DISOLO YA KULONGOKA 52
Sadisa bampangi na ntangu ya mpasi mingi
‘Kumanga ve kusala mambu ya mbote na bantu yina nge fwana sadila yawu kana nge kele na kiyeka ya kusadisa.’—BIN. 3:27.
NZIMBU 103 Les bergers, des dons de Dieu
YINA BETO KE LONGOKAa
1. Bantangu ya nkaka, wa’ faso Yehova ke pesá mvutu na balusambu ya bisadi ya yandi?
NGE zaba kwandi ti Yehova lenda sadila nge samu na kupesa mvutu na balusambu ya bampangi? Ee Yehova lenda sadila nge, ya vanda ti nge ke kuluntu, kisadisi, pionnier to samuni. Nge vanda ntwenya to muntu ya kukula, kento to bakala, nge lenda sadisa bampangi. Ntangu muntu yina ke zolá Yehova ke sambilak’ yandi samu yandi sadisa yandi, Nzambi lenda sadila bakuluntu to bampangi ya nkaka samu na ‘kukindisa yandi mingi.’ (Kol. 4:11) Beto ke na kilengi ya kusadila Yehova mpe bampangi ya beto na mutindu yayi. Beto lenda sala yawu ntangu kimbevo ya nene ke basiká, mpe na ntangu ya bamambu mutindu bamvula ya nene, to bankwamusu ya bambeni ya beto.
SADISA BAMPANGI NTANGU KIMBEVO YA NENE KE BASIKAKA
2. Samu na yinki ya lenda vanda mpasi na kusadisa bampangi ntangu kimbevo ya nene ke basikaka?
2 Ntangu kimbevo ya nene ke basiká, ya lenda vanda mpasi na kusadisa bampangi. Na kifwani, beto lenda kanisa na kukwenda tala bawu. Kasi kusala yawu lenda natina beto mpe bawu kimbevo. Beto lenda vanda na nsatu ya kubokila ba yina ke na bamambu ya mbongo na yinzo samu na kudya, kasi beto lenda sala ve yawu. Beto lenda kanisa kusadisa bampangi, kasi ya lenda vanda mpasi na kusala yawu kana bantu ya dikanda ya beto mpe ke na mpasi. Ata mpili yina, beto zola kusadisa bampangi ya beto. Mpe Yehova ke na nsayi ntangu yandi ke talá ti beto ke na salá yina beto lenda sala samu na kusadisa bampangi. (Bin. 3:27; 19:17) Yinki beto lenda sala?
3. Yinki kifwani ya bakuluntu ya kimvuka ya Desi ke na longá beto? (Yeremia 23:4)
3 Yina bakuluntu lenda sala. Kana nge ke kuluntu, zaba mbote-mbote mameme ya nge. (Tanga Yeremia 23:4.) Desi, mpangi mosi ya kento yina beto zonzilá na disolo yina me luta, me zonza: “Tekila kimbevo yayi kubwa, bakuluntu ya kimvuka ya beto ya kusamuna vandá samuná na munu mpe na bampangi ya nkaka. Ba vandá lutisá mpe ntangu na beto na kusakana.”b Samu bakuluntu vandá salá mutindu yayi, ya vandá ve mpasi na bawu na kusadisa Desi ntangu kimbevo ya COVID-19 bandá, mpe ntangu bantu ya dikanda ya yandi kufwá na kimbevo yayi.
4. Samu na yinki ya vandá ve mpasi na bakuluntu na kusadisa Desi, mpe yinki ya ke na longá bakuluntu?
4 Desi me zonza: “Samu bakuluntu vandá bandiku ya munu, ya vandá ve mpasi na munu na kuzonza na bawu bamambu yina mu vandá na yawu na ntima, mpe yina vandá pesa munu boma.” Yinki bakuluntu lenda longoka na disolo yayi? Kipe mameme yina ba me pesa nge tekila mambu ya ngolo kubwa. Vanda ndiku samu na bawu. Kana kimbevo ya nene me basika mpe me kanga nge nzila ya kukwenda tala bawu, sosa bafaso ya nkaka ya kuzwa bansangu ya bawu. Desi me zonza: “Ya vandá na bilumbu yina bakuluntu mingi vandá bokilá munu, to ba vandá filisá munu ba messages. Mu zabá mbote baverse yina ba kabulá na munu, kasi ya simbá ntima ya munu.”
