Vanda na kundima ti Yehova ke zolaka nge

1. Samu na yinki nge pesaka luzingu ya nge na Yehova? (Tala mpe kizizi.)

NGE na zabaka dyaka, ntangu nge pesaka luzingu ya nge na Yehova? Nge bakaka mukanu yayi samu nge me zaba yandi mbote-mbote mpe nge ke zolaka yandi. Nge salaka yandi nsilulu ti nge ke tula yandi na kisika ya ntete ya luzingu ya nge, nge ke bika ve na kuzola yandi na ntima ya nge nyonso, na mwela ya nge nyonso, na makanisi ya nge nyonso mpe na ngolo ya nge nyonso. (Mrk. 12:30) Kubanda ntangu yina, luzolo ya nge samu na Yehova vanda bika ve kukula mpe kukuma kaka ngolo. Wapi mvutu nge ke pesa kana muntu yufula nge, “Nge ke zolaka kwandi Yehova?” Na ata ntembe, nge ke zonza na yandi ti, “Ya ke ve na muntu to kima yina mu ke zolaka kulutila Yehova!”

2-3. Yinki Yehova zola beto vanda na kundima mpe yinki beto ke tala na disolo yayi? (Yeremi 31:3)

² Kasi, wapi mvutu nge ke pesa kana muntu yufula nge: “Nge ke kwandi na kundima ti Yehova ke zolaka nge?” Ata nge zaba ti Yehova ke zolaka nge mingi, nge lenda vanda na bantembe ti Yehova ke zolaka nge. Nge lenda kanisa ti nge ke ve ya kulunga samu Yehova zola nge. Mpangi mosi ya kento yina bibuti ya yandi nyokolaka yandi me zonza: “Mu zaba ti Yehova ke zolaka munu. Kasi, bambala mingi mu ke vandaka na bantembe ti yandi ke zolaka munu.” Yinki lenda sadisa nge na kuzaba ti ya tsyeleka Yehova ke zolaka nge?

³ Yehova ke na nsatu nge vanda na kundima ti yandi ke zolaka nge. Yeremi 31:3 ke zonzaka: “Yandi vwandaka tuba: ‘[Yehova] me katuka ntama mpe yandi me kwiza talana na munu: ’ ‘Mu zola nge na luzolo ya seko. Ni yawu yina mu ke kaka ya kukwikama na nge.’” Kuzimbana ve ti ni Yehova yandi mosi bendaka nge na kisika yandi. Mpe ntangu nge pesaka luzingu ya nge na yandi mpe kuzwaka mbotokolo, yandi pesaka nge dikabu mosi ya kitoko, luzolo ya yandi ya kukwikama. Ya zola zonza ti yandi ke zolaka nge mingi mpe yandi lenda bika nge ata fioti. Yehova ke na luzolo ya kukwikama samu na bisadi ya yandi, yandi ke talaka bawu nyonso mutindu “mvwilu” ya yandi. Na yawu, nge lenda vanda na kundima ti nge mpe ke ntalu mingi na meso ya yandi. (Mal. 3:17) Ntumwa Polo sonikaka na Baroma 8:38, 39: “Samu mu ke na kundima ti ya vanda lufwa to luzingu, to bambazi, to baluyalu, to bima ya ntangu yayi, to bima yina ke kwiza, to lutumu, to bima yina ke na zulu, to bima yina ke na yisi, to konso kima ya nkaka yina Nzambi yidikaka, ata kima mosi ve ke lenda kukabula beto na luzolo ya Nzambi.” Yehova zola ti nge vanda na kundima yina Polo vandaka na yawu. Na disolo yayi, beto ke tala samu na yinki beto ke na nsatu ya kuvanda na kundima ti Yehova ke zolaka beto mpe yinki beto lenda sala samu na kukumisa ngolo kundima ya beto ti yandi ke zolaka beto.

