Tatamana na kulongoka bileso na malongi ya ntete ya Biblia

1. Wa’ faso malongi ya ntete ya Biblia sobaka luzingu ya nge?

MALONGI ya ntete ya Biblia yina beto longokaka sobaka luzingu ya beto. Na kifwani, na kulongoka nkumbu ya Nzambi Yehova, beto bandaka kukuma ndiku ya yandi. (Iza. 42:8) Matsyeleka na yina me tadila bantu ya kufwa, sadisaka beto na kuzaba ti bantu yina beto ke zolaka yina kufwaka, ke ve na talaka mpasi. (Ekl. 9:10) Nsilulu yina Nzambi salaka na yina me tadila ntoto, katulaka beto boma ya bilumbu ya mantwala. Na yawu, beto ke na kundima ti beto ke zinga ve kaka bamvula 70 to 80 kasi samu na ntangu nyonso.—Nku. 37:29; 90:10.

2. Samu na yinki Piere bambulaka bakristo ya kukangama na matsyeleka ti ba ke na nsatu ya kukanisa ntangu nyonso na malongi ya ntete ya Biblia?

² Beto me fwana kuzimbana ata fioti ve mfunu ya malongi ya ntete ya Biblia. Ni na yawu, na mukanda ya yandi ya zole ntumwa Piere sonikaka na bakristo yina vandaka ya “kukangama ngolo na matsyeleka.” (Tanga 2 Piere 1:12, 13.) Samu na yinki? Samu ti bantu ya yimbi kotaka na kimvuka mpe ba vanda sosa kunata bampangi ntama na matsyeleka. (2 Pi. 2:1-3) Piere vandaka na nsatu ya kusadisa bampangi, samu ba kubwa ve na luvunu ya bawu. Ni na yawu, yandi bambulaka bawu masonoko yina ba longokaka. Ya zola sadisa bawu na kubikana ya kukangama na Yehova.

3. Samu na yinki bakristo nyonso me bonga kutatamana na kuyindula na malongi ya ntete ya Biblia? Pesa kifwani.

³ Ata bakristo ya kukula na kimpeve lenda benda bileso na malongi ya ntete ya Biblia. Beto baka kifwani ya muntu yina me zaba kulamba mbote-mbote na muntu yina me banda ntama mingi ve. Bawu zole lenda sadila bima mosi samu na kulamba madya. Kasi, muntu yina me lutisa ntangu mingi na kati ya kisalu yayi ke na makoki ya kusadila bima yango samu na kulamba madya na faso ya malu-malu mpe ya kitoko. Mutindu, mosi ba yina ke sadilaka Yehova banda ntama na ba yina me banda kulongoka Biblia ntama mingi ve ke bendaka ve bileso mosi na malongi ya ntete ya Biblia. Ntangu beto ke sadilaka malongi ya ntete ya Biblia na bamambu yina beto ke na kutanaka na yawu bubu yayi, beto lenda benda bileso ya malu-malu. Beto tala mutindu bakristo ya kuyela na kimpeve lenda benda bileso na malongi tatu ya ntete ya Biblia.

YEHOVA YIDIKAKA BIMA NYONSO

4. Wa’ faso kuzaba ti Yehova yidikaka bima nyonso sobaka luzingu ya beto?

⁴ “Muntu yina tungaka bima nyonso ni Nzambi.” (Ebr. 3:4) Nzambi ke na ndwenga mpe ngolo ya kulutila. Beto zaba ti ni yandi yidikaka ntoto mpe luzingu. Yandi yidikaka beto, yandi zaba beto mbote-mbote mpe yandi zaba yina ke mbote samu na beto. Kuzaba ti Yehova yidikaka bima nyonso me soba luzingu ya beto mpe ya me pesa beto kivuvu.

