Vanda na kundima ti Yehova me lemvokila nge

1-2. Yinki Yehova ke salaka ntangu beto ke balulaka ntima? (Tala mpe kizizi.)

MFUMU Davidi zabaka yinki ya ke salaka ntangu beto ke kanisaka na masumu yina beto salaka na ntama. (Nku. 40:12; 51:3) Yandi salaka masumu ya nene na luzingu ya yandi. Kasi yandi lakisaka ti yandi balulaka ntima mpe Yehova lemvokilaka yandi. (2 Sa. 12:13) Na yawu, yandi vandaka na kilengi ntangu yandi kwiza zaba ti Yehova lemvokilaka yandi.—Nku. 32:1.

² Kaka mutindu Davidi, ya ke salaka beto kilengi ntangu beto me zaba ti Yehova me lakisa beto ntima ya yandi ya kyadi mpe me lemvokila beto. Ata ti beto me sala disumu ya nene, ya ke kindisaka beto na kuzaba ti Yehova ke lemvokila beto, ntangu beto ke nyongaka, ke sambilaka yandi na kuzwa mulemvo, ke zonzilaka yawu na bakuluntu mpe ke salaka nyonso samu na kuvutukila dyaka ve yawu. (Bin. 28:13; Bis. 26:20; 1 Yoa. 1:9) Beto ke vandaka na kilengi mingi ntangu Yehova ke lemvokilaka masumu ya beto. Ntangu yandi ke salaka yawu, ya ke kumaka mutindu mambu yina beto salaka, salamaka ve.—Ezek. 33:16.

3-4. Yinki Jennifer zonzaka na manima ya kuzwa mbotokolo, mpe yinki beto ke tala na disolo yayi?

³ Bantangu ya nkaka ya lenda kumina beto na kuvanda na bantembe ti Yehova me lemvokila beto ya tsyeleka. Beto zonzila kifwani ya Jennifer yina kulaka na kati ya matsyeleka. Ntangu yandi kumaka ntwenya, yandi bandaka kusala bamambu ya yimbi na mansweki. Bamvula mingi na manima, yandi sobaka ndyatulu, pesaka luzingu ya yandi na Yehova mpe kuzwaka mbotokolo. Yandi me zonza: “Na ntama mu vanda salaka mingi kinsuza, mu vanda kunwaka malafu mingi, mu vandaka muntu ya nkele mpe kusosa mbongo vandaka kima ya kulutila mfunu na luzingu ya munu. Na makanisi ya munu, mu zabaka ti na manima ya kulomba mulemvo mpe kubalula ntima, mu kuzwaka mulemvo na nzila ya munkayulu ya Yesu. Kasi na ntima ya munu, mu vandaka kaka na bantembe ti Yehova me lemvokila munu.”

⁴ Nge mpe ya ke vandaka mpasi na nge na kundima ti Yehova me lemvokila nge na masumu yina nge salaka na ntama? Kanisa na mutindu Davidi vanda bakilaka ntima ya kyadi ya Yehova. Yandi vandaka na kundima ti Yehova lemvokilaka yandi samu ti Yehova ke Nzambi ya ntima ya mawa. Yehova zola ti nge mpe, nge vanda na kundima ti yandi lemvokilaka nge. Na disolo yayi, beto ke tala samu na yinki beto ke na nsatu ya kuvanda na kundima ti Yehova ke lemvokilaka mpe yinki lenda sadisa beto na kuvanda na kundima ti yandi ke salaka yawu.

