DISOLO YA KULONGOKA 17
NZIMBU 99 Beto ke kimvuka ya nene
Beto ke ata fioti ve beto mosi
“Mu ke kwiza sadisa nge.”—IZA. 41:10.
NA BUNKUFI
Beto ke tala bafaso yiya yina Yehova ke kipeke beto.
1-2. a) Samu na yinki beto lenda zonza ti beto ke ata fioti ve beto mosi na mantwala ya bamambu ya mpasi? b) Yinki beto ke longoka na disolo yayi?
NTANGU beto ke na kutanaka na bamambu ya mpasi ya kulutila, beto lenda tala mutindu beto ke kaka beto mosi na kati ya brusu ya nene mpe ke na zabaka ve nzila. Kasi, beto ke ve kaka beto mosi. Tata ya beto ya luzolo yina ke na mazulu ke talaka ve kaka bampasi yina beto ke kutanaka na yawu kasi, yandi me pesa mpe beto nsilulu ya kusadisa beto. Na luzolo nyonso yandi me zonza: “Mu ke kwiza sadisa nge.”—Iza. 41:10.
2 Na disolo yayi, beto ke tala bafaso yiya yina Yehova ke sadisaka beto: 1) yandi ke twadisaka beto, 2) yandi ke kipeke beto, 3) yandi ke bumbaka beto, mpe 4) yandi ke kindisaka beto. Yehova me pesa beto nsilulu ti ata bamambu ya mpasi yina beto ke na kutanaka na yawu na luzingu, yandi ke zimbana beto ata fioti, yandi ke bika beto ata fioti. Ya zola zonza, beto ke ata fioti ve beto mosi.
YEHOVA KE TWADISAKA BETO
3-4. Wa’ faso Yehova ke twadisaka beto? (Nku. 48:14)
3 Nkunga 48:14 ke zonzaka: “Nzambi yayi ke Nzambi ya beto samu na bantangu nyonso, mpe mankululu, ni yandi kaka ke twadisa beto tii na lufwa.” Yehova zaba ti muntu ke ve mfumu ya nzila ya yandi mpe ti yandi ke na nsatu ba twadisa yandi. Wa’ faso bubu yayi, yandi ke twadisaka bisadi ya yandi ya kukwikama? Mosi ya bafaso yina yandi ke salaka yawu, ni na nzila ya mambu ya yandi Biblia. (Nku. 119:105) Na nzila ya Biblia Yehova ke sadisaka beto na kubaka mikanu ya mbote, mpe kukulisa bifu ya mbote yina ke sala ti beto vanda na kilengi ya luzingu bubu yayi, mpe kuzwa luzingu ya ntangu nyonso na mantwala.a Na kifwani, yandi ke longaka beto na kulemvokila bampangi, na kubumba ve nkele, na kuvanda muntu ya matsyeleka na mambu nyonso mpe kuzola bampangi na ntima mosi. (Nku. 37:8; Ebr. 13:18; 1 Pi. 1:22) Ntangu beto ke lakisaka bifu yayi, beto ke kumaka bibuti ya mbote, bakala to kento ya mbote mpe bandiku ya mbote.
4 Dyaka, na Biblia Yehova tulaka masolo ya bantu mingi yina kutanaka na bankwamusu mpe yina vandaka bantu mutindu beto. (1 Kor. 10:13; Zaki 5:17) Ntangu beto ke tangaka masolo yango mpe ke sadilaka bileso yina beto me longoka na yawu, beto ke kuzwaka bambote na bafaso zole. Ya ntete, beto ke bakulaka ti beto ke ve kaka beto mosi na kukutana na bampasi na luzingu. Ba ya nkaka kutanaka na bampasi ya mutindu mosi mpe ba lendaka kukanga ntima na lusalusu ya Yehova. (1 Pi. 5:9) Ya zole, beto ke longoka kunwana na bankwamusu yina beto ke kutana na yawu.—Rom. 15:4.