5. Wa’ faso kuzaba ti Yehova yidikaka bima nyonso lenda sadisa beto na kukulisa kifu ya kuvanda ya kukuluka? (Izayi 45:9-12)

⁵ Kuzaba ti Yehova yidikaka bima nyonso lenda longa beto kileso na yina me tadila kukuluka. Na kifwani, ntangu Yobi zimbanaka mambu yina vandaka mfunu mpe vanda kanisa kaka na yandi mosi samu na kulakisa ti yandi salaka ve mambu ya yimbi, yandi zonzaka bamambu ya yimbi na yina me tadila Yehova. (Yobi 38:1-4) Kasi Yehova vutulaka yandi na nzila mpe lakisaka yandi ti yandi ke muntu ya kulutila ngolo nyonso mpe yina yidikaka bima nyonso. Ya sadisaka Yobi na kutala ti bamambu nyonso yina Yehova ke salaka ke vandaka kaka mbote. Ya ke kwendaka nzila mosi na kyuvu ya mbikudi Izayi: “Kalaba lenda tuba na kisadi-mbungu ti: ‘Yinki nge ke na kusala?’” Izayi 45:9-12 ke zonzaka: “Kyadi na muntu yina ke swanisa yina me yidika yandi, na kutala mbote, yandi kele kaka mbungu na kati-kati ya bambungu ya ntoto, kalaba lenda tuba na kisadi-mbungu ti: «Yinki nge ke na kusala? Mpe ti kisalu [ya] nge kele ya mpamba!» Kyadi na muntu yina ke tuba na tata ya yandi mutindu yayi: Samu na yinki nge butaka munu? To na kento: Samu na yinki nge ke butaka? [Yehova] Nzambi ya [santu] ya Isayeli yina yidikaka nge ke na kutuba mutindu yayi: Nge zola kuyufula munu na mambu yina ke kwiza? To kupesa munu bantumunu samu na bana ya munu, mpe samu na yina mu ke yidika na maboko ya munu? Ni munu yidikaka ntoto, mpe na zulu ya yawu, mu yidikaka muntu, mu tandaka mazulu na maboko ya munu, ni munu ke pesa bantumunu na binwani ya yawu nyonso.”

6. Na wapi ntangu ya ke mfunu na kukanisa na ndwenga mpe na ngolo ya Yehova? (Tala mpe bizizi.)

⁶ Ntangu muntu ke sadilaka Yehova na kati ya bamvula mingi, yandi lenda banda kusikidila na mayela ya yandi mosi na kisika ya kutula ntima na Yehova mpe na Biblia. (Yobi 37:23, 24) Kuyindula na muntu yina yidikaka yandi Yehova mpe na mayela na ndwenga yina yandi ke na yawu lenda sadisa yandi na kuvanda ya kukuluka mpe kubongisa faso ya yandi ya kukanisa.—Iza. 40:22; 55:8, 9.

7. Yinki Rahela salaka samu na kundima bansobolo?

⁷ Rahela yina ke vandaka na Slovénie, kwizaka tala ti kukanisa na muntu yina yidikaka yandi sadisaka yandi na kundima bansobolo na dibuundu ya Yehova. Yandi zonzaka: “Bantangu ya nkaka, ya vandaka mpasi na munu na kundima mikanu yina bampangi yina ke twadisaka kimvuka ya Yehova ke bakaka. Na kifwani, mu talaka Bansangu ya Kimvuka ya Bantwadisi no 8 ya 2023, kasi mbala ya ntete yina mu talaka mpangi mosi yina vanda sala diskure na mandefo, ya kwamisaka munu. Na yawu, mu sambilaka Yehova samu yandi sadisa munu na kundima bansobolo yayi.” Rahela kwizaka bakula ti samu Yehova yidikaka bima nyonso, yandi me zaba faso ya mbote ya kutwadisa kimvuka ya yandi. Kana ya ke mwa mpasi na nge na kundima mwa bansobolo to faso ya malu-malu na kusala bamambu, ya ke vanda ve kwandi mbote nge yindula na ndwenga mpe ngolo ya Yehova muntu yina yidikaka beto?—Rom. 11:33-36.