BETO VANDA NA KUNDIMA TI YEHOVA KE ZOLAKA BETO

4. Wapi luvunu Satana zola ti beto kwikila na yawu mpe wa’ faso beto lenda losa yawu?

⁴ Kuvanda na kundima ti Yehova ke zolaka beto, ke sala ti beto kubwa ve “na mayela ya yimbi” ya Satana. (Efe. 6:11) Satana ke na salaka nyonso yina yandi lenda sala samu na kukanga beto nzila na kusadila Yehova. Beto zimbana ata fioti ve ti Satana ke na mayela ya yimbi. Mosi ya mayela ya yimbi yina Satana ke sadilaka kele, kumwangisa luvunu ti Yehova ke zolaka ve beto. Bambala mingi, yandi ke sosaka kusala beto yimbi ntangu beto ke vandaka ya kulemba. Ya lenda vanda ti beto ke na nyongaka samu na bamambu yina beto salaka na ntama, bamambu ya mpasi yina beto ke na kutanaka na yawu bubu yayi, to samu beto zaba ve yinki mbasi ke na bumbilaka beto. (Bin. 24:10) Satana ke mutindu nkosi yina ke na sosaka kibulu yina ke ve na ngolo ya kunwana. Yandi ke nwanisaka beto na bisika yina beto ke ya kulemba samu na kunata beto na kubika kusadila Yehova. Kana beto tatamana na kukumisa ngolo kundima ya beto ti Yehova ke zolaka beto, beto ke vanda ya kubongama na ‘kutelemina Dyabulu’ mpe mayela ya yandi ya yimbi.—1 Pi. 5:8, 9; Zaki 4:7.

5. Samu na yinki ya ke mfunu na nge na kutala ti Yehova ke zolaka nge mingi?

⁵ Kuvanda na kundima ti Yehova ke zolaka beto lenda sala ti beto vanda pene-pene na yandi. Samu na yinki beto ke na zonzaka yawu? Samu yandi yidikaka beto na nsatu ya kuzola bampangi mpe kusosa ti bampangi zola beto. Ntangu muntu ke lakisaka beto luzolo, ya ke nataka beto mpe na kulakisa yandi luzolo. Mutindu mosi mpe, kutala luzolo yina Yehova ke na yawu samu na beto ke nata beto na kuzola yandi ya kulutila. (1 Yoa. 4:19) Kana luzolo ya beto samu na Yehova kuma ngolo, luzolo yina Yehova ke na yawu samu na beto ke kuma mpe ngolo. Ni na yawu, Biblia ke zonzaka na beto: “Beno kwenda pene-pene na Nzambi mpe yandi ke kwiza pene-pene na beno.” (Zaki 4:8) Wa’ faso beto lenda kumisa ngolo kundima ya beto ti Yehova ke zolaka beto?

YINKI LENDA SADISA BETO NA KUNDIMA TI YEHOVA KE ZOLAKA BETO

6. Kana nge ke ve na kundima ti Yehova ke zolaka nge yinki nge lenda sala?

⁶ Tatamana na kusambila Yehova samu yandi sadisa nge na kubakula samu na yinki yandi ke zolaka nge. (Luke 18:1; Rom. 12:12) Nge lenda sambila yandi bilumbu nyonso samu yandi sadisa nge na kuzaba ti yandi ke zolaka nge mingi. Bantangu ya nkaka, nge lenda vanda na dikanisi ya yimbi na yina me tadila nge mosi, mpe kusala ti ya vanda mpasi na nge na kundima ti Yehova ke zolaka nge. Kasi, kuzimbana ve ti Yehova ke nene kulutila ntima ya nge. (1 Yoa. 3:19, 20) Yandi zaba nge mbote-mbote kulutila nge mosi mpe yandi ke na makoki ya kutala yina nge ke ve na makoki ya kutala. (1 Sa. 16:7; 2 Ns. 6:30) Na yawu, “zabisa yandi mambu yina kele na kati ya [ntima]” ya nge mpe lomba yandi sadisa nge na kuvanda na kundima ti yandi ke zolaka nge. (Nku. 62:8) Na manima ya kusambila yandi, ya ke mfunu na kusala bamambu yayi ke landa.

7-8. Wa’ faso Bankunga ke na nataka beto na kuvanda na kundima ti Yehova ke zolaka beto?

