“Beno soola . . . nani beno ke sadila”

1. Yinki beto me fwana kusala samu na kuvanda na kilengi ya matsyeleka mpe samu na yinki? (Izayi 48:17, 18)

TATA ya beto ya mazulu ke zolaka beto mingi. Yandi zola ti beto vanda na luzingu ya kitoko bubu yayi mpe na mantwala. (Ekl. 3:12, 13) Yehova yidikaka beto na makoki ya kusala bamambu na faso ya ngitukulu, kasi yandi yidikaka ve beto na makoki ya kutwadisa luzingu ya beto, beto mosi to na makoki ya kusoola yina ke mbote mpe yimbi. (Ekl. 8:9; Yer. 10:23) Yandi zaba ti samu beto vanda na kilengi ya tsyeleka beto me fwana kusadila yandi mpe kutumama na malongi ya yandi. Izayi 48:17, 18 ke zonzaka: ‘Yehova ke na zonza, Yehova muvuukisi ya nge, Nzambi ya santu ya Izraele, munu Yehova, Nzambi ya nge: ‘Mu ke na kulongisa nge, samu na kusadila nge mambu ya mbote, mu ke twadisa nge na nzila yina nge fwana kulanda! Kana nge, nge sadilaka mbote ntumunu ya munu, kizunu ya nge zolaka luta mutindu nzadi, mpe ludedomo ya nge zolaka vanda mutindu bimpo ya mubu.’

2. Na yinki Satana ke sosaka kunata beto na kukanisa mpe yinki Yehova salaka?

² Satana ke sosaka na kunata beto na kukanisa ti ata ti Yehova ke ve na beto, beto lenda vanda na kilengi mpe ti bantu lenda twadisa luzingu ya bawu, bawu mosi. (Kub. 3:4, 5) Samu na kulakisa ti Satana ke muntu ya luvunu Yehova bikaka bantu twadisa luzingu ya bawu, bawu mosi na kati ya mwa ntangu. Kasi bamambu nyonso yina beto ke na talaka ke na lakisaka ti muntu lenda twadisa ve luzingu ya yandi, yandi mosi. Biblia ke zonzilaka bakento mpe babakala mingi yina vandaka na kilengi samu ba sadilaka Yehova. Kifwani ya kulutila mbote na bawu nyonso ni ya Yesu Kristo. Beto banda ntete na kutala bamambu yina nataka Yesu na kusoola kusadila Yehova. Na manima, beto ke tala samu na yinki beto me fwana kusadila Tata ya beto ya mazulu. Na kumanisa, beto ke tala mwa bamambu yina nataka beto na kusoola kusadila Yehova.

SAMU NA YINKI YESU SOOLAKA KUSADILA YEHOVA?

3. Yinki Satana pesaka na Yesu mpe yinki Yesu soolaka na kusala?

³ Ntangu Yesu vandaka awa na ntoto, yandi soolaka nani yandi ke sadila. Mwa ntangu fioti na manima ya kuzwa mbotokolo, Satana zonzaka na Yesu ti yandi ke pesa yandi bimfumu nyonso ya yinza kana yandi sala kaka mambu mosi, kufukama mpe kusambila yandi. Yesu zonzaka na yandi: “Katuka awa Satana! Samu ya ke ya kusonama, ‘Nge fwana kusambila Yehova Nzambi ya nge, mpe kaka ni na yandi nge fwana kusadila kisalu ya santu.’” (Mat. 4:8-10) Samu na yinki Yesu soolaka kusadila Yehova? Beto tala mwa bamambu yina nataka yandi na kubaka mukanu yayi.

4-5. Wapi bamambu nataka Yesu na kusadila Yehova?

