Baleson yina beto lenda longoka na ‘disiple yina Yesu vandá zolá mingi’

1. Yinki luzolo ya Nzambi samu na beto ke salá nge?

Yoane soniká ti “Nzambi [ke] luzolo.” (1 Yoa. 4:8) Beto zaba ti Nzambi muntu yidiká luzingu, kasi verse yayi ke sadisá beto na kuzimbana ve ti luzolo katuká na yandi. Yehova ke zolá beto! Luzolo ya yandi samu na beto ke salá ti beto vanda na sekurite, beto vanda na kilengi, mpe beto vanda na yina ke mfunu samu na beto.

2. Faso Matayi 22:37-40 ke zonzak’ yawu, wapi yina ke misiku zole ya kulutila nene, mpe samu na yinki ya lenda vanda mpasi na beto na kulanda musiku ya zole?

² Bakristo lenda sola ve si ba ke lakisa luzolo to ve. Samu ya ke musiku. (Tanga Matayi 22:37-40.) Ntangu beto ke longoka na kuzaba mbote Yehova, beto lenda tala ti ya ke ve mpasi na kulanda musiku ya ntete. Na nyonso, Yehova ke muntu ya kulunga; yandi ke kipeke beto mpe yandi ke lakisá beto ntima ya mbote. Kasi ya lenda vanda mpasi samu na beto na kulanda musiku ya zole. Samu na yinki? Samu ti bampangi ya beto ya kento na ya bakala ya kimvuka ke bantu ya masumu. Bantangu ya nkaka, ba lenda zonza mpe ba lenda sala bamambu yina ke talana nete ba ke zolá ve beto. Yehova zabá ti ya ke vanda mpasi na beto na kulanda musiku yina, na yawu, yandi sadilá bantu yina soniká babuku ya Biblia samu na kulonga beto samu na yinki beto zolá zolasana, mpe faso ya kusala yawu. Mosi ya bawu vandá Yoane.—1 Yoa. 3:11, 12.

3. Yinki Yoane zonzá mingi na yina me tadila luzolo?

³ Yoane zonzá bambala mingi ti, bakristo zolá vanda na luzolo. Yandi sadilá mot “luzolo” na “kuzola” bambala mingi kuluta nombre yina ba sadilak’ yawu na buku ya Matayi, ya Marke, mpe ya Luke. Yoane kumá ntangu ya nkaka na bamvula 100 ntangu yandi soniká buku ya Yoane, mpe ya 1 Yoane, 2 Yoane, na 3 Yoane. Babuku yina yandi soniká ke longá beto ti, beto zolá sala mambu nyonso na luzolo. (1 Yoa. 4:10, 11) Kasi, ya baká ntangu na Yoane na kulongoka mambu yayi.

4. Yoane lakisá kwandi ntangu nyonso luzolo na bampangi?

⁴ Ntangu Yoane vandá jeune, yandi vandá lakisá ve luzolo ntangu nyonso. Na kifwani, kilumbu mosi Yesu na badisiple ya yandi katuká na Jeruzalem samu na kukwenda na Samari. Bantu ya bwala mosi ya Samari mangá kulakisa bawu kifu ya kuyambá banzenza. Yinki Yoane salá? Yandi na mpangi ya yandi Zaki lombá na Yesu si ba lenda sala ti, tiya katuka na zulu, mpe yoka bantu nyonso ya bwala yina! (Luke 9:52-56) Mbala ya nkaka, Yoane lendá ve kulakisa luzolo na bampangi ya yandi ba-apotre. Yandi na mpangi ya yandi, zonzá na mama ya bawu na kulomba na Yesu na kupesa bawu baplase ya nene na Kimfumu ya Nzambi. Ba-apotre ya nkaka dasuká ntangu ba wá mambu yina Yoane na Zaki salá! (Mat. 20:20, 21, 24) Kasi, Yesu vandá zolá kaka Yoane ata yandi bulá mabaku nyonso yayi.—Yoa. 21:7.

