na boma ya kuzonzila yandi bamambu yina ba vandá na yawu na ntima. (Mat. 16:22) Na mambu yayi, Yesu landá kifwani ya Tata ya yandi ya mazulu. Ya tsyeleka, ya ke ve mpasi na kusolola na Yehova. Beto lenda sambila yandi, mpe ntangu beto ke sambilaka, beto lenda fungula yandi ntima ya beto. Beto zaba ti yandi ke dasukila ve beto. Yandi zola beto, mpe yandi ke na mawa samu na beto.—1 Pi. 5:7.

⁶ Yesu vandá na kyadi samu na bantu. Ntumwa Matayi soniká mambu yina salamá kilumbu mosi: “Ntima ya yandi kumaka ya kufuluka na kyadi samu na bankonga ya bantu yina yandi [vandaka] tala. Bawu [vandaka] ya kulemba mpe ya kukondwa kibakala mutindu mameme yina kele ve na muvungi.” (Mat. 9:36) Yinki beto lenda zonza samu na Yehova? Yesu zonzaka: “Tata ya beno yina kele na mazulu zola ti ata mosi na kati ya bana ya [fioti] yayi zimbana.” (Mat. 18:14) Mambu yayi ke na sepelisá beto samu ya ke na lakisá ti Yehova zola beto mingi. Ntembe ve, kuzaba mbote-mbote Yesu ke sadisa beto na kukulisa luzolo ya beto samu na Yehova.

7. Wa’ faso kulutisa ntangu na bampangi ya kukula na kimpeve lenda sadisa nge?

⁷ Kima ya nkaka yina lenda sadisa nge na kukula na kimpeve mpe na kulakisa luzolo na bampangi, ni na kulutisa ntangu mingi na bampangi ya kukula na kimpeve ya kimvuka ya nge. Nge ke tala ti ba ke na kilengi. Ba ke na nyongá ata fioti ve mukanu yina ba baká ya kusadila Yehova. Lomba ba zabisa nge bambote yina ba me kuzwa na kisalu ya Yehova. Ntangu nge ke na mukanu ya mfunu ya kubaka, lomba ba pesa nge malongi. Kuzimbana ve ti “mambu ke nungaka kana bandongisi kele mingi.”—Bin. 11:14.

8. Yinki nge lenda sala si nge ke na bantembe na bamambu yina Biblia ke longaka?

⁸ Sala bangolo na kukatula bantembe yina ke na nge. Mutindu beto me tala yawu na paragrafe ya zole, Satan ke sala nyonso na kukanga nge nzila samu nge kula ve na kimpeve. Mosi ya bafaso yina yandi lenda sala yawu, ni na kunata nge na kutula ntembe na bamambu ya nkaka yina nge ke longoká na Biblia. Na kifwani, bantu ya nkaka lendá sosa kunata nge na kundima ti Nzambi yidiká ve beto mpe luzingu bandá kaka yawu mosi. Ntangu nge vandá mwana ya fioti, ntangu ya nkaka nge vandá kanisá ve na yawu. Kasi bubu yayi, ntangu ya nkaka ba ke na longisá nge yawu na lukolo. Ntangu ya nkaka nge ke na talá ti bamambu yina milongi ya nge ke na zonzá ke na nzila. Kasi ya lenda vanda ti bawu mosi nabunu ba sosa kuzaba mbote-mbote kana ya ke na muntu yina yidiká bima nyonso. Kuzimbana ve mambu yina ke na Bingana 18:17. Ya ke zonzaka: ‘Muntu ya ntete na kutuba na ntangu ya kunwanina nzutu ya yandi ke talanaka muntu ya lunungu, tii ntangu muntu ya nkaka ke kwizaka mpe ke yufulaka yandi byuvu mbote-mbote.’ Kundima ve kaka mpili yina mambu yina ba ke na longá nge na lukolo. Baka ntangu ya kutala mbote-mbote yinki Biblia ke na longaka. Sosa mpe bamvutu na kati ya mikanda ya beto. Solola na bampangi ya kento na ya bakala yina na ntama vandá ndima ti luzingu bandá kaka yawu mosi. Yufula bawu yinki natá bawu na kundima ti ya ke na muntu yina yidiká beto mpe ke zolá beto. Masolo ya mutindu yina lendá sadisa nge na kundima ti ya ke na muntu yina yidiká beto.

