Samuna na tiya mutindu Yesu

1. Yinki ke salaka luswaswanu na bantu yina ke zonzaka ti ba ke bakristo na bisadi ya Yehova?

BISADI ya Yehova ke na nsatu ya ngolo na kusamuna nsangu ya mbote mpe ba ke salaka bangolo na kusala yawu. Ni yawu ke salaka luswaswanu na ba yina ke zonzaka ti ba ke bakristo. (Tite 2:14) Kasi, bantangu ya nkaka ya lenda vanda mpasi na kusamuna na tiya. Ya lenda vanda ti nge ke na dikanisi mosi na kuluntu yayi yina ke salaka mingi na kisalu ya Yehova. Yandi me zonza: “Bantangu ya nkaka mu ke vandaka ve na nsatu ya kusamuna.”

2. Samu na yinki ya lenda vanda mpasi na beto na kusamuna na tiya nyonso?

² Beto lenda zola mingi bisalu ya nkaka na kisalu ya Yehova kuluta kisalu ya kusamuna. Samu na yinki? Samu ti ntangu beto ke tungaka, ke bongisaka bayinzo ya Kimfumu, to ke sadisaka bampangi yina ke kutanaka na bamambu mutindu kuningana ya ntoto to ntangu beto ke kindisaka bawu, beto ke talaka bambote ya yawu na mbangu mpe ya ke sepelisaka beto. Beto ke salaka na kizunu mpe ke lakisaka luzolo ntangu beto ke salaka na bampangi. Beto zaba ti ba ke sepelaka na yina beto ke salaka samu na bawu. Kasi na yina me tadila kisalu ya kusamuna, ya lenda vanda ti banda bamvula kaka bantu ndambu ke yambaka beto kisika yina beto ke samunaka. To ya lenda vanda ti bantu ya nkaka ke mangaka kuwa beto. Samu beto me kuma na nsuka ya yinza, bantu ke lutila kuyiina beto. (Mat. 10:22) Yinki ke sadisa beto na kuvanda na tiya mpe kukulisa dyaka tiya ya beto na kisalu ya kusamuna?

3. Yinki Luke 13:6-9 ke na longaka beto na yina me tadila tiya ya Yesu?

³ Kifwani ya Yesu lenda longa beto na kusamuna na tiya nyonso. Ntangu Yesu vandaka awa na ntoto, yandi samunaka na tiya. (Tanga Luke 13:6-9.) Mutindu muntu ya bilanga ya vinu ya kifwani yina Yesu sadilaka, yina lutisaka bamvula tatu na kusosa bambuma na yinti ya fige, kasi kuzwaka ata kima, Yesu mpe lutisaka bamvula tatu na kusamuna Bazwife, kasi kaka bantu ndambu kumaka bilandi ya yandi. Mutindu muntu ya bilanga ya vinu vandaka na kivuvu ti yinti ya fige ke pesa bambuma, Yesu mpe lembaka ve na kisalu ya yandi ya kusamuna. Yandi salaka bangolo ya yandi nyonso samu na kusadisa Bazwife na kundima nsangu ya mbote.

4. Wapi bamambu yiya beto ke longoka na kifwani ya Yesu?

⁴ Na disolo yayi, beto ke zonzila tiya yina Yesu lakisaka na nsuka ya bangonda 6 ya kisalu ya yandi ya kusamuna. (Luke 10:1) Kana beto tumama na yina Yesu zonzaka mpe salaka, beto ke vanda na manzangu. Beto tala bamambu yiya yina beto lenda longoka na kifwani ya Yesu: 1) Yandi tulaka makanisi ya yandi na luzolo ya Yehova, 2) yandi tulaka dikebi na bambikudulu ya Biblia, 3) yandi vandaka na kundima ti Yehova ke sadisa yandi, mpe 4) yandi vandaka na kundima ti ya ke na bantu yina zola kuwa yandi.

