DISOLO YA KULONGOKA 14
Na dyambu yayi, “bantu nyonso ke zaba ti beno kele bilandi ya munu”
“Kana beno zolasana beno na beno, bantu nyonso ke zaba ti beno kele bilandi ya munu.”—YOA. 13:35.
NZIMBU 106 Cultivons l’amour
YINA BETO KE LONGOKAa
Yinki bantu yina ke ve Bambangi ya Yehova ke kanisá ntangu ba ke talá luzolo yina ke na kati ya dikanda ya Yehova? (Tala paragrafe 1)
1. Yinki ke simbá bantima ya bantu mingi ntangu ba ke kwizá na balukutakanu ya beto? (Tala mpe kizizi.)
KANISA na kifwani yayi: kento mosi na bakala ya yandi me kwiza mbala ya ntete na yinzo ya Kimfumu ya Bambangi ya Yehova. Mutindu ba me yamba bawu mpe luzolo yina ba me tala na kati ya bampangi ya kimvuka me simba mingi ntima ya bawu. Ntangu ba ke na vutuká na yinzo, kento me zonza na bakala ya yandi: ‘Bambangi ya Yehova ke ve faso mosi na bantu ya nkaka. Me sepela mingi kuvanda na bawu.’
2. Samu na yinki bantu ya nkaka me bika kusadila Yehova?
2 Luzolo yina ke na kati ya bisadi ya Yehova ke kima mosi ya ngitukulu. Kasi Bambangi ya Yehova ke bantu ya masumu. (1 Yoa. 1:8) Na yawu, ntangu beto ke mesaná na bampangi ya kimvuka, beto ke kwizá talá mwa bifu ya yimbi yina ke na bawu. (Rom. 3:23) Mambu ya kyadi ke ti, ya ke na ba yina me bika mwa bifu ya bampangi sala ti ba bika kusadila Yehova.
3. Yinki ke lakisá banani ke bilandi ya Yesu ya tsyeleka? (Yoane 13:34, 35)
3 Tala dyaka verse yina ke na twadisá disolo yayi. (Tanga Yoane 13:34, 35.) Yinki ke lakisá banani ke bilandi ya Yesu ya tsyeleka? Biblia ke zonzá ti ba ke zolasana. Ya zonzá ve ti ba ke sala ve masumu. Mpe Yesu zonzá ve ti: ‘Beno ke zaba ti beno ke bilandi ya munu.’ Kasi yandi zonzaka: “Bantu nyonso ke zaba ti beno kele bilandi ya munu.” Yesu lakisá ti ntangu bilandi ya yandi ke lakisa luzolo na bampangi, kaka ni bawu ve ke zaba ti ba ke bilandi ya yandi ya tsyeleka. Ata mpe bantu ya ngaanda ke tala yawu.
4. Yinki bantu ya nkaka lenda yufula na yina me tadila Bakristo ya tsyeleka?
4 Bantu ya nkaka yina ke ve Bambangi ya Yehova lenda yufula: ‘Wa’ faso luzolo ke salá ti beto zaba bilandi ya Yesu ya tsyeleka? Wa’ faso Yesu lakisá luzolo na bantumwa ya yandi? Mpe wa’ faso bubu yayi bantu lenda landa kifwani ya yandi?’ Bambangi ya Yehova me bonga kukanisa na byuvu yayi. Kusala yawu lenda sadisa beto na kulakisa luzolo na faso ya kulutila, mingi-mingi ntangu bampangi ke nyongisá beto.—Ef. 5:2.
SAMU NA YINKI LUZOLO KE LAKISÁ BANANI KE BILANDI YA YESU YA TSYELEKA?