9. Yinki nge me longoka na disolo ya Melissa?

⁹ Melissa, mpangi mosi ya kento longoká mingi samu na kuzaba wapi mutindu luzingu bandaka.b Ya sadisak’ yandi na kukatula bantembe yina vandá na yandi. Yandi me zonza: “Na lukulo, mutindu ba ke longá ti luzingu bandak’ yawu mosi, ya ke ve mpasi na kundima yawu. Na kubanda, mu vandá na boma ya kusosa kuzaba. Mu vandá kanisa ti si mu sala yawu, mu ke kwiza tala ti bamambu yina ba vandá zonza ke ya tsyeleka. Kasi na manima, mu kwizá kanisa ti Yehova zola beto sadila yandi samu beto me sosa mpe beto me tala ti mambu yina Biblia ke zonzá ke ya tsyeleka. Na yawu, mu bandá kusosa. Mu tangá buku Y a-t-il un Créateur qui se soucie de vous ? mpe mikanda La vie a-t-elle été créée ? na Cinq questions à se poser sur l’origine de la vie. Mu kuzwá mvutu na bamambu yina mu vandá sosa. Mu nyongá na yina mu salá ve yawu na ntama.”

10-11. Yinki lenda sadisa nge na kubwa ve na disumu? (1 Batesalonika 4:3, 4)

¹⁰ Losa ndyatulu ya yimbi. Ntangu nge ke kulá, nsatu ya kuvukisa nzutu lendá kuma ngolo. Mpe bantu ya nkaka lendá sala nge tiya samu nge sala yawu. Satan zola ti nge lungisa bansatu yina. Yinki lenda sadisa nge na kubwa ve na disumu yayi? (Tanga 1 Batesalonika 4:3, 4.) Ntangu nge ke sambilá, zonza na Yehova nyonso yina ke na ntima ya nge. Mpe lomba yandi pesa nge ngolo. (Mat. 6:13) Kuzimbana ve ti Yehova zola kusadisa nge. Yandi ke dasukila ve nge. (Nku. 103:13, 14) Biblia lenda sadisa mpe nge. Melissa yina beto me zonzila, vandá nwaná na bansatu ya kuvukisa nzutu. Yandi me zonza: “Kutanga Biblia bilumbu nyonso sadisá munu na kubika ve kunwana na bansatu ya yimbi yina vandá na munu. Ya sadisá munu na kuzimbana ve ti mu pesá luzingu ya munu na Yehova, mpe mu zola kusadila yandi luzingu ya munu nyonso.”—Nku. 119:9.

¹¹ Kusosa ve kuyidika bamambu ya nge nge mosi. Zonza na bibuti ya nge mambu yina nge ke na nwaná na yawu. Ya tsyeleka, ya lenda vanda mpasi na kuzonzila bamambu ya mutindu yayi. Kasi ya ke mfunu na kusala yawu. Melissa me zonza: “Mu sambilá samu na kuzwa bukindi, mpe na manima mu zonzilá mambu ya munu na tata ya munu. Na manima, mu kuzwá kizunu ya ntima. Mu zabá ti Yehova vandá na kilengi na mambu yina mu salaka.”