VANDA NA KUNDIMA TI YEHOVA KE LEMVOKILAKA BETO

5. Yinki Satana ke na sosaka beto ndima? Pesa kifwani.

⁵ Kuvanda na kundima ti Yehova ke lemvokilaka beto ke sadisa beto na kubwa ve na mitambu ya Satana. Kuzimbana ve ti Satana ke sala nyonso yina yandi ke na makoki ya kusala samu na kunata beto na kusadila dyaka ve Yehova. Samu na kulungisa dikanisi ya yandi, yandi ke sosaka kunata beto na kuvanda na kundima ti beto lenda kuzwa ve mulemvo ya Yehova. Beto zonzila kifwani ya bakala mosi ya bwala ya Korinto. Ba basisaka yandi na kimvuka samu yandi salaka kinsuza. (1 Kor. 5:1, 5, 13) Mwa ntangu fioti na manima yandi balulaka ntima. Kasi, Satana vanda zola ti bampangi ya yandi ya kimvuka manga kulemvokila yandi mpe kundima ve ti yandi vutuka na kimvuka. Satana vanda sosa mpe ti bakala yayi tala ti yandi lenda kuzwa ve mulemvo, yandi vanda “na kati ya kyadi ya kulutila” mpe yandi kubika kusadila Yehova. Satana me soba ve dikanisi ya yandi to bansalulu ya yandi, kasi “beto zaba mbote-mbote makanisi ya yandi.”—2 Kor. 2:5-11.

6. Yinki lenda sadisa beto na kuvanda dyaka ve na manyongo?

⁶ Kuvanda na kundima ti Yehova ke lemvokila beto, lenda sadisa beto na kuvanda dyaka na kilengi. Ya ke ve yimbi na kuvanda na manyongo ntangu beto ke salaka disumu. (Nku. 51:17) Samu ti ntangu beto ke vandaka na manyongo, ya lenda sadisa beto na kusala bansobolo mpe kusala mambu ya mbote. (2 Kor. 7:10, 11) Kasi na manima ya kubalula ntima, kana beto ke na nyongaka kaka na mambu yango, ya lenda nata beto na kubika kusadila Yehova. Ntangu beto ke ndimaka ti ya tsyeleka Yehova me lemvokila beto ya lenda sala ti beto vanda dyaka ve na manyongo. Dyaka, beto ke lenda kusadila Yehova mutindu yandi zola ti beto sadila yandi, mpe na kilengi nyonso. (Kol. 1:10, 11; 2 Tim. 1:3) Kasi, wa’ faso beto lenda vanda na kundima ti ya tsyeleka Yehova me lemvokila beto?

YINKI LENDA SADISA BETO NA KUVANDA NA KUNDIMA TI YEHOVA KE LEMVOKILAKA?

7-8. Yinki Yehova zonzaka na Moyize na yina me tadila yandi mosi, mpe na yinki beto lenda vanda na kundima? (Kubasika 34:6, 7)

⁷ Kanisa na yina Yehova zonzaka na yina me tadila yandi mosi. Tala bamambu yina yandi zonzaka na Moyize na mongo ya Sinayi.a (Tanga Kubasika 34:6, 7.) Yehova vandaka na bamambu mingi na kuzonzila na Moyize na yina me tadila bifu ya yandi mpe faso ya yandi ya kusala. Kasi, yandi talanaka na Moyize kaka mutindu “Nzambi yina ke talaka kyadi mpe yina ke lemvokilaka.” Nzambi ya mutindu yayi lenda mangaka kwandi kulemvokila muntu yina me balula ntima? Yehova lenda sala ve yawu ata fioti samu ti yandi ke ve na ntima ya ngolo.

⁸ Beto lenda vanda na kundima ntangu Yehova ke zonzaka ti yandi ke na ntima ya kyadi. Ya kele matsyeleka. (Nku. 31:5) Yandi lenda vuna ata fioti ve. Na yawu, beto ndima mambu yina yandi ke zonzaka. Kana ya ke mpasi na nge na kuzimbana masumu yina ke salaka na ntama, nge lenda yufula: ‘Mu ke kwandi ya kundima ti ya tsyeleka Yehova ke na ntima ya kyadi mpe yandi lenda manga kwandi kulemvokila muntu yina me balula ntima? Me bonga kwandi ve kundima ti yandi me lemvokila munu?’