5. Wa’ faso bakuluntu lenda zaba yina bampangi ke na yawu nsatu, mpe kusadisa bawu?
5 Samu na kuzaba yina bampangi ke na yawu nsatu, nge lenda yufula bawu byuvu yina ke pesa ve bawu nsoni. (Bin. 20:5) Nge lenda sosa kuzaba kana ba ke na madya, manganga to bima ya nkaka ya mfunu. Kimbevo yayi lenda sala kwandi ti ba vanda dyaka ve na kisalu to yinzo? Kana na bwala ya beno luyalu ke sadisá ba yina ke na mpasi, nge lenda bakisa bampangi na kufulusa mikanda samu na kuzwa bima yina ba ke na yawu nsatu. Bampangi ya kimvuka pesá Desi bima yina yandi vandá na yawu nsatu. Kasi yina sadisak’ yandi mingi, ya ke luzolo yina bakuluntu lakisak’ yandi, mpe faso ba sadilá Biblia samu kukindisa yandi. Yandi me zonza: “Bakuluntu sambilá na munu. Mu na zabá dyaka ve mambu yina ba zonzá na lusambu. Kasi, mu lenda zimbana ve yinki ya salá munu na ntima. Ya vandá mutindu Yehova vandá zonza na munu, ‘Nge ke ve nge mosi.’”—Iza. 41:10, 13.
Mpangi yina ke na ntwadisá disolo ya Yinzo ya Kengidi ke na nsayi ya kuwa bamvutu ya bampangi yina ke na Yinzo ya Kimfumu mpe ya mpangi yina ke na beelaka mpe yandi lenda landa lukutakanu kaka na vidéoconférence (Tala paragrafe 6)
6. Yinki bampangi ya kimvuka lenda sala samu na kusadisa bampangi? (Tala kizizi.)
6 Yina bampangi ya nkaka lenda sala. Beto zaba ti Yehova pesá bakuluntu kisalu ya kukipe kimvuka. Kasi Yehova zola ti beto nyonso kindisa mpe sadisa bampangi. (Gal. 6:10) Kima ni kima yina beto lenda sala samu na muntu yina ke na beelá, lenda sadisa yandi. Mwana fioti lenda sala mwa dessin samu na kukindisa mpangi. Mpangi ya ntwenya lenda sala zandu samu na mpangi ya kento. Mpangi ya nkaka lenda lamba mwa madya mpe kwenda bika yawu na mpangi yina ke na beelaka. Ntembe ve, ntangu kimbevo ke mwanganá, bantu nyonso ke na nsatu ba kindisa bawu. Beto lenda lutisa mwa ntangu na manima ya balukutakanu samu na kusolola na bampangi na kisika yina beto ke vukaná, to na vidéoconférence. Bakuluntu mpe ke na nsatu ba kindisa bawu. Ntangu kimbevo ya nene ke basiká, bakuluntu ke vandá na mingi ya kusala. Bampangi ya nkaka filisá bawu mikanda samu na kuvutula bawu matondo. Ya ke kilengi mingi ntangu beto nyonso ke ‘kindisaka bampangi mpe ke salasanaka na kukula na kiminu’!—1 Tes. 5:11.
SADISA BAMPANGI YINA KE KUTANÁ NA BAMAMBU MUTINDU BAMVULA YA NENE
7. Yinki lenda vanda mpasi ntangu bamambu mutindu bamvula ya nene ke salamaka?
7 Bamambu mutindu bamvula ya nene lenda bebisa luzingu ya muntu kaka na mbala mosi. Ntangu ya ke salamá, bantu mingi ke vandá dyaka ve na bayinzo to bima yina ba vandá na yawu. Ba ya nkaka ke fwidilá bantu ya bawu. Mambu yayi ke kuminá mpe na bampangi ya beto. Yinki beto lenda sala samu na kusadisa bawu?
8. Yinki bakuluntu na bamfumu ya makanda lenda sala tekila mambu ya mpasi kubwa?
8 Yina bakuluntu lenda sala. Bakuluntu, beno sadisa bampangi na kubongama tekila mambu ya mpasi kubwa. Beno sadisa bampangi nyonso ya kimvuka na kuzaba yinki ya kusala samu na kuvuuka mpe kubokila bakuluntu. Margaret, yina beto zonzilá na disolo yina lutá, me zonza: “Na bansatu ya kimvuka, bakuluntu zonzilá beto batiya ya nene yina lendá salama kisika yina beto kele. Ba zonzá na beto ti, kana bamambu beba to bantu ya luyalu zonza na beto na kukatuka kisika yina beto kele, beto me bonga kukwenda na mbangu.” Bansatu ya kimvuka yayi salamá na ntangu ya kulunga, samu ti kaka balumingu 5 na manima, tiya ya nene salamá na kisika yina. Na kulongoka ya dikanda, bamfumu ya makanda me bonga kuzonzila yinki mosi na mosi na kati ya dikanda me bonga kusala. Kana nge na bana ya nge ke ya kubongama, ya ke vanda ve mpasi na beno na kubumba kizunu ntangu mambu ya mpasi ya faso yayi ke salama.