⁷ Ndima mambu yina Biblia ke zonzaka. Nge lenda kwikila na bamambu yina ba yina sonikaka Biblia zonzaka na yina me tadila Yehova, samu ti ni yandi nataka bawu na kusonika yawu. Na mosi ya Bankunga, Davidi zonzilaka banzonzolo mosi ya kitoko samu na kulakisa mutindu Yehova ke kipe beto. Yandi zonzaka: “[Yehova] kele pene-pene ya bayina ke na manyongo na ntima. Yandi ke vuukisa bantu yina mpeve kele ya kulemba.” (Nku. 34:18) Ntangu nge ke vandaka na manyongo na ntima, nge lenda kanisa ti nge ke kaka nge mosi. Kasi, Yehova zola nge vanda na kundima ti yandi ke pene-pene ya nge samu yandi zaba ti nge ke na nsatu ya yandi. Na Nkunga ya nkaka Davidi sonikaka: “Tula mansangasa ya munu na kati ya mayuki ya nge.” (Nku. 56:8) Yehova ke talaka ntangu beto ke vandaka na mawa mpe mpasi. Na yawu, yandi ke vandaka na kyadi mpe ke zolaka ve kutala nge na kati ya mpasi. Ya ke mutindu, yandi ke na bakaka masangasa ya nge samu na kubumba yawu, kaka mutindu ba ke bumbaka maza yina ke mfunu na kati ya bouteille samu na nzyetolo. Na Nkunga 139:3, beto ke tangaka: “Nge zaba banzila ya munu nyonso.” Yehova ke talaka nyonso yina nge ke salaka, kasi yandi ke tulaka makanisi ya yandi kaka na bamambu ya mbote yina nge ke salaka. (Ebr. 6:10) Samu na yinki? Samu yandi ke zolaka bangolo nyonso yina nge ke salaka samu na kusepelisa yandi.a

⁸ Na nzila ya baverse ya mutindu yayi, Yehova ke na sosaka kuzonza na nge: “Mu zola nge zaba ti mu ke zolaka nge mingi mpe nge ke mfunu samu na munu.” Kaka mutindu beto me tala yawu, Satana ke na sosaka kunata beto na kukanisa ti Yehova ke zolaka ve beto. Na yawu, kana nge ke na bantembe ti Yehova ke zolaka nge, baka mwa ntangu mpe yufula: ‘Na nani mu ke kwikila: Na “tata ya luvunu” to na “Nzambi ya tsyeleka”?’—Yoa. 8:44; Nku. 31:5.

9. Wapi nsilulu Yehova pesaka na ba yina nyonso ke zolaka yandi? (Kubasika 20:5, 6)

⁹ Kanisa na yina ya ke salaka Yehova na ntima samu na ba yina ke zolaka yandi. Beto tala mambu yina Yehova zonzaka na Moyize mpe na dikanda ya Izraele. (Tanga Kubasika 20:5, 6.) Yehova pesaka yandi nsilulu ti yandi ke bika ve na kulakisa luzolo ya yandi ya kukwikama na ba yina ke zolaka yandi. Bamambu yayi ke na ndimisaka beto ti Nzambi ya beto ya kukwikama ke bika ata fioti ve kulakisa luzolo ya yandi na ba yina ke zolaka yandi. (Neh. 1:5) Na yawu, kana nge ke na bantembe ti Yehova ke zolaka nge baka mwa ntangu mpe yufula, ‘Mu ke zolaka kwandi Yehova?’ Kuzimbana ve mambu yayi: Kana nge ke zolaka yandi mpe nge ke salaka nyonso yina nge lenda sala samu na kusepelisa yandi, nge lenda vanda na kundima ti yandi ke zolaka nge ya kulutila. (Dan. 9:4; 1 Kor. 8:3) Kana, nge zaba ti nge ke zolaka Yehova, samu na yinki nge ke na ntembe ti yandi ke zolaka nge? Nge lenda vanda ntangu nyonso na kundima ti yandi ke zolaka kaka nge mpe ke bika nge ata fioti.

10-11. Wa’ faso Yehova zola ti nge tadila ntalu ya kufuta? (Bagalate 2:20)

¹⁰ Yindula na ntalu ya kufuta. Luzingu ya Yesu ke dikabu ya kulutila nene yina Yehova pesaka samu na bantu. (Yoa. 3:16) Kasi, nge ke bakilaka kwandi yawu mutindu dikabu yina yandi pesaka samu na nge? Beto zonzila kifwani ya Polo. Tekila yandi kuma mukristo, yandi salaka bamambu mingi ya yimbi mpe vanda nwana na nzutu ya yandi ya masumu. (Rom. 7:24, 25; 1 Tim. 1:12-14) Kasi, yandi vanda bakilaka ntalu ya kufuta mutindu dikabu yina Yehova pesaka samu na yandi. (Tanga Bagalate 2:20.) Ni Yehova nataka ntumwa Polo na kusonika bamambu yina ke na Bagalate. Bamambu nyonso yina ke na Biblia ke samu na kulonga beto. (Rom. 15:4) Ya ke na lakisaka mutindu Yehova zola ti nge tadila ntalu ya kufuta, mutindu dikabu yina yandi pesaka samu na nge. Kutadila yawu mutindu yayi ke kumisa ngolo kundima ya nge ti Yehova ke zolaka nge.