5. Banani Yehova ke sadilaka samu na kutwadisa beto?
5 Samu na kutwadisa beto, Yehova ke sadilaka mpe bampangi ya beto bakristo.b Na kifwani, bantwadisi ya circoncription ke kwendaka talaka bimvuka ntangu nyonso samu na kukindisa bawu. Badiskure ya bawu ke kumisaka ngolo kiminu ya beto mpe ke sadisaka beto na kubumba bumosi. (Bis. 15:40–16:5) Bakuluntu mpe ke salaka ngolo samu na kusadisa mosi na mosi ya beto na kuvanda pene-pene na Yehova. (1 Pi. 5:2, 3) Bibuti ke longaka bana ya bawu na kuzola Yehova, mitindu ya kubaka mikanu na ndwenga nyonso, mpe kuvanda na bifu ya mbote. (Bin. 22:6) Bakristo ya bakento ya kuyela na kimpeve ke sadisaka bantwenya ya kento na kifwani ya bawu ya mbote. Ba ke pesaka bawu malongi yina me fwanana mpe ke kindisaka bawu na luzolo nyonso.—Tite 2:3-5.
6. Yinki beto me fwana kusala samu na kuzwa bambote na malongi ya Yehova?
6 Yehova me pesa beto malongi yina beto ke na yawu nsatu samu na kubaka mikanu ya mbote mpe kuvanda na kilengi na luzingu. Wa’ faso beto lenda vutula yandi matondo samu na nyonso yina yandi salaka samu na beto? Bingana 3:5, 6 ke zonzaka: “Tula ntima ya nge ya muvimba na Yehova, mpe kutula ve ntima na mayela ya nge mosi ya kubakula bamambu.” Ntangu beto ke salaka yawu, ‘yandi ke katulaka masakuba na banzila ya beto.’ Ya zola zonza na lubakusu ya yandi beto ke kubwa ve na bamambu mingi ya mpasi mpe beto ke vanda na kilengi na luzingu. Beto ke na vutulaka Yehova matondo samu yandi zaba beto mbote-mbote, yandi ke zolaka beto mingi mpe ke pesaka mosi na mosi ya beto malongi yina beto ke na yawu nsatu.—Nku. 32:8.
YEHOVA KE KIPEKE BETO
7. Wapi yina ke bafaso ya nkaka yina Yehova ke kipeke beto? (Bafilipi 4:19)
7 Tanga Bafilipi 4:19. Dyaka, Yehova ke twadisaka beto na kimpeve, yandi ke sakumunaka bangolo yina beto ke salaka samu na kuzwa madya, bilele mpe kisika ya kuvanda. (Mat. 6:33; 2 Tes. 3:12) Ya ke ve yimbi na kuvanda na manyongo na yina me tadila bima yayi, kasi Yehova zola ve ti beto vanda na manyongo ya kulutila na yina me tadila yawu. (Mat. 6:25) Samu na yinki? Samu ti Tata ya beto ke bika ata fioti ve bisadi ya yandi ya kukwikama na ntangu ya mpasi. (Mat. 6:8; Ebr. 13:5) Beto lenda vanda na ata ntembe ntangu yandi ke zonzaka na beto, mu ke kipe beno.
8. Yinki Yehova salaka samu na Davidi?
8 Beto tala mutindu Yehova sadisaka Davidi. Na kati ya bamvula ya mpasi yina Davidi vanda kima mfumu Saule, Yehova pesaka yandi na bantu ya yandi bima yina ba vandaka na yawu nsatu samu na kuvuuka. Na kukanisa na mutindu Yehova kipeke yandi na kati ya bamvula, Davidi sonikaka: “Mu vwandaka ntwenya, awa munu me nuna. Munu me tala ve ti Nzambi me bika muntu ya kudedama, to bana ya yandi na kwendaka lomba dimpa.” (Nku. 37:25) Mutindu Davidi, nge mpe talaka mutindu Yehova kipeke nge to bampangi ya nkaka na luzolo nyonso na bantangu ya mpasi.