YANDI TULAKA MAKANISI YA YANDI NA LUZOLO YA YEHOVA

5. Wa’ faso Yesu lakisaka ti yandi vanda tula makanisi ya yandi na kusala luzolo ya Yehova?

⁵ Yesu samunaka “nsangu ya mbote ya Kimfumu ya Nzambi” na tiya samu ti ya vandaka kisalu yina Nzambi zolaka ti yandi sala. (Luke 4:43) Kusamuna nsangu ya mbote vandaka kisalu ya ntete na luzingu ya Yesu. Yandi salaka nzyetolo na “bambanza mpe na babwala,” samu na kulonga bantu ya nkaka, ata ti yandi bikanaka kaka na bangonda fioti samu na kusala yawu. (Luke 13:22) Yandi longisaka mpe bilandi mingi ya nkaka na kusamuna mutindu ya yandi.—Luke 10:1.

6. Wa’ faso kisalu ya kusamuna ke na kwelanaka na bisalu ya nkaka? (Tala mpe kizizi.)

⁶ Bubu yayi mpe, Yehova na Yesu zola ti kisalu ya kusamuna vanda mambu ya ntete na luzingu ya beto. (Mat. 24:14; 28:19, 20) Ni yawu ke salaka ti bisalu ya nkaka vanda. Na kifwani, beto ke tungaka bayinzo ya Kimfumu samu ti bantu yina beto ke samunaka kwiza kembila Yehova. Dyaka, bisalu yina beto ke salaka na Betele mpe na bisika ya nkaka ke samu na kutula diboko na kisalu ya kusamuna. Mpe ntangu bamambu ya mpasi ke kubwaka, beto ke na kundima ti bampangi ya beto ke kuzwa bima yina ba ke na yawu nsatu. Ya ke sadisa bawu na kuvutukila balukutakanu mpe kusamuna. Kana beto zimbana ve ti kusamuna ke kisalu ya kulutila mfunu yina Yehova zola ti beto sala, beto ke samuna ntangu nyonso na tiya. János, kuluntu mosi ya bwala ya Hongrie, me zonza: “Ya ke ve na kisalu yina beto lenda sala samu na Yehova yina lenda baka kisika ya kisalu ya kusamuna. Ni yawu ke kisalu ya beto.”

7. Samu na yinki Yehova zola ti beto bika ve kusamuna? (1 Timote 2:3, 4)

⁷ Kutala bantu mutindu Yehova, lenda kumisa ngolo tiya ya beto ya kusamuna. Yehova ke na nsatu ti bantu mingi kuwa nsangu ya mbote mpe ndima matsyeleka. (Tanga 1 Timote 2:3, 4.) Ni na yawu, Yehova ke na sadisaka beto na kubongisa faso ya beto ya kusamuna nsangu yina ke vuukisa bantu. Na kifwani buku Zola bantu—Kumisa bawu bilandi ke na bamambu yina lenda sadisa beto na kubanda masolo na bantu na dikanisi ya kukumisa bawu bilandi. Ata ti bantu ke ve na ndimaka nsangu ya mbote bubu yayi, ba lenda vanda na bweso ya kusala yawu tekila nsuka ya mpasi ya nene. Na mantwala ba lenda bambuka bamambu yina beto ke na zonzilaka bawu bubu yayi, mpe ya lenda nata bawu na kusadila Yehova. Mambu yayi lenda salama kaka kana beto bika ve kusamuna.

YANDI TULAKA DIKEBI NA BAMBIKUDULU YA BIBLIA

8. Wa’ faso bambikudulu ya Biblia sadisaka Yesu na kusadila ntangu ya yandi na ndwenga?

⁸ Yesu bakulaka mutindu bambikudulu zolaka lungana. Yandi zabaka ti yandi zola samuna kaka bamvula tatu na ndambu. (Dan. 9:26, 27) Yandi zabaka mpe ntangu na mutindu yandi ke kufwa. (Luke 18:31-34) Bamambu yina ba bikulaka samu na yandi sadisaka yandi na kusadila ntangu ya yandi na faso ya mbote. Ya salaka ti yandi samuna na tiya nyonso mpe manisa kisalu yina ba pesaka yandi.