9. Wa’ faso bakuluntu ke bongisá bamambu tekila mambu ya mpasi kubwa, mpe na manima?
9 Kana nge ke kengidi ya kimvuka ya kusamuna (to responsable de groupe de prédication), kuvingila ve ti mambu kubwa samu na kusosa kuzwa banumero ya téléphone ya bampangi nyonso ya kimvuka ya nge ya kusamuna, mpe kuzaba kisika yina ba ke vandaka. Vanda na banumero ya bawu na mukanda mpe bambala mingi sosa kuzaba si ya ke lutá kaka. Ya ke sala ti ntangu mambu ke kubwa, nge ke lenda kubokila mosi na mosi ya bampangi mpe kuzaba yina ba ke na yawu nsatu. Bamambu yina ba ke zonza na nge, zonzila yawu na coordinateur ya kimvuka ya bakuluntu. Mpe yandi ke zonzila yawu na ntwadisi ya circonscription. Ntangu bakuluntu ke salá kintwadi faso yayi, ba lenda sadisa mbote-mbote bampangi. Ntangu tiya ya nene salamá kisika yina Margaret vandá vanda, ntwadisi ya circonscription lalá ve ba heures 36. Yandi vandá twadisa kisalu yina bakuluntu vandá sala samu na kubokila mpe kukipe bampangi 450 yina kimaka. (2 Ko. 11:27) Ya salá ti bampangi nyonso kuzwa kisika ya kuvanda.
10. Samu na yinki ya ke mfunu na bakuluntu na kukindisa mameme? (Yoane 21:15)
10 Yehova pesá bakuluntu kisalu ya kusadila Biblia samu na kukindisa bampangi mpe kusadisa ba yina ke ya kulemba. (1 Pi. 5:2) Ntangu mambu ya mpasi ke kubwaka, bakuluntu me bonga kuzaba ntete kana mosi na mosi ya bampangi ke mbote, ke na madya, bilele mpe kisika ya kuvanda. Kasi, ata na manima ya bangonda mingi, bampangi yina vuuká lenda vanda na nsatu ba kindisa bawu na nzila ya Biblia mpe ba sadisa bawu na kuvanda ve na manyongi. (Tanga Yoane 21:15.) Harold ke salá na kati ya Comité ya filiale ya bwala mosi. Yandi me kutaná na bampangi mingi yina bamambu ya mpasi ya mutindu yayi me kuminá bawu. Yandi me zonza: “Ya ke baká ntangu na kuzwa dyaka ngolo. Ntangu ya nkaka, bampangi me banda luzingu ya malu-malu. Kasi ntangu ba ke kanisá na muntu yina ba vandá zolá yina kufwá, na kima ya mfunu yina ba ke dyaka ve na yawu, to na mutindu ba vuuká na lufwa, ya lenda vumbula mpasi yina ba ke na yawu na ntima. Ya zola zonza ve ti ba ke ve na kiminu. Ya zola zonza ti beto ke kaka bantu.”
11. Yinki makanda lenda vanda na yawu nsatu?
11 Bakuluntu ke landá dilongi ya Biblia yayi: “Beno dila na bayina ke na kudila.” (Rom. 12:15) Bakuluntu me bonga kulakisa na ba yina me vuuka na mpasi ti Yehova na bampangi ya bawu ke kaka na luzolo samu na bawu. Ba ke sadisa makanda na kubika ve kusambila, kulongoka mambu ya Nzambi, kukwenda na balukutakanu mpe kusamuna. Bakuluntu ke sadisa bibuti na kusadisa bana ya bawu na kutula makanisi na bima yina bampasi lenda bebisa ve. Bibuti, beno sadisa bana ya beno na kuzimbana ve ti Yehova ke vanda kaka ndiku ya bawu, mpe yandi ke bika ve bawu. Beno sadisa bawu na kuzaba ti ba ke na dikanda na yinza nyonso yina ke bika ve kusadisa bawu.—1 Pi. 2:17.