⁴ Mambu ya ntete yina nataka Yesu na kusoola kusadila Yehova ke ni luzolo ya ngolo yina yandi ke na yawu samu na Tata ya yandi. (Yoa. 14:31) Dyaka, Yesu sadilaka Yehova samu ti ya ke mambu ya mbote. (Yoa. 8:28, 29; Luz. 4:11) Yandi zaba ti ni Yehova muntu yidikaka bima nyonso, beto lenda tula yandi ntima mpe ti yandi ke pesaka beto bima mingi ya mbote. (Nku. 33:4; 36:9; Zaki 1:17) Yesu zabaka ti Yehova ke vunaka ata fioti ve mpe ti bima nyonso yina yandi vandaka na yawu katukaka na Yehova. (Yoa. 1:14) Kasi, Satana ke muntu ya luvunu, yandi ke na lukokoto mpe yandi ke talaka kaka bansatu ya yandi mosi. Na yawu, yandi nata bantu na kusala disumu mpe kufwa. (Yoa. 8:44) Yesu zabaka mbote-mbote Yehova na Satana. Yandi sosaka ata fioti ve kuvanda mutindu Satana mpe kubalukila Yehova.—Filp. 2:5-8.

⁵ Mambu ya nkaka yina nataka Yesu na kusoola kusadila Yehova ke ti yandi kanisaka na bambote yina kukwikama ya yandi zola nata. (Ebr. 12:2) Yandi zabaka ti kukwikama ya yandi zola kumisa nkumbu ya Tata yandi santu mpe kukatula yimbi nyonso yina Dyabulu nataka.

SAMU NA YINKI BETO ME FWANA KUSADILA YEHOVA?

6-7. Samu na yinki bantu mingi bubu yayi ke sadilaka ve Yehova mpe samu na yinki beto me fwana kusadila kaka yandi?

⁶ Bantu mingi bubu yayi, ke sadilaka ve Yehova samu ti nabunu ba zaba bifu ya yandi ya mbote mpe ba me zaba ve bamambu nyonso yina yandi me sala samu na bawu. Ba ke mutindu mosi na bantu yina Polo samunaka na Atene. Bawu mpe zabaka ve Nzambi.—Bis. 17:19, 20, 30, 34.

⁷ Polo zonzaka na bantu ya Atene ti Nzambi ya tsyeleka “ke pesaka bantu nyonso luzingu, kupema mpe bima nyonso.” Yandi bwelaka: “Ni na nzila ya yandi beto ke na luzingu, beto ke ninganaka mpe beto kele.” Ni Nzambi yidikaka bima nyonso, “na nzila ya muntu mosi yandi salaka makanda nyonso ya bantu.” Na yawu, kaka ni yandi beto me fwana kusadila.—Bis. 17:25, 26, 28.

8. Yinki Yehova lenda sala ata fioti ve? Zonzila yawu.

⁸ Samu ti Yehova yidikaka bima nyonso mpe yandi ke mfumu na zulu ya nyonso. Na yawu, yandi zolaka nata bantu na ngolo na kusadila yandi. Kasi, yandi lenda sala ata fioti ve yawu. Yandi ke bumbilaka ve beto ti yandi kele mpe ti yandi ke zolaka mingi mosi na mosi ya beto. Yandi zola ti bantu mingi kuma bandiku yandi ya ntangu ya nyonso. (1 Tim. 2:3, 4) Na yawu, yandi ke longaka beto samu beto sadisa bantu ya nkaka na kuzaba makanisi ya yandi mpe kuzonzila bawu bamambu ya kitoko, yina yandi ke sala. (Mat. 10:11-13; 28:19, 20) Yandi me pesa beto bimvuka kisika yina beto lenda sadila yandi mpe kuzwa lubakusu ya bakuluntu yina ke zolaka beto.—Bis. 20:28.

9. Wa’ faso Yehova ke lakisaka bantu luzolo yandi?

⁹ Yehova ke zolaka mingi bantu mpe yandi ke lakisaka luzolo ya yandi na mutindu yina yandi ke bakila bantu yina ke soolaka kutumama ve na yandi. Kanisa na mambu yayi: Na kati ya bamvula mingi, bantu mingi me manga kutumama na Yehova, kasi ba me baka mukanu ya kusala mambu yina ba me kanisa ti ya ke mbote to yimbi na meso ya bawu. Ata faso yina, na ntima ya yandi ya kulutila mbote, yandi ke pesaka bawu yina ba ke na yawu nsatu samu na kuzinga mpe kusepela na luzingu. (Mat. 5:44, 45; Bis. 14:16, 17) Yandi pesaka bawu makoki ya kuvanda na bandiku ya mbote, ya kukulisa bana mpe ya kuzwa kilengi na kisalu ya bawu ya ngolo. (Nku. 127:3; Ekl. 2:24) Bamambu yayi ke na lakisaka pwelele ti Tata ya beto ya mazulu ke zolaka bantu nyonso. (Bas. 34:6) Beto tala dyaka mwa bamambu yina ke nataka beto na kusoola kusadila Yehova mpe bambote yina beto ke kuzwa na manima.