12. Wa’ faso nge lenda baka mikanu ya mbote?

¹² Bika faso ya Yehova ya kutadila bamambu twadisa nge. Malembe-malembe nge ke na kulá, bibuti ya nge ke pesa nge muswa ya kubaka mikanu ya nge mosi. Kasi, nge ke ntete ve na ndwenga mingi. Yinki nge lenda sala samu na kubwa ve na bamambu yina lenda bebisa kindiku ya nge na Yehova? (Bin. 22:3) Kari mpangi mosi ya kento me zonza yinki sadisak’ yandi na kubaka mikanu ya mbote. Yandi kwizá tala ti bakristo ya kukula ke ve na nsatu ba pesa bawu misiku na bamambu nyonso yina ba ke salaka. Yandi me zonza: “Mu vandá na nsatu ya kulanda kaka ve misiku, kasi na kusosa kuzaba mutindu Yehova ke tadilá bamambu.” Ntangu nge ke tangá Biblia, nge lenda yufula: ‘Mambu yayi mu ke na tangá ke na longá munu yinki na mutindu yina Yehova ke tadilá bamambu? Na kati ya bamambu yina mu ke na tangá, ya ke kwandi na makanisi ya Yehova yina lenda twadisa munu? Wapi bambote mu ke kuzwa kana mu sadila yawu? (Nku. 19:7; Iza. 48:17, 18) Kana nge tanga Biblia mpe nge kanisa mbote-mbote na bamambu yina nge ke tangá, ya ke vanda ve mpasi na nge na kubaka mikanu yina ke sepelisa Yehova. Malembe-malembe nge ke kula, nge ke zaba faso ya Yehova ya kutadila bamambu. Na yawu, nge ke vanda ve na nsatu ba pesa nge misiku samu na bamambu nyonso.

13. Wa’ faso bandiku ya mbote lenda sadisa nge? (Bingana 13:20)

¹³ Soola bandiku yina zola Yehova. Mutindu beto zonzak’ yawu na paragrafe 7, bandiku yina nge ke soola lenda sadisa nge na kukula na kimpeve. (Tanga Bingana 13:20.) Sara mpangi mosi ya kento vandá dyaka ve na kilengi. Na manima, ya ke na mambu salamá yina sadisak’ yandi na kuvutula kilengi ya yandi. Yandi me zonza: “Mu kuzwá bandiku ya kitoko na ntangu yina mu vandá na yawu nsatu. Munu na mpangi mosi ya kento ya ntwenya vandá longoká Yinzo ya Kengidi kintwadi. Mpangi ya nkaka ya kento sadisá munu na kubanda kupesa bamvutu na balukutakanu. Lubakusu ya bandiku ya munu sadisá munu na kubanda kulutisa ntangu mingi na kulongoka Biblia munu mosi, mpe kusambila Yehova mingi. Kindiku ya munu na Yehova kulá mpe mu vutulá kilengi ya munu.”

14. Wa’ faso Julien salá samu na kuzwa bandiku ya mbote?

¹⁴ Wa’ faso nge lenda sala kindiku na bantu yina lendá sadisa nge na kukula na kimpeve? Julien yina ke kuluntu bubu yayi me zonza: “Ntangu mu vandá ntwenya, mu kuzwá bandiku ya mbote na bampangi yina mu vandá lutisá ntangu na bawu na kisalu ya kusamuna. Ba vandá na tiya, mpe na bawu mu kwizá tala ti kisalu ya kusamuna ke kisalu mosi yina ke pesá kilengi. Mu bandá kukanisa na kusala kisalu ya ntangu nyonso. Mu kwizá tala ti mu vandá ve na bandiku mingi ya mbote samu mu vandá sosa kusala kindiku kaka na bampangi yina vandá mvula mosi na munu. Ntangu mu kumá na Béthel, mu kuzwá mpe bandiku ya mbote. Kifwani ya bawu sadisá munu na kusoola mbote-mbote bima yina mu vandá sadila na kulutisa ntangu. Mpe ya salá ti mu kuma dyaka pene-pene na Yehova.”

15. Wa’ faso Polo kebisá Timote na yina me tadila bandiku? (2 Timote 2:20-22)

¹⁵ Yinki nge lenda sala si nge me tala ti mpangi mosi ya kimvuka ke ve ndiku ya mbote samu na nge? Polo zabá ti bampangi ya nkaka na kati ya kimvuka ya siècle ya ntete vandá ve na kimpeve ya mbote. Na yawu, yandi zonzá na Timote na kuvanda ntama na bawu. (Tanga 2 Timote 2:20-22.) Kindiku ya beto na Yehova ke ntalu mingi. Beto me sala bangolo na kutunga yawu. Beto zolá bika ata muntu bebisa yawu.—Nku. 26:4.