¹¹ Beto ke na vutulaka Yehova matondo na yina yandi filisaka Yesu awa na ntoto na kufwa samu na beto. Kasi, yandi kwizaka mpe awa na ntoto samu na kuzonzila matsyeleka na yina me tadila Nzambi. (Yoa. 18:37) Yandi longaka mpe beto mutindu Yehova ke zolaka bana ya yandi.

YESU SADISAKA BETO NA KUNDIMA TI YEHOVA KE ZOLAKA BETO

12. Samu na yinki beto ke ve na ntembe na bamambu yina Yesu zonzaka na yina me tadila Yehova?

¹² Ntangu Yesu kwizaka awa na ntoto, yandi lakisaka mutindu ya muntu Yehova kele. (Luke 10:22) Beto ke ve na ntembe na bamambu yina Yesu zonzaka na yina me tadila Yehova. Samu na yinki? Samu ti ya ke ve na muntu yina me lutisa bamvula mingi na Yehova na mazulu kulutila Yesu tekila yandi kwiza awa na ntoto. (Kol. 1:15) Yesu zaba ti Tata ya yandi ke zolaka yandi mingi. Yandi me tala mpe mutindu Tata ya yandi me lakisa luzolo ya yandi na bambazi ya kukwikama mpe na bana ya yandi nyonso ya kento na bakala yina kele awa na ntoto. Wapi mutindu Yesu sadisaka bantu ya nkaka na kuvanda na kundima ti Yehova ke zolaka bawu?

13. Wa’ faso Yesu zola ti beto tala Yehova?

¹³ Yesu zola ti beto zaba mutindu Yehova ke tadilaka beto. Na babuku Matayi, Marke, Luke na Yoane, Yesu bokilaka Yehova “Tata” bambala kuluta 160. Yandi vanda sadilaka nzonzolo “Tata ya beno” to “Tata ya beno ya mazulu,” ntangu yandi vanda sololaka na bilandi ya yandi. (Mat. 5:16; 6:26) Tekila Yesu kwiza awa na ntoto, bisadi ya Yehova kukwikama vanda bokila Yehova, ‘Muntu ya kulutila zulu,’ ‘Muntu ya ngolo nyonso,’ ‘Muntu yina yidikaka bima nyonso’ to na bankumbu ya na nkaka. Kasi, Yesu vanda bokilaka Yehova bambala mingi na ‘Tata.’ Nzonzolo yayi ke lakisaka pwelele mutindu Yesu zola beto tadila Yehova: Mutindu Tata ya beto ya luzolo mpe beto ke mfunu samu na yandi. Beto zonzila bambala zole yina yandi sadilaka nzonzolo “Tata.”

14. Wa’ faso Yesu lakisaka ti mosi na mosi ya beto ke mfunu na meso ya Yehova? (Matayi 10:29-31) (Tala mpe kizizi.)

¹⁴ Na kubanda, beto zonzila bamambu yina Yesu zonzaka na Matayi 10:29-31. (Tanga.) Yesu zonzaka ti Tata ya beto zaba mbote-mbote kisika yina mosi na mosi ya bandeke ya fioti yayi kele. Kasi, ndeke ke sambilaka ve Yehova to ke zolaka ve yandi. Kana ndeke ya fioti yayi kele ntalu mingi samu na Yehova, beto lenda vanda na kundima ti yandi ke kipe mosi na mosi ya bisadi ya yandi yina ke zolaka yandi. Yesu zonzaka mpe ti Yehova me zaba lutangu ya bansuki ya yintu ya mosi na mosi ya beto. Kana Yehova me zaba ata bima ya fioti yina beto ke na yawu, beto lenda na kundima ti beto ke mfunu mingi na meso ya yandi. Yesu zola beto vanda na kundima ti mosi na mosi ya beto ke mfunu na meso ya Yehova.