5. Yinki zola zonza mambu yina Yesu zonzá na Yoane 15:12, 13?
5 Yesu lakisá pwelele ti ni luzolo ke sadisa bantu na kuzaba banani ke bilandi ya yandi ya tsyeleka. (Tanga Yoane 15:12, 13.) Bantu ke tala luzolo ya mutindu yina kaka na bilandi ya yandi. Tala ti Yesu pesá na bilandi ya yandi musiku yayi: “Beno zolasana beno na beno mutindu mu ke zolaka beno.” Yinki ya zola zonza? Mutindu Yesu lakisak’ yawu na manima, ya zola zonza kuzola bampangi kulutila beto mosi. Mutindu ya luzolo yayi ke natá mukristo na kundima kufwa samu na mpangi ya yandi.b
6. Wa’ faso mambu ya Nzambi ke lakisá ti luzolo ke mfunu mingi?
6 Mambu ya Nzambi ke longá beto ti luzolo ke mfunu mingi. Bantu mingi ke zolá baverse mutindu: “Nzambi kele luzolo.” (1 Yoa. 4:8) “Nge fwana kuzola mpangi ya nge mutindu nge mosi.” (Mat. 22:39) ‘Luzolo ke lemvokilaka lutangu ya nene ya masumu.’ (1 Pi. 4:8) “Luzolo kele seko.” (1 Ko. 13:8) Baverse yayi na baverse ya nkaka ke lakisá pwelele ti beto fwana kukulisa kifu ya kitoko yayi.
7. Samu na yinki Satana lenda longa ve bantu na kuzolasana mpe kuvanda na bumosi?
7 Bantu mingi ke yufulaka: ‘Wa’ faso beto lenda zaba dibuundu ya tsyeleka? Mabuundu nyonso ke zonzá ti ba ke longá matsyeleka, kasi bawu nyonso ke longá ve mambu mosi na yina me tadila Nzambi.’ Satana me sala mabuundu mingi ya luvunu. Ya ke salá ti ya vanda mpasi na bantu na kuzaba wapi yina ke dibuundu ya tsyeleka. Kasi yandi lenda sala ve dibuundu yina ke na bantu ya yinza nyonso yina ke zolasanaka. Kaka ni Yehova muntu lenda sala yawu. Ya ke ve na kamwisá beto samu beto zaba ti luzolo ke katuká na yandi. Kaka ni ba yina ke na mpeve mpe lusakumunu ya Nzambi lenda vanda na luzolo ya tsyeleka na kati ya bawu. (1 Yoa. 4:7) Ni na yina Yesu zonzá ti kaka ni bilandi ya yandi ke lakisa luzolo ya tsyeleka na bampangi.
8-9. Yinki ya me sala na bantu mingi ntangu ba me tala luzolo yina ke na kati ya Bambangi ya Yehova?
8 Kaka mutindu Yesu zonzak’ yawu, bantu mingi me kwiza zaba banani ke bilandi ya Yesu ya tsyeleka na luzolo yina ke na kati ya bawu. Na kifwani, Yan mpangi mosi ya bakala, ke na zabá dyaka mbala ya ntete yina yandi kwendá na lukutakanu ya nene ya Bambangi ya Yehova. Lukutakanu yayi salamá na stade, pene-pene na yinzo ya bawu. Bangonda tekila lukutakanu yina, yandi kwendá tala match kuna. Yandi me zonza: “Bantu yina kwizá na lukutakanu yayi vandá ata fioti ve faso mosi na ba yina kwizá tala match. Bambangi ya Yehova vandá na buzitu mpe ba vandá ya kulwata mbote-mbote. Bana ya bawu vandá na buzitu.” Yandi me bwela: “Ya kulutila, ba vandá na kilengi mpe kizunu. Ni yawu mu vandá sosa na luzingu ya munu. Mu na zabá dyaka ve bamambu yina ba zonzá na lukutakanu yina. Kasi mu lenda zimbana ve ndyatulu ya Bambangi ya Yehova.”c Ni luzolo ya tsyeleka yina beto ke na yawu na bampangi ke salá ti beto vanda na ndyatulu ya mbote. Samu beto ke zolá bawu, beto ke lakisá bawu buzitu mpe ntima ya mbote.