Nge lenda sadisa bampangi ntangu mambu ya mpasi mingi ke salamá pene-pene na kisika nge kele (Tala paragrafe 12)e
12. Yinki bampangi ya nkaka lenda sala samu na kusadisa bampangi ya kisika mambu ya mpasi me salama? (Tala kizizi.)
12 Yina bampangi ya nkaka lenda sala. Kana mambu ya mpasi me kubwa pene-pene na kisika nge kele, yufula na bakuluntu yinki nge lenda sala samu na kusadisa bampangi. Ntangu ya nkaka, nge lenda yamba na yinzo ya nge bampangi yina me bika bayinzo ya bawu samu na mambu ya mpasi yayi, to ba yina me kwiza samu na kusadisa bawu. Nge lenda pesa madya to bima ya nkaka na bampangi yina ke na yawu nsatu. Kana mambu ya mpasi me kubwa ntama na kisika nge kele, nge lenda pesa mpe diboko. Nge lenda sambila samu na bampangi ya kuna. (2 Ko. 1:8-11) Nge lenda pesa mbongo samu na kisalu yina ke salamá na yinza nyonso. Ba ke sadilá mpe mbongo yango samu na kusadisa bampangi yina ke kutaná na bamambu ya mpasi. (2 Ko. 8:2-5) Kana nge ke na makoki ya kukwenda na kisika yina bampangi me kutana na mambu ya mpasi, nge lenda lomba na bakuluntu yinki nge lenda sala. Kana ba me bokila nge, ntangu ya nkaka kuna, ba ke lakisa nge kisalu samu nge sadisa bampangi na faso ya mbote.
SADISA BAMPANGI YINA BA KE KWAMISÁ NA BAMBENI YA BETO
13. Wapi bamambu ya mpasi bampangi ya beto ke kutaná na yawu kisika yina ba ke niminá kisalu ya beto?
13 Na babwala yina ba ke niminá kisalu ya beto, luzingu lenda vanda mpasi. Mutindu bampangi nyonso, bampangi yina ke vandá na babwala yina ke mpe na bamambu ya mbongo, bimbevo mpe ba ke fwidilá ba yina ba ke zolaka. Kasi, samu ba ke niminá kisalu ya beto, ya lenda vanda mpasi na bakuluntu na kusolola to na kukwenda tala bampangi yina ke na nsatu ba kindisa bawu. Ni yina salamá samu na Andrei, yina beto zonzila na disolo yina lutaka. Mpangi mosi ya kento ya kimvuka ya bawu vandá na bamambu ya mbongo. Yandi salá accident. Ba opérer yandi bambala mingi mpe yandi vandá lenda dyaka ve kusala. Bampangi salá nyonso yina ba lendá kusala samu na kusadisa yandi, ata ti na kisika yina, ba niminá kisalu ya beto, mpe kimbevo ya COVID-19 vandaka. Mpe Yehova zabá yina mpangi ya beto vandá na yawu nsatu.
14. Wa’ faso bakuluntu lenda lakisa kifwani ya mbote na yina me tadila kutula ntima na Yehova?
14 Yina bakuluntu lenda sala. Andrei sambilá mpe salá yina yandi lendá kusala. Wa’ faso Yehova pesá mvutu na balusambu ya yandi? Yandi sadilá bampangi yina vandá na makoki ya kusala mingi samu na kusadisa mpangi ya kento yayi. Ya ke na ba yina vandá natak’ yandi na l’hôpital, mpe ba ya nkaka vandá pesá mbongo. Yehova tindá bawu na kusala yina be lendá sala, mpe yandi sakumuná bumosi mpe bangolo ya bawu. (Ebr. 13:16) Bakuluntu, ntangu ba ke niminá kisalu ya beto kisika beno kele, beno lomba na bampangi ya nkaka na kusala yina beno lenda sala ve. (Yer. 36:5, 6) Ya kulutila, beno tula ntima na Yehova. Yandi lenda sadisa beno na kusadisa bampangi ya beto.
15. Wa’ faso beto lenda bumba bumosi ya beto ntangu ba ke kwamisá beto na bambeni ya beto?
15 Yina bampangi ya nkaka lenda sala. Ntangu ba ke niminá kisalu ya beto kisika beto kele, ba lenda lomba na beto na kuvukana kaka na bampangi ndambu. Na yawu, ya ke mfunu mingi na kubumba kizunu na kati ya beto. Nwana na Satana, kasi na bampangi ve. Kutula ve ntima na bafoti ya bampangi. Sosa kuyidika na mbangu mwa mindondo yina ke na beno. (Bin. 19:11; Ef. 4:26) Sosa kusadisa bampangi. (Tite 3:14) Lubakusu yina bampangi pesá na mpangi ya kento yina beto me zonzila salá ti kindiku ya bampangi ya kimvuka ya bawu ya kusamuna kuma dyaka ngolo. Ba kumá mutindu dikanda.—Nku. 133:1.