9. Bubu yayi, wa’ faso Yehova ke kipeke dikanda ya yandi na kati ya bamambu ya mpasi mutindu kuningana ya ntoto to bamvula ya nene? (Tala mpe bizizi.)
9 Yehova ke kipeke mpe bisadi ya yandi ntangu ba ke kutanaka na bamambu ya mpasi mutindu kuningana ya ntoto to bamvula ya nene. Na kifwani, ntangu mambu ya nsatu kubwaka na siècle ya ntete, bakristo yina vandaka na bambanza mingi filisaka bampangi ya bawu bima yina ba vandaka na yawu nsatu. (Bis. 11:27-30; Rom. 15:25, 26) Bisadi ya Nzambi ya bubu yayi mpe ke lakisaka kifu yayi. Ntangu bamambu ya mpasi ke kubwaka mutindu kuningana ya ntoto to bamvula ya nene, Yehova na luzolo ya yandi ke nataka dikanda ya yandi na kufilisa bima mutindu madya, maza, bilele mpe manganga na bampangi yina ke na kutanaka na bamambu ya mpasi yayi. Ba yina ke salaka na kisalu ya kutunga ke bongisaka bayinzo ya bawu mpe bayinzo ya Kimfumu. Mpe na mbangu nyonso, ba ke kindisaka ba yina ke dyaka ve na bayinzo mpe ba yina me fwidila bantu yina ba ke zolaka.c
Wa’ faso Yehova ke kindisaka beto na ntangu ya bamambu ya mpasi mutindu bamvula ya nene to kuningana ya ntoto? (Tala paragrafe 9)e
10-11. Yinki nge me longoka na mambu yina kuminaka Borys?
10 Yehova ke lakisaka mpe ntima ya mbote na bantu yina ke sadilaka ve yandi. Samu na kulanda kifwani ya yandi, beto mpe ke sosaka bafaso ya kulakisa ntima ya mbote na ba yina ke ve Bambangi ya Yehova. (Gal. 6:10) Ntangu beto ke salaka yawu, beto lenda sadisa bawu na kuzaba dyaka mingi na yina me tadila Yehova mpe beto. Beto tala kifwani ya Borys mfumu ya lekole mosi, yina ke vandaka na Ukraine. Ata ti yandi vandaka ve mbangi ya Yehova, yandi vanda lakisaka ntima ya mbote na balongoki ya yandi yina vandaka Bambangi ya Yehova mpe vanda lakisaka buzitu na bamambu yina ba vanda kwikilaka. Samu ti kisika yina yandi vandaka, vandaka na mvita yandi bakaka mukanu ya kukwenda na kisika ya nkaka ya bwala yina vandaka ve na mvita, mpe kuna bampangi ya beto sadisaka yandi. Na manima, Borys kwendaka na lukutakanu ya kubambuka moyo lufwa ya Yesu. Ntangu yandi ke na kanisaka na bamambu yina ba salaka samu na yandi, yandi me zonza: “Bambangi ya Yehova tulaka munu dikebi mpe kipeke munu. Mu ke na vutulaka bawu matondo.”
11 Beto mpe lenda landa kifwani ya Tata ya beto ya mazulu na kulakisaka luzolo, ya vanda na ba yina ke kabulaka kiminu mosi na beto to ve. (Luke 6:31, 36) Beto ke na kundima ti bangolo nyonso yina beto ke na salaka samu na kulakisa bantu luzolo lenda sala ti ba kuma bilandi ya Kristo. (1 Pi. 2:12) Kana ba soola kusadila Yehova to ve, beto ke vanda na kilengi samu ti kilengi ya kukabula ke lutilaka ya kuzwa.—Bis. 20:35.