SAMU NA YINKI BETO SOOLAKA KUSADILA YEHOVA

10. a) Wapi yina ke mambu ya ntete yina ke nataka beto na kusadila Yehova? (Matayi 22:37) b) Wapi bambote ntima ya yandi ya yinda ke natinaka beto? (Nkunga 103:13, 14)

¹⁰ Mutindu Yesu, mambu ya ntete yina nataka beto na kusadila Yehova ya ke ti beto ke zolaka yandi mingi. (Tanga Matayi 22:37.) Ntangu beto ke longokaka bifu ya Yehova ya ke bendaka beto na yandi. Na kifwani, yandi ke ya kubongama na kulemvokila beto. Ntangu bantu ya Izraele vanda tumamaka ve na yandi, yandi vanda bondilaka bawu mutindu yayi: “Ya tsyelika, beno soba ndyatulu ya beno mpe mutindu ya beno ya kusadila.” (Yer. 18:11) Yehova me zaba ti beto ke bantu ya masumu, mpe ti beto ke kaka fundu-fundu. Nkunga 103:13, 14 ke zonzaka: “Mutindu tata ke fwilaka bana ya yandi kyadi, [Yehova] ke fwilaka kyadi bantu yina ke zitisaka yandi. Ya tsyelika yandi zaba mutindu beto yilamaka, yandi me zimbana ve ti beto kele fundu-fundu.” Ntangu nge ke yindulaka na ntima ya yandi ya yinda mpe na bifu ya yandi ya nkaka ya ke pesaka kwandi ve nge nsatu ya kusadila yandi samu na ntangu nyonso?

11. Wapi yina ke bamambu ya nkaka yina ke nataka beto na kusoola kusadila Tata ya beto ya mazulu?

¹¹ Dyaka, beto ke sadilaka Yehova samu ti ya ke mambu ya mbote yina beto lenda sala. (Mat. 4:10) Dyaka, beto zaba ti kana beto ke ya kukwikama na Yehova bamambu mingi ya mbote ke salama. Ya ke sadisa na kukumisa santu nkumbu ya Yehova, kulakisa ti Dyabulu ke muntu ya luvunu mpe ya ke sepelisaka ntima ya Tata ya beto ya mazulu. Kana beto soola kusadila Yehova bubu yayi, ya ke pesa beto bweso ya kusadila yandi samu na ntangu nyonso!—Yoa. 17:3.

12-13. Yinki mambu yina kuminaka Jane na Pam ke na longaka beto?

¹² Ata ti beto ke ntwenya, beto lenda longoka kukumisa ngolo luzolo ya beto samu na Yehova. Beto zonzila kifwani ya bampangi zole ya kento na nkumbu ya Jane na Pam.a Jane vandaka na bamvula 11 mpe Pam vandaka na bamvula 10 ntangu ba bandaka kulongoka Biblia. Bibuti ya bawu vandaka ve na nsatu ya kulongoka Biblia. Kasi ba pesaka nzila na Jane na Pam na kulutisa ntangu na Bambangi ya Yehova kaka, kana balumingu ba vanda na bibuti ya bawu, na kisika yina ba ke sambilaka. Jane me zonza: “Matsyeleka ya Biblia yina Bambangi ya Yehova me longa munu, me sadisa munu na kubwa ve na tiya yina bampangi ya munu ya lekole vanda sala munu ya kunwa dyamba mpe kusala kinsuza mutindu mingi ya bawu vanda sala yawu.”