9. Ntangu Nkunga 32:5 ke zonzilaka mulemvo ya masumu yinki ya zola zonza?

⁹ Yindula na mambu yina Yehova ke longaka beto na Biblia na yina me tadila mulemvo ya yandi. Beto tala mambu yina Davidi sonikaka na yina me tadila mulemvo ya Yehova. Nkunga 32:5 ke zonzaka: “Mu me zabisa nge disumu ya munu, mu me bumba ve yimbi ya munu. Mu me tuba: ‘Mu ke ndima kondwa kutumama ya munu na ntadisi ya [Yehova]!’ Mpe nge, nge me lemvokila yimbi ya munu, nge me fuka disumu ya munu.” Davidi zonzaka: “Nge me lemvokila yimbi ya munu, nge me fuka disumu ya munu.” Na ndinga ya Kiebre nzonzolo “kulemvokila” zola zonza “kunanguna,” “kukatula,” to “kunata.” Ntangu Yehova lemvokila Davidi, ya vandaka mutindu yandi katula kilo yina yandi vandaka na yawu mpe nataka yawu ntama na yandi. Davidi vandaka na kilengi ya kuzaba ti Yehova me lemvokila yandi ya tsyeleka. (Nku. 32:2-4) Ya lenda vanda mutindu mosi samu na beto. Ntangu beto ke balulaka ntima samu na masumu yina beto me sala, ya ke vanda ve mbote na kutatamana na kunata kilo ya masumu yina Yehova me katula mpe nata ntama.

10-11. Yinki nzonzolo ke “lemvokilaka” ke na longaka beto na yina me tadila Yehova? (Nkunga 86:5)

¹⁰ Nkunga 86:5 ke zonzaka: “Samu ti nge [Yehova], nge kele mbote nge ke lemvokilaka, kukwikama ya nge kele nene samu na bantu yina ke bokilaka nge.” Awa Davidi ke na zonzilaka Yehova mutindu, muntu yina ke “lemvokilaka.” Ya zola zonza ti Yehova ke dasukaka ve na mbangu ntangu beto ke salaka mambu ya yimbi, mpe ntangu nyonso yandi ke vandaka na nsatu ya kulemvokila ba yina ke balulaka ntima. Samu na yinki Yehova ke mutindu yayi? Verse me bwela: “Kukwikama ya nge kele nene samu na bantu yina ke bokilaka nge.” Kaka mutindu beto me longoka yawu na disolo yina me luta, luzolo ya Yehova ya kukwikama ke nataka yandi na kulakisa luzolo na bisadi ya yandi ya kukwikama mpe ke bikaka ata fioti ve bawu. Na nzila ya luzolo ya yandi ya kukwikama, yandi ke lembaka ve na kulemvokila ba yina ke balulaka ntima. (Iza. 55:7) Kana ya ke mpasi na nge na kundima ti Yehova ke lemvokilaka, nge lenda yufula: ‘Mu ke ndimaka kwandi ti Yehova ke lemvokilaka bantu nyonso yina ke balulaka ntima, mpe yina ke bokilaka yandi na lusambu samu na kulomba yandi na lakisa bawu ntima ya yandi ya kyadi? Me bonga kwandi ve kundima ti yandi lemvokila munu ntangu mu lombaka yandi na kulakisa munu ntima ya yandi ya kyadi?’

¹¹ Kuzaba ti Yehova me zaba beto mbote-mbote lenda pesa beto kilengi. (Nku. 139:1, 2) Ni yawu, beto lenda tanga na Bankunga ya nkaka yina Davidi sonikaka, yina lenda sadisa beto na kundima ti Yehova ke lemvokilaka.

NA YINA ME TADILA BETO, YINKI YEHOVA KE ZIMBANAKA VE?

12-13. Mutindu Nkunga 103:14 ke zonzaka yawu, yinki Yehova ke zimbana ve na yina me tadila beto mpe yinki ya ke nataka yandi na kusala?