YEHOVA KE BUMBAKA BETO
12. Wapi nsilulu Yehova pesaka na dikanda ya yandi? (Nkunga 91:1, 2, 14)
12 Nkunga 91:1, 2, 14 ke zonzaka: “Muntu yina ke zingaka na kisika yina Nzambi ya Kulutila Kuzangama ke bumbamaka, yandi ke pemaka na mpewo ya Nzambi. Mu me tuba na [Yehova]: ‘Nge kele kiswamunu ya munu, kibaka ya lukengolo ya munu, Nzambi ya munu yina mu ke sadilaka kivuvu.’ Nzambi tubaka: ‘Samu ti yandi me zola munu, mu ke kuula yandi, samu ti yandi zaba nkumbu ya munu, mu ke keba yandi.’” Bubu yayi, Yehova pesaka nsilulu ya kubumba bisadi ya yandi na mambu nyonso yina lenda bebisa kindiku ya yandi na bawu. Yandi ke bika ata fioti nzila na Satana samu na kubebisa lusambu ya tsyeleka. (Yoa. 17:15) Mpe na ntangu “ya mpasi ya nene,” beto lenda vanda na kundima ti Yehova ke lungisa nsilulu ya yandi ya kubumba dikanda ya yandi kaka ve na kimpeve kasi mpe na kinsuni.—Luz. 7:9, 14.
13. Wapi bafaso Yehova ke bumbaka mosi na mosi ya beto?
13 Wa’ faso Yehova ke bumbaka mosi na mosi ya beto? Ni na nzila ya Biblia. Ya ke sadisaka beto na kusala luswaswanu na mambu ya mbote mpe ya yimbi. (Ebr. 5:14) Ntangu beto ke sadilaka bamambu ya Biblia na luzingu ya beto, ya ke bumbaka beto na kimpeve mpe na kinsuni. (Nku. 91:4) Dyaka, Yehova ke bumbaka beto na nzila ya kimvuka. (Iza. 32:1, 2) Kuna beto ke vandaka na bampangi yina ke zolaka Yehova mpe ke tumamaka na yandi. Kulutisa ntangu na bawu na balukutakanu, na kisalu ya kusamuna, kusakana kintwadi ke kindisaka beto mingi mpe ke sadisaka na kukima bamambu ya yimbi.—Bin. 13:20.
14. a) Samu na yinki Nzambi ke bumbaka ve beto na bampasi nyonso yina ke kuminaka beto? b) Na yinki Nkunga 9:10 ke na nataka beto na kuvanda na kundima? (Tala mpe noti ya yisi ya paje.)
14 Yehova bantangu ya nkaka na ntama, bumbaka dikanda ya yandi ntangu ba vanda sosa kufwa bawu. Kasi, yandi vanda sala ve yawu ntangu nyonso. Biblia ke zonzaka ti “mambu ya mbote to ya yimbi ke bwidilaka bantu nyonso” na ntangu yina ba ke ve na vingilaka yawu. (Ekl. 9:11) Dyaka, na kati ya bamvula, Yehova bikaka ti ba kwamisa bisadi ya yandi mpe ba kufwa bawu samu na kulakisa ti Satana ke muntu ya luvunu. (Yobi 2:4-6; Mat. 23:34) Ya ke kaka faso mosi tii bubu yayi. Ata ti Yehova lenda katula ve bampasi ya beto bubu yayi, beto lenda vanda na kundima ti yandi ke bika ata fioti ba yina ke zolaka yandi.d—Nku. 9:10.