¹³ Mwa bamvula na manima, Jane na Pam kumaka basamuni. Na manima ba kumaka mipasuli-nzila mpe ba vanda kipe bibuti ya bawu yina nunaka. Kukanisa na bamambu nyonso yina salamaka, Jane me zonza: “Me longoka ti Yehova ke kipeke na kukwikama nyonso bandiku ya yandi mpe mutindu ke zonzilaka yawu 2 Timote 2:19, ‘Yehova me zaba bantu ya yandi.’” Ntembe ve, yandi ke kipeke bansatu ya ba yina ke soolaka kuzola yandi mpe kusadila yandi!

14. Wa’ faso ndyatulu mpe nzonzolo ya beto lenda kunwanina nkumbu ya Yehova? (Tala mpe bizizi.)

¹⁴ Beto zola ti bantu ya nkaka zaba matsyeleka na yina me tadila Yehova. Kanisa na mambu yayi: Nge ke na ndiku yina ke na ntima ya mbote, yina ke na kifu ya kukabulaka mpe yina ke lemvokilaka. Kasi kilumbu mosi, nge me kuwa muntu kuvunina yandi ti yandi ke na ntima ya ngolo mpe ke salaka mayuya. Yinki nge ke sala? Ntembe ve, nge ke sosa kunwanina yandi. Mutindu mosi, ntangu Satana na bantu yina ke na lutumu ya yandi ke zonzaka bamambu ya luvunu na nkumbu ya Yehova, beto ke nwaninaka Yehova na kuzonzaka matsyeleka na yina me tadila yandi. (Nku. 34:1; Iza. 43:10) Ndyatulu ya beto mpe faso ya beto ya kuzonza me fwana kulakisa ti beto zola kusadila Yehova na ntima ya beto nyonso.

15. Wapi bambote ntumwa Polo kuzwaka na manima ya kusala bansobolo na luzingu ya yandi? (Bafilipi 3:7, 8)

¹⁵ Beto ke ya kubongama samu na kusala bansobolo na luzingu ya beto samu na kusepelisa Yehova to samu na kusala dyaka mingi na kisalu ya yandi. Na kifwani, ntumwa Polo vandaka muntu ya mfunu ya kati ya dibuundu ya Bazwife, kasi yandi bikaka yawu samu na kukuma kilandi ya Kristo mpe kusadila Yehova. (Gal. 1:14) Yinki ya natinaka yandi? Yandi kuzwaka bambote mingi na kisalu ya Yehova mpe kuzwaka bweso ya kuyala na Yesu na mazulu. Yandi nyongaka ata fioti mukanu ya yandi ya kusadila Yehova. Beto mpe ke na nyongaka ata fioti mukanu ya beto ya kusadila Yehova.—Tanga Bafilipi 3:7, 8.

16. Yinki kifwani ya Julia ke na longaka beto? (Tala mpe bizizi.)

¹⁶ Kana beto sala kisalu ya Yehova na kisika ya ntete na luzingu ya beto, ya ke sala ti beto vanda na luzingu ya mbote bubu yayi mpe na mantwala. Beto zonzila mambu yina kuminaka Julia. Tekila yandi longoka matsyeleka, yandi vandaka yimbaka na dibuundu ya bawu ntangu yandi vandaka mwana ya fioti. Muntu mosi yina ke salaka kisalu ya kuyimba talaka ti Julia zaba kuyimba. Yandi bakaka mukanu ya kulongisa dyaka yandi kuyimba. Na mbangu Julia kumaka na nkumbu ya nene mpe bandaka kuyimba na bisika ya nene. Ntangu yandi vandaka kota na lekole mosi ya nene ya misiki, mpangi ya yandi mosi ya lekole bandaka kuzonzila yandi na yina me tadila Nzambi mpe lakisaka yandi nkumbu ya Nzambi, Yehova. Mwa ntangu na manima yandi bandaka kulongoka Biblia bambala zole na lumingu. Na yawu, yandi bakaka mukanu ya kutula kisalu ya Yehova na kisika ya ntete na luzingu ya yandi na kisika ya kukuma muyimbidi mosi ya nene. Ya vandaka ve mukanu ya pete samu na yandi. Yandi me zonza: “Bantu mingi vanda zonza na munu ti mu vanda bebisa dikabu ya munu, kasi mu vandaka na nsatu ya kusadila Yehova luzingu ya munu nyonso.” Bubu yayi, bamvula 30 me luta. Yinki yandi ke kanisaka na mukanu yina yandi bakaka? Yandi me zonza: “Mu ke na kizunu na ntima mpe ke na kundima ti na mantwala, Yehova ke lungisa bansatu nyonso yina mu ke na yawu na ntima.”—Nku. 145:16.