¹² Nkunga 103:14 ke zonzaka: “Ya tsyelika yandi zaba mutindu beto yilamaka, yandi me zimbana ve ti beto kele fundu-fundu.” Na yina me tadila Yehova Davidi zonzaka: “Yandi me zimbana ve ti beto kele fundu-fundu.” Davidi sadilaka nzonzolo yayi samu na kulakisa samu na yinki Yehova ke lemvokilaka bisadi ya yandi yina ke balulaka ntima. Yandi lenda zimbana ata fioti ve ti beto ke bantu ya masumu. Samu na kubakula yawu mbote-mbote beto tala yinki Davidi vanda sosa kuzonza.

¹³ Davidi me zonza ti ya tsyeleka Yehova “zaba mutindu beto yilamaka.” Yehova bakaka “fundu-fundu” samu na kuyidika Adami. Na yawu, yandi zaba mutindu beto kele mpe bansatu yina beto ke na yawu. Na kifwani, beto ke na nsatu ya kudya, ya kulala mpe ya kupema. Ata mpe bantu ya kulunga ke na nsatu ya bima yayi. (Kub. 2:7) Kasi, ntangu Adami na Eva sumukaka, kuvanda bantu yina ba yidikaka na fundu-fundu sosaka dyaka kuzonza mambu ya nkaka. Samu ti ni na nzila ya bawu beto kwizaka na luzingu, beto byadilaka disumu yina ke salaka ti beto sala mambu ya yimbi. Yehova me zaba ti beto ke bantu ya masumu, kasi na verse yayi Davidi me zonza ti yandi ke “zimbanaka” ve yawu. Nzonzolo ya Kiebre yina ba me sadila awa, ke sosa mpe kuzonza ti yandi ke bakila beto na ntima ya kyadi nyonso. Na bunkufi bamambu yina Davidi zonzaka, beto lenda zonza yawu mutindu yayi: Yehova me zaba ti bantangu ya nkaka ya ke kuminaka beto na kusala bafoti. Kasi, na ntangu yandi ke talaka ti ya tsyeleka beto me balula ntima, yandi ke lakisaka beto ntima ya kyadi mpe ke lemvokilaka beto.—Nku. 78:38, 39.

14. a) Yinki dyaka Davidi zonzaka na yina me tadila mutindu ya Yehova ya kulemvokila? (Nkunga 103:12) b) Wapi kifwani Davidi sadilaka samu na kulakisa beto ti Yehova ke lemvokilaka beto yimeni? (Tala mpe encadré “Yehova ke lemvokila mpe ke zimbanaka.”)

¹⁴ Yinki dyaka lenda sadisa beto na kuvanda na kundima ti Yehova me lemvokila beto? Nkunga 103:12 ke zonzaka: “Mutindu mosi lweka ya esete kele ntama na lweka ya wesete, mutindu mosi mpe yandi ke na kukatula yimbi ya beto, samu na kunata yawu ntama.” Davidi zonzaka ntangu Yehova ke lemvokila masumu ya beto ya ke kumaka ntama na beto, mutindu “lweka ya esete kele ntama na lweka ya wesete.” Esete ke ntama na wesete, bisika zole yayi lenda kutana ve. Yinki ya ke na sosaka kulonga beto? Buku mosi yina ke zonzilaka verse yayi ke lakisaka ti: “Yehova ke nataka ntama na beto masumu yina beto salaka. Ya ke mutindu kima ke dyaka ve, ata nsunga ya yawu me zimbana.” Na yawu, beto lenda vanda na kundima ti Yehova lenda kanisa dyaka ve na bamambu ya yimbi yina beto salaka. Kanisa mwa fioti, nsunga lenda nata beto na kukanisa na bamambu yina salamaka na ntama. Kasi, ntangu Yehova ke lemvokilaka, ya ke mutindu yandi me katula bamambu nyonso ya yimbi yina beto salaka na ntama mpe nsunga ya yawu.—Ezek. 18:21, 22; Bis. 3:19.