5. Yinki beto ke zonzila na artikle yayi?

⁵ Na artikle yayi, beto ke zonzila ekzample ya Yoane, mpe mwa bamambu yina yandi soniká na yina me tadila luzolo. Beto ke longoka faso beto lenda lakisa luzolo samu na bampangi ya beto ya kento na ya bakala. Beto ke longoka mpe faso ya mbote yina chef ya famiye lenda lakisa ti yandi ke zolá famiye ya yandi.

LUZOLO KE TALANÁ NA NDYATULU

6. Yinki Yehova salá samu na kulakisa ti yandi ke zolá beto?

⁶ Beto lenda kanisa ti, samu na kuzola bantu beto zolá vanda kaka na makanisi ya mbote samu na bawu, to kuzonzila bawu mambu ya kitoko. Kasi si ya vrai beto zola bawu, beto zolá lakisa yawu na bamambu ya mbote yina beto ke salá bawu. (Tala Zaki 2:17, 26.) Na kifwani, Yehova ke zolá beto. (1 Yoa. 4:19) Yandi ke lakisá beto luzolo ya yandi na makanisi ya kitoko yina ke na kati ya Biblia. (Nku. 25:10; Rom. 8:38, 39) Kasi beto zaba ti, Nzambi ke zolá beto kaka na yina ve yandi ke zonzá, kasi na yina mpe yandi ke salá. Yoane soniká: ‘Beno tala faso Nzambi lakisá beto luzolo ya yandi. Yandi filisá Mwana ya yandi kaka mosi na yinza, samu beto kuzwa luzingu ya ntangu nyonso.’ (1 Yoa. 4:9) Yehova ndimá ti mwana ya yandi tala mpasi mpe yandi kufwa samu na beto. (Yoa. 3:16) Beto lenda vanda kwandi na ntembe ti Yehova ke zolá beto?

7. Yinki Yesu salá samu na kulakisa beto luzolo ya yandi?

⁷ Yesu zonzá na badisiple ya yandi ti yandi ke zolá bawu. (Yoa. 13:1; 15:15) Yandi lakisá ti yandi ke zolá bawu mingi, na beto mpe, kaka na yina ve yandi zonzá, kasi na yina mpe yandi salaka. Yesu zonzá: “Ata muntu mosi ve ke na luzolo ya nene kuluta yayi [...] ti muntu pesa luzingu ya yandi samu na bampangi ya yandi.” (Yoa. 15:13 nwt-MK) Ntangu beto ke kanisa na yina Yehova na Yesu salá samu na beto, yinki ya ke puse beto na kusala?

8. Yinki 1 Yoane 3:18 ke zonzá yina beto zolá sala?

⁸ Beto ke lakisá ti beto ke zolá Yehova na Yesu ntangu beto ke kuwá bawu. (Yoa. 14:15; 1 Yoa. 5:3) Yesu lombá na beto na kuvanda na luzolo samu na bampangi. (Yoa. 13:34, 35). Beto me bonga kuzonza na bampangi ya beto ya kento na ya bakala ti beto ke zolá bawu. Kasi beto zolá lakisa mpe yawu na yina beto ke salá. (Tanga 1 Yoane 3:18.) Wapi yina ke mwa bima beto lenda sala samu na kulakisa ti beto ke zolá bawu?

ZOLA BAMPANGI YA NGE YA KENTO NA YA BAKALA

9. Yinki luzolo natá Yoane na kusala?

⁹ Ntangu ya nkaka, si yandi zolá, Yoane zolá kontinye kusosa mbongo na papa ya yandi na kisalu ya lapeche ya famiye. Kasi yandi salá ve yawu. Yandi sadilá luzingu ya yandi nyonso samu na kusadisa bantu ya nkaka na kuzaba Yehova na Yesu. Luzingu yina Yoane solá, vandá ve luzingu ya pete. Ba kwamisak’ yandi mpe pene-pene ya nsuka ya siekle ya ntete, ntangu yandi nuná, ba natak’ yandi na ngolo na bwala ya nkaka. (Bis. 3:1; 4:1-3; 5:18; Luz. 1:9) Ata ntangu yandi vandá na boloko, Yoane lakisá ti yandi vandá kanisa na bampangi ya yandi. Na kifwani, ntangu yandi vandá na ile ya Patmos, yandi soniká buku ya Luzabusu to révélation yina yandi kuzwá, mpe yandi filisak’ yawu na bimvuka samu ba zaba yina ke “salama ntama mingi ve.” (Luz. 1:1 nwt-MK) Ntembe ve, na manima ya kubasika na Patmos, Yoane soniká buku ya Yoane yina ke zonzá luzingu mpe kisalu ya predikasion ya Yesu. Yandi soniká mpe mikanda tatu samu na kupesa bampangi ya yandi ya kento na ya bakala kuraje mpe ngolo. Na ntima mosi, Yoane pesá luzingu ya yandi nyonso na kisalu ya Yehova. Wa’ faso nge lenda landa ekzample ya yandi?