15. Yinki bamambu yina ke na Yoane 6:44 ke na longaka nge na yina me tadila Tata ya nge ya mazulu?

¹⁵ Mbala ya zole yina Yesu sadilaka nzonzolo “Tata,” ke na Yoane 6:44. (Tanga.) Yehova, yandi mosi bendaka nge na matsyeleka. Yinki nataka yandi na kubenda nge? Yandi talaka bifu ya nge ya mbote. (Bis. 13:48) Ntangu Yesu zonzaka bamambu yina ke na Yoane 6:44, ya lenda vanda ti yandi vanda zonzila Yehova mutindu beto ke tangaka yawu na Yeremi 31:3. Kuna, Yehova zonzaka na dikanda ya yandi: “Mu zola nge na luzolo ya seko” (Yer. 31:3; fwanisa yawu na Oze 11:4.) Ya zola zonza ti Tata ya beto ya mazulu ke na bikaka ve kutala bifu yina nge ke na yawu yina ntangu ya nkaka nge mosi ke na talaka ve yawu.

16. a) Yinki Yesu ke na longaka beto, mpe samu na yinki beto me bonga kundima yandi? b) Wa’ faso nge lenda kumisa ngolo kundima ya nge ti Yehova ke Tata yina nge ke na yawu nsatu? (Tala mpe encadré “Tata yina beto nyonso ke na yawu nsatu.”)

¹⁶ Ntangu Yesu vanda bokila Yehova Tata, ya ke mutindu yandi vanda sosa kuzonza na beto: “Yehova ke ve kaka Tata ya munu, kasi mpe Tata ya nge. Mu ke na zonzaka na nge ti yandi ke zolaka nge mpe ke kipeke nge.” Bantangu ya nkaka, nge lenda vanda na bantembe ti Yehova ke kipeke nge. Kasi, kuzimbana ve ti Yesu ke Mwana ya Nzambi mpe ke zonzaka ntangu nyonso matsyeleka. Na yawu, nge me bonga kwandi ve kundima bamambu yina yandi me zonza na yina me tadila Tata ya beto?—1 Pi. 2:22.

TATAMANA NA KUKUMISA NGOLO KUNDIMA YA NGE

17. Samu na yinki beto me fwana kutatamana na kukumisa ngolo kundima ya beto ti Yehova ke zolaka beto?

¹⁷ Beto me bonga kutatamana na kukumisa ngolo kundima ya beto ti Yehova ke zolaka beto. Mutindu beto me tala yawu, mbeni ya beto Satana ke na mayela ya yimbi mpe yandi ke salaka nyonso samu na kukanga beto nzila ya kusadila Yehova. Satana ke bika ve na kusala nyonso yina yandi lenda sala samu na kunata beto na kuvanda na bantembe ti Yehova ke zolaka beto. Kasi, beto me fwana ve kubika Satana nunga!—Yobi 27:5.

18. Wa’ faso nge lenda kumisa ngolo kundima ya nge ti Yehova ke zolaka nge?

¹⁸ Samu na kukumisa ngolo kundima ya nge ti Yehova ke zolaka nge, kubika ve na kulomba yandi na lusambu yandi sadisa nge na kutala nge mosi mutindu yandi ke talaka nge. Yindula na malongi ya Biblia yina ke lakisaka ti Yehova ke zolaka nge. Kanisa na yina ya ke salaka Yehova na ntima samu na ba yina ke zolaka yandi. Kuzimbana ve, Yehova ke bika ve kuzola muntu yina ke zolaka yandi. Yindula na kuzaba samu na yinki ntalu ya kufuta ke dikabu yina Yehova pesaka samu na nge. Vanda na kundima ti Yehova ke Tata ya nge ya mazulu kaka mutindu Yesu zonzaka yawu. Kana muntu yufula nge, “Nge ke kwandi na kundima ti Yehova ke zolaka nge?” Nge ke vanda ve na ntembe ya kuzonza na yandi ti, “Ee, yandi ke zolaka munu! Mpe bilumbu nyonso mu ke sala nyonso yina mu lenda sala samu na kulakisa yandi ti mu ke zolaka yandi!”