Nge me “longoka kinsweki” ya kusepela na yina nge ke na yawu?

1. Yinki zola zonza kusepela na yina beto ke na yawu, mpe yinki ya zola zonza ve?

NGE ke sepelaka kwandi na yina nge ke na yawu? Muntu yina ke sepelaka na yina yandi ke na yawu, ke vandaka na kilengi mpe kizunu samu ti yandi ke tulaka makanisi ya yandi nyonso na bima ya kitoko yina Yehova ke pesaka yandi. Yandi ke vandaka ve ndudi to na nkele samu na bima yina yandi ke ve na yawu. Kasi kusepela na yina beto ke na yawu, zola zonza ve ti beto ke kanisaka ve na luzingu ya beto. Na kifwani, ya ke ve yimbi na kusosa kusala dyaka mingi samu na Yehova. (Rom. 12:1; 1 Tim. 3:1) Kasi kana beto ke sepelaka na yina beto ke na yawu, beto ke bumba kaka kilengi ya beto.

2. Samu na yinki ya ke yimbi mingi na kusepela ve na yina beto ke na yawu?

² Kana beto ke sepelaka ve na yina beto ke na yawu, ya lenda nata beto na kubaka mikanu ya yimbi. Na kifwani, bantu yina ke sepelaka ve na yina ba ke na yawu, ke lutisaka ntangu mingi na kusosa bima yina na kutala ba ke ve na nsatu ya yawu. Mambu ya kyadi ke ti ya ke na mwa bakristo yina labaka mbongo to bima ya nkaka yina ba vanda sosa kuzwa. Ntangu ya nkaka, na bantima ya bawu ba vanda zonza: ‘Mu me lunga kuzwa yawu,’ ‘mu me vingila mingi,’ to ‘mu ke vutula mbongo yina mu me baka ntangu mu ke kuzwa yawu.’ Nyonso yayi ke bafaso ya kuyiba. Ya ke sepelisaka ve mpe ke kumisaka ve Yehova. (Bin. 30:9) Ba ya nkaka me lemba samu ba vandaka kuzwa ve mikumba yina ba vanda sosa na kisalu ya Yehova, mpe ya me sala ti ba bika kusadila yandi. (Gal. 6:9) Samu na yinki kisadi ya Yehova lenda kanisa na kusala bamambu ya mutindu yayi? Ya ke samu ti yandi me bika kusepela na yina yandi ke na yawu.

3. Yinki Bafilipi 4:11, 12 ke na longaka beto?

³ Beto nyonso lenda kulisa kifu ya kusepela na yina beto ke na yawu. Ntumwa Polo zonzaka ti yandi “longokaka kusepela na yina [yandi] ke na yawu na mambu nyonso.” (Tanga Bafilipi 4:11, 12.) Yandi zonzaka mambu yayi ntangu yandi vandaka na boloko. Ata mpila yina, yandi bumbaka kaka kilengi ya yandi. Yandi “longokaka kusepela” na yina yandi vandaka na yawu. Mambu yina Polo zonzaka mpe bamambu yina yandi kutanaka na yawu, ke lakisaka ti beto mpe lenda kukulisa kifu ya kusepela na yina beto ke na yawu. Ya tsyeleka, ya ke vandaka ve pete. Kasi beto me fwana kulongoka kifu yayi. Wa’ faso? Beto tala bamambu yina ke sadisa beto na kulongoka kifu yayi.

VUTULA MATONDO

4. Wa’ faso kuvanda na kifu ya kuvutulaka matondo ke sadisa beto na kusepela na yina beto ke na yawu? (1 Batesalonika 5:18)

⁴ Muntu yina ke vutulaka matondo ke sepeleka na yina yandi ke na yawu. (Tanga 1 Batesalonika 5:18.) Na kifwani, kana beto ke na bima yina beto na yawu nsatu mpe beto ke vutulaka Yehova matondo samu na yawu, ya ke sadisa beto na kukanisa ve mingi na yina beto ke ve na yawu. Kana beto vutula Yehova matondo na mutindu beto ke na sadilaka yandi bubu yayi, beto ke kanisa ve mingi na biyeko yina beto ke ve na yawu. Yehova zaba ti ya ke mfunu na beto na kuvutulaka matondo. Ni na yawu, na Biblia yandi ke zonzaka na beto na kuvutula yandi matondo na lusambu. Kuvanda na kifu ya kuvutulaka matondo ke sadisaka beto na kuvanda na “kizunu ya Nzambi yina me lutila nyonso yina beto lenda bakula.”—Filp. 4:6, 7.