15. Yinki beto lenda sala kana bamambu yina beto salaka na ntama ke kaka na kwamisaka beto?

¹⁵ Wapi mutindu bamambu yina Davidi zonzaka na Nkunga 103 lenda sadisa beto na kuvanda na kundima ti Yehova ke lemvokilaka? Kana masumu yina nge salaka na ntama ke kaka na kwamisaka nge, kanisa na mambu yayi: ‘Yehova zaba ti nge ke muntu ya masumu mpe yandi ke lemvokila bantu yina me balula ntima. Na yawu, kuzimbana ve ti Yehova lemvokilaka nge mpe yandi ke kanisaka dyaka ve na mambu yina nge salaka. Yandi ke semba dyaka ve nge samu na yawu.’ Ya ke vanda ve mbote na nge na kutula makanisi ya nge nyonso na yawu. (Nku. 130:3) Ntangu beto ke vandaka na kundima ti Yehova ke lemvokilaka, ya lenda sadisa beto na kulemvokila beto mosi mpe kukwenda na mantwala.

16. Pesa kifwani yina ke na lakisaka ti ya ke yimbi na kukanisa ntangu nyonso na masumu yina beto salaka na ntama. (Tala mpe kizizi.)

¹⁶ Beto baka kifwani. Kukanisa ntangu nyonso na masumu yina beto salaka na ntama ke mutindu, kutala ntangu nyonso na kitala-tala ntangu beto ke na nataka camion. Kulosa mwa meso na kitala-tala ke ve yimbi samu ti ya lenda sadisa beto na kusala ve accident. Kasi, samu na kukwenda kaka na mantwala beto me fwana kutula makanisi ya beto nyonso na nzila yina beto ke na kwendaka. Mutindu mosi mpe kulosa mwa meso na bafoti yina beto salaka na ntama ke ve yimbi, samu beto lenda longoka na disumu yina beto salaka na ntama. Kasi, kana beto tula kaka meso na masumu yina beto salaka na ntama ya lenda kanga beto nzila ya kusadila Yehova bubu yayi. Na mantwala ya beto ke na nzila. Nzila yayi ke nata beto na yinza ya malu-malu yina Yehova pesaka nsilulu. Kuna beto ke “zimbana mambu nyonso ya ntama yina lutaka.”—Iza. 65:17; Bin. 4:25.

TATAMANA NA KUKUMISA NGOLO KUNDIMA YA NGE

17. Samu na yinki beto me bonga kubika ve na kundimisa ntima ya beto ti Yehova ke zolaka beto mpe yandi ke lemvokilaka?

¹⁷ Beto bika ve na kundimisa ntima ya beto ti Yehova ke zolaka beto mpe yandi ke lemvokilaka. (1 Yoa. 3:19) Samu na yinki? Samu ti dikanisi ya Satana me soba ve. Yandi ke bika ve na kusala yina yandi ke na makoki ya kusala, samu na kunata beto na kukanisa ti Yehova ke zolaka ve beto to yandi lenda lemvokila ve beto. Mpe beto zimbana ve ti kaka ntangu fioti me bikana na yandi. Na yawu, yandi ke sala nyonso samu na kunata beto na kubika kusadila Yehova. (Luz. 12:12) Beto kubwa ve na mutambu ya yandi.

18. Yinki lenda sadisa nge na kuvanda na kundima ti Yehova ke zolaka nge mpe ke lemvokilaka?

¹⁸ Samu na kuvanda na kundima ti Yehova ke zolaka beto, beto lenda sadila bamambu yina beto me tala na disolo yina me luta. Samu na kuvanda na kundima ti Yehova ke lemvokilaka beto, beto me bonga kukanisa na mutindu yandi ke zonzilaka yandi mosi mpe kuyindula na bamambu yina Biblia ke zonzaka na yina me tadila mulemvo ya yandi. Kuzimbana ve, Yehova me zaba mbote-mbote ti beto ke bantu ya masumu mpe yandi ke bakilaka beto na ntima ya kyadi nyonso. Ntangu yandi ke lemvokilaka, yandi ke sembaka dyaka ve beto samu na yawu. Kaka mutindu Davidi yina vanda ya kundima ti Yehova ke na ntima ya kyadi, nge mpe lenda zonza: “Nge me lemvokila yimbi ya munu, nge me fuka disumu ya munu.”—Nku. 32:5.