Kubika ve kukulisa luzolo ya nge

1. Yinki simbá ntima ya nge ntangu nge bandá kulongoka Biblia?

NGE na zabá dyaka bamambu yina nge kwizá zaba na kulongoka ya nge ya Biblia? Ya simbá ntima ya nge na kuzaba ti Nzambi ke na nkumbu. Ntima pemá nge ntangu nge zabá ti Nzambi ke yoká ve bantu na dibenga ya tiya. Mpe ya sepelisá nge na kuzaba ti nge ke tala dyaka bantu ya nge yina kufwaka mpe nge ke zinga na bawu na paradiso awa na ntoto.

2. Na manima ya kuzaba matsyeleka ya Biblia, yinki dyaka nge salá samu na kukula na kimpeve? (Baefeze 5:1, 2)

² Kulongoka Biblia ntangu nyonso salá ti luzolo ya nge samu na Yehova kula. Mpe ni luzolo yina, natá nge na kusadila bamambu yina nge vandá longoka. Ya salá ti nge baka mikanu yina ke kwelaná na makanisi ya Biblia. Nge bongisá faso ya nge ya kukanisa mpe ndyatulu ya nge samu nge vandá na nsatu ya kusepelisa Nzambi. Mutindu luzolo ke natá mwana na kulanda bamambu ya tata to mama ya yandi, luzolo natá nge mpe na kusala bamambu mutindu Tata ya nge ya mazulu.​—Tanga Baefeze 5:1, 2.

3. Na wapi byuvu nge lenda kanisa?

³ Nge lenda kanisa na byuvu yayi: ‘Kubanda ntangu yina mu kuzwá mbotokolo tii ntangu yayi, luzolo ya munu samu na Yehova me lutila kwandi kukula? Mu ke na lutilá kwandi kukwelisa faso ya munu ya kukanisa mpe ndyatulu ya munu na ya Yehova, mingi-mingi na yina me tadila luzolo samu na bampangi?’ Kana ‘luzolo yina nge vandaka na yawu ntete’ samu na Yehova mpe bampangi ya nge ke dyaka ve ngolo, kulemba ve. Bakristo ya ntete kutaná mpe na mambu yayi. Yesu biká ve bawu, yandi ke bika mpe ve beto. (Luz. 2:4, 7) Yandi zaba ti beto lenda vanda dyaka na luzolo yina beto vandá na yawu ntangu beto zabá matsyeleka.

4. Yinki beto ke tala na disolo yayi?

⁴ Na disolo yayi, beto ke tala wa’ faso beto lenda bika ve kukulisa luzolo ya beto samu na Yehova mpe samu na bampangi. Beto ke tala mpe ti, kukulisa luzolo ya beto na Yehova mpe na bampangi ke natá bambote mingi.

KULISA LUZOLO YA NGE SAMU NA YEHOVA

5-6. Wapi bamambu ya mpasi ntumwa Polo kutaná na yawu na kisalu ya yandi ya kusamuna, mpe yinki sadisak’ yandi na kubika ve kusadila Yehova?

⁵ Polo vandá na kilengi ya kusadila Yehova, kasi ya vandá mpe mpasi na yandi na kusala yawu. Yandi vandá kwendá na babwala ya ntama, mpe na ntangu yina, ya vandá mpasi mingi. Ya vandá na bilumbu yina yandi “vwandaka tala lufwa na ntwala ya [yandi] na kati ya banzadi” mpe “na ntwala ya bimpumbulu.” Bantangu ya nkaka bambeni ya yandi to bantu yina vandá zolá ve yandi vandá bulá yandi. (2 Ko. 11:23-27) Mpe ya vandá na bampangi yina vandá talá ata fioti ve bangolo nyonso yina yandi vandá salá samu na kusadisa bawu.​—2 Ko. 10:10; Flp. 4:15.

⁶ Yinki sadisá Polo na kubika ve kusadila Yehova? Mambu ya Nzambi mpe bamambu yina kuminak’ yandi, longak’ yandi mingi na yina me tadila kimuntu ya Yehova. Ya salá ti Polo vanda ve na ntembe ti Yehova ke zolak’ yandi. (Rom. 8:38, 39; Ef. 2:4, 5) Mpe ya kulisá dyaka luzolo ya yandi samu na Yehova. Polo lakisá luzolo ya yandi samu na Yehova ‘na kisalu ya yandi mpe na kusadisa’ basantu.​—Ebr. 6:10.