5. Yinki zola nata bana ya Izraele na kuvutulaka matondo? (Tala mpe kizizi.)

⁵ Beto tala mambu yina kuminaka na bana ya Izraele. Bambala mingi ba vanda yawula na Yehova, samu ba vandaka na nsatu ya kudya bima yina ba vandaka na yawu na Ezipte. (Lut. 11:4-6) Ya tsyeleka, luzingu ya bawu na ntoto ya kuyuma vandaka ve pete. Yinki zola sadisa bawu na kusepela na bima yina ba vandaka na yawu? Ni kukanisa mpe kuvutula matondo na yina nyonso Yehova salaka samu na bawu. Ba zola bambuka na ntangu ba vandaka ntete bangaamba na Ezipte, mpe mutindu Yehova salaka ti bamambu 10 ya mpasi bula bwala ya Ezipte. Ntangu bana ya Izraele basikaka, ba “bakaka bimvwama nyonso ya bantu ya [Ezipte],” arza, wolo mpe bilele. (Bas. 12:35, 36) Na ntangu ba kangamaka na mantwala ya nzadi ya mungwa, Yehova pasulaka maza na kati-kati samu ba luta. Mpe na ntangu ba vandaka na ntoto ya kuyuma, bilumbu nyonso Yehova pesaka bawu mana samu ba kudya. Kasi, samu na yinki bana ya Izraele vanda yawula samu na mambu ya madya? Ya ke ve samu ba vandaka ve na madya, kasi ya ke samu ti ba vandaka ve na kifu ya kuvutulaka matondo na yina ba vandaka na yawu.

6. Yinki beto lenda sala samu na kukulisa kifu ya kuvutulaka matondo?

⁶ Yinki beto lenda sala samu na kukulisa kifu ya kuvutulaka matondo? Ya ntete, baka ntangu ya kukanisa bilumbu nyonso na yina nge ke na yawu. Nge lenda sonika bamambu zole to tatu yina nge ke na vutulaka matondo samu na yawu. (Bid. 3:22, 23) Ya zole, vutula matondo. Vanda muntu ya ntete na kuvutulaka bampangi matondo na yina ba ke salaka samu na nge. Ya kulutila, vutula Yehova matondo ntangu nyonso. (Nku. 75:1) Ya tatu, soola bandiku yina ke na kifu ya kuvutulaka matondo. Kana beto ke na bandiku yina ke vutulaka ve matondo, ke yawulaka, beto lenda kuma mutindu bawu. Kasi, kana bandiku ya beto ke na kifu ya kuvutulaka matondo, ya ke sadisa beto mpe na kuvanda na kifu ya kuvutulaka matondo. (Det. 1:26-28; 2 Tim. 3:1, 2, 5) Kana beto vanda na kifu ya kuvutulaka matondo, ya ke sadisa beto na kuvanda ve na manyongi na bampasi yina beto ke na kutanaka na yawu, to na bima yina beto ke na sosaka kuzwa kasi beto ke ve na yawu.

7. Yinki sadisaka Aci na kukuma na kifu ya kuvutulaka matondo?

⁷ Beto tala mambu yina kuminaka Aci, yina ke vandaka na Indonésie. Yandi me zonza: “Na ntangu ya COVID-19, mu vanda fwanisa mambu mu vanda kutana na yawu na ya bampangi. Ya salaka ti mu sepela dyaka ve na yina mu vandaka na yawu.” (Gal. 6:4) Yinki sadisaka yandi? Yandi me zonza: “Mu bandaka kutala bima yina Yehova vanda pesa munu konso kilumbu mpe kukanisa na bima nyonso ya mbote yina mu vanda kuzwa na dibuundu ya Yehova. Mpe mu vanda vutulaka Yehova matondo. Na yawu, ya sadisaka munu na kusepela na yina mu vandaka na yawu.” Kana nge ke ve na kilengi na yina nge ke na yawu, nge lenda landa kwandi kifwani ya Aci na kuvutulaka matondo?