SAMU NA YINKI NZAMBI KE BIKAKA NZILA NA BAMPASI?

8. Wa’ faso kuzaba samu na yinki Yehova ke bikaka nzila na bampasi ke kindisaka beto?

⁸ Samu na yinki Nzambi ke bikaka nzila na bampasi? Ba ya nkaka yina kuzwaka ve mvutu na kyuvu yayi dasukilaka Nzambi to ya nataka ba ya nkaka na kuzonza ti Nzambi kele ve. (Bin. 19:3) Nge me kwiza longoka ti bampasi ke katukaka ve na Yehova, kasi ni disumu yina beto byadilaka mpe nzutu ya beto ya masumu ke salaka ti beto vanda na bampasi. Nge me kwiza longoka mpe ti samu Yehova ke na ntima ya yinda, ya me sala ti bantu mingi zaba yandi mpe ba kwiza longoka ti Yehova ke sukisa bampasi. (2 Pi. 3:9, 15) Ya me pesa nge ngolo mpe me sala ti kuma pene-pene ya yandi.

9. Na wapi ntangu beto me bonga kukanisa samu na yinki Yehova ke bikaka nzila na bampasi?

⁹ Ya ke na longaka beto ti beto me fwana kuvanda na ntima ya yinda samu na kuvingila ntangu yina Yehova ke manisa bampasi. Kasi ntangu beto to muntu yina beto ke zolaka ke na lutisaka bantangu ya mpasi, ke na kutanaka na bamambu ya kukondwa lunungu to muntu yina beto ke zolaka me kufwa ya lenda nata beto na kuyufula samu na yinki Yehova ke ve na yidikaka bamambu na mbangu. (Abak. 1:2, 3) Na ntangu beto ke kutanaka na bamambu ya mutindu yayi, ya ke mbote na kukanisa samu na yinki Yehova ke bikaka bantu ya lunungu kutana na bamambu ya mpasi.a (Nku. 34:19) Beto lenda kanisa mpe na dikanisi ya yandi ya kumanisa bampasi samu na ntangu nyonso.

10. Yinki sadisaka Anne na kukanga ntima na manima ya lufwa ya mama ya yandi?

¹⁰ Matsyeleka na yina me tadila bampasi ke sadisaka beto na kukanga ntima. Anne, yina ke vandaka na Île ya Mayotte na Océan Indien me zonza: “Ya me sala mwa bamvula yina mama kufwaka mpe ya ke na salaka munu kaka mpasi. Kasi, ntangu nyonso mu vanda zonzaka na munu mosi ti bampasi yina beto ke kutanaka na yawu ke katukaka ve na Yehova. Yandi ke na nsatu ya ngolo ya kukatula bampasi mpe kuvutula na luzingu bantu yina beto ke zolaka. Ya kamwisaka munu na kutala ti kuyindula na bamambu yayi zunisaka makanisi ya munu.”

11. Wa’ faso kuzaba samu na yinki Yehova ke bikaka nzila na bampasi ke na sadisaka beto na kubika ve na kusamuna?

¹¹ Kuzaba matsyeleka na yina me tadila bampasi lenda sadisa beto na kutatamana na kusamuna. Na manima ya kulakisa ti ntima ya yinda ya Yehova ke lusalusu samu na bantu yina ke balulaka ntima, Piere sonikaka: “Beno kanisa na mutindu ya bantu yina beno me fwana kuvanda, bantu yina ke vandaka na bisalu ya kuvedila mpe bisalu yina ke lakisaka ndyatulu ya kukangama na Nzambi.” (2 Pi. 3:11) Na kati ya “bisalu yina ke lakisaka ndyatulu ya kukangama na Nzambi” ya ke mpe na kisalu ya kusamuna. Beto ke zolaka bantu mutindu Tata ya beto Yehova. Beto ke na nsatu ba zinga na yinza ya malu-malu. Samu ti Yehova ke na ntima ya yinda, yandi ke na pesaka bweso na bantu yina ke vandaka kisika yina nge kele na kusadila yandi. Nge ke na bweso ya kitoko ya kusala kintwadi na Yehova, samu na kusadisa bantu mingi na kuzaba yandi tekila nsuka kuma!—1 Kor. 3:9.