TATAMANA NA KUSADILA YEHOVA!

17. Yinki bamambu yina ke na Baebre 10:37, zola zonza samu na ba yina ke sadilaka Yehova mpe ba yina ke sadilaka ve yandi?

¹⁷ Samu ti nsuka ya yinza ke dyaka ve ntama, ntumwa Polo sonikaka: “Ya tsyelika, ya kele ya kusonama: ‘Kaka ntangu fyoti me bikana, kaka ya kulutila fyoti, mpe muntu yina fwana kukwiza, ke kwiza. Yandi ke lutisa dyaka ve ntangu mingi.’” (Ebr. 10:37) Yinki ya zola zonza samu na beto? Ya me bikana kaka ntangu fioti samu na bantu yina ke sadilaka ve Yehova na kusoola kusadila yandi. (1 Kor. 7:29) Samu na beto, ba yina bakaka mukanu ya kusadila Yehova, “kaka ntangu fyoti me bikana, kaka ya kulutila fyoti,” samu na beto na kukanga ntima na mantwala ya bampasi.

18. Yinki Yehova na Yesu zola ti beto sala?

¹⁸ Yesu zonzaka ve kaka na bilandi ya yandi na kulanda yandi, kasi na kutatamana na kulanda yandi. (Mat. 16:24) Na yawu, ya lenda vanda ti beto me sala bamvula mingi na kisalu ya Yehova kasi beto me fwana kubika ve. Yehova zola ti beto tatamana na kuzitisa mukanu ya beto ya kusadila yandi. Ata ti ya ke vandaka ve pete, beto lenda vanda na kilengi mpe kuzwa balusakumunu mingi na kusadila yandi.—Nku. 35:27.

19. Yinki kifwani ya Gene ke na longaka beto?

¹⁹ Bantu ya nkaka ke kanisaka ti kana ba sadila Yehova ba ke sepela ve na luzingu. Kana nge ke ntwenya, nge ke na talaka ti ya ke mpasi mingi na nge na kusadila Yehova? Mpangi mosi ya ntwenya na nkumbu ya Gene me zonza: “Mu vanda tala ti kuvanda mbangi ya Yehova vandaka mutindu mu vandaka na boloko. Mu vanda talaka ti mingi ya bampangi yina kulaka na munu zolaka kusala bafeti, kubasika na bakento to kusala bansaka ya ngolo. Kasi munu, mu vanda lutisaka ntangu ya munu na kukwenda na balukutakanu mpe na kisalu ya kusamuna.” Yinki ya nataka Gene na kusala? Yandi me zonza: “Mu bandaka kusala na mansweki bamambu ya yimbi yina bantwenya ya nkaka vanda salaka. Kasi ya pesaka ve munu kilengi ya tsyeleka. Mu bandaka kukanisa na bambote yina mu ke kuzwa na kusadila na malongi ya Biblia mpe mu bakaka mukanu ya kusadila Yehova luzingu ya munu nyonso. Kubanda kilumbu yina, mu ke na kundima ti Yehova ke pesaka bamvutu na balusambu ya munu.”

20. Yinki beto me bonga kutatamana na kusala?

²⁰ Nkunga 65:4 ke zonzaka: ‘Nsayi na muntu yina nge me soola, mpe yina nge me nata pene-pene ya nge. Samu ti yandi zinga na lupangu ya yinzo ya nge.’ Bika ti beto tatamana na kusadila Yehova. Mpe kaka mutindu Yozue beto ke zonza: ‘Munu mpe bantu ya yinzo ya munu, beto ke sadila Yehova.’—Yoz. 24:15.