9 Mambu ya mutindu yayi kuminá mpe na John, mpangi mosi ya bakala, ntangu yandi bandá kukwenda na balukutakanu. Yandi me zonza: “Bantu nyonso vandá na ntima ya mbote. Ya simbá ntima ya munu, mpe mu kanisá ti ba vandá ve bantu ya masumu. Luzolo ya tsyeleka yina vandá na kati ya bawu natá munu na kundima ti mu kuzwá dibuundu ya tsyeleka.”d Masolo yayi mpe masolo ya nkaka ke lakisá ti Bambangi ya Yehova ke Bakristo ya tsyeleka.
10. Na wapi ntangu beto lenda lakisa ti beto ke zolá ya tsyeleka bampangi ya beto? (Tala mpe noti ya yinsi ya paje.)
10 Faso beto me zonza yawu na kubanda, bampangi ya beto ke bantu ya masumu. Bantangu ya nkaka, ba ke sala to kuzonza bamambu yina ke nyongisa beto.e (Zaki 3:2) Na bantangu yina, bamambu yina beto ke sala to ke zonza ke lakisa kana beto ke zolá bawu ya tsyeleka. Beto tala kifwani yina Yesu bikilá beto na ntangu yandi kutaná na mambu ya mutindu yayi.—Yoa. 13:15.
WA’ FASO YESU LAKISÁ BANTUMWA YA YANDI LUZOLO?
Yesu bakilá bantumwa ya yandi na luzolo nyonso ntangu ba lakisá bifu ya yimbi (Tala baparagrafe 11-13)
11. Wapi bifu ya yimbi Zaki na Yoane lakisaka? (Tala mpe kizizi.)
11 Yesu vandá vingilá ve ti bilandi ya yandi sala kaka bamambu ya mbote. Kasi na luzolo nyonso, yandi sadisá bawu na kubongisa ndyatulu ya bawu samu na kusepelisa Yehova. Kilumbu mosi, bantumwa zole, Zaki na Yoane, kwendá tala mama ya bawu samu yandi zonza na Yesu na kupesa bawu bisika ya mfunu na kati ya Kimfumu ya Nzambi. (Mat. 20:20, 21) Mambu yina ba salá lakisá ti ba vandá na lunangu mpe ba vandá sosa kulutila bampangi.—Bin. 16:18.
12. Kaka ni Zaki na Yoane lakisá bifu ya yimbi? Zonzila yawu.
12 Kilumbu yina, kaka Zaki na Yoane ve lakisá bifu ya yimbi. Tala yinki bantumwa ya nkaka salá na manima ya kuwa mambu yina Zaki na Yoane salaka: “Ntangu bilandi kumi ya nkaka kuwaka mutindu yina, bawu dasukilaka bampangi zole yina.” (Mat. 20:24) Beto lenda kanisa ti kilumbu yina ba swanaka. Ntangu ya nkaka, bantumwa 10 ya nkaka zonzá na Zaki na Yoane: ‘Beno ke banani samu na kusosa bisika ya mfunu na Kimfumu ya Nzambi? Beto mpe me sala mingi na Yesu. Beto mpe me lunga kuzwa bisika ya mfunu na Kimfumu ya Nzambi.’ Mambu ni mambu yina ba zonzá to ba kanisá kilumbu yina, ba lakisá ve luzolo mpe ntima ya mbote na bampangi.
13. Yinki Yesu salá na mantwala ya bafoti ya bantumwa ya yandi? (Matayi 20:25-28)
13 Yinki Yesu salá samu na mambu yayi? Yandi dasuká ve. Yandi zonzá ve ti yandi ke sosa bantumwa ya nkaka, yina me lutila bawu, yina ke vanda ya kukuluka mpe ke bakila ntangu nyonso bampangi na luzolo. Kasi, na ntima ya yinda, Yesu sololá na bawu samu yandi zabá ti, na kati ya ntima ya bawu, ba vandá na nsatu ya kusala bamambu ya mbote. (Tanga Matayi 20:25-28.) Ya vandá ve mbala ya ntete na ya nsuka yina bilandi ya yandi sosá kuzaba nani me lutila bampangi. Kasi ntangu nyonso, Yesu bakilá bawu na luzolo.—Mrk. 9:34; Luke 22:24.