10. Wa’ faso nge lenda lakisa ti nge ke zolá bantu?

¹⁰ Nge lenda lakisa ti nge ke zolá bantu na badesizion yina nge ke baká na luzingu ya nge. Yinza ya Satan ke na nsatu nge lutisa ntangu ya nge mpe nge sadila bangolo ya nge kaka samu na nge mosi, mpe samu na kusosa mbongo to kusosa kuvanda na nkumbu. Kasi, na yinza nyonso bakristo ke lutisá ntangu mingi yina ba lenda lutisa na kupreche nsangu ya mbote, mpe kusadisa bantu na kuvanda pene-pene na Yehova. Samu na kupreche bantangu mingi, ba ya nkaka ke kumá bapionier permanent, bapionier spesial, to bamisionere.

11. Wa’ faso baproklamatere mingi ya kukangama na Yehova ke lakisá ti ba zola Yehova mpe bampangi ya bawu ya kento na ya bakala?

¹¹ Bakristo mingi ke lutisá ba-heure mingi na kisalu, samu na kulenda kudikisa banzutu ya bawu mpe bafamiye ya bawu. Kasi baproklamatere yayi, ke salá nyonso yina ba lenda sala samu na kutula diboko na bisalu ya organizasion ya Yehova. Na kifwani, ba ya nkaka ke na ngolo ya kusadisa bampangi yina mipepe ya ngolo to bamvula ya nene ke natiná bampasi, ba ya nkaka ke tulá diboko na kisalu ya construction, mpe beto nyonso ke pesá mbongo ya beto samu na kutula diboko na bisalu ya organizasion. Beto ke salá nyonso yayi, samu beto ke zolá Nzambi mpe bampangi ya beto. Ba-semaine nyonso, beto ke lakisá ti beto ke zolá bampangi ya beto ntangu beto ke vukaná na balukutakanu mpe ke pesá bakomentere. Ata beto ke ya kulemba, beto ke vandá na balukutakanu yango. Ata beto me lutisa kilumbu ya yimbi, beto ke pesá bakomentere. Mpe ata beto nyonso ke na bamambu ya mpasi yina ke kuminá beto, beto ke pesá bampangi ngolo avant balukutakanu banda, mpe na manima ya yawu. (Ebr. 10:24, 25) Beto ke na kilengi mingi na kisalu yina ke salá bampangi ya beto ya kimpeve!

12. Wapi yina ke faso ya nkaka yina Yoane lakisá ti yandi ke zolá bampangi ya yandi?

¹² Samu na kulakisa luzolo ya yandi na bampangi, Yoane nsuka ve kaka na kufelisite bawu, kasi yandi pesá mpe bawu bakonseye. Na kifwani, na mikanda yina yandi soniká, Yoane felisiteke bampangi ya yandi samu na kiminu ya bawu mpe samu na kisalu ya bawu ya mbote, kasi yandi pesá mpe bawu bakonseye na yina me tadila disumu. (1 Yoa. 1:8–2:1, 13, 14) Faso mosi mpe, beto zolá felisite bampangi ya beto samu na bamambu ya mbote yina ba ke salaka. Kasi si muntu banda kulakisa bifu ya yimbi, to banda kusala bamambu yina lenda bebisa kikamarade ya yandi na Yehova, beto ke lakisa yandi ntima ya mbote ntangu beto ke pesa yandi bakonseye ya kulunga yina ke sadisa yandi. Ya ke lombá kuraje na kupesa mpangi konseye, kasi Biblia ke zonzá ti, bakamarade ya vrai ke pesá bampangi bakonseye.—Bin. 27:17.