BETO KE NA ZINGAKA “BILUMBU YA NSUKA”

12. Wapi bambote beto me kuzwa na kulongoka ti beto ke na zingaka “bilumbu ya nsuka”?

¹² Biblia zonzilaka mbote-mbote mutindu bantu ke zinga na “bilumbu ya nsuka.” (2 Tim. 3:1-5) Beto ke na talaka pwelele ti bamambu yina Biblia zonzaka ke na lunganaka. Kutala mutindu ndyatulu ya bantu ke na bebaka ke na nataka beto na kundima ti mambu ya Nzambi ke matsyeleka.—2 Tim. 3:13-15.

13. Wapi mutindu kifwani yina Yesu sadilaka na Luke 12:15-21 lenda sadisa beto?

¹³ Kuzaba ti beto ke na zingaka bantangu ya nsuka ke sadisaka beto na kusadila ntangu ya beto na faso ya mbote. Kifwani yina Yesu sadilaka na Luke 12:15-21 lenda sadisa beto. (Tanga.) Samu na yinki mvwama yayi vandaka “kizoba”? Ya ke ve samu yandi vandaka mvwama, kasi yandi zabaka ve yina vandaka mfunu. Yandi vanda bumbaka “bimvwama samu na yandi mosi, kasi [yandi vandaka] ve mvwama na meso ya Nzambi.” Samu na yinki ya vandaka mambu? Nzambi zonzaka na muntu yango: “Na mpimpa yayi kaka nge ke kufwa.” Beto na kumaka pene-pene na nsuka ya yinza yayi, na yawu beto lenda kanisa na byuvu yayi: ‘Bamambu yina me kanisa kulungisa ke na lakisaka kwandi ti mu ke na sadila ntangu ya munu na faso ya mbote? Wapi mutindu ya bamambu mu ke na sosaka ti bana ya munu lungisa na mantwala? Mu ke sadilaka ngolo, ntangu mpe mbongo ya munu samu na kubumba bimwvama samu na munu mosi to samu na kusosa bimvwama ya mazulu?’

14. Samu na yinki kifwani ya Miki ke na lakisaka beto ti ya ke mfunu na kubambuka ti beto ke na zingaka bilumbu ya nsuka?

¹⁴ Kuzaba mbote-mbote ti beto ke na zingaka bilumbu ya nsuka, lenda sadisa beto na kuzaba wapi mikanu yina beto lenda baka. Ni yawu kuminaka mpangi mosi na nkumbu ya Miki. Yandi me zonza: “Ntangu mu manisaka lycée, mu vanda sosa kisalu yina ke sadisa munu na kulongoka bibulu. Mu vandaka na nsatu ya kukuma mupasuli-nzila mpe kukwenda kisika yina ba ke na nsatu ya basamuni. Bampangi ya kuyela na kimpeve sadisaka munu na kukanisa mbote-mbote, kana mu ke lenda kulungisa dikanisi ya munu na yina me tadila kisalu mpe kukuma mupasuli-nzila. Ba bambulaka munu ti nsuka ya yinza ke dyaka ve ntama. Ba bambulaka mpe munu ti mu ke longoka bibulu na yinza ya malu-malu samu na ntangu nyonso. Mu sosaka kisalu yina ke lomba ve ti mu sala lekole ya yinda. Kasi, mu bakaka mukanu ya kukuma mupasuli-nzila mpe kukwenda kisika yina ba vandaka na nsatu ya basamuni na Équateur.” Bubu yayi, Miki na bakala ya yandi ke na kisalu ya circonscription na bwala yango.

15. Wa’ faso kifwani ya Zaki lenda sadisa beto na kubika ve na kusamuna bantu yina ke na zolaka ve kuwa beto? (Tala mpe bizizi.)