14. Wa’ faso bantu vandá tadilá bamambu na kisika yina bantumwa ya Yesu kulaka?
14 Ntembe ve, Yesu zimbaná ve kisika yina bantumwa ya yandi kulaka. (Yoa. 2:24, 25) Na kisika yina, bamfumu ya dibuundu ya bazwife vandá longa ti ba pesa buzitu kaka na bantu ya nene. (Mat. 23:6) Bamfumu yayi vandá kanisa mpe ti ba me lutila bampangi.f (Luke 18:9-12) Yesu zabá ti kukula na kisika ya mutindu yayi lenda sala ti bantumwa vanda ve na faso ya kulunga ya kutadila bawu mosi mpe bampangi. (Bin. 19:11) Yesu vandá vingila ve ti bilandi ya yandi sala ntangu nyonso bamambu ya mbote. Mpe yandi lakisá bawu ntima ya yinda ntangu ba vandá sala bamambu ya yimbi. Yandi zabá ti ba vandá na nsatu ya kusala bamambu ya mbote. Na yawu, na ntima ya yinda nyonso, yandi longá bawu na kuvanda ya kukuluka mpe kulakisa bampangi luzolo. Ba zolá sosa ve kulutila bampangi.
WA’ FASO BETO LENDA LANDA KIFWANI YA YESU?
15. Yinki beto lenda longoka na mambu yina salamá na Zaki, Yoane mpe bantumwa ya nkaka?
15 Beto lenda longoka mingi na mambu yina salamá na Zaki, Yoane na bantumwa ya nkaka. Ya vandá ve mbote na Zaki na Yoane na kusosa kuzwa bisika ya mfunu na Kimfumu ya Nzambi. Kasi ya vandá mpe yimbi bantumwa ya nkaka bika mambu yayi bebisa bumosi na kati ya bawu. Ata mpila yina, Yesu lakisá bawu nyonso ntima ya mbote mpe luzolo. Wapi kileso beto lenda benda? Mambu yina me lutila mfunu ke ve yina bampangi me sala, kasi yina beto ke sala na ntangu bampangi me sala mambu yina me nyongisa beto. Yinki lenda sadisa beto? Ntangu mpangi me sala to me zonza mambu yina me nyongisa beto, beto lenda yufula: ‘Samu na yinki mambu yina yandi me sala ke na nyongisá munu? Mambu yayi ke na lakisá kwandi ve mwa kifu ya yimbi yina mu me bonga kukatula? Ya ke kwandi na mambu yina ke na kwamisá mpangi yina me nyongisa munu? Ata ti yandi me sala mambu ya yimbi, mu lenda lakisa kwandi ve yandi luzolo mpe kulemvokila yandi?’ Ntangu beto ke bakilá bampangi na luzolo, beto ke lakisá ti beto Bakristo ya tsyeleka.
16. Yinki beto lenda longoka dyaka na kifwani ya Yesu?
16 Kifwani ya Yesu ke na longá beto na kusosa kuzaba bampangi ya beto. (Bin. 20:5) Ntembe ve, Yesu vandá na makoki ya kutanga bantima. Beto lenda sala ve yawu. Kasi, beto lenda lakisa ntima ya yinda na bampangi ntangu ba ke salá bamambu yina ke pesá beto nkele. (Ef. 4:1, 2; 1 Pi. 3:8) Kana beto zaba bawu mbote-mbote, ya ke vanda ve mpasi na beto na kusala yawu. Beto tala mwa kifwani.
17. Wapi bambote ntwadisi mosi ya circonscription kuzwá ntangu yandi sosá kuzaba mbote-mbote mpangi mosi ya kimvuka?
17 Ntwadisi mosi ya circonscription ya Afrique ya Esti ke na zabá dyaka mpangi ya kimvuka mosi yina yandi kwendá tala. Ntwadisi ya circonscription yayi vandá kanisa ti mpangi yayi vandá ve muntu ya mbote. Yinki yandi salaka? Yandi me zonza: “Mu sosá ve kukima yandi. Kasi mu baká mukanu ya kusosa kuzaba yandi mbote-mbote.” Ntangu yandi salak’ yawu, yandi kwizá zaba ti ni faso mpangi yayi kulá vandá sala ti yandi vanda mutindu yina. Ntwadisi ya circonscription me bwela: “Ntangu mu kwizá zaba bangolo nyonso yina mpangi yayi salá samu na kusoba, mpe kubanda kubakila bampangi na faso ya mbote, mu bandá kupesa yandi buzitu. Beto kumá bandiku.” Ntembe ve, ntangu beto ke sosá kuzaba bampangi ya beto, ya ke vandá ve mpasi na kulakisa bawu luzolo.