VANDA YA KUKULUKA

8. Yinki kuminaka Baruke?

⁸ Ni Baruke muntu vanda sonikaka mambu yina mbikudi Yeremi vanda zonza. Baruke vandaka na kisalu ya mpasi. Yandi zola sadisa Yeremi na kuzonza na bana ya Izraele mambu yina zola kumina bawu samu ti ba vanda tumama ve na Yehova mpe ba vanda vutula ve yandi matondo. Mbala mosi, ya kuminaka yandi na kusepela dyaka ve na yina Yehova vanda zola ti yandi sala. Ya ke na talanaka ti, yandi bandaka kukanisa ntangu nyonso na yandi mosi mpe na yina yandi vandaka na nsatu ya kusala. Yehova sadilaka Yeremi samu na kuzonza na yandi: “Nge ke na kusosa kaka ndandu ya nge mosi? Kulomba ata kima ve.” (Yer. 45:3-5) Yandi vanda sosa kuzonza na yandi na kusepela na yina yandi vandaka na yawu. Baruke kuwaka Yehova mpe yandi bikanaka ndiku ya yandi ya ntima.

9. Yinki 1 Bakorinto 4:6, 7, ke na longaka beto? (Tala mpe bizizi.)

⁹ Bantangu ya nkaka ya lenda kumina mukristo na kukanisa ti yandi ke muntu yina me lunga kuzwa kiyeko mosi na kati ya kimvuka. Ya lenda vanda ti yandi ke na mayela, ke salaka mingi, me zaba bamambu mingi, to yandi me sala bamvula mingi na kisalu ya Yehova. Kasi ba lenda pesa kiyeko yina yandi ke na sosaka na bantu ya nkaka. Yinki ke sadisa yandi na kunyonga ve? Yandi lenda kanisa na mambu yina ntumwa Polo sonikaka na 1 Bakorinto 4:6, 7. (Tanga.) Biyeko nyonso yina beto ke kuzwaka mpe mayela nyonso yina beto ke na yawu ke katukaka na Yehova. Yehova me pesa ve beto makabu yayi samu beto me lutila bampangi. Ya ke faso ya Yehova ya kulakisa ti yandi ke zolaka beto mpe yandi ke na ntima ya kulutila mbote.—Rom. 12:3, 6; Efe. 2:8, 9.

10. Yinki lenda sadisa beto na kuvanda ya kukuluka?

¹⁰ Kukanisa mbote-mbote na kifwani yina Yesu bikilaka beto, ke sadisa beto na kukulisa kifu ya kuvanda ya kukuluka. Beto tala mambu yina ntumwa Yoane sonikaka ntangu Yesu sukulaka makulu ya bilandi ya yandi: “Yesu zabaka ti [1] Tata pesaka bima nyonso na maboko ya yandi, [2] ti yandi katukaka na Nzambi [3] mpe ti yandi vanda kwenda na sika ya Nzambi, . . . yandi . . . bandaka kusukula makulu ya bilandi ya yandi.” (Yoa. 13:3-5) Na kutala, Yesu vandaka ya kulunga samu na kuzonza na bilandi ya yandi na kusukula yandi makulu. Kasi Yesu kanisaka ata fioti ve ti samu yandi ke Mwana ya Nzambi, yandi zola vanda na yinzo ya kitoko, mbongo mingi mpe luzingu ya pete. (Luke 9:58) Yesu vandaka ya kukuluka, yandi vanda sepelaka na yina yandi vandaka na yawu. Yandi bikilaka beto kifwani ya kulutila mbote—Yoa. 13:15.

11. Wa’ faso kifu ya kuvanda ya kukuluka sadisaka Dennis na kusepela na yina yandi ke na yawu?

¹¹ Dennis, yina ke vandaka na Hollande, salaka bangolo samu na kulanda kifwani ya Yesu na yina me tadila kuvanda ya kukuluka, kasi ya vandaka ve pete. Yandi me zonza: “Ntangu muntu ya nkaka ke kuzwaka mukumba yina mu vanda sosa, ya ke pesaka munu nkele. Samu mu ke kanisaka ti ni munu ke ya kulunga samu na kuzwa yawu. Na ntangu ya ke kuminaka munu, mu ke longokaka bamambu yina ke zonzilaka kifu ya kuvanda ya kukuluka. Na JW Library^®, ya ke na mwa baverse yina ke zonzilaka kifu ya kukuluka, yina mu soolaka samu ya vanda ve mpasi na munu na kuzwa yawu mpe kutanga dyaka yawu. Mu tulaka mpe na telefone ya munu bavideo yina ke zonzilaka kifu ya kuvanda ya kukuluka mpe mu ke landaka yawu bambala mingi.a Mu kwizaka longoka ti bisalu nyonso beto ke salaka ke samu na kupesa nkembo na Yehova, kasi na beto mosi ve. Yehova ke pesaka mosi na mosi ya beto bweso ya kusala kima, kasi ni yandi mosi ke salaka ti ya lungana.” Kana nge ke dyaka ve na sepelaka na yina nge ke na yawu, sala bamambu yina ke sadisa nge na kukulisa kifu ya kuvanda ya kukuluka. Ya ke kumisa ngolo kindiku ya nge na Yehova mpe ya ke sadisa nge na kusepela na yina nge ke na yawu.—Zaki 4:6, 8.