¹⁵ Beto me bonga ve kuvanda ya kulemba ntangu bantu ke mangaka kuwa nsangu ya mbote. Bantu lenda soba. Beto tala kifwani ya Zaki leki ya Yesu. Yandi talaka mutindu Yesu vanda kula, kumaka Masiya mpe vanda longa kulutila bantu ya nkaka. Kasi, na kati ya bamvula yandi kumaka ve kilandi ya Yesu. Kaka na manima ya kuvumbuka ya Yesu na lufwa, yandi kumaka kilandi ya Yesu mpe kumaka na tiya mingi.b (Yoa. 7:5; Gal. 2:9) Ya ke mfunu na kubika ve kusamuna bantu ya dikanda ya beto ata ti ba ke na ndimaka ve nsangu ya mbote mpe kubika ve na kusamuna bantu yina ke mangaka kuwa beto tekila Kimfumu ya Nzambi kwiza. Beto zimbana ve ti beto ke na zingaka bilumbu ya nsuka. Na yawu, kisalu ya beto ya kusamuna ke mfunu mingi. Bamambu yina nge na zonzaka na bawu bubu yayi lenda sala ti ntangu mpasi ya nene ke banda,c ba bambuka na yawu.

VUTULA MATONDO NA YINA YEHOVA KE BAMBULAKA BETO

16. Wa’ faso nge lenda kuzwa bambote na bamambu yina Yehova ke bambulaka nge? (Tala mpe encadré “Sadila yawu samu na kusadisa bampangi.”)

¹⁶ Madya ya nkaka ya kimpeve yina beto ke kuzwaka ke samu na bantu yina me kuwa ntete ve malongi ya ntete ya Biblia. Na kifwani, badiskure yina ba ke salaka na lumingu, mikanda na bavideo ya nkaka yina ke na jw.org, Yinzo ya Kengidi samu na bantu nyonso mpe Réveillez-vous! ke samu na ba yina ke ve Bambangi ya Yehova. Ata faso yina, beto mpe ke bendaka bambote na yawu. Luzolo ya beto ya ngolo samu na Yehova, mpe kiminu ya beto ya ngolo samu na mambu ya yandi ke sadisaka beto na kulonga Biblia na bantu ya nkaka.—Nku. 19:7.

17. Na wapi ntangu nge lenda kanisa na malongi ya ntete ya Biblia?

¹⁷ Samu na beto yina ke na sadilaka Yehova na kati ya bamvula mingi, beto ke sepelaka ntangu ba ke bongisaka faso ya beto ya bakulaka malongi mosi ya Biblia. Kasi beto ke vutulaka mpe Yehova matondo samu na malongi ya ntete yina beto longokaka mpe yina sadisaka beto na kuvanda pene-pene ya yandi. Mutindu beto me tala yawu, malongi ya ntete ya Biblia lenda sadisa beto bubu yayi. Ntangu beto ke kuzwaka malongi na nzila ya kimvuka ya Yehova, beto lenda tala ti faso ya beto ya kukanisa to ya kusala me lutila mbote. Kasi, kuvanda ya kukuluka ke bambula beto ti ni Yehova muntu yina ke na ndwenga mpe yina yidikaka bima nyonso ke na twadisaka kimvuka ya yandi. Ntangu beto to muntu yina beto ke zolaka ke na lutisaka bantangu ya mpasi, beto me bonga kuvanda na ntima ya yinda mpe kuyindula samu na yinki Yehova ke na bikaka nzila na bampasi. Mpe ntangu beto ke bakaka mukanu na yina me tadila faso ya kusadila ntangu mpe mbongo ya beto, beto zimbana ve ti beto ke na zingaka bilumbu ya nsuka. Malongi yina Yehova ke bambulaka beto ke pesaka beto ndwenga mpe ke sadisaka beto na kubika ve kusadila yandi na kukwikama nyonso.