13. Yinki beto zolá manga kusala?

¹³ Bantangu ya nkaka, beto ke lakisá luzolo ya beto na bampangi ntangu beto ke mangá kusala bima ya nkaka. Na kifwani, beto ke dasuká ve na mbangu samu na bamambu yina ba me zonza. Beto kanisa na mambu yina salamá na nsuka ya luzingu ya Yesu awa na ntoto. Yandi zonzá na badisiple ya yandi ti, samu na kuzwa luzingu ya ntangu nyonso, ba zolá kudya munsuni ya yandi, mpe kunwa menga ya yandi. (Yoa. 6:53-57) Mingi ya badisiple ya Yesu sepelá ve na yina Yesu zonzá. Na yawu, ba biká kulanda yandi. Kasi ba yina vandá ya kukangama na yandi faso Yoane, bikaná kaka na yandi. Ba komprendre ve mambu Yesu zonzá, mpe ya vandá mbala ya ntete ba kuwa mambu ya faso yayi. Ata ba ya nkaka yina bikaná na Yesu, kanisá ti yina Yesu zonzá vandá yimbi, mpe ba dasuká na yawu, kasi ba vandá na konfianse na yandi, samu ba zabá ti yandi ke zonzá kaka verite. (Yoa. 6:60, 66-69) Ya ke mbote mingi na kudasuká ve na mbangu na yina bampangi ya beto ke zonzá! Kasi, beto ke pesá bawu ntangu ya kulakisa mbote-mbote yina ba ke na zolá kuzonza.—Bin. 18:13; Lon. 7:9.

14. Samu na yinki beto zolá yiina ve bampangi ya beto ya kento na ya bakala?

¹⁴ Yoane mpe zonzá na beto na kuyiina ve bampangi ya beto. Si beto landa ve konseye yayi, Satan lenda nata beto na kusala yina yandi zola. (1 Yoa. 2:11; 3:15) Ya kuminá bakristo ya nkaka na nsuka ya siekle ya ntete. Satan vandá sala nyonso na kunata bisadi ya Nzambi na kuyiina bampangi, mpe na kukabuka. Na ntangu yina Yoane vandá sonika mikanda ya yandi, babakala yina vandá lakisa kifu yayi ya Satan kotá na kati ya kimvuka. Na kifwani, Diotrephes vandá sosa kukotisa divizion na kati ya kimvuka. (3 Yoa. 9, 10) Yandi vandá pesa ve buzitu na bakuluntu yina kimvuka ya bantwadisi vandá filisa. Yandi meká mpe kubingisa na kimvuka, ba yina vandá yamba na ntima mosi bantu yina yandi vandá zolá ve. Ya vandá mambu mosi ya yimbi. Bubu yayi mpe, Satan ke na salá nyonso samu na kukabula bisadi ya Nzambi. Beto zolá yiina ata fioti ve bampangi ya beto mpe kubika kusadisa bawu.

ZOLA FAMIYE YA NGE

15. Yinki chef ya famiye zolá zimbana ve?

¹⁵ Faso mosi yina chef ya famiye lenda lakisa ti yandi ke zolá famiye ya yandi, ni na kupesa bawu yina bawu ke na yawu nsatu. (1 Tim. 5:8) Yandi zolá zimbana ve ti, bima ya kinsuni yina yandi ke pesá bawu lenda lungisa ve bansatu ya kimpeve ya famiye ya yandi. (Mat. 5:3) Kanisa na ekzample ya mbote yina Yesu pesá na bachef ya famiye. Buku ya Yoane ke zonzá na beto ti ntangu Yesu vandá kufwa na zulu ya yinti, yandi vandá kontinye kukanisa na famiye ya yandi. Na kisika yina ba vandá kufwa Yesu, Yoane vandá ya kutelama kuna na Marie, mama ya Yesu. Ata na kati ya ntangu ya mpasi ya faso yina, Yesu lombá na Yoane na kukipe mama ya yandi. (Yoa. 19:26, 27) Yesu vandá na baleki ya kento na ya bakala yina lenda sala ti Marie vanda na yina yandi ke na yawu nsatu, kasi ya ke na talana nete ti ata mosi na kati ya bawu vandá disiple ya Yesu na ntangu yina. Yesu vandá sosa kuvanda sure ti Marie ke vanda na yina yandi ke na yawu nsatu na kinsuni mpe na kimpeve.