YEHOVA KE KINDISAKA BETO
15. Wa’ faso lusambu, mambu ya Nzambi mpe bampangi ke kindisaka beto? (2 Bakorinto 1:3, 4)
15 Tanga 2 Bakorinto 1:3, 4. Bantangu ya nkaka, beto ke vanda na manyongo to mawa ya kulutila. Ya lenda vanda ti nge ke na kutanaka na bamambu ya mpasi bubu yayi, yina ke na salaka ti nge tala ti nge ke kaka nge mosi. Ya ke kwandi na muntu yina ke na bakulaka yinki ya ke na salaka nge na ntima? Ee, Yehova. Yandi ke talaka kaka ve yina ke salaka beto mpasi, kasi mpe “yandi ke kindisaka beto na bankwamusu ya beto nyonso.” Wa’ faso? Ni na ntangu beto ke sambilaka yandi, yandi ke pesaka beto “kizunu ya Nzambi yina me lutila nyonso yina beto lenda bakula.” (Filp. 4:6, 7) Ntangu beto ke tangaka na Biblia bamambu yina Yehova zonzaka yina ke na talanaka mutindu yandi ke na zonzaka yawu na beto, ya ke pesaka mpe beto ngolo. Na nzila ya Biblia, Yehova ke lakisaka mutindu yandi ke zolaka beto mingi, ke longaka beto mutindu ya kuvanda na ndwenga mpe ke pesaka beto kivuvu samu na mantwala. Balukutakanu mpe ke kindisaka beto mingi samu beto ke vandaka kintwadi na bampangi yina ke zolaka beto, mpe ke kuzwaka malongi yina ke pesaka beto ngolo.
16. Yinki nge me longoka na mambu yina kuminaka Nathan na Priscilla?
16 Beto tala mutindu Yehova pesaka ngolo na Nathan na Priscilla yina ke vandaka na États-Unis. Bamvula mingi, ba bakaka mukanu ya kukwenda vanda kisika yina ba vandaka na nsatu ya basamuni. Nathan me zonza: “Beto vandaka na kundima ti Yehova ke sakumuna bangolo ya beto.” Kasi, na manima ya kukuma kisika yango ba kutanaka na bamambu ya mavimpi mpe ya mbongo yina ba vanda vingila ve. Na yawu, ba bakaka mukanu ya kuvutuka na yinzo ya bawu, kasi kuna mpe ba vanda kutana na bamambu ya mbongo. Nathan me bwela: “Mu bandaka kuyufula samu na yinki Yehova sakumunaka ve beto mutindu beto vanda kanisa. Mpe mu bandaka kukanisa ti mu salaka mambu ya yimbi.” Kasi, Nathan na Priscilla kwiza tala ti Yehova bikaka ve bawu na kati ya bantangu ya bawu ya mpasi. Nathan me zonza: “Na ntangu ya bampasi yina, Biblia kumaka mutindu ndiku ya ndwenga yina ke pesaka bukindi mpe malongi. Beto tulaka makanisi ya beto na mutindu Yehova sadisaka beto na kukanga ntima kasi ve na bampasi ya beto. Kusala yawu me sadisa beto na kuvanda na kundima ti Yehova ke tatamana na kusadisa beto na bampasi yina ke kumina beto na mantwala.”
17. Wa’ faso mpangi Helga kuzwaka bukindi? (Tala mpe kizizi.)
17 Bampangi ya beto ya kento na bakala lenda pesa beto bukindi. Wa’ faso? Beto tala kifwani ya Helga yina ke vandaka na Hongrie. Na kati ya bamvula mingi, yandi kwizaka kutana na bamambu mingi ya mpasi ya mitindu na mitindu. Ya salaka ti yandi kuma na manyongo mpe kutala ti yandi vandaka ve mfunu. Kasi ntangu yandi ke kanisaka na yawu, yandi lenda tala ti Yehova pesaka yandi ngolo na manima ya kimvuka. Yandi me sonika: “Ntangu kisalu ya munu ya ngolo, kukipe mavimpi ya mwana mpe bamambu ya nkaka ya mpasi vanda lembisaka munu, Yehova vanda sadisa kaka munu. Ya ke ve na kilumbu na kati ya bamvula 30 yayi me luta, yina Yehova me lungisa ve nsilulu ya yandi ya kukindisa munu. Bambala mingi Yehova ke pesaka munu ngolo na nzila ya bampangi na bamambu ya kitoko yina ba ke zonzaka mpe na dikebi yina ba ke tulaka munu. Mu kuzwaka ba messages mpe masiika na ntangu yina mu vandaka na yawu nsatu.”