9. Samu na yinki bambikudulu ya Biblia ke sadisaka beto na kusamuna na tiya?

⁹ Faso ya beto ya kubakula bambikudulu ya Biblia lenda sadisa beto na kusamuna na tiya nyonso. Beto zaba ti ntangu me bikana kaka fioti. Biblia bikulaka mutindu bantu ke vanda na bilumbu ya nsuka mpe bamambu yina ke salama na ntangu yango. Beto ke na talaka kulungana ya bamambu yango. Biblia zonzaka ti “na ntangu ya nsuka,” mfunu ya nore yina ke kimfumu ya ngolo ya Angleterre na États-Unis ke wisana ve na mfumu ya sude yina ke Russie na babwala ya nkaka yina ke kintwadi na yandi. (Dan. 11:40) Beto me kwiza bakula mpe ti kimfumu ya ngolo ya Angleterre na États-Unis kele makulu ya kizizi yina Daniele 2:43-45 ke zonzilaka. Bambikudulu ya Biblia ke na nataka beto na kundima ti ntangu me bikana kaka fioti yina Kimfumu ya Nzambi ke kwiza mwangisa bimfumu ya bantu. Bambikudulu nyonso yayi ke na lakisaka ti beto me kuma na bilumbu ya nsuka. Na yawu, beto zola sadila ntangu ya beto na faso ya mbote samu na kusamuna nsangu ya mbote.

10. Wapi mutindu bambikudulu ya Biblia ke na nataka nge na kusamuna na tiya nyonso?

¹⁰ Bambikudulu ya Biblia ke pesaka mpe beto nsangu yina beto ke na nsatu ya kukabula na bantu. Carrie mpangi mosi ya kento yina ke samunaka na République dominicaine me zonza: “Kukanisa na bamambu ya mbote yina Yehova salaka nsilulu ti yandi ke sala na mantwala, ke pesaka munu nsatu ya kuzonzila yawu na bantu ya nkaka. Mpe kutala bampasi yina ke na bantu bubu yayi, ke nataka munu na kutala ti bansilulu nyonso yina Yehova me pesa ke ve kaka samu na munu mosi, kasi mpe samu na bawu.” Bambikudulu ya Biblia ke pesaka beto ngolo ya kubika ve kisalu ya kusamuna samu beto zaba ti Yehova ke sadisa beto. Leila, yina ke vandaka na Hongrie me zonza: “Izayi 11:6-9 ke pesaka munu ngolo ya kusamuna nsangu ya mbote ata na ba yina beto ke na talaka ti ba lenda ndima ve. Samu mu zaba ti na lubakusu ya Yehova muntu lenda soba.” Christopher, yina ke vandaka na Zambie me zonza: “Mutindu bikulaka yawu Marke 13:10, na bayinsi nyonso ba me fwana kusamuna ntete nsangu ya mbote. Mpe ya ke kilengi na munu na kutula diboko na kulungana ya mbikudulu yayi.” Wapi bambikudulu ya Biblia ke na pesaka nge ngolo ya kutatamana na kusamuna?

YANDI VANDA NA KUNDIMA TI YEHOVA KE SADISA YANDI

11. Samu na yinki Yesu vandaka na nsatu ya kutula ntima na Yehova samu yandi sadisa yandi na kusamuna na tiya nyonso? (Luke 12:49, 53)

¹¹ Yesu zabaka ti Yehova zola bika ve kusadisa yandi na kusamuna na tiya nyonso. Ata ti yandi vanda samunaka na buzitu, yandi zabaka ti nsangu ya Kimfumu ya Nzambi zola kabula bantu mpe kunata bankwamusu ya ngolo. (Tanga Luke 12:49, 53.) Bamfumu ya mabuundu zolaka ve ti Yesu samuna. Na yawu, ba sosaka bambala mingi kufwa yandi. (Yoa. 8:59; 10:31, 39) Kasi yandi bikaka ve kusamuna samu ti yandi zabaka ti Yehova vandaka na yandi. Yandi me zonza: “Mu ke ve munu mosi, kasi Tata yina filisaka munu ke na munu. . . . Yandi me bika ve munu, munu mosi, samu mu ke salaka ntangu nyonso bamambu yina ke sepelisaka yandi.”—Yoa. 8:16, 29.