7. Wapi yina ke mosi ya bamambu yina lenda sadisa beto na kukulisa luzolo ya beto samu na Yehova?

⁷ Beto lenda kulisa luzolo ya beto samu na Nzambi na kulongoká ntangu nyonso Biblia. Ntangu nge ke tangá Biblia, sosa kutala yinki mambu yina nge ke na tangá ke na longá nge na yina me tadila Yehova. Nge lenda yufula: ‘Wa’ faso mambu yina mu ke na tangá ke na lakisá ti Yehova ke zolá munu? Wapi bamambu awa lenda pesa dyaka munu nsatu ya kuzola Yehova?’

8. Wa’ faso lusambu lenda sadisa beto na kukulisa luzolo ya beto samu na Nzambi?

⁸ Kima ya nkaka yina lenda sadisa beto na kukulisa luzolo ya beto samu na Yehova, ni kufungulak’ yandi ntangu nyonso ntima ya beto na lusambu. (Nku. 25:4, 5) Yehova ke pesá bamvutu na balusambu ya beto. (1 Yoa. 3:21, 22) Khanh, mpangi mosi ya kento yina ke vandá na Asie, me zonza: “Kima ya ntete yina salá ti mu zola Yehova, ni bamambu yina mu longoká na yina me tadila yandi. Kasi ntangu mu ke talá bamvutu ya yandi na balusambu ya munu, luzolo ya munu samu na yandi ke lutilá dyaka kukula. Ya ke salá ti mu vanda na nsatu ya kusala bamambu yina ke sepelisa yandi.”b

KULISA LUZOLO YA NGE SAMU NA BAMPANGI

9. Wa’ faso Timote lakisá ti luzolo ya yandi samu na bampangi vandá ngolo?

⁹ Mwa bamvula na manima ya kukuma mukristo, Polo kutaná na ntwenya mosi na nkumbu ya Timote. Timote vandá zolá Yehova mpe bantu. Na yina me tadila Timote, Polo zonzá na bafilipi: “Kaka ni yandi ke na mabanza mosi na munu, mpe ke talaka ya tsyelika ntima mpasi samu na beno.” (Flp. 2:20) Awa Polo ke na zonzilá luzolo yina Timote vandá na yawu samu na bampangi ya kento na ya bakala, kasi ve na makoki yina vandá na yandi na kusala bamambu to kusala ba discours. Ntembe ve, bimvuka yina Timote zolá kwenda tala vandá vingilak’ yandi na kilengi nyonso.​—1 Ko. 4:17.

10. Wa’ faso Anna na bakala ya yandi lakisá luzolo ya bawu samu na bampangi?

¹⁰ Beto mpe me bonga kusosa bafaso ya kusadisa bampangi ya beto. (Ebr. 13:16) Beto tala kifwani ya Anna yina beto zonzilá na disolo yina me luta. Na manima ya mupepe ya ngolo, yandi na bakala ya yandi kwendá tala dikanda mosi ya kimvuka mpe ba talá ti ba tôles ya bawu kwendá na mupepe. Na yawu, bilele ya bawu nyonso bebaka. Anna me zonza: “Beto baká bilele ya bawu, beto sukulak’ yawu mpe beto bongisak’ yawu. Samu na beto, ya vandá kaka kima ya fioti, kasi ni yina salá ti kindiku ya ngolo banda na bawu kubanda kilumbu yango tii bubu yayi.” Luzolo yina Anna na bakala ya yandi vandá na yawu samu na bampangi natá bawu na kupesa bampangi lubakusu yina ba vandá na yawu nsatu.​—1 Yoa. 3:17, 18.

11. a) Yinki ya ke salá bampangi ntangu beto ke lakisá bawu luzolo? b) Faso ke na lakisak’ yawu Bingana 19:17, yinki Yehova ke sala samu na beto kana beto lakisa luzolo?