18. Wapi byuvu beto lenda yufula kana mpangi me sala mambu yina me nyongisa beto? (Bingana 26:20)
18 Bantangu ya nkaka, beto lenda tala ti ya ke mbote beto kwenda tala mpangi yina me nyongisa beto. Kasi, tekila beto sala yawu, beto me bonga kuyufula: ‘Me zaba kwandi faso bamambu lutilaka?’ (Bin. 18:13) ‘Yandi salá kwandi yawu na nko?’ (Lon. 7:20) ‘Ya me kuminá kwandi munu na kusala foti ya faso yayi?’ (Lon. 7:21, 22) ‘Kana mu solola na yandi na mambu yayi, ya ke kuma kwandi ve mambu ya nene?’ (Tanga Bingana 26:20.) Kana beto baka ntangu na kukanisa na byuvu yayi, beto lenda kwiza tala ti beto me bonga kuzimbana kaka mambu yina mpangi me sala, samu beto ke zolak’ yandi.
19. Yinki nge ke tatamana na kusala?
19 Luzolo yina ke na kati ya Bambangi ya Yehova ke lakisá ti ba ke bilandi ya Yesu ya tsyeleka. Mosi na mosi ya beto ke lakisá ti yandi ke kilandi ya Yesu ya tsyeleka ntangu yandi ke lakisá luzolo na bampangi ata mwa bafoti yina ba ke salaka. Ntangu beto ke lakisá luzolo na bampangi ya beto, beto ke sadisá bantu ya nkaka na kutala ti beto ke Bakristo ya tsyeleka, mpe ya lenda nata bawu na kusadila Yehova Nzambi ya luzolo, kintwadi na beto. Beto bika ata kima kanga beto nzila ya kulakisa luzolo yina ke lakisá ti beto ke Bakristo ya tsyeleka.
NZIMBU 17 “Je le veux”
a Bantu mingi ke sosá kuzaba dyaka mingi na yina me tadila Yehova mpe Biblia ntangu ba ke talá luzolo ya tsyeleka yina ke na kati ya beto. Kasi, beto ke bantu ya masumu. Na yawu, bantangu ya nkaka ya lenda vanda mpasi na beto na kubakila bampangi na luzolo. Beto tala samu na yinki luzolo ke mfunu mingi, mpe wa’ faso beto lenda landa kifwani ya Yesu ntangu bampangi ke nyongisá beto.
b Tala buku “Viens, suis-moi,” kikapu 17, par. 10-11.
c Tala disolo “Ma vie a enfin un but,” na Yinzo ya Kengidi ya 1er novembre 2012, p. 13-14.
d Tala disolo “Tout semblait me réussir,” na Yinzo ya Kengidi ya 1er mai 2012, p. 18-19.
e Na disolo yayi, beto ke ve na zonzilá masumu ya nene yina bakuluntu me bonga kuzaba mpe kupesa lubakusu na ba yina me sala yawu, mutindu bamambu yina ke na 1 Bakorinto 6:9, 10.
f Bantu zonzá ti kilumbu mosi, mulongi mosi ya dibuundu ya bazwife zonzá mambu yayi: “Yinza ke na bantu kuluta 30 yina ke ya kusungama mutindu Abrahami. Kana ba ke kaka 30, munu na mwana ya munu ya bakala ke na kati. Kana ba ke 10, munu na mwana ya munu ke na kati. Kana ba ke 5, munu na mwana ya munu ke na kati. Kana ba ke zole, ya ke munu na mwana ya munu. Kana ya ke kaka mosi, ya ke ni munu.”