SOSA KULUNGISA BAMAMBU YINA KE SALA TI NGE KULA NA KIMPEVE

16. Wapi bamambu nge lenda kanisa na kulungisa?

¹⁶ Sosa kulungisa bamambu ya mbote. Soola bamambu yina ke sadisa nge na kukuma na kiminu ya ngolo mpe kukula na kimpeve. (Ef. 3:16) Na kifwani, nge lenda baka mukanu ya kutanga Biblia bilumbu nyonso mpe ya kulongoka yawu balumingu nyonso. (Nku. 1:2, 3) To nge lenda tala ti nge me bonga kubanda kusambila bambala mingi mpe kubongisa balusambu ya nge. Ntangu ya nkaka nge lenda tala mpe ti nge me bonga kuvanda mayela na bima yina nge ke soolá samu na kulutisa ntangu, mpe na mutindu yina nge ke sasilá ntangu ya nge. (Ef. 5:15, 16) Yehova ke vanda na kilengi na kutala bangolo nyonso yina nge ke sala samu na kukula na kimpeve.

17. Wapi bambote nge ke kuzwa na kusadisa bampangi?

¹⁷ Kusadisa bampangi ke sala ti nge kula na kimpeve. Yesu zonzaka: “Kilengi ke [vandaka] mingi na muntu yina ke kabulaka, kulutila muntu yina ke kuzwaka.” (Bis. 20:35) Kana nge sadila ntangu mpe ngolo ya nge na kusadisa bampangi, nge ke vanda na kilengi. Na kifwani, nge lenda baka mukanu ya kupesa diboko na bampangi ya kimvuka ya nge yina ke ya kununa to na bimbevo yina ke salá ti ba lenda sala ve bima mingi. Nge lenda sadila bawu zandu, to kusadisa bawu na kuzaba kusadila ba appareils ya bawu. Kana nge ke mpangi ya bakala, sosa kukuma kisadisi na dikanisi ya kusadisa mingi bampangi ya nge. (Flp. 2:4) Nge lenda lakisa mpe luzolo na bantu yina ke ve na kati ya kimvuka na kuzonzilá bawu nsangu ya mbote ya Kimfumu. (Mat. 9:36, 37) Dyaka, nge lenda sosa kusala kisalu ya ntangu nyonso.

18. Wa’ faso kisalu ya ntangu nyonso lendá sadisa nge na kukula na kimpeve?

¹⁸ Kisalu ya ntangu nyonso ke fungula nge banzila mingi yina ke sadisa nge na kukula na kimpeve. Kana nge ke pionnier, nge lenda sala École pour évangélisateurs du Royaume, nge lenda sala na Béthel, to na kisalu ya kutunga. Kaitlyn mpangi mosi ya kento ya ntwenya yina ke pionnier me zonza: “Na manima ya mbotokolo ya munu, mu vandá lutisa ntangu mingi na kisalu ya kusamuna na bampangi ya kento na ya bakala yina ke ya kukula na kimpeve. Ya sadisá munu mingi na kukula na kimpeve. Kifwani ya bawu pesá munu nsatu ya kulongoka dyaka mingi Biblia, mpe ya kubongisa faso ya munu ya kulonga.”

19. Wapi bambote nge ke kuzwa na kukula na kimpeve?

¹⁹ Nge ke kuzwa bambote mingi kana nge bika ve kukula na kimpeve. Nge ke lutisa ve ntangu ya nge na bamambu ya buzoba. (1 Yoa. 2:17) Nge ke tala ve mpasi yina bantu mingi ke kuzwá samu na mikanu ya yimbi yina ba ke bakaka. Nge ke kuzwa luzingu ya mbote mpe kilengi ya tsyeleka. (Bin. 16:3) Kifwani ya nge ya mbote ke sadisa bampangi nyonso. (1 Tim. 4:12) Ya kulutila mfunu, nge ke kuzwa kizunu mpe kilengi ya kuzaba ti nge ke sepelisá Yehova, mpe nge ke na kindiku ya ngolo na yandi.—Bin. 23:15, 16.