12. Wa’ faso Yesu sadisaka bilandi ya yandi samu ba bika ve kusamuna na mantwala ya bankwamusu?

¹² Yesu bambulaka na bilandi ya yandi ti ba lenda sikidila na Yehova samu yandi sadisa bawu. Yandi zonzaka mpe ti Yehova ke sadisa bawu ata na ntangu ya bankwamusu. (Mat. 10:18-20; Luke 12:11, 12) Yandi zonzaka yawu samu yandi zabaka ti bantu mingi zola telemina bawu. (Mat. 10:16; Luke 10:3) Yandi zonzaka mpe na bawu na kunata ve bantu na ngolo kana ba me manga kuwa. (Luke 10:10, 11) Yandi bwelaka mpe ti kana ba ke na sosaka kutalisa bawu mpasi, ba kima. (Mat. 10:23) Ata ti Yesu vanda tulaka ntima na Yehova mpe vanda samunaka na tiya nyonso, yandi vanda tula ve luzingu ya yandi na mpasi na buzoba.—Yoa. 11:53, 54.

13. Samu na yinki nge lenda vanda na kundima ti Yehova ke sadisa nge?

¹³ Bubu yayi, bantu mingi ke na teleminaka kisalu ya beto ya kusamuna. Na yawu, beto ke na nsatu Yehova sadisa beto na kusala yawu. (Luz. 12:17) Samu na yinki nge lenda vanda na kundima ti Yehova ke sadisa nge? Beto zonzila lusambu yina Yesu salaka na Yoane kikapu 17. Yesu lombaka na Yehova na kukengidila bantumwa. Yehova pesaka mvutu na lusambu ya yandi. Buku ya Bisalu ke zonzilaka mutindu Yehova sadisaka bantumwa na kusamuna na tiya nyonso ata ti ba vanda kwamisa bawu. Na lusambu ya yandi Yesu lombaka na Yehova na kukengidila ba yina vanda kwikila na bamambu yina bantumwa vanda longa. Nge mpe ke na kati. Tii bubu yayi Yehova ke na bikaka ve kupesa mvutu na lusambu ya Yesu. Yehova ke sadisa nge mutindu yandi salaka samu na bantumwa.—Yoa. 17:11, 15, 20.

14. Samu na yinki beto lenda vanda na kundima ti beto lenda samuna na tiya nyonso ata na bantangu ya bankwamusu? (Tala mpe kizizi.)

¹⁴ Samu ti beto me kuma na nsuka ya yinza, ya lenda kuma dyaka mpasi na kusamuna nsangu ya mbote. Kasi, Yesu zonzaka na beto ti yandi ke pesa beto lubakusu yina beto ke na yawu nsatu samu na kuvanda kaka na tiya na kisalu yayi. (Luke 21:12-15) Mutindu Yesu na bilandi ya yandi, beto bika bantu soola kana ba ke kuwa to ve, mpe beto sosa ve kuswana na bawu. Ata ntangu ba ke niminaka kisalu ya kusamuna, bampangi ke bikaka ve na kusala yawu samu ba ke sikidilaka na Yehova kasi ve na ngolo ya bawu mosi. Samu Yehova zola ti “kisalu ya kusamuna lungana na faso ya kulutila,” yandi ke na pesaka beto ngolo kaka mutindu yandi salaka yawu na bisadi ya yandi na siècle ya ntete. (2 Tim. 4:17) Vanda na kundima ti kana nge tula ntima ya nge nyonso na Yehova nge ke bika ve kusamuna na tiya nyonso.