Wa’ faso Yehova lenda sadila nge samu na kukindisa bampangi? (Tala paragrafe 17)
18. Wa’ faso beto lenda kindisa bantu ya nkaka?
18 Beto ke na bweso ya kulanda kifwani ya Nzambi ya beto na kukindisaka bampangi. Wa’ faso beto lenda sala yawu? Beto lenda kuwa bawu na ntima ya yinda nyonso, kuzonzila bawu na faso yina lenda pesa bawu ngolo mpe kupesa bawu lubakusu yina ba ke na yawu nsatu. (Bin. 3:27) Beto lenda kindisa ba yina nyonso ke na talaka mpasi, ya vanda ba yina ke sadilaka Yehova to ve. Ntangu bantu yina ke vandaka kisika mosi na beto ke na kutanaka na bimbevo to manyongo ya kulutila, beto kwenda tala bawu, beto kuwa bawu mpe beto kabula na bawu malongi ya Biblia yina ke kindisa bawu. Ntangu beto ke landaka kifwani ya Yehova, “Nzambi yina ke katulaka kyadi ya bantu nyonso,” beto ke sadisaka ve kaka bampangi ya beto na kukanga ntima, kasi mpe beto ke sadisaka ba yina ke sadilaka ve Yehova na kulongoka kuzaba yandi.—Mat. 5:16.
YEHOVA KE KAKA NA BETO
19. Yinki Yehova me sala samu na beto mpe wa’ faso beto lenda kifwani ya yandi?
19 Yehova ke kipeke na faso ya kulutila ba yina nyonso ke zolaka yandi. Yandi ke bikaka ve bawu ntangu ba ke kutanaka na bamambu ya mpasi. Mutindu tata ya luzolo yina ke kipeke mwana yandi, Yehova mpe ke kipeke bisadi ya yandi ya kukwikama. Yandi ke twadisaka beto, ke kipeke beto, ke bumbaka beto mpe kindisaka beto. Beto ke landaka luzolo ya Tata ya beto ya mazulu ntangu beto ke sadisaka mpe ke kindisaka bampangi ya beto, ntangu ba ke kutanaka na bamambu ya mpasi. Ata ti bantangu ya nkaka, beto lenda kutana na bamambu ya mpasi mpe kuvanda na manyongo, beto lenda vanda kundima ti Yehova ke kaka na beto samu ti yandi zonzaka na beto: “Kuvwanda na boma ve, samu ti mu ke na nge.” (Iza. 41:10) Nsilulu yayi, ke na pesaka beto ngolo! Beto ke na kundima ti beto ke vanda ata fioti ve beto mosi.
NZIMBU 100 Beto yamba bawu na ntima ya mbote
a Tala disolo “Prenons des décisions qui honorent Dieu” na Yinzo ya Kengidi ya 15 avril 2011.
b Tala baparagrafe 11-14 ya disolo “Bika Yehova twadisa nge” na Yinzo ya Kengidi ya février 2024.
c Samu na kuzwa bamambu ya malu-malu na yina me tadila ba opérations de secours sonika “opérations de secours” na kisika yina ba me sonika na jw.org sosa.
d Tala “Byuvu ya ba yina ke tangaka mikanda ya beto” na Yinzo ya Kengidi ya février 2017.
e YINA KIZIZI KE NA LAKISAKA: Bampangi ya Malawi, ke na kuzwaka lubakusu na kimpeve mpe na kinsuni, na manima ya bamambu ya mpasi mutindu mvula ya nene to kuningana ya ntoto.