¹¹ Ntangu ya nkaka bampangi ke talá ti beto ke na landá kifwani ya Yehova, ntangu ba ke talá bangolo yina beto ke salá na kulakisa bawu luzolo. Mpe bamambu ya mbote yina beto ke salá na bampangi lenda simba ntima ya bawu kulutila yina beto lenda kanisa. Khanh, yina beto me zonzila na mantwala, me zimbana ve bantu yina sadisak’ yandi. Yandi me zonza: “Mu ke na vutulá matondo mingi na bampangi ya kento nyonso yina vandá kwiza baka munu samu na kukwenda samuna. Ba vandá kwiza baka munu na yinzo ya beto, natá munu na kukwenda kudya mpe kukwiza vutula dyaka munu na yinzo ya beto. Bubu yayi, mu na talá bangolo nyonso yina ba vandá salaka. Mpe ba vandá salak’ yawu na luzolo nyonso.” Na luzingu, ya ke ve bantu nyonso yina beto ke lakisa ntima ya mbote, ke vutula beto matondo. Na yina me tadila bantu yina sadisak’ yandi, Khanh me zonza: “Mu ke na nsatu ya kuvutula bawu matondo na yina ba salá samu na munu, kasi mu zaba ve kisika ya kutala bawu. Yehova lenda vutula bawu bambote nyonso yina ba salá munu mpe mu ke sambilak’ yandi samu na yawu.” Khanh ke ve na vunaka. Ya tsyeleka Yehova ke talá bamambu ya mbote nyonso yina beto ke salá na bampangi, ata yina ke talaná fioti na meso ya beto mosi. Na meso ya yandi, bangolo nyonso yina beto ke salá ke ntalu mingi, mpe ya ke mutindu mfuka beto ke na defisak’ yandi mpe yandi ke vutula beto yawu.​—Tanga Bingana 19:17.

12. Wa’ faso bampangi ya bakala lenda lakisa luzolo ya bawu samu na kimvuka? (Tala mpe bizizi.)

¹² Kana nge ke mpangi ya bakala, wa’ faso nge lenda lakisa luzolo na bampangi mpe kusosa kusadisa bawu? Jordan mpangi mosi ya ntwenya yufulá na kuluntu mosi, yinki yandi lenda sala samu na kusala dyaka mingi na kimvuka. Kuluntu yango siiká yandi samu na bangolo yina yandi vandá sala. Mpe yandi zonzá na Jordan mwa bamambu ya kulungisa samu na kusala dyaka mingi na kati ya kimvuka. Na kifwani, yandi zonzá na yandi ti ya ke vanda mbote kana yandi vanda na kati ya bantu ya ntete na kukwiza na Yinzo ya Kimfumu, samu na kuyamba bampangi. Yandi kindisak’ yandi na kupesá bamvutu na balukutakanu, na kusamuná mingi na kimvuka ya yandi ya kisalu ya kusamuna mpe na kusosá kusadisa bampangi. Ntangu Jordan sadilá malongi yayi, ya sadisá ve kaka yandi na kulongoka kuzaba kusala bima ya malu-malu. Kasi luzolo ya yandi samu na bampangi kulá mpe. Jordan kwizá longoka ti mpangi ya bakala me bonga kubanda kusadisa bampangi tekila yandi kuma kisadisi, mpe yandi lenda tatamana na kusala yawu ntangu yandi ke kuma kisadisi.​—1 Tim. 3:8-10, 13.

13. Wa’ faso luzolo sadisá Christian na kukuma dyaka kuluntu?

¹³ Kana nge vandá kisadisi to kuluntu, Yehova me zimbana ve luzolo yina vandá na nge mpe faso ya vandá natá nge na kusala bamambu samu na yandi. (1 Ko. 15:58) Yandi ke na talá mpe luzolo yina nge ke na lakisá bubu yayi. Ya lembisá mpangi mosi na nkumbu ya Christian ntangu yandi zabá ti yandi ke vanda dyaka ve kuluntu. Kasi yandi me zonza: “Mu salá nyonso na kusadila Yehova na luzolo nyonso ata mu vanda kuluntu to ve.” Bubu yayi, Christian ke na sadilá dyaka mutindu kuluntu na kimvuka. Yandi me zonza: “Ntangu ba zonzá na munu na kusala dyaka mutindu kuluntu, mu vandá na mwa maketi-keti. Kasi mu kwizá tala ti, kana Yehova na ntima ya yandi ya mbote zola ti mu sadila dyaka mutindu kuluntu, samu na luzolo ya munu na yandi mpe bampangi ya munu, mu ke sala yawu.”