16. Wapi baresponsabilite Yoane vandá na yawu?

¹⁶ Yoane vandá na baresponsabilite mingi. Yandi vandá apotre, na yawu, yandi zolá vanda na tiya na kisalu ya predikasion. Ya lenda vanda ti yandi vandá ya kukwela. Na yawu, yandi zolá sala nyonso samu famiye ya yandi kuzwa yina ba ke na yawu nsatu na kinsuni, mpe na kimpeve. (1 Ko. 9:5) Wapi leson lenda benda bachef ya famiye bubu yayi?

17. Samu na yinki ya ke mbote na chef ya famiye na kukipe bansatu ya kimpeve ya famiye ya yandi?

¹⁷ Mpangi yina ke chef ya famiye lenda vanda na baresponsabilite mingi ya nene. Na kifwani, yandi me bonga kusala na ntima mosi kisalu yina ke sadisak’ yandi na kudikisa famiye ya yandi, samu na kupesa nkembo na Yehova. (Ef. 6:5, 6; Tite 2:9, 10) Mpe yandi lenda vanda na baresponsabilite na kimvuka, faso kupesa bampangi ngolo, kukipe bawu, mpe kutwadisa kisalu ya predikasion. Yandi ke mpe na responsabilite ya kulongoka ntangu nyonso Biblia na kento ya yandi, mpe na babana ya yandi. Ba ke sepelá na nyonso yina yandi ke salá samu ba vanda na sante ya mbote mpe kilengi, mpe faso yandi ke sadisá bawu na kukontinye kusadila Yehova.—Ef. 5:28, 29; 6:4.

“BIKANA NA LUZOLO YA MUNU”

18. Na wapi mambu Yoane vandá sure?

¹⁸ Yoane zingá bamvula mingi, mpe kutaná na bamambu mingi na luzingu ya yandi. Yandi kutaná na bamambu ya mpasi ya bafaso mingi yina zolá lembisa kiminu ya yandi. Kasi ntangu nyonso, yandi vandá sala yina yandi vandá na ngolo ya kusala samu na kulanda misiku ya Yesu, faso kuzola bampangi ya yandi. Samu na yawu, Yoane vandá sure ti Yehova na Yesu zolak’ yandi, mpe ba zolá pesa yandi ngolo yina yandi vandá na yawu nsatu na mantwala ya bamambu ya mpasi. (Yoa. 14:15-17; 15:10; 1 Yoa. 4:16) Satan na yinza ya yandi lendá ve kukanga Yoane nzila na kuzola bampangi ya yandi, mpe na kulakisa bawu luzolo ya yandi na yina yandi vandá zonzá, mpe na bamambu yina yandi vandá sala.

19. Yinki 1 Yoane 4:7 ke lombá na beto na kusala, mpe samu na yinki?

¹⁹ Faso Yoane, beto ke zingá na yinza yina Satan ke yalá, nzambi yina ke na luzolo na ata muntu. (1 Yoa. 3:1, 10) Yandi ke na sosá kunata beto na kubika kuzola bampangi ya beto ya kento na bakala. Yandi ke lenda kusala yawu kaka si beto pesa yandi nzila. Beto ke lemba ve na kuzola bampangi ya beto ya kento na ya bakala, mpe na kulakisa bawu luzolo yango na bamambu yina beto ke salaka. Si beto sala yawu, beto ke vanda na kilengi ya kuvanda na kati ya famiye ya Yehova, mpe luzingu ya beto ke vanda na kilengi mingi.—Tanga 1 Yoane 4:7.