16. Mutindu ke lakisak’ yawu Bakolose 4:3, 18, wa’ faso beto lenda sadisa bampangi yina ba ke kwamisá na bambeni ya beto?
16 Bampangi ya beto mingi ke sadilá Yehova ata ti ba ke niminá kisalu ya beto kisika ba kele. Ya ke na ba yina ba ke tulá na boloko samu na kiminu ya bawu. Beto lenda sambila samu na bawu, mpe samu na makanda ya bawu. Beto lenda sambila mpe samu na bampangi yina ke sadisá bawu ata ba zaba ti ba lenda kanga mpe bawu. Bampangi yayi ke kindisá bampangi ya beto, ke pesá bawu yina ba ke na yawu nsatu mpe ke nwaniná bawu na ba tribunal.c (Tanga Bakolose 4:3, 18.) Kuzimbana ve ti balusambu ya nge lenda sadisa bawu mingi.—2 Tes. 3:1, 2; 1 Tim. 2:1, 2.
Wa’ faso nge lenda sadisa dikanda ya nge na kubongama samu na bankwamusu ya bambeni ya beto? (Tala paragrafe 17)
17. Wa’ faso nge lenda bongama samu na bankwamusu?
17 Nge na dikanda ya nge, beno lenda bongama samu na bankwamusu ya bambeni ya beto. (Bis. 14:22) Kusosa ve kukanisa na bamambu nyonso ya yimbi yina lenda kumina beno. Kasi kumisa ngolo kindiku ya nge na Yehova, mpe sadisa bana ya nge na kusala mutindu mosi. Kana bantangu ya nkaka nge ke na basusi ya kulutila, fungula ntima ya nge na Yehova. (Nku. 62:7, 8) Solola na dikanda ya nge na bamambu yina ke salá ti beno tula ntima na Yehova.d Kusala yawu ke sadisa bana ya nge na kubongama samu na bankwamusu, kaka mutindu ya ke sadisa bawu na kubongama tekila mvula ya nene kubwa. Ba ke vanda ve na boma, mpe ba ke vanda na kizunu samu nge me lakisa bawu na kutula ntima na Yehova.
18. Yinki ke na vingilá beto na mantwala?
18 Kizunu ya Nzambi ke sadisá beto na kuvanda ve na boma. (Flp. 4:6, 7) Yehova ke pesá beto yawu samu na kuzunisa ntima ya beto ata na ntangu bimbevo ya nene ke basiká, to na ntangu ya bamambu mutindu bamvula ya nene, mpe bankwamusu ya bambeni ya beto. Yandi ke sadilá bakuluntu. Ba ke salá mingi samu na kukipe beto. Mpe yandi ke pesá beto nyonso bweso ya kusadisa bampangi. Bantangu ya kizunu yina beto ke na yawu bubu yayi lenda sadisa beto na kubongama samu na bampasi ya kulutila na mantwala, ata samu na “mpasi ya nene.” (Mat. 24:21, nwt-MK) Na ntangu ya mpasi ya nene, beto ke vanda na nsatu ya kusadisa bampangi mpe ya kubumba kizunu ya beto. Kasi na manima, beto ke kutana dyaka ve na bamambu ya mpasi yina ke sala ti ntima ya beto vanda na zulu. Na ntangu yina, beto ke kuzwa yina Yehova kanisá samu na beto: kizunu ya tsyeleka mpe ya ntangu nyonso.—Iza. 26:3, 4.
NZIMBU 109 “ Aimons intensément, avec le cœur ”
a Bantangu ya nkaka, Yehova ke sadilá bisadi ya yandi samu na kusadisa ba yina ke kutaná na bamambu ya mpasi. Yandi lenda sadila nge samu na kukindisa bampangi. Beto tala wa’ faso beto lenda sadisa bampangi ntangu ba ke na mpasi.
b Ba me soba bankumbu ya nkaka.
c Beto lenda filisa ve na filiale to na bampangi ya siège mondial mikanda yina beto ke sonikilá bampangi yina ke na boloko, samu ba filisa bawu yawu.
d Tala disolo “ Prépare-toi dès maintenant à la persécution ” na Yinzo ya Kengidi ya juillet 2019, na lumputu.
e YINA KIZIZI KE NA ZONZILAKA: Dikanda mosi me zwa mwa kisika ya kuvanda na manima ya mpasi ya ngolo yina me salama kisika yina ba vandá vandaka. Bampangi ya kukwela me natina bawu mwa madya.