14. Yinki beto lenda longoka na mambu yina mpangi mosi ya kento yina ke vandá na Géorgie zonzaka?

¹⁴ Bisadi ya Yehova ke lakisá mpe luzolo ya bawu na bantu ya nkaka. (Mat. 22:37-39) Na kifwani, Elena mpangi mosi yina ke vandá na Géorgie me zonza: “Kima ya ntete yina vandá natá munu na kusamuna, ni luzolo ya munu samu na Yehova. Kasi ntangu nyonso yina luzolo ya munu samu na Tata ya munu ya mazulu vandá kulá, luzolo ya munu samu na bantu mpe vandá kulaka. Mu ke kanisá na bamambu yina bantu ke na kutaná na yawu, mpe na yina mu lenda zonza samu na kusimba bantima. Kukanisa mutindu yayi, ke pesá dyaka munu nsatu mingi ya kusadisa bawu.”—Rom. 10:13-15.

BAMBOTE YINA KULAKISA LUZOLO NA BAMPANGI KE NATINA BETO

15-16. Mutindu bizizi ke na lakisak’ yawu, wapi bambote beto ke kuzwá ntangu beto ke lakisá luzolo na bampangi?

¹⁵ Kulakisa luzolo na bampangi ke natiná ve bambote kaka na bawu. Ntangu beto ke sadisá bampangi ya beto, bantu ya nkaka mpe lendá kuzwa bambote na manima ya bawu. Mambu yina Paolo na kento ya yandi salá ke na lakisak’ yawu. Ntangu maladi ya COVID-19 bandá, ba sadisá bampangi ya kukula na kuzaba kusadila ba appareils ya bawu samu na kusamuna. Ya vandá mpasi samu na mpangi mosi ya kento na kusimba faso ya kusadila yawu, kasi yandi kwizá zaba. Mpe na manima, yandi bokilá bantu ya dikanda ya yandi na lukutakanu ya kubambuka moyo lufwa ya Yesu. Bantu ya dikanda ya yandi 60 landá lukutakanu ya kubambuka moyo na vidéoconférence. Bangolo yina Paolo na kento ya yandi salá, natá ve kaka bambote na mpangi yina, kasi mpe na dikanda ya yandi. Na manima, mpangi yango sonikilá Paolo: “Matondo mingi na yina nge me kanisa na beto biboba. Mu lenda zimbana ata fioti ve luzolo yina Yehova me lakisa beto mpe nyonso yina nge me sala.”

¹⁶ Beto lenda benda kileso ya mfunu na mambu yina Paolo salaka. Luzolo me lutila mfunu na mayela nyonso yina beto lenda vanda na yawu. Yandi me zonza: “Ntangu mu vandá ntwadisi ya circonscription, mu salá ba discours mingi. Bubu yayi mu ke na talá ti mingi ya bamambu yina mu zonzá, bampangi me zimbana yawu, kasi ba me zimbana ata fioti ve yina mu salá samu na bawu.”

17. Nani mpe ke kuzwa bambote ntangu beto ke lakisá luzolo?

¹⁷ Ntangu beto ke lakisá luzolo na bampangi, ya ke sadisá beto mosi. Jonathan, yina ke vandá na Nouvelle-Zélande, me tala ti ya ke ya tsyeleka. Kilumbu mosi ya samedi na manima ya midi, yandi talá mupasuli-nzila mosi yina vandá samuna yandi mosi. Yandi baká mukanu ya kusamuna na yandi ba samedi na manima ya midi. Yandi vandá kanisa ata fioti ve ti ya zolá sadisa yandi mosi. Yandi me zonza: “Na ntangu yina, mu vandá zolá ve mingi kisalu ya kusamuna. Kasi kutala faso mupasuli-nzila yayi vandá longa, mpe bambuma yina ya vandá buta, salá ti mu banda kuzola kisalu ya kusamuna. Mu kuzwá mpe ndiku ya mbote yina sadisá munu na kukula na kimpeve, na kuvanda na kilengi na kisalu ya kusamuna mpe na kukuma pene-pene na Yehova.”

18. Yinki Yehova zola beto sala?

¹⁸ Yehova zola ti luzolo ya beto samu na yandi mpe samu na bampangi kula. Mutindu beto me tala yawu, kutanga Biblia, kukanisa na yawu mbote-mbote mpe kufungula ntima ya beto ntangu nyonso na Yehova, lenda sadisa beto na kukulisa luzolo ya beto samu na yandi. Mpe kupesa bampangi lubakusu, lenda kulisa luzolo ya beto samu na bawu. Ntangu luzolo ya beto ke kulá, beto ke kumá dyaka pene-pene na Yehova mpe na bampangi ya beto. Kindiku yina beto ke tunga na bawu ke vanda samu na ntangu nyonso.