YINDULA NA BANSILULU YA YEHOVA

12. Wapi bansilulu ke sadisaka beto na kusepela na yina beto ke na yawu? (Izayi 65:21-25)

¹² Kuyindula na bansilulu ya kitoko yina Yehova ke lungisa na mantwala, ke sadisa beto na kusepela na yina beto ke na yawu. Na buku ya Izayi, Yehova ke zonzaka na beto ti yandi zaba ti ya ke na bamambu mingi yina ke talisaka beto mpasi, kasi yandi me pesa mpe nsilulu ti yandi ke katula yawu. (Tanga Izayi 65:21-25.b) Beto ke vanda na bayinzo ya mbote mpe ya kitoko. Beto ke vanda na bisalu ya mbote mpe beto ke kudya madya ya kitoko yina ke pesa beto mavimpi ya mbote. Beto ke vanda dyaka ve na boma ti mambu ya yimbi kumina beto na bana ya beto. (Iza. 32:17,18; Ezek. 34:25) Beto lenda vanda na kundima ti bansilulu nyonso ya kitoko yayi ke lungana.

13. Wapi bamambu beto ke na yawu mpe wa’ faso kutula makanisi ya beto nyonso na Yehova lenda sadisa beto?

¹³ Bubu yayi, ya ke mfunu mingi na beto na kutula makanisi ya beto nyonso na bansilulu ya Yehova. Samu na yinki? Samu ti beto nyonso ke na zingaka na “bilumbu ya nsuka”, mpe ti ya “ke mpasi mingi.” (2 Tim. 3:1) Yehova ke sadisaka beto bilumbu nyonso. Yandi ke pesaka beto malongi, ngolo mpe lusalusu yina beto ke na yawu nsatu samu beto lenda kukanga ntima. (Nku. 145:14) Dyaka, kivuvu yina beto ke na yawu lenda sadisa beto na kati ya bantangu ya mpasi. Ntangu ya nkaka, nge ke salaka ngolo samu dikanda ya nge kuzwa kima ya kudya, bilele ya kulwata, mpe kisika ya kuvanda. Ya zola zonza kwandi ti nge ke vanda kaka povre? Ata fioti ve! Yehova me pesa nsilulu ti yandi ke pesa nge yina nge ke na yawu nsatu mpe ya kulutila, yandi ke sala yawu na Paradiso. (Nku. 9:18; 72:12-14) Ntangu ya nkaka nge ke na nwanaka na maladi yina ke manisaka ve, manyongi ya kulutila to kimbevo ya ngolo yina ke na kwamisaka luzingu ya nge. Ya zola zonza kwandi ti ya ke ve na kivuvu samu na nge? Ata fioti ve. Na yinza ya malu-malu, maladi mpe lufwa ke vanda dyaka ve. (Luz. 21:3, 4) Kivuvu yayi ke sadisaka beto na kuvanda ve na manyongi ya kulutila to na nkele samu na bamambu yina beto ke na kutanaka na yawu bubu yayi. Beto lenda vanda na kilengi mpe kizunu ata ba ke na bakilaka beto na faso ya yimbi, beto me fwidila muntu to ata bamambu ya mpasi yina beto ke na kutanaka na yawu. Samu na yinki? Samu ti, ata ti beto ke na kutanaka na bamambu ya mpasi, beto zaba ti “bankwamusu ke kaka samu na ntangu fioti” mpe na yinza ya malu-malu, bamambu nyonso ya mpasi ke manisa.—2 Kor. 4:17, 18.