YANDI VANDAKA NA KUNDIMA TI YA KE NA BANTU YINA ZOLA KUWA YANDI

15. Yinki ke na lakisaka ti Yesu vandaka na kundima ti kusamuna nsangu ya mbote zola buta bambuma?

¹⁵ Yesu vanda tadila kisalu ya kusamuna na faso ya mbote. Ya sadisaka yandi na kuvanda na tiya. Na kifwani, mvula mosi na manima ya kubanda kisalu ya yandi ya kusamuna, Yesu talaka bantu mingi yina vandaka ya kubongama samu na kuwa nsangu ya mbote. Yandi fwanisaka bawu na bilanga yina me yela mpe yina vandaka ya kubongama na kubuka bambuma. (Yoa. 4:35) Pene-pene ya mvula mosi na manima, yandi zonzaka na bilandi ya yandi: “Kisalu ya kuyonzika bambuma ke nene.” (Mat. 9:37, 38) Na mantwala yandi zonzaka: “Kisalu ya kuyonzika bambuma ke nene . . . Beno bondila Mfumu ya kisalu ya kuyonzika bambuma na kufilisa bisadi na kisalu ya yandi ya kuyonzika bambuma.” (Luke 10:2) Yesu vandaka na kundima ti bantu zola kuwa nsangu ya mbote. Ya fulusaka yandi na kilengi ntangu ba salaka yawu.—Luke 10:21.

16. Wa’ faso bifwani zole yina Yesu sadilaka ke na nataka beto na kuvanda na dikanisi ya mbote na kisalu ya kusamuna? (Luke 13:18-21) (Tala mpe kizizi.)

¹⁶ Yesu sadilaka bifwani zole samu na kulonga bilandi ya yandi ti nsangu yina ba ke samuna ke buta bambuma mpe yandi kindisaka bawu na kubumba tiya ya bawu. (Tanga Luke 13:18-21.) Ya ntete, Yesu fwanisaka nsangu ya Kimfumu na mbuma ya mutarde. Yandi sadilaka yawu samu na kulakisa mutindu nsangu ya mbote zola mwangana na faso ya ngitukulu mpe ti ata kima zola kanga yawu nzila. Ya zole, Yesu fwanisaka nsangu ya mbote na levire. Yandi sadilaka kifwani yayi samu na kulakisa mutindu nsangu ya Kimfumu zola mwangana, mpe bantu yina vandaka kuwa zola sala bansobolo yina ntangu ya nkaka zola talana ve na mbangu. Na yawu, Yesu sadisaka bilandi ya yandi na kutala ti nsangu yina ba vanda samuna zola sadisa bantu mingi.

17. Yinki lenda sadisa beto na kuvanda na dikanisi ya mbote na yina me tadila kusamuna nsangu ya mbote?

¹⁷ Kukanisa na mutindu nsangu ya mbote ke na sadisaka bantu mingi na yinza bubu yayi, ke na pesaka beto ngolo na kutatamana na kusamuna. Konso mvula, ba millions ya bantu yina ke sepelaka na nsangu ya mbote ke kwizaka na lukutakanu ya kubambuka moyo lufwa ya Yesu mpe ke longokaka Biblia. Mingi kuzwaka mbotokolo mpe ke na samunaka kintwadi na beto. Ya tsyeleka, beto zaba ve lutangu ya bantu yina ke ndima matsyeleka kasi beto zaba ti Yehova ke na vukisaka mafunda ya bantu yina ke vuuka na mpasi ya nene. (Luz. 7:9, 14) Yehova ke Mfumu ya kuyonzika bambuma, mpe yandi ke na kundima ti bantu mingi ke kuwa nsangu ya mbote. Na yawu beto tatamana na kusamuna nsangu ya mbote.

18. Yinki beto zola ti bantu ya nkaka tala na beto?

¹⁸ Bilandi ya Yesu ke vandaka kaka na tiya na kisalu ya kusamuna. Ntangu bantu talaka bukindi ya bantumwa, “ba kwizaka zaba ti ba vandaka na Yesu.” (Bis. 4:13) Mutindu mosi mpe kana beto samuna na tiya nyonso, bantu ke tala ti beto ke na landaka manzangu ya Yesu.