14. Wa’ faso beto lenda kumisa ngolo kivuvu ya beto?

¹⁴ Samu ti kivuvu ya beto ke sadisaka beto na kusepela na yina beto ke na yawu, yinki beto lenda sala samu na kukumisa yawu ngolo? Samu muntu tala mbote-mbote kima yina ke ntama, yandi ke na nsatu ya ba lunettes. Beto lenda vanda na nsatu ya kusala mwa bamambu yina ke sadisa beto na kutala mbote-mbote Paradiso yina ke na kwizaka. Kana beto ke na kutanaka na bamambu ya mbongo, beto lenda kanisa na mutindu luzingu ya beto ke vanda ntangu mbongo, bamfuka, to bupovrete ke vanda dyaka ve. Kana beto me lemba samu ti beto ke ve na kiyeko yina beto ke na sosaka kuzwa, beto lenda kanisa na mutindu luzingu ke vanda kitoko ntangu beto ke kuma bantu ya kulunga. Ya ke sadisa beto na kutala ti biyeko yina beto ke na sosaka bubu yayi, ke vanda ve mfunu na Paradiso. (1 Tim. 6:19) Ntembe ve, samu ti beto ke nyongaka na bamambu mingi bubu yayi, ya lenda vanda mpasi na beto na kukanisa na bansilulu yina ke lungana na mantwala. Kana beto vanda na kifu ya kukanisaka na bansilulu yina Yehova me pesa beto, ya ke vanda ve mpasi na beto na kutula makanisi ya beto na yawu, kasi ve na bamambu yina ke na kwamisaka beto.

15. Yinki mambu yina Christa me zonza ke na longaka nge?

¹⁵ Beto tala mutindu kivuvu sadisaka Christa, kento ya Dennis, yina beto zonzilaka. Yandi me zonza: “Mu ke na maladi mosi yina ke salaka ti nzutu ya munu vanda ya kulemba, mu lenda tambula ve, mu ke sadilaka velo ya bikata, mpe mu ke lutisaka ntangu mingi ya kulala. Bilumbu nyonso nzutu ke salaka munu mpasi. Ntama mingi ve dokotolo ya munu zonzaka ti bilumbu yina ke kwiza, mavimpi ya munu ke bonga ve. Na mbala mosi, mu kwizaka tala ti beto zole ke na tadilaka ve bilumbu yina ke kwiza faso mosi. Mu tulaka makanisi ya munu nyonso na kivuvu yina mu ke na yawu, ya sadisaka munu na kuvanda na kizunu na makanisi. Bubu yayi mu me fwana kukanga ntima na kuzinga na yinza yayi, kasi na yinza ya malu-malu mu ke vanda na luzingu ya kitoko mingi!”

‘BA YINA KE SOSAKA YEHOVA KE KONDWA ATA KIMA MOSI VE’

16. Samu na yinki mfumu Davidi sonikaka ti ba yina ke sosaka Yehova ke “kondwa ata kima mosi ve”?

¹⁶ Ata ntangu beto ke sepelaka na yina beto ke na yawu, beto lenda kutana na bamambu ya yimbi. Kanisa na mfumu Davidi. Ya lenda vanda ti yandi fwidilaka bana tatu. Ba vuninaka yandi bamambu, ba tekaka yandi, mpe na kati ya bamvula, yandi vanda kwenda kima samu na kubumba luzingu ya yandi. Kasi na ntangu yandi vanda kutana mambu ya kulutila mpasi, yandi zonzaka na Yehova: ‘Ba yina ke sosaka Yehova ke kondwa ata kima mosi ve.’ (Nku. 34:9, 10) Samu na yinki yandi zonzaka yawu? Samu ti, ata ti Yehova ke bikaka bamambu ya yimbi kumina beto, beto ke na kundima ti yandi ke pesa beto nyonso yina beto ke na yawu nsatu. Davidi zabaka yawu. (Nku. 145:16) Na yawu, beto lenda tula ntima na Yehova, yandi ke sadisa beto na kati ya bamambu nyonso ya mpasi yina beto ke na kutanaka na yawu. Beto lenda sepela na yina beto ke na yawu.

17. Samu na yinki nge ke na nsatu ya kusepela na yina nge ke na yawu?

¹⁷ Yehova zola ti beto sepela na yina beto ke na yawu. (Nku. 131:1, 2) Na yawu, sala nyonso yina nge lenda sala samu na kusepela na yina nge ke na yawu. Kana nge sala ngolo ya kukulisa kifu ya kuvutulaka matondo, ya kuvanda ya kukuluka, mpe kukumisa ngolo kivuvu ya nge, nge ke zonza: “Ee, mu ke vandaka na kyese.”—Nku. 16:5, 6, NWT.